1. ʻOku mahuʻinga fēfē ʻa e tuí? (Sio ki he ʻuluaki fakatātā ʻi he kupú ni.)

 KUO faifai ange peá ke ʻeke hifo, ‘ʻE finangalo ʻa Sihova ke fakahaofi au lolotonga ʻa e fuʻu mamahi lahí?’ Naʻe pehē ʻe he ʻapositolo ko Paulá ʻoku fiemaʻu kiate kitautolu ʻa e ʻulungaanga mātuʻaki mahuʻinga ʻe taha koeʻuhí ke tau haó ko e tuí. Naʻá ne pehē: “I he ʻikai kau ʻa e tuí ʻoku ʻikai malava ke fakahōifuaʻi lelei ʻa e ʻOtuá.” (Hep. 11:6) ʻE ongo maʻamaʻa nai ia, ka ko hono moʻoní “ko e tuí ʻoku ʻikai ko ha meʻa ia ʻa e kakai kotoa pē.” (2 Tes. 3:2) ʻOku tokoniʻi kitautolu ʻe he ongo konga Tohi Tapu ko ení ke tau mahinoʻi ʻa e mahuʻinga ke fakaivimālohiʻi ʻetau tuí.

2, 3. (a) ʻOku mahuʻinga fēfē ʻetau tuí? (e) Ko e hā te tau lāulea ki ai he taimi ní?

² Naʻe lave ʻa e ʻapositolo ko Pitá fekauʻaki mo hono ‘siviʻi’ ʻa e tuí. (Lau ʻa e 1 Pita 1:7.) ʻOku ofi ʻaupito ʻa e fuʻu mamahi lahí, pea ʻoku fiemaʻu ke tau hoko “ko e faʻahinga kitautolu ʻoku tau maʻu ʻa e tuí, ʻa ia ʻoku taki atu ki hono fakahaofi ʻo ʻetau moʻuí.” (Hep. 10:39) Ko ia ʻoku fiemaʻu ke tau ngāue mālohi ke fakaivimālohiʻi ʻetau tuí. ʻOku tau fiemaʻu ke ʻi he lotolotonga ʻo e faʻahinga ʻe fakapaleʻi ʻi he taimi ʻe hā mai ai ʻa Sīsū Kalaisi, ko hotau Tuʻí. Ko ia, hangē ko e tangata naʻe kōlenga kia Sīsū ki ha tui lahi angé, te tau pehē foki mo kitautolu: “Tokoniʻi muʻa au ʻi he tafaʻaki ʻoku vaivai ai ʻeku tuí!” (Mk. 9:24) Pe hangē ko e kau ʻapositoló, te tau toe pehē nai: “ʻOmi kiate kimautolu ha tui lahi ange.”—Luke 17:5.

³ ʻI he kupu ko ení, te tau lāulea ai ki he ngaahi poini ko ení: founga  ʻe lava ke langa hake ai ʻetau tuí, founga ʻe lava ke tau fakahāhā ai ʻoku mālohi ʻetau tuí, mo e ʻuhinga ʻe lava ke tau fakapapauʻi ai ʻe tali ʻe he ʻOtuá ʻetau kole ki ha tui lahi angé.

4. Ko e faʻifaʻitakiʻanga ʻa hai ʻe lava ke ne ueʻi kitautolu ke fakaivimālohiʻi ʻetau tuí?

⁴ Koeʻuhí ko e mātuʻaki mahuʻinga ʻa e tuí, kuo ʻomai ai ʻe Sihova ʻi he Tohi Tapú ʻa e ngaahi faʻifaʻitakiʻanga lahi ʻo e tuí. Ko e ngaahi faʻifaʻitakiʻanga ko ení “naʻe tohi ko hotau fakahinohino.” (Loma 15:4) Ko e faʻifaʻitakiʻanga ʻa ʻĒpalahame, Sela, ʻAisake, Sēkope, Mōsese, Lēhapi, Kitione, Pēlaki mo e niʻihi tokolahi ʻe lava ke ne ueʻi kitautolu ke fakaivimālohiʻi tonu ʻetau tuí. (Hep. 11:32-35) Tānaki atu ki he ngaahi faʻifaʻitakiʻanga mei he kuohilí, ʻoku tau toe maʻu ʻa e ngaahi faʻifaʻitakiʻanga fakaofo ʻo e tuí ʻi he lotolotonga hotau fanga tokoua mo e fanga tuofāfine ʻi he ʻaho ní. a

