1, 2. Ko e hā naʻe ʻofa ai ʻa Sīsū ʻia Māʻatá, ka ko e hā ʻa e fehālaaki naʻá ne fai ʻoku hā ai naʻe ʻikai ke ne haohaoa?

 ʻI HE taimi ʻokú ke fakakaukau ai ki he tuofefine ʻo Lāsalosi ko Māʻatá, ʻokú ke sioloto atu ko e tokotaha fēfē ia? ʻOku fakahaaʻi ʻe he Tohi Tapú ko Māʻatá ko ha kaumeʻa lelei ʻaupito ia ʻo Sīsū, pea ʻoku pehē ai naʻá ne ʻofa ʻiate ia. Ko hono moʻoní, naʻe ʻikai ko ia pē ʻa e fefine naʻe ʻofaʻi mo fakaʻapaʻapaʻi ʻe Sīsuú. Ko e fakatātaá, ko e tokoua ʻo Māʻatá, ʻa Mele, ko e toe kaumeʻa ofi ia ʻo Sīsū. Pea naʻe ʻofa ʻa Sīsū ʻi heʻene faʻeé tonu, ʻa Mele. (Sione 11:5; 19:25-27) Ko ia, ko e hā naʻe ʻofa ai ʻa Sīsū ʻia Māʻatá?

² Naʻe ʻofa ʻa Sīsū ʻia Māʻatá koeʻuhí naʻá ne anga-lelei mo nima-homo, pea ko ha tokotaha ngāue mālohi foki ia. Kae hiliō he meʻa kotoa, naʻe ʻofa ʻa Sīsū ʻiate iá koeʻuhí naʻá ne maʻu ʻa e tui mālohi. Naʻá ne tui ki he meʻa kotoa naʻe akoʻi ʻe Sīsuú, pea naʻe ʻikai haʻane veiveiua ko ia ʻa e Mīsaia naʻe talaʻofá. (Sione 11:21-27) Naʻa mo ia, naʻe ʻikai ke haohaoa ʻa Māʻata. Hangē ko e kotoa ʻo kitautolú, naʻá ne fai ʻa e ngaahi fehālaaki. Ko e fakatātaá, ʻi he taimi naʻe ʻaʻahi atu ai ʻa Sīsū kia kinautolú, naʻe loto-mamahi ʻa Māʻata ʻi hono tokouá, ʻa  Mele, peá ne tala ange kia Sīsū naʻe totonu ke ne fakatonutonu ia. “ʻEiki,” ko e lea ia ʻa Māʻatá, “ʻoku ʻikai koā te ke tokanga ki hono tuku toko taha au ʻe hoku tokouá ke u fai ʻa e ngaahi meʻá? Ko ia, tala ange kiate ia ke ne tokoni mai kiate au.” (Lau ʻa e Luke 10:38-42.) Ko e hā naʻe lea pehē ai ʻa Māʻatá, pea ko e hā ʻe lava ke tau ako mei he tali ʻa Sīsū kiate iá?

3, 4. Ko e hā naʻe leleiʻia ai ʻa Sīsū ʻi he meʻa naʻe fai ʻe Melé, pea ko e hā naʻe ako ʻe Māʻatá? (Sio ki he ʻuluaki fakatātā ʻi he kupú ni.)

³ Naʻe houngaʻia ʻa Sīsū ʻi hono fakaafeʻi ia ʻe Māʻata mo Mele ki hona ʻapí, pea naʻá ne loto ke ngāueʻaki ʻa e taimi ko iá ke akoʻi ʻa e moʻoni mahuʻingá kia kinaua. Naʻe tangutu leva ʻa Mele ʻi he tafaʻaki ʻo Sīsuú, ʻo “fanongo ki heʻene leá.” Naʻá ne loto ke ako ʻa e meʻa kotoa te ne malavá mei he Faiako Lahí. Naʻe mei malava foki mo Māʻata ke ne fili ke fanongo kia Sīsū. Pea naʻe mei fakaongoongoleleiʻi ia ʻe Sīsū kapau naʻá ne taʻofi ʻa e meʻa naʻá ne loto ke faí kae tokanga ange kiate ia.

