1-3. (a) Ko e hā ʻoku māʻolunga ange ai ʻa e ngaahi fakakaukau mo e lea ʻa Sihová ʻi he faʻahinga ʻo e tangatá? (e) Ko e hā te tau ako ki ai ʻi he kupu ko ení?

 NAʻE finangalo ʻa Sihova ke ne vahevahe mo e niʻihi kehé ʻa e moʻuí mo e fiefiá, ko ia naʻá ne fakatupu ʻa e kau ʻāngeló pea ki mui ai ko e faʻahinga ʻo e tangatá. (Saame 36:9; 1 Tīm. 1:11) Naʻe ʻuluaki fakatupu ʻe Sihova ʻa e tokotaha ʻoku ui ʻe he ʻapositolo ko Sioné ko “Folofola.” (Sione 1:1; Fkh. 3:14) Naʻe fetuʻutaki ʻa Sihova mo e tokotaha ko iá, ʻa Sīsū, mo fakahaaʻi kiate ia ʻene ngaahi fakakaukaú mo ʻene ngaahi ongoʻí. (Sione 1:14, 17; Kol. 1:15) ʻOku pehē ʻe he ʻapositolo ko Paulá ʻoku toe fetuʻutaki ʻa e kau ʻāngeló pea ʻoku ʻi ai ʻenau lea, ʻa ia ʻoku mātuʻaki kehe ia mei he lea ʻa e faʻahinga ʻo e tangatá.—1 Kol. 13:1.

² ʻOku ʻafioʻi ʻe Sihova ʻa e meʻa kotoa pē fekauʻaki mo e laui piliona ʻo e kau ʻāngeló mo e faʻahinga ʻo e tangatá ʻa ia naʻá ne fakatupú. ʻOku malava ke ne fanongo ki he ngaahi lotu ʻa e kakai ʻe laui miliona ʻi he taimi pē taha, pea ʻokú ne mahinoʻi ʻenau lotú ʻo tatau ai pē pe ko e hā ʻa e lea ʻoku nau leaʻakí. Lolotonga ʻa e fanongo ʻa Sihova ki he ngaahi lotu kotoa ko iá, ʻokú ne toe fetuʻutaki mo e kau ʻāngeló pea tataki kinautolu. Ke fakahoko kotoa iá, ʻoku pau pē ʻoku māʻolunga ange ʻa e ngaahi fakakaukau mo e lea ʻa Sihová ʻi he  ngaahi fakakaukau mo e lea ʻa e faʻahinga ʻo e tangatá. (Lau ʻa e ʻAisea 55:8, 9.) Ko ia, ʻi he taimi ʻokú ne fetuʻutaki ai mo e faʻahinga ʻo e tangatá, ʻokú ne ʻai ke faingofua ʻene pōpoakí koeʻuhí ke tau lava ʻo mahinoʻi ia.

³ ʻI he kupu ko ení, te tau ako ai ki he founga māʻalaʻala ʻoku fetuʻutaki mai ai ʻa Sihova ki he faʻahinga ʻo e tangatá. Te tau toe sio ai ki he founga ʻokú ne liliu ai ʻa e anga ʻene fetuʻutaki maí ʻo makatuʻunga ʻi he ngaahi tuʻungá.

4. (a) Ko e hā ʻa e lea naʻe ngāueʻaki ʻe Sihova ke ne fetuʻutaki ai mo Mōsese, Sāmiuela mo Tēvitá? (e) Ko e hā ʻoku hiki ʻi he Tohi Tapú?

⁴ ʻI he taimi naʻe fetuʻutaki ai ʻa Sihova ʻi he ngoue ʻo ʻĪtení mo e ʻuluaki tangatá, ʻa ʻAtama, ngalingali naʻá ne ngāueʻaki ʻa e faʻunga motuʻa ʻo e lea faka-Hepeluú. Ki mui ai, naʻe fetuʻutaki ʻa Sihova mo e kau tangata hangē ko Mōsese, Sāmiuela mo Tēvita. Neongo naʻa nau hiki ia ʻi heʻenau leá tonu ʻa ia ko e lea faka-Hepeluú pea ʻi he sīpinga tohi pē ʻanautolú, naʻa nau hiki moʻoni ʻa e ngaahi fakakaukau ʻa e ʻOtuá. Naʻa nau hiki hangatonu ʻa e ngaahi lea ʻa Sihová pea pehē ki he hisitōlia ʻo fekauʻaki mo e vahaʻangatae ʻo e ʻOtuá mo ʻene kakaí. Ko e fakatātaá, ʻoku lēkooti ʻi he Tohi Tapú ʻenau tui mo e ʻofa ki he ʻOtuá pea pehē ki heʻenau ngaahi fehālaakí mo e taʻefaitōnungá. Naʻe hiki kotoa ʻa e ngaahi fakamatala ko ení ke tau maʻu ʻaonga mei ai.—Loma 15:4.