5. Naʻe anga-fēfē hono fakahaaʻi ʻe ʻIlaisiā ʻene tui mālohi kia Sihová, pea ko e hā ʻoku totonu ke tau ʻeke hifo kia kitautolú?

⁵ Ko ha faʻifaʻitakiʻanga mei he Tohi Tapú ko e palōfita ko ʻIlaisiaá. ʻI hoʻo fakalaulauloto ki heʻene faʻifaʻitakiʻangá, fakatokangaʻi ʻa e tafaʻaki ʻe nima naʻá ne fakahāhā ai ʻa e mālohi ʻene falala kia Sihová. (1) ʻI he taimi naʻe tala ai ʻe ʻIlaisiā kia Tuʻi ʻĒhapi ʻe ʻomai ʻe Sihova ha laʻalaʻaá, naʻá ne fakahaaʻi ange ʻi he falala-pau: “Oku moui a Jihova koe Otua o Isileli, aia oku ou tuu ni i hono ao, bea e ikai ha hahau be ha uha i he gaahi taʻu ni.” (1 Tuʻi 17:1, PM) (2) Naʻe tui ʻa ʻIlaisiā ʻe ʻoange ʻe Sihova kiate ia mo e niʻihi kehé ʻenau ngaahi fiemaʻú lolotonga ʻa e laʻalaʻaá. (1 Tuʻi 17:4, 5, 13, 14) (3) Naʻe toe fakapapauʻi ʻe ʻIlaisiā ʻe fokotuʻu hake ʻe Sihova ʻa e foha ʻo e uitoú. (1 Tuʻi 17:21) (4) Naʻe ʻikai haʻane veiveiua ʻe keina ʻe he afi ʻa Sihová ʻene feilaulau ʻi Moʻunga Kāmelí. (1 Tuʻi 18:24, 37) (5) Naʻa mo e ki muʻa ke tō hifo ʻa e ʻuhá, naʻe fakapapauʻi ange ʻe ʻIlaisiā kia ʻĒhapi: “Meʻa hake, ʻo fai hoʻo taumafa; he ʻoku ngahaha mai ha fuʻufuʻunga ʻuha.” (1 Tuʻi 18:41) ʻI he hili ʻa e lāulea ki he ngaahi hokosia ko ení, ʻe lava ke tau ʻeke hifo, ‘ʻOku mālohi ʻeku tuí ʻo hangē ko ʻIlaisiaá?’

6. Ko e hā ʻoku fiemaʻu meia Sihova ke langa hake ai ʻetau tuí?

⁶ Koeʻuhí ʻoku ʻikai lava ke tau langa hake ʻetau tuí ʻia kitautolu pē ʻoku fiemaʻu ke tau kole ʻa e laumālie māʻoniʻoni ʻo e ʻOtuá. Ko e hā hono ʻuhingá? Koeʻuhí ko e tuí ko e konga ia ʻo e fua ʻo e laumālie māʻoniʻoní. (Kal. 5:22) ʻOku tau hoko ai ʻo fakapotopoto ʻi he muimui ki he akonaki ʻa Sīsuú ke lotu ke maʻu ha laumālie māʻoniʻoni lahi ange. Naʻe talaʻofa ʻe Sīsū ʻe hanga ʻe Sihova ʻo “foaki ʻa e laumālie māʻoniʻoní ki he faʻahinga ʻoku kole kiate iá.”—Luke 11:13.