⁴ Ka naʻe hohaʻa ʻa Māʻata. Naʻá ne femoʻuekina ʻi hono teuteu ha meʻakai makehe maʻa Sīsū pea fai mo e ngaahi meʻa kehe ke ne ongoʻi fiemālie ʻi heʻene ʻi aí. ʻI he taimi naʻá ne sio ai naʻe ʻikai ke tokoni ange ʻa Melé, naʻá ne ʻita pea lāunga kia Sīsū. Naʻe ʻiloʻi ʻe Sīsū naʻe feinga ʻa Māʻata ke fai ha fuʻu teuteu lahi, ko ia naʻá ne tala ange anga-ʻofa kiate ia: “Māʻata, Māʻata, ʻokú ke loto-moʻua mo hohaʻatuʻu ki he ngaahi meʻa lahi.” Naʻá ne toe fokotuʻu ange ʻe feʻunga pē ha kiʻi meʻakai siʻisiʻi, mahalo ko ha tisi ʻe taha. Naʻe fakaongoongoleleiʻi leva ʻe Sīsū ʻa Mele ʻi heʻene fanongo tokanga kiate iá. Naʻá ne pehē: “He ko e meʻa kia Melé, naʻá ne fili ʻe ia ʻa e meʻa ʻoku leleí, pea ʻe ʻikai ke ʻave ia meiate ia.” Kuo pau pē naʻe ngalo ʻia Mele ʻa e meʻakai naʻá ne kai ʻi he houa kai ko iá, ka ʻoku ʻikai ha veiveiua naʻe ʻikai ʻaupito ngalo ʻiate ia ʻa e ngaahi meʻa naʻá ne ako meia Sīsuú mo e founga ʻo ʻene fakaongoongoleleiʻi iá. Laka hake ʻi he taʻu ʻe 60 ki mui ai, naʻe tohi ʻe he ʻapositolo ko Sioné: “Naʻe ʻofa foki ʻa Sīsū ʻia Māʻata, mo hono tokouá.” (Sione 11:5) ʻOku fakahaaʻi ʻi he ngaahi lea ko ení naʻe tali ʻe Māʻata ʻa e ngaahi fakatonutonu anga-ʻofa ʻa Sīsuú pea tauhi faitōnunga kia Sihova ʻi he toenga ʻo ʻene moʻuí.

5. Ko e hā ʻoku mātuʻaki faingataʻa ai he ʻahó ni ke nofoʻaki tokangataha ki he meʻa ʻoku mahuʻinga angé, pea ko e hā ʻa e fehuʻi te tau talí?

⁵ ʻOku tau ʻiloʻi ʻoku lahi ange ʻa e ngaahi meʻa ia ʻi he ʻahó ni ʻe lava ke ne fakahohaʻasi kitautolu mei heʻetau tauhi kia Sihová ʻi he ngaahi taimi ʻo e Tohi Tapú. Naʻe fakatokanga ʻi he ʻīsiu ʻo e Watchtower ʻo Sepitema 15, 1958 ki he fanga tokouá mo e fanga tuofāfiné ke ʻoua te nau fakaʻatā ʻa e tekinolosiá ke ne fakahohaʻasi kinautolu mei heʻenau tauhi kia Sihová. Naʻa mo e taimi ko iá, ko e ʻaho kotoa pē naʻe ʻi ai nai ʻa e meʻa foʻou. Ko e ngaahi meʻa hangē ko e makasini fakatauelé, letioó, faivá mo e televīsoné naʻe hoko ia ʻo mātuʻaki manakoa. Naʻe pehē ʻi he Watchtower ʻi heʻetau ofi ange ki he ngataʻanga ʻo e fokotuʻutuʻu ko ení, “ngalingali ʻe fakautuutu ange ʻa e ngaahi fakahohaʻá.” ʻI he ʻahó ni, laka ange ʻi ha toe taimi ki muʻa, ʻoku toe lahi ange ʻa e ngaahi meʻa ʻe lava ke ne fakahohaʻasi kitautolú. Ko e hā ʻe lava ke tau fai ke tau hangē ai ko Melé ʻo nofoʻaki tokangataha ki he lotu kia Sihová?

