1. ʻOku anga-fēfē ʻetau ʻiloʻi ʻoku loto ʻa Sihova ke ʻunuʻunu ofi mai kiate kitautolú?

 KO Sihova ʻokú ne fakaafeʻi mai kitautolu ke ʻunuʻunu ofi ange kiate ia. (Sēm. 4:8) ʻOkú ne loto ke ne hoko ko hotau ʻOtua, ko ʻetau Tamai pea mo hotau Kaumeʻa. ʻOkú ne tali ʻetau ngaahi lotú pea tokoniʻi kitautolu ʻi he ngaahi taimi faingataʻá. Pea ʻokú ne ngāueʻaki ʻene kautahá ke akoʻi mo maluʻi kitautolu. Ka ko e hā kuo pau ke tau fai ke ʻunuʻunu ofi ai kia Sihová?

2. ʻE lava fēfē ke tau ʻunuʻunu ofi kia Sihová?

² ʻE lava ke tau ʻunuʻunu ofi kia Sihova ʻaki ʻa e lotu kiate ia pea lau ʻene Folofolá pea fakalaulauloto ki ai. ʻI heʻetau fai iá, ʻoku tau hoko ai ʻo ʻofa mo houngaʻia lahi kiate ia. ʻOku ueʻi kitautolu ke ʻoange kiate ia ʻa e talangofua mo e fakahīkihiki ʻokú ne tuha moʻoni mo iá. (Fkh. 4:11) Ko e lahi ange ʻetau ʻiloʻi ʻa Sihová, ko e lahi ange ia ʻetau falala kiate ia pea mo e kautaha kuó ne tokonaki mai ke tokoniʻi kitautolú.

3. ʻOku anga-fēfē feinga ʻa e Tēvoló ke fakamavaheʻi kitautolu meia Sihová, ka ko e hā te ne tokoniʻi kitautolu ke ʻoua ʻaupito te tau liʻaki hotau ʻOtuá mo ʻene kautahá? (Saame 31:13, 14)

³ Neongo ia, ʻoku feinga ʻa e Tēvoló ke fakamavaheʻi kitautolu meia Sihova, tautefito ʻi he taimi ʻoku tau fehangahangai ai mo e ngaahi polé. Ko e hā ʻene foungá? ʻOkú ne feinga māmālie ke fakavaivaiʻi ʻetau falala kia Sihova mo ʻene kautahá. Ka ʻe lava ke tau talitekeʻi ʻene ngaahi foungá. ʻI he taimi ʻoku mālohi ai ʻetau tuí pea taʻeueʻia ʻetau falala kia Sihová, heʻikai ke tau liʻaki hotau ʻOtuá mo ʻene kautahá.​—Lau ʻa e Saame 31:13, 14.

4. Ko e hā te tau lāulea ki ai ʻi he kupu ko ení?

⁴ ʻI he kupu ko ení, te tau lāulea ai ki he pole ʻe tolu ʻe haʻu nai mei tuʻa ʻi he fakatahaʻangá; ʻe lava ke nau fakavaivaiʻi ʻetau falala  kia Sihova pea mo ʻene kautahá. ʻE lava fēfē ke fakamavaheʻi kitautolu ʻe he ngaahi pole ko ení meia Sihová? Pea ko e hā ʻe lava ke tau fai ke fakafepakiʻi ai ʻa e ngaahi feinga ʻa Sētané?

5. ʻE lava fēfē ke fakavaivaiʻi ʻe he faingataʻá ʻetau falala kia Sihova mo ʻene kautahá?