7. Fakamatalaʻi ʻa e founga ʻe lava ke tau ʻai ai ke mālohi ʻetau tuí.

⁷ ʻI heʻetau maʻu pē ʻa e tui mālohi ki he ʻOtuá, kuo pau ke tau tauhi maʻu ia. ʻE lava ke tau fakahoa ʻa e tuí ki ha afi. ʻI heʻetau tutu ha afi, ʻe lava ke mālohi ʻaupito ʻene uló. Kae kehe, kapau heʻikai ke tau toloʻaki ha fefie ʻa e afí, ʻe faifai atu pē ʻo mate pea hoko ʻo efuefu. Ka ʻo kapau te tau tolo maʻu pē ʻa e afí, ʻe lava ke tau ʻai ia ke ulo maʻu pē. ʻOku tatau ia mo ʻetau tuí. Kapau te tau hokohoko atu hono lau mo ako ʻa e Folofola ʻa e ʻOtuá ʻi he ʻaho kotoa pē, ʻe tupulaki ʻetau ʻofa kia Sihová mo e Tohi Tapú. Ko hono olá, te tau tauhi maʻu mo fakaivimālohiʻi ai ʻetau tuí.

8. Ko e hā te ne tokoniʻi koe ke langa hake mo tauhi maʻu hoʻo tuí?

 ⁸ Kuo pau ke ʻoua te ke fiemālie pē ʻi he ngaahi meʻa naʻá ke ako ki muʻa peá ke papitaisó. (Hep. 6:1, 2) Ko e fakatātaá, ko hono ako ʻa e ngaahi kikite kuo ʻosi fakahokó ʻe tokoniʻi ai koe ke langa hake mo tauhi maʻu hoʻo tuí. ʻE lava ke ke toe ngāueʻaki ʻa e Folofola ʻa e ʻOtuá ke sio pe ʻoku mālohi moʻoni hoʻo tuí.—Lau ʻa e Sēmisi 1:25; 2:24, 26.

9, 10. ʻOku anga-fēfē hono fakaivimālohiʻi ʻetau tuí ʻe he (a) ngaahi kaumeʻa leleí? (e) ngaahi fakataha ʻa e fakatahaʻangá? (f) ngāue fakamalangá?

⁹ Naʻe pehē ʻe he ʻapositolo ko Paulá ʻe lava ʻa e kau Kalisitiané ke nau ‘fefakalototoʻaʻaki ʻi honau lotolotongá, ʻa e tokotaha taki taha fakafou ʻi he tui ʻa e tokotaha ko ē.’ (Loma 1:12) ʻOku ʻuhinga ia ki he hā? ʻI he taimi ʻoku tau fakamoleki ai ʻa e taimi mo hotau fanga tokouá mo e fanga tuofāfiné, ʻe lava ke tau tauʻaki fakaivimālohiʻi ai ʻetau tuí. ʻOku moʻoni eni tautefito ʻi he taimi ʻoku tau feohi ai mo e faʻahinga kuo ‘siviʻi’ ʻenau tuí. (Sēm. 1:3) Ko e ngaahi kaumeʻa koví te nau fakaʻauha ʻetau tuí, ka ko e ngaahi kaumeʻa leleí te nau langa hake ia. (1 Kol. 15:33) Ko e ʻuhinga ia ʻoku faleʻi mai ai ke tau maʻu maʻu pē ʻa e ngaahi fakatahá. ʻI aí, ʻe lava ke tau hanganaki “fefakalototoʻaʻaki.” (Lau ʻa e Hepelū 10:24, 25.) Tānaki atu ki ai, ko e fakahinohino ʻoku tau maʻu ʻi he ngaahi fakatahá ʻoku fakaivimālohiʻi ai ʻetau tuí. ʻOku pehē ʻe he Tohi Tapú “ko e tuí ʻoku muimui mai ia ʻi he meʻa ʻoku fanongoá.” (Loma 10:17) Ko ia ʻeke hifo kiate koe, ‘ʻOku hoko ʻa e ngaahi fakataha faka-Kalisitiané ko e konga tuʻumaʻu ia ʻeku moʻui?’