6. Kuo anga-fēfē hono ngāueʻaki ʻe he kakai ʻa Sihová ʻa e tekinolosiá?

⁶ Kuo ngāueʻaki ʻe he kakai ʻa Sihová ʻa e tekinolosia ʻo e māmaní ke malangaʻi ʻa e ongoongo leleí. Ko e fakatātaá, ki muʻa mo e lolotonga ʻa e tau ʻuluaki ʻa māmaní, naʻa nau huluʻi ai ʻa e “Tulama-ʻAta ʻo e Fakatupú.” ʻI hono ngāueʻaki ʻa e ngaahi silaiti mo e faiva nounou ʻoku fakalanu mo lea, naʻa nau malanga ai ki he kakai ʻe laui miliona ʻi he ngaahi fonua lahi. ʻI he ngataʻanga ʻo e “Tulama-ʻAta” naʻe fakamatalaʻi ai ʻa e taimi ʻe nonga ai ʻa e māmaní ʻi he pule mai ʻa Sīsū Kalaisí. Ki mui ai, naʻe ngāueʻaki ʻe he kakai ʻa Sihová  ʻa e letioó ke fakamafola ai ʻa e pōpoaki ʻo e Puleʻangá ki he laui miliona takatakai ʻi he māmaní. ʻI he ʻahó ni, ʻoku tau ngāueʻaki ʻa e komipiutá mo e ʻInitanetí ke aʻu ai ki he kakai ʻi ha feituʻu pē ʻoku nau ʻi ai, naʻa mo e ngaahi feituʻu tuʻu mavahé.

7. (a) Ko e hā ʻoku fakatuʻutāmaki ai ke ngāueʻaki ʻa e māmaní ke ʻosikí? (e) Ko e hā ʻoku totonu ke tau mātuʻaki tokanga ki aí? (Sio ki he fakamatala ʻi laló.)

⁷ ʻOku fakatokanga mai ʻa e Tohi Tapú ke ʻoua te tau ngāueʻaki ʻa e māmaní ke ʻosiki. ʻOku kau heni hono fakamoleki ʻa e taimi lahi ʻaupito ʻi he ngaahi meʻa ʻoku tuʻuaki mai ʻe he māmaní. (Lau ʻa e 1 Kolinitō 7:29-31.) ʻOku ʻikai ke hala ʻa e ngaahi meʻa ʻe niʻihi ko ení, ka ʻe lava ke mole lahi ai hotau taimí. Ko e fakatātaá, ʻoku tau fiefia nai ʻi he ngaahi meʻa ʻoku tau saiʻia aí, lautohi, sio televīsone, ʻaʻahi ki he ngaahi feituʻu manakoa, fai ha fakatau mo kumi ki he ngaahi meʻa fakaʻilekitulōnika fakamuimui tahá pe kumi ki he moʻui fiemālie tahá. ʻOku saiʻia ʻa e tokolahi ke talanoa ʻi he ʻinitanetí, feʻaveʻaki pōpoaki ʻi he telefoni toʻotoʻó mo e ʻīmeilí, pe vakaiʻi maʻu pē ʻa e ongoongó pe ola ʻo e ngaahi sipotí. Ka ʻe lava ke maʻunimā ʻa e niʻihi ʻi hono fai ʻa e ngaahi meʻa ko ení. a (Koh. 3:1, 6) Kapau te tau fakamoleki ʻa e taimi lahi ʻi he ngaahi meʻa ʻoku ʻikai fuʻu mahuʻingá, heʻikai nai ke tau tokangataha ai ki he meʻa ʻoku mahuʻinga tahá, ʻa ʻetau lotu kia Sihová.—Lau ʻa e ʻEfesō 5:15-17.