⁵ ʻI he taimi ʻe niʻihi, ʻoku tau fehangahangai mo e ngaahi faingataʻa​—hangē ko e fakafepaki mei he fāmilí pe ko e mole ʻetau ngāué. ʻE lava fēfē ke fakavaivaiʻi ʻe he faingataʻa ko iá ʻetau falala ki he kautaha ʻa Sihová pea fakamavaheʻi ai kitautolu meiate ia? ʻI heʻetau kātekina ha faingataʻa ʻi ha taimi fuoloa, te tau ongoʻi nai ʻoku siva ʻetau ʻamanakí pea loto-siʻi. ʻOku lau ia ʻe Sētane ko ha faingamālie peá ne feinga ke ʻai kitautolu ke tau veiveiua ʻi he ʻofa ʻa Sihova ʻiate kitautolú. ʻOku loto ʻa e Tēvoló ke tau fehuʻia pe ko Sihova pe ko ʻEne kautahá ʻa e tupuʻanga ʻo ʻetau faingataʻaʻiá. Naʻe hoko ʻa e meʻa meimei tatau ki he niʻihi ʻo e kau ʻIsileli ʻi ʻIsipité. ʻI he kamatá naʻa nau tui ko Sihova naʻá ne fakanofo ʻa Mōsese mo ʻĒlone ke fakahaofi kinautolu mei he nofo pōpulá. (ʻEki. 4:29-31) Ka ki mui ai ʻi hono ʻai ʻe Felo ke faingataʻa ange ʻenau moʻuí, naʻa nau tukuakiʻi ʻa Mōsese mo ʻĒlone ki heʻenau ngaahi palopalemá, ʻo tala ange: “Kuó mo ʻai ʻa Felo mo ʻene kau sevānití ke nau fehiʻanekinaʻi kimautolu, pea kuó mo ʻai ki honau nimá ha heletā ke tāmateʻi ʻaki kimautolu.” (ʻEki. 5:19-21) Naʻa nau tukuakiʻi ʻa e ongo sevāniti mateaki ʻa e ʻOtuá. He fakalotomamahi ē ko ia! Kapau kuó ke kātekina ha faingataʻa ʻi ha taimi fuoloa, ʻe lava fēfē ke ke tauhi ke mālohi hoʻo falala kia Sihova mo ʻene kautahá?

6. Ko e hā ʻoku tau ako mei he palōfita ko Hapakuké fekauʻaki mo e founga ke fekuki ai mo e faingataʻá? (Hapakuke 3:17-19)

⁶ Huaʻi atu ho lotó kia Sihova ʻi he lotu, pea hanga kiate ia ki ha poupou. Naʻe fehangahangai ʻa e palōfita ko Hapakuké mo e ngaahi faingataʻa lahi. ʻI he taimi ʻe taha, ʻoku hā ngali naʻá ne veiveiua pe naʻe tokanga mai ʻa Sihova kiate ia. Ko ia naʻá ne huaʻi atu ʻene ngaahi ongoʻí kia Sihova ʻi he lotu. Naʻá ne pehē: “Ko e hā hono fuoloa, ʻe Sihova, kuo pau ke u tangi ai ki ha tokoni, kae ʻikai te ke ongoʻí? . . . Ko e hā ʻokú ke kātakiʻi ai ʻa e fakaaoaó?” (Hap. 1:2, 3) Naʻe tali ʻe Sihova ʻa e lotu loto-moʻoni ʻa ʻene sevāniti mateakí. (Hap. 2:2, 3) Hili ʻa e fakalaulauloto ʻa Hapakuke ki he ngaahi ngāue faifakahaofi ʻa Sihová, naʻe toe fakafoʻou ʻene fiefiá. Naʻá ne tuipau naʻe tokanga ange ʻa Sihova kiate ia pea te ne tokoniʻi ia ke kātekina ha faʻahinga ʻahiʻahi pē. (Lau ʻa e Hapakuke 3:17-19.) Ko e hā ʻa e lēsoni kiate kitautolú? ʻI hoʻo fehangahangai mo e faingataʻá, lotu kia Sihova pea tala ange kiate ia ʻa e anga hoʻo ongoʻí. Hanga leva kiate ia ki ha poupou. ʻI hoʻo fai peheé, ʻe lava ke ke tuipau ʻe ʻoatu ʻe Sihova ʻa e mālohi ʻoku fiemaʻu ke ke kātekina aí. Pea ʻi he taimi ʻokú ke ongoʻi ai ʻene poupoú, ko hoʻo tui kiate iá ʻe tupu ke toe mālohi ange.

7. Ko e hā naʻe feinga ʻa e kāinga ʻo Shirley ke fakatuipauʻi kiate iá, pea ko e hā naʻá ne ʻai ia ke ʻoua ʻe mole ʻene tui kia Sihová?