¹⁰ ʻOku tau toe fakaivimālohiʻi ʻetau tuí ʻi he taimi ʻoku tau malanga mo akoʻi ai ʻa e niʻihi kehé ʻaki ʻa e ongoongo lelei mei he Tohi Tapú. Hangē ko e muʻaki kau Kalisitiané, ʻoku tau ako ke falala kia Sihova pea lea loto-toʻa ʻi ha faʻahinga tuʻunga pē.—Ngā. 4:17-20; 13:46.

11. Ko e hā naʻe mālohi ai ʻa e tui ʻa Kēlepi mo Siosiuá, pea ʻe lava fēfē ke tau hangē ko kinauá?

¹¹ ʻOku tupulaki ʻetau tui kia Sihová ʻi he taimi ʻoku tau sio ai ki he anga ʻo ʻene tokoniʻi kitautolú mo e founga ʻokú ne tali ai ʻetau ngaahi lotú. Ko e meʻa ia naʻe hoko kia Kēlepi mo Siosiuá. Naʻá na fakahāhā ʻa e tui kia Sihova ʻi heʻena asiasi ʻi he Fonua ʻo e Talaʻofá. ʻI he faai atu ʻa e taimí, naʻe hoko ʻo mālohi ange ʻena tuí ʻi he taimi kotoa pē naʻá na sio ai ki hono tokoniʻi kinaua ʻe Sihová. Naʻe lava ke tala ange ʻe Siosiua ki he kau ʻIsilelí ʻi he falala-pau: “Kuo ʻikai to kelekele ha momoʻi meʻa ʻe taha ʻi he ngaahi lelei fuape naʻe talaʻofa ʻe Sihova ko homou ʻOtua maʻamoutolu.” Naʻá ne toe lea ki mui ai: “Bea koeni, mou manavahe kia Jihova, bea tauhi ia i he agatonu moe mooni.” Naʻá ne tānaki mai leva: “Ko au mo hoku fale te mau tauhi a Jihova.” (Sios. 23:14; 24:14, 15, PM) ʻI heʻetau falala kia Sihova pea sio ki heʻene tokoniʻi fakafoʻituitui kitautolú, ʻe hoko ʻo mālohi ange ai ʻetau tuí.—Saame 34:8.

12. ʻOku anga-fēfē ʻetau fakahāhā ʻoku mālohi ʻetau tuí?

¹² ʻOku anga-fēfē ʻetau fakahāhā ʻoku mālohi ʻetau tuí? Naʻe pehē ʻe he ākonga ko Sēmisí: “Te u fakahā atu ʻeku tuí ʻaki ʻeku ngaahi ngāué.” (Sēm. 2:18) Ko ʻetau ngaahi ngāué ʻoku fakahāhā ai ʻa e mālohi ʻetau tuí. Tau sio angé pe ʻoku founga fēfē.

13. ʻOku anga-fēfē hono fakahāhā ʻetau tuí ʻi heʻetau kau ki he ngāue fakamalangá?

¹³ Ko e ngāue fakamalangá ko e founga lelei ʻaupito ia ke fakahāhā ai ʻetau tuí. Ko e hā hono ʻuhingá? Koeʻuhí ʻi he taimi ʻoku tau malanga aí, ʻoku fakahāhā ai ʻetau tui ʻoku ofi ʻa e ngataʻangá pea “ʻe ʻikai tuai”! (Hap. 2:3) Ke ʻiloʻi pe ʻoku mālohi ʻetau tuí, ʻe lava ke tau ʻeke hifo kia kitautolu: ‘ʻOku mahuʻinga fēfē kiate au ʻa e ngāue fakamalangá? ʻOku ou fai ʻa e meʻa kotoa te u malavá ke tala ki he niʻihi  kehé ʻa e ʻOtuá? ʻOku ou kumi ki ha ngaahi founga ke fakalahi ai ʻeku ngāue kia Sihová?’ (2 Kol. 13:5) Tau fakahāhā ʻa e mālohi ʻetau tuí ʻaki ʻa e “talaki fakahāhaá ke maʻu ai ʻa e fakamoʻuí,” ʻa ia ko hono malangaʻi ʻa e ongoongo leleí.—Lau ʻa e Loma 10:10.