8. Ko e hā ʻoku mātuʻaki mahuʻinga ai ke ʻoua te tau ʻofa ki he ngaahi meʻa ʻi he māmaní?

⁸ ʻOku fai ʻe Sētane ʻa e meʻa kotoa te ne malavá ke tohoakiʻi ai kitautolu ki he ngaahi meʻa ʻi hono māmaní pea fakahohaʻasi ʻetau tauhi kia Sihová. Naʻe fai eni ʻe Sētane ʻi he ʻuluaki senitulí, pea ʻokú ne fai eni ʻo toe lahi ange ʻi he ʻahó ni. (2 Tīm. 4:10) Ko ia ʻoku totonu ke tau sivisiviʻi maʻu pē ʻa e anga ʻetau ongoʻi fekauʻaki mo e ngaahi meʻa ʻi he māmaní pea fai ha ngaahi fengaʻunuʻaki ʻo ka fiemaʻu. ʻOku tala mai ʻe Tohi Tapú kuo pau ke ʻoua te tau ʻofa ki he ngaahi meʻa ʻi he māmaní. ʻI hono kehé, kuo pau ke tau tauhi ke mālohi ʻetau ʻofa kia Sihová. Kapau te tau fai ia, ʻe faingofua ange ai ke tau talangofua kia Sihova pea nofoʻaki ofi kiate ia.—1 Sio. 2:15-17.

9. Ko e hā naʻe akoʻi ʻe Sīsū ki heʻene kau ākongá ke nau tokangataha ki aí, pea naʻe anga-fēfē ʻene fokotuʻu ʻa e faʻifaʻitakiʻangá?

⁹ Hangē pē ko e akoʻi anga-ʻofa ʻe Sīsū ʻa Māʻata ke ʻoua ʻe fakahohaʻasi ʻe he ngaahi meʻa lahi, naʻá ne akoʻi ki heʻene kau ākongá ʻa e lēsoni tatau. Naʻá ne fakalototoʻaʻi kinautolu ke nau hanganaki tokangataha ki he tauhi kia Sihová mo  hono Puleʻangá. (Lau ʻa e Mātiu 6:22, 33.) Naʻe fokotuʻu ʻe Sīsū tonu ha faʻifaʻitakiʻanga lelei ʻaupito. Naʻe ʻikai ke ne maʻu ha ngaahi meʻa lahi, pea naʻe ʻikai hano fale pe kelekele.—Luke 9:58; 19:33-35.

10. Ko e hā ʻa e faʻifaʻitakiʻanga lelei naʻe fokotuʻu ʻe Sīsū maʻa kitautolú?

¹⁰ Naʻe ʻikai tuku ʻe Sīsū ha meʻa ke ne fakahohaʻasi ia mei he ngāue fakamalangá. Ko e fakatātaá, ʻikai fuoloa mei heʻene kamata ʻa e ngāue fakamalangá, naʻe loto ʻa e fuʻu kakai ʻi Kāpaneumé ke fakamoleki ʻe Sīsū ʻa e taimi lahi ange ʻi honau koló. Ko e hā naʻá ne faí? Naʻá ne nofoʻaki tokangataha ki heʻene ngāué. Naʻá ne pehē: “Kuo pau ke u talaki ʻa e ongoongo lelei ʻo e Puleʻanga ʻo e ʻOtuá ki he ngaahi kolo kehé foki, koeʻuhi ko e meʻa ʻeni naʻe fekauʻi mai ai aú.” (Luke 4:42-44) Naʻe fononga ʻa Sīsū ki he ngaahi feituʻu mamaʻó ke malangaʻi ʻa e ongoongo leleí pea akoʻi ʻa e tokolahi taha ʻe ala lavá. Ko ha tangata haohaoa ia, ka naʻá ne kei helaʻia pē mo fiemaʻu ke mālōlō koeʻuhí naʻá ne ngāue mālohi ʻaupito.—Luke 8:23; Sione 4:6.