5. Ko e lea faka-Hepeluú pē naʻe ngāueʻaki ʻe he ʻOtuá ke ne fetuʻutaki ai mo e faʻahinga ʻo e tangatá? Fakamatalaʻi.

⁵ Naʻe ʻikai ke fetuʻutaki maʻu pē ʻa Sihova mo e faʻahinga ʻo e tangatá ʻi he lea faka-Hepeluú. ʻI he taimi naʻe fakatauʻatāinaʻi mai ai ʻa e kau ʻIsilelí mei Pāpiloné, ko e niʻihi ʻo kinautolu naʻa nau lea faka-Alamea ʻi heʻenau moʻui fakaʻahó. Mahalo ko e ʻuhinga ia naʻe fakamānavaʻi ai ʻe Sihova ʻa Taniela, Selemaia mo ʻĒsela ke nau hiki ʻa e konga ʻo e Tohi Tapú ʻi he lea faka-Alameá. a

6. Ko e hā naʻe liliu ai ʻa e Ngaahi Konga Tohi Tapu Faka-Hepeluú ki he lea faka-Kalisí?

⁶ Ki mui ai, naʻe ikunaʻi ʻe ʻĀlekisānita ko e Lahí ʻa e konga lahi ʻo e māmaní, pea ko e lea faka-Kalisi anga-mahení pe Koiné, naʻe hoko ia ko e lea tefito ʻi he ngaahi fonua lahi. Naʻe kamata ke lea faka-Kalisi ʻa e kau Siu tokolahi, pea faai atu pē ʻo liliu ʻa e Ngaahi Konga Tohi Tapu Faka-Hepeluú ki he lea faka-Kalisí. ʻOku ui ʻa e liliu ko ení ko e Sepituakiní. Ko hono fuofua liliu eni ʻo e Tohi Tapú pea ko e taha ia ʻo e liliu mahuʻinga tahá. ʻOku tui ʻa e kau mataotaó naʻe fakakakato ʻe he kau liliu lea ʻe toko 72 ʻa e Sepituakiní. b Naʻe liliu fakafoʻilea ʻe he niʻihi ʻa e Ngaahi Konga Tohi Tapu Faka-Hepeluú, ka naʻe ʻikai pehē ʻa e niʻihi. Neongo ia, ʻoku tui ʻa e kau Siu lea faka-Kalisí mo e kau Kalisitiané ko e Sepituakiní ko e Folofola ʻa e ʻOtuá.

7. Ko e hā ʻa e lea naʻe ngāueʻaki ʻe Sīsū ke akoʻi ʻaki ʻene kau ākongá?

⁷ ʻI he taimi naʻe ʻi māmani ai ʻa Sīsuú, naʻá ne lea faka-Hepelū nai. (Sione 19:20; 20:16; Ngā. 26:14) Naʻá ne toe ngāueʻaki nai ʻa e ngaahi kupuʻi lea faka-Alamea ʻa ia naʻe faʻa ngāueʻaki ʻi he taimi ko iá. Ka naʻá ne toe ʻiloʻi ʻa e muʻaki lea faka-Hepelū naʻe leaʻaki ʻe Mōsese mo e kau palōfitá, ʻa ia ko ʻenau ngaahi tohí naʻe lau ia ʻi he sinakoké he uike taki taha. (Luke 4:17-19; 24:44, 45; Ngā. 15:21) Pea neongo naʻe leaʻaki ʻa e lea faka-Kalisí mo e lea faka-Latiná ʻi he taimi ʻo Sīsuú, ʻoku ʻikai fakahaaʻi mai ʻi he Tohi  Tapú pe naʻe toe leaʻaki ʻe Sīsū ʻa e ongo lea ko iá.