14, 15. (a) ʻE lava fēfē ke tau fakahāhā ʻa e tuí ʻi heʻetau moʻui fakaʻahó? (e) Lave ki ha hokosia ʻoku fakahaaʻi ai ʻa e tui mālohí.

¹⁴ ʻOku tau toe fakahāhā ʻetau tui kia Sihová ʻi heʻetau kātekina ʻa e ngaahi faingataʻa ʻo e moʻui ʻi he māmani ko ení. ʻI he taimi ʻoku tau puke ai, loto-siʻi, loto-mafasia, masiva, pe maʻu ha palopalema kehe, kuo pau ke tau tui kia Sihova mo Sīsū te na “tokoniʻi kitautolu ʻi he taimi totonú.” (Hep. 4:16) ʻOku tau fakahāhā ʻa e tui kia Sihová ʻi he taimi ʻoku tau kole tokoni ai kiate iá. Naʻe pehē ʻe Sīsū ʻe lava ke tau kole kia Sihova ke ne ʻomai haʻatau ‘mā ʻo fakatatau ki he fiemaʻu ʻo e ʻaho ko ení.’ (Luke 11:3) Ko e ngaahi fakamatala ʻi he Tohi Tapú ʻoku fakamoʻoniʻi ai ʻe lava ke ʻomai ʻe Sihova ha meʻa pē ʻoku tau fiemaʻu. Ko e fakatātaá, lolotonga ha laʻalaʻā lahi ʻi ʻIsileli, naʻe ʻoange ʻe Sihova ʻa e meʻakai mo e vai kia ʻIlaisiā. ʻOku pehē ʻi he Tohi Tapú naʻe “ʻomi ai pe ʻe he fanga leveni kiate ia ha ma mo e kanomate pongipongi, mo ha ma mo e kanomate efiafi: pea ne maʻu hono inu mei he vaitafe.” (1 Tuʻi 17:3-6) ʻOku tau tui ʻe lava ke toe ʻomai ʻe Sihova ʻa e meʻa ʻoku tau fiemaʻú.

¹⁵ ʻOku tau tuipau ʻi he taimi ʻoku tau ngāueʻaki ai ʻa e ngaahi tefitoʻi moʻoni Fakatohitapú, te tau malava ke tokangaʻi ʻa e ngaahi fiemaʻu hotau fāmilí. Ko Rebecca, ko ha tuofefine mali ʻi ʻĒsia, ʻokú ne fakamatala ki he founga naʻá ne ngāueʻaki ai mo hono fāmilí ʻa e tefitoʻi moʻoni ʻi he Mātiu 6:33 mo e Palōveepi 10:4. ʻOkú ne pehē naʻe ongoʻi ʻe hono husepānití naʻe hoko ʻene ngāué ke fakatuʻutāmaki ki honau vahaʻangatae mo Sihová. Ko ia naʻá ne tukuange ʻene ngāué. Ka naʻe ʻi ai ʻena fānau ʻe toko fā ke tokangaʻi, ko ia naʻa nau kamata ke ngaohi ha meʻakai ke fakatau atu. Ko e ola ʻenau ngāue mālohí, naʻa nau maʻu maʻu pē ʻa e paʻanga feʻunga ke tokangaʻiʻaki ʻa e ngaahi fiemaʻu ʻa e fāmilí. ʻOkú ne pehē: “Naʻa mau ongoʻi naʻe ʻikai ʻaupito liʻaki kimautolu ʻe Sihova. Naʻe  ʻi ai maʻu pē ʻemau meʻakai.” Kuó ke maʻu ha hokosia meimei tatau ʻo fakaivimālohiʻi ai hoʻo tuí?