⁷ Tauhi maʻu hoʻo taimi-tēpile fakalaumālié. Fakatokangaʻi ʻa e founga naʻe tokoni ai eni kia Shirley, ko ha tuofefine ʻi Pāpua Niu Kini, ʻi heʻene fehangahangai mo e ngaahi faingataʻá. b Naʻe masiva ʻa e fāmili ʻo Shirley pea ʻi he taimi ʻe niʻihi, naʻa nau fāinga ke maʻu ha meʻakai feʻunga. Naʻe feinga ha kāinga ke fakavaivaiʻi ʻene falala kia Sihová. Naʻá ne pehē: “ʻOkú ke pehē ko e laumālie māʻoniʻoni ʻo e ʻOtuá ʻokú ne tokoniʻi koé, ka ko fē ʻa e tokoní? ʻOku kei masiva pē ʻa e fāmilí. ʻOkú ke fakamoleki noa ho taimí ʻi he malangá.” ʻOku pehē ʻe Shirley: “Naʻá ku ʻeke hifo: ‘ʻOku tokanga mai ʻa e ʻOtuá pe ʻikai?’ Ko ia naʻá ku lotu leva kia Sihova pea tala ange ʻa e meʻa kotoa naʻe ʻi hoku ʻatamaí.  Naʻá ku lau maʻu pē ʻa e Tohi Tapú mo ʻetau ʻū tohí, pea naʻe hokohoko atu ʻeku malangá mo e maʻu ʻa e ngaahi fakatahá.” Naʻe vave ʻa e kamata ke ne ʻiloʻi naʻe tokangaʻi ʻe Sihova hono fāmilí. Naʻe ʻikai ke fiekaia hono fāmilí, pea naʻa nau fiefia. ʻOku pehē ʻe Shirley: “Naʻá ku ongoʻi naʻe tali ʻe Sihova ʻeku ngaahi lotú.” (1 Tīm. 6:6-8) Kapau te ke pipiki ofi ki hoʻo taimi-tēpile fakalaumālié, ko koe foki heʻikai ke ke fakaʻatā ʻa e ngaahi faingataʻá pe veiveiuá ke ne fakamavaheʻi koe meia Sihova.

8. Ko e hā ʻe hoko nai ki he fanga tokoua fua fatongia ʻi he kautaha ʻa Sihová?

⁸ Fakafou ʻi he mītiá mo e netiueka fakasōsialé, ko hotau ngaahi filí ʻoku nau fakamafola ai ʻa e ngaahi loi pe fakamatala hala fekauʻaki mo e fanga tokoua fua fatongia ʻi he kautaha ʻa Sihová. (Saame 31:13) Kuo puke ʻa e fanga tokoua ʻe niʻihi pea tukuakiʻi ko e kau faihia. Ko e kau Kalisitiane ʻi he ʻuluaki senitulí naʻa nau fehangahangai mo ha tuʻunga meimei tatau ʻi he taimi naʻe tukuakiʻi hala ai ʻa e ʻapositolo ko Paulá pea puké. Naʻe anga-fēfē ʻenau fakafeangaí?

9. Naʻe anga-fēfē fakafeangai ʻa e kau Kalisitiane ʻe niʻihi ʻi hono tuku pilīsone ʻa e ʻapositolo ko Paulá?

⁹ Ko e kau Kalisitiane ʻe niʻihi ʻi he ʻuluaki senitulí naʻe ʻikai ke nau toe poupou ki he ʻapositolo ko Paulá ʻi hono tuku pilīsone ia ʻi Lomá. (2 Tīm. 1:8, 15) Ko e hā hono ʻuhingá? Naʻa nau maaʻi ʻa Paula koeʻuhí naʻe vakai ʻa e kakaí kiate ia ko ha tokotaha faihia? (2 Tīm. 2:8, 9) Pe naʻa nau manavahē pe ilifia naʻa fakatangaʻi foki mo kinautolu? Pe ko e hā pē ʻenau fakaʻuhingá, sioloto atu ki he anga ʻo e ongoʻi ʻa Paulá. Naʻá ne kātekina ʻa e ngaahi faingataʻa lahi pea aʻu ʻo tuku ʻene moʻuí ke ʻi ha tuʻunga fakatuʻutāmaki koeʻuhi ko kinautolu. (Ngā. 20:18-21; 2 Kol. 1:8) ʻOfa ke ʻoua ʻaupito te tau hangē ko e faʻahinga naʻa nau liʻaki ʻa Paula lolotonga ʻa e taimi naʻá ne fiemaʻu tokoni aí! Ko e hā ʻoku totonu ke tau manatuʻi ʻi he taimi ʻoku fakatangaʻi ai ʻa e fanga tokoua fua fatongiá?