8, 9. Ko e hā naʻe lea faka-Kalisi ai ʻa e kau Kalisitiane tokolahi, pea ko e hā ʻoku akoʻi mai heni kia kitautolu fekauʻaki mo Sihová?

⁸ Ko e ʻuluaki kau muimui ʻo Sīsuú naʻa nau lea faka-Hepelū, ka ʻi he hili ʻene pekiá naʻe lea ʻene kau ākongá ʻi he ngaahi lea kehe. (Lau ʻa e Ngāue 6:1.) ʻI he mafola atu ʻa e ongoongo leleí, naʻe lea faka-Kalisi ʻa e kau Kalisitiane tokolahi kae ʻikai ko e lea faka-Hepeluú. Koeʻuhí ko e lea faka-Kalisí ʻa e lea anga-mahení, naʻe tufaki atu ai ʻa e tohi ʻa Mātiu, Maʻake, Luke mo Sioné ʻi he lea faka-Kalisí. c Naʻe hiki foki mo e ngaahi tohi ʻa e ʻapositolo ko Paulá mo e ngaahi tohi Fakatohitapu kehe ʻi he lea faka-Kalisí.

⁹ ʻOku fakatupu tokangá he ko e taimi naʻe toʻo lea ai ʻa e kau hiki tohi ʻo e Ngaahi Konga Tohi Tapu Faka-Kalisi Kalisitiané mei he Ngaahi Konga Tohi Tapu Faka-Hepeluú, naʻa nau faʻa ngāueʻaki ʻa e Sepituakiní. ʻI he taimi ʻe niʻihi, naʻe kiʻi kehe ʻa e ngaahi toʻo lea ko iá mei hono muʻaki fakalea ʻi he faka-Hepeluú. Neongo ia, naʻe hoko ʻa e ngāue ʻa e kau liliu lea taʻehaohaoá ko e konga ia ʻo e Tohi Tapu ʻoku tau maʻu ʻi he ʻaho ní. ʻOku akoʻi mai heni kia kitautolu ʻoku ʻikai vakai ʻa Sihova ki he lea pe anga fakafonua ʻe taha ʻoku lelei ange ia ʻi he taha.—Lau ʻa e Ngāue 10:34.

10. Ko e hā kuo tau ako mei he founga ʻoku fetuʻutaki mai ai ʻa Sihova ki he faʻahinga ʻo e tangatá?

¹⁰ Kuo tau ako ʻoku fetuʻutaki mai ʻa Sihova ki he faʻahinga ʻo e tangatá ʻo fakatatau ki he ngaahi tuʻungá. ʻOku ʻikai te ne ʻamanekina kitautolu ke tau leaʻaki ha lea pau ka tau toki ʻiloʻi ia pe ko ʻene ngaahi taumuʻá. (Lau ʻa e Sākalaia 8:23; Fakahā 7:9, 10.) Kuo tau toe ako naʻe fakamānavaʻi ʻe Sihova ʻa e kau hiki Tohi Tapú, ka naʻá ne fakaʻatā ke nau hiki ʻi he lea pē ʻanautolu ʻene ngaahi fakakaukaú.

11. Ko e hā ʻoku ʻikai ai ko ha palopalema kia Sihova ʻa e kehekehe ʻo e lea ʻoku ngāueʻaki ʻe he faʻahinga ʻo e tangatá?