11. Ko e hā naʻe fai ʻe Sīsū ʻi he taimi naʻe kole ange ai ʻe ha tangata fekauʻaki mo ʻene palopalema fakafoʻituituí? Ko e hā ʻa e lēsoni naʻe akoʻi ʻe Sīsū ki heʻene kau ākongá?

¹¹ Ki mui ai, ʻi he taimi naʻe akoʻi ai ʻe Sīsū ha lēsoni mahuʻinga ki heʻene kau ākongá, naʻe lea atu ha tangata ʻo ne pehē: “Faiako, tala ange ki hoku tokouá ke ma vahevahe mo au ʻa e koloa tukufakaholó.” Naʻe ʻikai feinga ʻa Sīsū ke fakaleleiʻi ʻa e palopalema fakafoʻituitui ʻa e tangata ko ení. Naʻe ʻikai fakahohaʻasi ia mei hono akoʻi ʻene kau ākongá. Ko hono moʻoní, naʻá ne ngāueʻaki ʻa e faingamālie ko ení ke akoʻi kinautolu kapau te nau tokangataha ki hono maʻu ha ngaahi meʻa lahi ange, ʻe lava ke fakahohaʻasi ai kinautolu mei he tauhi ki he ʻOtuá.—Luke 12:13-15.

12, 13. (a) Ko e hā naʻe fai ʻe Sīsū naʻe ʻohovale ai ʻa e kau Kalisi ʻe niʻihi ʻi Selusalemá? (e) Ko e hā ʻa e tali ʻa Sīsū ʻi he kole ange ʻe Filipe ke ne feʻiloaki mo e kakai ko iá?

¹² Ko e ngaahi ʻaho fakaʻosi ʻo e moʻui ʻa Sīsū ko ha tangatá naʻe faingataʻa ʻaupito. (Māt. 26:38; Sione 12:27) Naʻá ne ʻiloʻi ʻe pau ke ne faingataʻaʻia ʻaupito pea pekia. Naʻá ne toe ʻiloʻi naʻe ʻi ai ʻa e ngāue lahi ke fai ki muʻa ke ne pekiá. Ko e fakatātaá, ʻi he Sāpate ʻo Nīsani 9, naʻe heka atu ʻa Sīsū ki Selusalema ʻi ha ʻasi. Naʻe talitali lelei ia ʻe he fuʻu kakaí ko honau Tuʻi. (Luke 19:38) ʻI he ʻaho hokó, naʻá ne loto-toʻa ʻo laku ki tuʻa mei he temipalé ʻa e kau tangata mānumanú ʻa ia naʻa nau fakatau atu ʻa e ngaahi meʻá ʻi he totongi mamafa ʻo nau kaihaʻa ai mei he kakaí.—Luke 19:45, 46.

¹³ Ko e kau Kalisi ʻe niʻihi, ʻa ia naʻa nau haʻu ki Selusalema ke kātoangaʻi ʻa e Pāsová, naʻa nau sio ʻi he meʻa naʻe fai ʻe Sīsuú pea nau ʻohovale. Ko ia naʻa nau kole ki he ʻapositolo ko Filipé pe ʻe lava ke nau feʻiloaki mo Sīsū. Ka naʻe ʻikai ke feinga ʻa Sīsū ke kumi ki he kakai ʻoku nau poupouʻi mo maluʻi ia mei hono ngaahi filí. Naʻá ne ʻilo ʻa e meʻa naʻe mahuʻinga angé. Naʻá ne hanganaki tokangataha ke ne fai ʻa e finangalo ʻo Sihová, ʻa ia ko e foaki ʻene moʻuí ko ha feilaulau. Ko ia naʻá ne fakamanatu ki heʻene kau ākongá ʻe vave ke ne pekia pea ko e faʻahinga kotoa ʻoku muimui kiate ia kuo pau ke nau loto-lelei ke nau toe feilaulauʻi ʻenau moʻuí. Naʻá ne pehē: “Ko ia ʻokú ne ʻofa ki heʻene moʻuí ʻokú ne fakaʻauha ia, ka ko ia ʻokú ne fehiʻa ki heʻene moʻuí ʻi he māmani ko ení te ne haofaki atu ia ki he moʻui taʻengatá.” Ka naʻe toe talaʻofa ʻe Sīsū ‘ʻe fakalāngilangiʻi ʻe he Tamaí’ hono kau muimuí pea ʻoange kia kinautolu ʻa e moʻui taʻengatá. Naʻe malava ke ʻoange ʻe Filipe ki he kau Kalisi ko iá ʻa e pōpoaki fakalototoʻa ko ení.—Sione 12:20-26.