10. Ko e hā ʻoku totonu ke tau manatuʻi ʻi hono fakatangaʻi ʻa e fanga tokoua fua fatongiá, pea ko e hā hono ʻuhingá?

¹⁰ Manatuʻi ʻa e ʻuhinga ʻoku fakatangaʻi ai kitautolú  mo e tokotaha ʻokú ne fakatupunga iá. ʻOku pehē ʻi he 2 Tīmote 3:12: “Ko e faʻahinga kotoa ʻoku nau loto ke moʻui ʻaki ʻa e anga-līʻoa fakaʻotua ʻi he fekauʻaki mo Kalaisi Sīsuú, ʻe fakatangaʻi foki kinautolu.” Ko ia ʻoku totonu ke ʻoua te tau ʻohovale ʻi he hoko ʻa e fanga tokoua fua fatongiá ko e tāketi ia ʻa e ʻoho ʻa Sētané. Ko ʻene taumuʻá ke maumauʻi ʻenau anga-tonú pea fakailifiaʻi kitautolu.​—1 Pita 5:8.

11. Ko e hā ʻoku tau ako mei he faʻifaʻitakiʻanga ʻa ʻOnesifoló? (2 Tīmote 1:16-18)

¹¹ Hokohoko atu ʻa e poupou ki ho fanga tokouá pea pipiki mateaki kiate kinautolu. (Lau ʻa e 2 Tīmote 1:16-18.) Ko ha Kalisitiane ʻi he ʻuluaki senitulí ko ʻOnesifolo naʻe kehe ʻene fakafeangai ʻi hono tuku pilīsone ʻa Paulá. “Naʻe ʻikai te ne maaʻi [ʻa e] ngaahi sēini fakapōpulá” ʻo Paulá. ʻI hono kehé, naʻe ʻalu ʻa ʻOnesifolo ʻo kumi kia Paula, pea ʻi heʻene ʻilo iá, naʻá ne kumi ki ha ngaahi founga ʻaonga ke poupou ai kiate ia. ʻI he fai peheé, naʻe tuku ai ʻe ʻOnesifolo ʻene moʻuí tonu ke ʻi ha tuʻunga fakatuʻutāmaki. Ko e hā ʻa e lēsoni kiate kitautolú? Kuo pau ke ʻoua te tau fakaʻatā ʻa e manavahē tangatá ke ne fakailifiaʻi pe taʻofi kitautolu mei hono poupouʻi hotau fanga tokoua ʻoku fakatangaʻí. ʻI hono kehé, tau taukapoʻi kinautolu pea tokoniʻi kinautolu. (Pal. 17:17) ʻOku nau fiemaʻu ʻetau ʻofá mo e poupoú.

12. Ko e hā ʻoku tau ako mei hotau fanga tokoua mo e fanga tuofāfine ʻi Lūsiá?

¹² Fakakaukau ki he anga hono tokoniʻi ʻe hotau fanga tokoua mo e fanga tuofāfine ʻi Lūsiá ʻa honau kaungātui ʻofeina ʻoku tuku pilīsoné. ʻI he taimi ʻoku hopo ai ha niʻihi, ʻoku ʻalu ʻa e fanga tokoua tokolahi ki he fakamaauʻangá ke poupou kiate kinautolu. Ko e hā ʻa e lēsoni kiate kitautolú? ʻI he taimi ʻoku lauʻikovi loi ai, puke pe fakatangaʻi ʻa e fanga tokoua fua fatongiá, ʻoua ʻe hoko ʻo ilifiá. Lotu maʻanautolu, tokangaʻi ʻa e ngaahi mēmipa honau fāmilí, pea kumi ki ha ngaahi founga ʻaonga kehe ke fakahāhā ai hoʻo poupoú.​—Ngā. 12:5; 2 Kol. 1:10, 11.

13. ʻE lava fēfē ke fakavaivaiʻi ʻe he manukí ʻetau falala kia Sihova mo ʻene kautahá?