¹¹ ʻOku kehekehe ʻa e lea ʻoku ngāueʻaki ʻe he faʻahinga ʻo e tangatá, ka ʻoku ʻikai ko ha palopalema eni kia Sihova. ʻOku anga-fēfē ʻetau ʻiloʻi iá? ʻOku maʻu ʻi he Tohi Tapú ʻa e niʻihi pē ʻo e ngaahi lea ʻa Sīsū ʻi he muʻaki lea naʻá ne ngāueʻakí. (Māt. 27:46; Mk. 5:41; 7:34; 14:36) Ka naʻe fakapapauʻi ʻe Sihova naʻe hiki mo liliu ʻa e pōpoaki ʻa Sīsuú ki he lea faka-Kalisí, pea aʻu atu ai pē ki ha toe ngaahi lea kehe. Pehē foki, koeʻuhí ko hono hiki tatau ʻa e Folofola ʻa e ʻOtuá ʻi he ngaahi taimi lahi ʻe he kau Siú mo e kau Kalisitiané, naʻe fakatolonga ai ʻa e pōpoaki ʻa e ʻOtuá. Ko e ngaahi tatau ko ení naʻe liliu leva ia ki ha ngaahi lea lahi ange. ʻI he taʻu ʻe 400 nai hili ʻa Kalaisí, naʻe pehē ʻe John Chrysostom ko e ngaahi akonaki ʻa Sīsuú kuo liliu ia ki he lea ʻa e kakai Sīlia, ʻIsipite, ʻInitia, Pēsia, ʻItiopea mo e kakai tokolahi kehe.

12. Kuo anga-fēfē hono fakafepakiʻi ʻa e Tohi Tapú?

 ¹² ʻI he faai mai ʻa e hisitōliá, kuo fakafepakiʻi lahi ai ʻa e Tohi Tapú mo e faʻahinga naʻa nau liliu mo tufaki iá. ʻI he taʻu ʻe 300 nai hili ʻa e ʻaloʻi ʻo Sīsuú, naʻe tuʻutuʻuni ai ʻe he ʻEmipola Loma ko Tiokilitiané ke fakaʻauha ʻa e ngaahi tatau Tohi Tapu kotoa pē. ʻI he taʻu nai ʻe 1,200 ki mui ai, naʻe kamata ai ʻe William Tyndale ke liliu ʻa e Tohi Tapú ki he lea faka-Pilitāniá. Naʻá ne pehē kapau ʻe fakaʻatā ia ʻe he ʻOtuá ke ne moʻui fuoloa, naʻa mo ha kiʻi tamasiʻi faama te ne fakapapauʻi ke ne ʻiloʻi lelei ange ʻa e Tohi Tapú ʻi ha faifekau. Koeʻuhi ko e fakatangá, naʻe pau ke hola ai ʻa Tyndale mei ʻIngilani ki ʻIulope ke ne lava ai ʻo liliu mo pulusi ʻene liliu Tohi Tapú. Neongo naʻe feinga ʻa e haʻa faifekaú ke tutu ʻa e ngaahi tatau kotoa pē naʻa nau maʻú, naʻe tufaki atu ʻa e liliu ʻa Tyndale ki he kakai tokolahi. Faifai atu pē, naʻe fakasisina ʻa Tyndale mo tutu ʻi he ʻakaú. Ka naʻe hao mai ʻene liliu Tohi Tapú mei he haʻa faifekaú, pea naʻe ngāueʻaki ia ke teuteuʻi ai ʻa e liliu Tohi Tapu ʻoku ui ko e King James Version.—Lau ʻa e 2 Tīmote 2:9.

13. Ko e hā kuo fakahaaʻi ʻi hono ako ʻa e ngaahi maniusikilipi Fakatohitapu motuʻá?

¹³ Ko e moʻoni ʻoku ʻi ai ha fanga kiʻi fehālaaki mo e ngaahi faikehekehe ʻi he niʻihi ʻo e ngaahi tatau motuʻa taha ʻo e Tohi Tapú. Kae kehe, naʻe ako fakamātoato ʻe he kau mataotao Tohi Tapú ʻa e laui afe ʻo e maniusikilipí mo hono ngaahi kongá pea mo e ngaahi liliu motuʻa ʻo e Tohi Tapú. Hili hono fakahoa kinautolú, naʻa nau ʻiloʻi ai ko e ngaahi veesi pē ʻe niʻihi naʻe ʻi ai ha kiʻi faikehekehe ai pea ko e fanga kiʻi meʻa iiki pē ia. Ka kuo ʻikai ʻaupito liliu ʻa e pōpoaki ʻo e Tohi Tapú. Ko e ngaahi ako hangē ko ení ʻoku fakatuipauʻi ai ʻa e kau ako Tohi Tapu loto-moʻoní, ko e meʻa ʻoku nau maʻu ʻi he ʻaho ní ko e Folofola fakamānavaʻi ia ʻa Sihova.—ʻAi. 40:8. d