16. Ko e hā ʻe hoko kapau ʻoku tau falala ki he ʻOtuá?

¹⁶ ʻOku totonu ke ʻoua ʻaupito te tau veiveiua ʻe tokoniʻi kitautolu ʻe Sihova kapau te tau muimui ki heʻene fakahinohinó. Naʻe toʻo-lea ʻa Paula mei he ngaahi lea ʻa Hapakuke ʻi he taimi naʻá ne pehē ai: “Ko e tokotaha māʻoniʻoní te ne moʻui ko hono ʻuhingá ko e tuí.” (Kal. 3:11; Hap. 2:4) Ko e ʻuhinga ia ʻoku totonu ai ke tau tui mālohi ki he Tokotaha ʻe lava ke ne tokoniʻi moʻoni kitautolú. ʻOku fakamanatu mai ʻe Paula ko e ʻOtuá ko e “tokotaha ʻa ia ʻokú ne lava ke fai ʻo mahulu lahi atu ia ʻi he ngaahi meʻa kotoa pē ʻoku tau kole pe fakakaukau ki aí ʻo fakatatau ki hono mālohi ʻa ia ʻoku ngāue ʻiate kitautolú.” (ʻEf. 3:20) ʻOku fai ʻe he kau sevāniti ʻa Sihová ʻa e meʻa kotoa te nau malavá ʻi hono fai ʻa e finangalo ʻo e ʻOtuá, ka ʻoku nau toe ʻiloʻi ʻoku ʻi ai honau ngataʻanga. ʻOku tau toe houngaʻia ʻaupito ʻi he kau ʻa e ʻOtuá mo kitautolú pea ʻokú ne tāpuakiʻi ʻetau ngaahi feinga kotoa pē.

17. (a) Naʻe anga-fēfē ʻa e tali ʻa Sīsū ki he kau ʻapositoló? (e) Ko e hā ʻe lava ai ke tau ʻamanekina ʻe tali ʻe Sihova ʻetau kole ki ha tui lahi angé?

¹⁷ Mei he meʻa kuo tau lāulea ki aí, ʻoku tau ongoʻi nai hangē ko e kau ʻapositoló ʻi heʻenau kole kia Sīsū: “ʻOmi kiate kimautolu ha tui lahi ange.” (Luke 17:5) Naʻe ʻoange ʻe Sīsū ʻa e tali ki heʻene kau ʻapositoló ʻi ha founga makehe ʻi he Penitekosi he taʻu 33, ʻi he taimi naʻa nau maʻu ai ʻa e laumālie māʻoniʻoní pea naʻe malava ai ke nau maʻu ʻa e mahino loloto ange fekauʻaki mo e taumuʻa ʻa e ʻOtuá. Naʻe fakaivimālohiʻi heni ʻenau tuí. Ko e hā ʻa e olá? Naʻa nau kamataʻi ʻa e feingangāue fakamalanga lahi tahá ʻi he aʻu mai ki he taimi ko iá. (Kol. 1:23) ʻOku tau ʻamanekina ʻe lava ke tali ʻetau kole ki ha tui lahi angé? ʻOku talaʻofa mai ʻe Sihova ʻe lava ke tau maʻu ia ʻi he taimi “ʻoku tau kole ʻo fakatatau ki hono finangaló.”—1 Sio. 5:14.

18. ʻOku anga-fēfē hono tāpuakiʻi ʻe Sihova ʻa e faʻahinga ʻoku nau langa hake ʻenau tuí?

¹⁸ ʻE hōifua mai ʻa Sihova kia kitautolu, ʻi he taimi ʻoku tau falala kakato ai kiate iá. Te ne tali ʻetau kole ki ha tui lahi angé, ʻe hoko ʻo mālohi ange ai ʻetau tuí, pea te tau hoko ai ʻo “taau mo e Puleʻanga ʻo e ʻOtuá.”—2 Tes. 1:3, 5.