¹³ Ko e ngaahi kāinga taʻetuí, kaungāngāué pe kaungāakó te nau manukiʻi nai kitautolu koeʻuhi ko ʻetau ngāue fakamalangá pe ki heʻetau moʻuiʻaki ʻa e ngaahi tuʻunga fakaeʻulungaanga māʻolunga ʻa Sihová. (1 Pita 4:4) ʻOku nau tala atu nai: “ʻOku ou saiʻia pē au ʻia koe, ka ko hoʻo lotú ʻoku fuʻu fakataputapui pea ʻolokuonga.” ʻOku fakaangaʻi nai ʻe he niʻihi kitautolu ki heʻetau fakafeangai ki he faʻahinga ʻoku tuʻusí, ʻo pehē: “ʻE lava fēfē ke ke pehē ko ha tokotaha anga-ʻofa koe?” Ko e ngaahi lea pehení ʻe lava ke ne tō ʻa e ngaahi tenga ʻo e veiveiuá ʻi hotau ʻatamaí. ʻE kamata nai ke tau fifili: ‘ʻOku ʻamanekina ʻe Sihova ʻa e meʻa lahi meiate au? ʻOku fuʻu fakataputapui ʻene kautahá?’ Kapau ʻokú ke fehangahangai mo ha tuʻunga pehē, ʻe lava fēfē ke ke ʻunuʻunu ofi kia Sihova mo ʻene kautahá?

14. ʻOku totonu ke fēfē ʻetau fakafeangai ʻi hono manukiʻi kitautolu ʻe he niʻihi kehé ki he moʻuiʻaki ʻa e ngaahi tuʻunga ʻa Sihová? (Saame 119:50-52)

¹⁴ Fakapapauʻi ke pouaki ʻa e ngaahi tuʻunga ʻa Sihová. Ko Siope ko ha tangata naʻá ne pouaki ʻa e ngaahi tuʻunga ʻa Sihová neongo hono manukiʻi ia ʻi heʻene fai peheé. Ko e taha ʻo e ngaahi kaungāmeʻa loi ʻo Siopé naʻe aʻu ʻo ne feinga ke fakatuiʻi ʻa Siope naʻe ʻikai ke mahuʻinga ia ki he ʻOtuá pe te ne muimui ki Heʻene ngaahi tuʻungá pe ʻikai. (Siope 4:17, 18; 22:3) Ka naʻe fakafisi ʻa Siope ke tui ki he ngaahi loi ko iá. Naʻá ne ʻiloʻi ko e ngaahi tuʻunga ʻa Sihova ki he tonú mo e halá ʻoku totonú, pea naʻá ne fakapapauʻi ke pouaki ia. Naʻe ʻikai ke ne fakaʻatā ʻa e niʻihi kehé ke nau toʻo ʻene anga-tonú. (Siope 27:5, 6) Ko e hā ʻa e lēsoni kiate kitautolú? ʻOua ʻe fakaʻatā ʻa e manukí ke ne fakatupunga koe ke fehuʻia ʻa e ngaahi tuʻunga ʻa Sihová.  Fakafoki hoʻo fakakaukaú ki hoʻo hokosiá tonu. ʻIkai kuó ke toutou sio ko e ngaahi tuʻunga ʻa Sihová ʻoku tonu pea ʻoku ʻaonga kiate koe? Fakapapauʻi ke poupou ki he kautaha ʻoku nau pouaki ʻa e ngaahi tuʻunga ko iá. Pea heʻikai ʻaupito lava ʻe ha manuki mei ha faʻahinga tafaʻaki pē ʻo fakamavaheʻi koe meia Sihova.​—Lau ʻa e Saame 119:50-52.

