KO E ʻOtua nima-homo ʻa Sihova. (Sēm. 1:17) Mei he maamangia ʻo e fetuʻu ʻi he langí he poʻulí ki he musie ʻokú ne ʻufiʻufi ʻa e māmaní, ʻoku hiva ai ʻa e meʻa fakatupu ʻa Sihová koeʻuhi ko ʻene nima-homó.—Saame 65:12, 13; 147:7, 8; 148:3, 4.

ʻI he houngaʻia loloto ʻa e tokotaha-tohi-sāmé ʻi hono Tokotaha-Fakatupú, naʻe ueʻi ai ia ke ne faʻu ha hiva fakahīkihiki fekauʻaki mo e ngaahi ngāue ʻa Sihová. Lau ʻa e Saame 104, pea sio ai pe te ke maʻu ʻa e anga ʻo ʻene ongoʻí. Naʻe pehē ʻe he tokotaha-tohi-sāmé: “Teu hiva fakamalo ki hoku Otua i he lolotoga o eku moui.” (Saame 104:33, PM) ʻOku pehē pē mo hoʻo holí?

ʻOku loto ʻa Sihova ke tau muimui ʻi heʻene faʻifaʻitakiʻanga ʻo e nima-homó. ʻOkú ne toe tokonaki mai ʻa e ngaahi ʻuhinga lelei ke tau hoko ai ʻo nima-homó. Fakatokangaʻi ʻa e meʻa naʻá ne fakamānavaʻi ʻa e ʻapositolo ko Paulá ke ne tohí: “Fakahinohinoʻi ʻa e faʻahinga ʻoku nau koloaʻia ʻi he fokotuʻutuʻu lolotonga ní ke ʻoua te nau hīkisia, pea ke fokotuʻu ʻenau ʻamanakí, ʻo ʻikai ʻi he ngaahi koloa taʻepaú, ka ʻi he ʻOtuá, ʻa ia ʻokú ne tokonaki hulu fau mai kiate kitautolu ʻa e ngaahi meʻa kotoa pē ʻoku tau fiefia aí. Tala kiate kinautolu ke nau failelei, ke nau hulu atu ʻi he ngaahi ngāue lelei, ke nau nima-homo, mateuteu ke fai ha vahevahe atu, ʻo nau faʻoaki malu ai maʻanautolu ha makatuʻunga lelei ki he kahaʻú, koeʻuhí ke nau lava ai ʻo piki maʻu ki he moʻui moʻoní.”—1 Tīm. 6:17-19.

ʻI he taimi naʻe tohi ai ʻe Paula ʻene tohi fakamānavaʻi hono ua ki he fakatahaʻanga ʻi Kolinitoó, naʻá ne fakamamafaʻi ʻa e fakakaukau totonu ki he foakí. “Tuku ki he tokotaha taki taha ke ne fai ʻa e meʻa tofu pē ko ia kuó ne fakapapauʻi ʻi hono lotó,” ko e lau ia ʻa Paulá, “ʻo ʻikai ʻi he taʻefiefiefai pe ʻi hono kounaʻi, he ʻoku ʻofa ʻa e ʻOtuá ʻi ha tokotaha foaki fiefia.” (2 Kol. 9:7) Hokó, naʻe lave ʻa Paula ki he faʻahinga ʻoku nau maʻu ʻaonga mei he foaki nima-homó: ko e faʻahinga ʻoku nau maʻu ʻa e foakí, ʻoku fakalato ai ʻenau ngaahi fiemaʻú; pea ko e kau foakí, ʻoku tāpuakiʻi lahi fakalaumālie ai kinautolu.—2 Kol. 9:11-14.

Naʻe fakaʻosi ʻe Paula ʻa e konga ko eni ʻene tohí ʻaki ʻene lave ki he fakamoʻoni mālohi taha ʻo e nima-homo ʻa e ʻOtuá. “Fakafetaʻi ki he ʻOtuá koeʻuhi ko ʻene meʻaʻofa taʻetotongi taʻealafakamatalaʻí,” ko e tohi ia ʻa Paulá. (2 Kol. 9:15) Ko e meʻaʻofa ʻa Sihová ʻoku hā mahino ia ʻi he lelei kotoa ʻoku fakaaʻu mai ʻe he ʻOtuá ki hono kakaí ʻo fakafou ʻia Sīsū Kalaisi. ʻOku fuʻu māʻolunga ia ʻo ʻikai ha ngaahi lea feʻunga ke ne fakamatalaʻi kakato hono mahuʻingá.

ʻE lava fēfē ke tau fakahaaʻi ʻa e houngaʻia ki he meʻa kotoa kuo fai ʻe Sihova mo hono ʻAló pea mo ia te na toki fai maʻatautolú? Ko e founga ʻe taha ko ʻetau foaki nima-homo atu hotau taimí, iví mo e koloá ke ʻai ke laka ki muʻa ʻa e lotu maʻa ʻa Sihová, ʻo tatau ai pē pe ʻoku siʻisiʻi pe lahi.—1 Kal. 22:14; 29:3-5; Luke 21:1-4.