14. Ko e hā ʻa e tuʻunga ʻoku aʻu ki ai ʻa e Tohi Tapú ʻi he ʻahó ni?

¹⁴ Neongo hono fakafepakiʻi lahi ʻa e Tohi Tapú, kuo liliu ia ʻi he lea ʻe 2,800 tupu. Ko e tohi tufaki lahi taha ia ʻi he ʻaho ní. Neongo ʻoku ʻikai tui ʻa e kakai tokolahi ki he ʻOtuá, ko ʻene Folofolá ʻa e tohi tufaki lahi taha ʻi he hisitōliá. Neongo ko e niʻihi ʻo e ngaahi liliu Tohi Tapú ʻoku ʻikai ke fuʻu faingofua hono laú pe ʻikai ke fuʻu tonu, ʻoku ʻomai ʻe he meimei kotoa ʻo kinautolú ha pōpoaki faingofua ʻo e ʻamanaki mo e moʻui taʻengata.

15. (a) Kuo anga-fēfē hono liliu ʻetau ʻū tohi Fakatohitapú talu mei he 1919? (e) Ko e hā ʻoku ʻuluaki hiki ai ʻetau ʻū tohí ʻi he lea faka-Pilitāniá?

¹⁵ ʻI he 1919, naʻe fakanofo ha kiʻi kulupu tokosiʻi ʻo e kau ako Tohi Tapú ko e “tamaioʻeiki anga-tonu mo potó.” ʻI he taimi ko iá, meimei ko e lea faka-Pilitāniá naʻe fetuʻutaki ai ʻa e  tamaioʻeiki anga-tonú mo e kakai ʻa e ʻOtuá. (Māt. 24:45) Ka ʻi he ʻahó ni, ko e ʻū tohi Fakatohitapú ʻoku maʻu ia ʻi he lea ʻe 700 tupu. Hangē pē ko e lea faka-Kalisi ʻi he kuohilí, ʻi he ʻahó ni ko e lea faka-Pilitāniá ʻoku ngāuelahiʻaki ʻi he pisinisí mo e akó pea ʻoku ʻiloa ia. Ko ia, ko ʻetau ʻū tohí ʻoku ʻuluaki hiki ia ʻi he lea faka-Pilitāniá pea toki liliu ai ki he ngaahi lea kehé.

16, 17. (a) Ko e hā naʻe fiemaʻu ʻe he kakai ʻa e ʻOtuá? (e) Naʻe anga-fēfē hono feau ʻa e fiemaʻu ko iá? (f) Ko e hā ʻa e fakaʻamu ʻa Tokoua Knorr?

¹⁶ ʻOku makatuʻunga ʻetau ʻū tohí kotoa ʻi he Tohi Tapú. ʻI he ʻuluaki taimí, naʻe ngāueʻaki ai ʻe he kakai ʻa e ʻOtuá ʻa e King James Version, ʻa ia naʻe kakato ia ʻi he 1611. Kae kehe, ko hono fakaleá naʻe motuʻa mo faingataʻa ke mahinoʻi. Naʻe siʻisiʻi pē hono ngāueʻaki ʻa e huafa ʻo e ʻOtuá, neongo naʻe ngāueʻaki tuʻo laui afe ia ʻi he ngaahi maniusikilipi motuʻa ʻaupitó. Ko e liliu Tohi Tapu ko iá naʻe toe ʻi ai ʻa e ngaahi liliu hala ai mo e ngaahi veesi naʻe tānaki mai ka naʻe ʻikai hā ia ʻi he ngaahi maniusikilipi motuʻa tahá. Naʻe maʻu ʻi he ngaahi liliu Tohi Tapu faka-Pilitānia kehé ʻa e palopalema meimei tatau.