14. Neongo naʻe fakamuʻomuʻa ʻe Sīsū ʻi heʻene moʻuí ʻa e ngāue fakamalangá, ko e hā naʻá ne fakapapauʻi ke faí?

¹⁴ ʻI he taimi naʻe ʻi māmani ai ʻa Sīsuú, ko ʻene ngāue tefitó ko hono malangaʻi ʻa e ongoongo leleí. Neongo naʻá ne tokangataha ki heʻene ngāue fakamalangá, naʻe ʻikai ke ne fakakaukau maʻu pē ki ai. Ko e fakatātaá, naʻá ne ʻalu ki ha mali, ʻa ia naʻá ne liliu ai ʻa e vaí ki ha uaine lelei  ʻaupito. (Sione 2:2, 6-10) Naʻá ne toe kai foki ʻi he ʻapi ʻo hono ngaahi kaumeʻá mo e niʻihi kehe naʻa nau mahuʻingaʻia ʻi he ongoongo leleí. (Luke 5:29; Sione 12:2) Ko e mahuʻinga angé, naʻe vaheʻi maʻu pē ʻe Sīsū ʻa e taimi ke lotu, fakalaulauloto mo mālōlō.—Māt. 14:23; Mk. 1:35; 6:31, 32.

15. Ko e hā naʻe leaʻaki ʻe he ʻapositolo ko Paulá ʻoku fiemaʻu ke fai ʻe he kau Kalisitiané, pea naʻe anga-fēfē ʻene fokotuʻu ha faʻifaʻitakiʻanga leleí?

¹⁵ Naʻe pehē ʻe he ʻapositolo ko Paulá ko e kau Kalisitiané ʻoku nau hangē ha kau lele ʻi ha lova lōloa, pea ke ʻosiki ʻa e lová, kuo pau ke nau toʻo atu ha meʻa pē ʻe lava ke ne fakamāmālieʻi kinautolu pe taʻofi kinautolu. (Lau ʻa e Hepelū 12:1.) Naʻe fokotuʻu ʻe Paula tonu ha faʻifaʻitakiʻanga lelei. Naʻá ne mei tuʻumālie mo ongoongoa ʻi he tuʻunga ko ha taki lotu Siu, ka naʻá ne tukuange ʻa e ngāue ko iá kae tokangataha ki he “ngaahi meʻa ʻoku mahuʻinga angé.” Naʻá ne ngāue mālohi ʻi he ngāue fakamalangá pea fononga ki he ngaahi feituʻu lahi, kau ai ʻa Sīlia, ʻĒsia Maina, Masitōnia mo Siutea. Naʻe fakatuʻotuʻa atu ʻa Paula ki hono pale ko e moʻui taʻengata ʻi hēvani. Naʻá ne pehē: “ʻI hono fakangaloʻi ʻa e ngaahi meʻa ʻi muí pea mafao atu ki he ngaahi meʻa ʻi muʻá, ʻoku ou tutui atu ki he taumuʻa ko ia ke maʻu ʻa e pale.” (Fil. 1:10; 3:8, 13, 14) Naʻe ʻikai ke mali ʻa Paula, pea naʻe tokoni ia ke ne ‘līʻoa maʻu pē ki he ʻEikí ʻo taʻeʻiai ha fakahohaʻa.’—1 Kol. 7:32-35.