¹⁷ ʻOku hā mahino, naʻe fiemaʻu ʻe he kakai ʻa e ʻOtuá ha liliu Tohi Tapu naʻe tonu mo faingofua ke mahinoʻí. Ko ia, naʻe fokotuʻu ai ha Kōmiti Liliu Tohi Tapu Māmani Foʻou, pea naʻe tukuange mai ai ʻe he fanga tokoua ʻi he kōmiti ko ení ʻa e konga ʻo e Tohi Tapú mei he 1950 ki he 1960. Naʻe tukuange mai ʻa e voliume ʻuluaki ʻo e voliume ʻe onó ʻi he fakataha-lahi naʻe fai ʻi ʻAokosi 2, 1950. ʻI he fakataha-lahi ko iá, naʻe pehē ai ʻe Tokoua Knorr ʻoku fiemaʻu ʻe he kakai ʻa e ʻOtuá ʻa e liliu Tohi Tapu fakaonopooni ko ia ʻoku tonu mo faingofua ke mahinoʻí, pea tokoniʻi ai kinautolu ke nau ako ke toe mahino ange ʻa e moʻoní. Naʻa nau fiemaʻu pē ha liliu Tohi Tapu ʻoku faingofua ke lau mo mahinoʻí ʻo hangē ko ia ko e ngaahi muʻaki tohi ʻa e kau ākonga ʻa Kalaisí. Ko e fakaʻamu ʻa Tokoua Knorr ke hoko ʻa e New World Translation ʻo tokoniʻi ʻa e laui miliona ʻo e kakaí ke nau ʻiloʻi ʻa Sihova.

18. Ko e hā naʻe fai ke tokoni ki hono liliu ʻo e Tohi Tapú?

¹⁸ ʻI he 1963, naʻe fakahoko moʻoni ai ʻa e fakaʻamu ʻa Tokoua Knorr. Ko e Liliu Tohi Tapu ʻo e Māmani Foʻoú ʻo e Ngaahi Konga Tohi Tapu Faka-Kalisi Kalisitiané naʻe liliu ia ki he lea faka-Hōlani, Falanisē, Siamane, ʻĪtali, Potukali mo e lea faka-Sipeiní. ʻI he 1989, naʻe fokotuʻu ai ʻe he Kulupu Pule ʻo e Kau Fakamoʻoni ʻa Sihová ha potungāue foʻou ʻi he ʻuluʻi ʻapitangá ke tokoni ki he kau liliu Tohi Tapú. ʻI he 2005 leva, naʻe maʻu ai ha ngofua ke liliu ʻa e Tohi Tapú ki he ngaahi lea ko ia kuo ʻosi liliu ai ʻa e Taua Leʻo. Ko hono olá, ko e New World Translation kuo maʻu kakato pe ʻi hano konga he taimí ni ʻi he ngaahi lea ʻe 130 tupu.

19. Ko e hā ʻa e meʻa mahuʻinga naʻe hoko ʻi he 2013, pea ko e hā te tau ako ki ai ʻi he kupu hono hokó?

¹⁹ Kuo liliu ʻa e lea faka-Pilitāniá talu mei hono tukuange mai ʻa e ʻuluaki pulusinga ʻo e New World Translation, ko ia naʻe fiemaʻu ai ke ngāueʻaki ʻa e ngaahi lea fakamuimui tahá. ʻI he fakaʻosinga uike ʻo ʻOkatopa 5 mo e 6, 2013, ko e kau fanongo ʻe toko 1,413,676 mei he ngaahi fonua ʻe 31 naʻa nau ʻi ai tonu pe fanongo pē mei honau feituʻú ki he fakataha fakataʻu hono 129. Naʻe fanongonongo ai ʻe ha mēmipa ʻo e Kulupu Pulé ʻa hono tukuange mai ʻo e New World Translation kuo fakaleleiʻi ʻi he lea faka-Pilitāniá. Naʻe fiefia ʻaupito ʻa e kau fanongó, pea naʻe tō loʻimata ʻa e tokolahi ʻi he taimi naʻa nau maʻu ai ʻenau tatau ʻi he liliu Tohi Tapu foʻou ko ení. ʻI he taimi naʻe lau ai ʻe he tokotaha-malangá ha ngaahi veesi mei he Tohi Tapu kuo fakaleleiʻí, naʻe hā mahino ki he tokotaha kotoa ʻa e faingofua ange ke lau mo mahinoʻi iá. ʻI he kupu hono hokó, te tau toe ako lahi ange ai fekauʻaki mo e fakaleleiʻi ko ení, pea pehē ki he founga kuo liliu ai ia ki he ngaahi lea kehé.