16, 17. Tatau ai pē pe ʻoku tau mali pe ʻikai, ʻe lava fēfē ke tau muimui ki he faʻifaʻitakiʻanga ʻa Paulá? Naʻe anga-fēfē hono fai eni ʻe Mark mo Claire?

¹⁶ Hangē ko Paulá, ʻoku fili ʻa e kau sevāniti ʻe niʻihi ʻa Sihova he ʻahó ni ke ʻoua ʻe mali koeʻuhí kae lava ke nau fai ha meʻa lahi ange ʻi he ngāue ʻa Sihová. (Māt. 19:11, 12) Ko e kakai taʻemalí ʻoku faʻa siʻisiʻi ange honau ngaahi fatongia fakafāmilí ʻi he kakai malí. Kae tatau ai pē pe ʻoku tau mali pe ʻikai, ko kitautolu kotoa ʻe lava ke tau ‘liʻaki atu ʻa e fakamamafa kotoa pē’ ʻa ia ʻe lava ke ne fakahohaʻasi kitautolu mei he tauhi kia Sihová. ʻE fiemaʻu nai ke liliu ʻetau ngaahi tōʻongá koeʻuhi ke tau fakaʻehiʻehi ai mei hano fakamoleki noa ʻa e taimí kae malava ke fai ha meʻa lahi ange ʻi he ngāue ʻa Sihová.

¹⁷ Ko e fakatātaá, ko Mark mo Claire, ʻa ia naʻá na tupu hake ʻi Uēlesi, naʻá na kamata tāimuʻa ʻi heʻena ʻosi pē mei he akó. Hili ʻena malí, naʻá na hokohoko atu ʻena tāimuʻá. Ka naʻá na loto ke fai ha meʻa lahi ange. ʻOku fakamatala ʻa Mark: “Naʻe malava ke ma fakafaingofuaʻi ange ʻema moʻuí ʻaki hono tukuange homa ʻapi loki tolú mo ʻema ngāue konga-taimí kae lava ke ma kau ki he ngāue langa fakavahaʻapuleʻangá.” ʻI he taʻu ʻe 20 kuohilí, kuó na fononga ki he konga lahi ʻo ʻAfilika ke tokoni ki he langa ʻo e ngaahi Fale Fakatahaʻangá. ʻI he taimi ʻe niʻihi naʻe siʻisiʻi ʻaupito ʻena paʻangá, ka naʻe tokangaʻi maʻu pē kinaua ʻe Sihova. ʻOku pehē ʻe Claire: “ʻOkú ma maʻu ʻa e fiemālie lahi ʻi he ʻaho kotoa ʻi he ngāue kia Sihová. Kuó ma maʻu ʻa e ngaahi kaumeʻa tokolahi ʻaupito ʻi he feituʻu pē naʻá ma ʻi aí, pea ʻoku ʻikai ke ma masiva ʻi ha meʻa. Ko e kiʻi meʻa fakamatelie naʻá ma tukuange atú ʻoku ʻikai lava ke fakahoa ia ki he fiefia ʻokú ma maʻu mei he tauhi taimi-kakato kia Sihová.” ʻOku ongoʻi pehē ʻa e kau sevāniti taimi-kakato tokolahi. b

18. Ko e hā ʻa e ngaahi fehuʻi ʻe lava ke tau ʻeke hifo kia kitautolú?

¹⁸ ʻOkú ke ongoʻi ʻe lava ke ke faivelenga ange ʻi hoʻo tauhi kia Sihová? ʻOku ʻi ai ha ngaahi meʻa ʻokú ne fakahohaʻasi koe mei hono fai ʻa e meʻa ʻoku mahuʻinga angé? Kapau ko ia, ko e hā ʻe lava ke ke faí? Mahalo pē ʻe lava ke ke fakaleleiʻi ʻa e founga hoʻo lau mo ako ʻa e Tohi Tapú. ʻE fakamatalaʻi ʻi he kupu hoko maí ʻa e founga ʻe lava ke ke fai ai iá.