15. Ko e hā naʻe manukiʻi ai ʻa Brizit?

¹⁵ Fakakaukau ki he hokosia ʻa Brizit, ko ha tuofefine ʻi ʻInitia. Naʻe manukiʻi ia ʻe he ngaahi mēmipa ʻo e fāmilí koeʻuhí ko ʻene tuí. Taimi nounou mei heʻene papitaiso ʻi he 1997, naʻe mole ʻa e ngāue hono husepāniti taʻetuí. Ko ia naʻá ne fili ke hiki mo Brizit pea mo ʻena tamaiki fefiné ʻo nofo mo ʻene ongo mātuʻá, naʻá na nofo ʻi ha kolo ʻe taha. Ka ʻe fehangahangai ʻa Brizit mo ha toe pole lahi ange. Koeʻuhi naʻe ʻikai ngāue hono husepānití, naʻe pau ke ne ngāue taimi-kakato ke tokonaki maʻa hono fāmilí. ʻIkai ko ia pē, ko e fakatahaʻanga ofi tahá naʻe kilomita nai ʻe 350 (maile ʻe 220) hono mamaʻó. Ko e meʻa fakamamahí, naʻe fakafepakiʻi ia ʻe he fāmili hono husepānití koeʻuhi ko ʻene tuí. Naʻe toe fakalalahi ange ʻa e fakafepakí pea naʻe pau ke toe hiki ʻa e fāmili ʻo Brizit. Pea fakafokifā pē naʻe mate hono husepānití. Ki mui ai, naʻe mate ʻa e taha ʻi heʻene tamaiki fefiné ko e kanisā ʻi hono taʻu 12 pē. Pea ʻi hono ʻai ke toe kovi ange ʻa e tuʻungá, naʻe tukuakiʻi ʻe he kāinga ʻo Brizit ko ia ʻa e tupuʻanga ʻo e ngaahi meʻá ni. Naʻa nau taukaveʻi kapau naʻe ʻikai ke ne hoko ko ha Fakamoʻoni ʻa Sihova, ko e kotoa ʻo e ngaahi meʻa fakamamahi ko ení naʻe ʻikai mei hoko. Neongo ia, naʻá ne hanganaki falala kia Sihova pea nofo ofi ki heʻene kautahá.

16. Naʻe anga-fēfē hono tāpuakiʻi ʻa Brizit ʻi heʻene pipiki ofi kia Sihova mo ʻene kautahá?

¹⁶ Koeʻuhi naʻe nofo ʻa Brizit ʻo fuʻu mamaʻo mei he fakatahaʻangá, naʻe fakalototoʻaʻi ia ʻe ha ʻovasia sēketi ke malanga ʻi hono feituʻu fakalotofonuá pea fai ʻa e ngaahi fakatahá ʻi hono ʻapí. ʻI he kamatá, naʻá ne ongoʻi lōmekina. Ka naʻá ne muimui ʻi he tatakí. Naʻá ne vahevahe ʻa e ongoongo leleí mo e niʻihi kehé, fakahoko ʻa e ngaahi fakatahá ʻi hono ʻapí, pea vaheʻi ʻa e taimi ki he lotu fakafāmilí mo ʻene tamaiki fefiné. Ko e hā ʻa e olá? Naʻe malava ke kamataʻi mo fakahoko ʻe Brizit ʻa e ngaahi ako Tohi Tapu, pea naʻe papitaiso ʻa e tokolahi ʻo ʻene kau akó. ʻI he 2005 naʻe  kamata ke ne ngāue ko ha tāimuʻa tuʻumaʻu. Ko ʻene falala kia Sihová pea mo ʻene mateaki ki heʻene kautahá naʻe fakapaleʻi. ʻOku tauhi faitōnunga ʻene tamaiki fefiné kia Sihova, pea ʻoku ʻi ai ha fakatahaʻanga ʻe ua ʻi he feituʻu ko iá he taimí ni! Naʻe tuipau ʻa Brizit ko Sihova naʻá ne ʻoange kiate ia ʻa e mālohi ke fekuki mo e ngaahi faingataʻá pea ke kātekina ʻa e manuki mei hono fāmilí.

17. Ko e hā ʻoku totonu ke tau fakapapauʻi ke faí?

¹⁷ ʻOku loto ʻa Sētane ke tau tui ʻoku liʻaki kitautolu ʻe Sihova ʻi heʻetau faingataʻaʻiá pea ko e poupou ki he kautaha ʻa Sihová te ne ʻai pē ke toe faingataʻa ange ʻetau moʻuí. ʻOku loto ʻa Sētane ke ʻai kitautolu ke tau ongoʻi ilifia ʻi he taimi ʻoku lauʻikovi loi ai, fakatangaʻi pe tuku pilīsone ʻa e fanga tokoua fua fatongiá. Pea fakafou ʻi he manukí, ʻokú ne loto ke fakavaivaiʻi ʻetau falala ki he ngaahi tuʻunga ʻa Sihová pea mo ʻEne kautahá. Kae kehe, ʻoku tau ʻiloʻi lelei ʻene ngaahi founga fulikivanú pea ʻoku ʻikai ke kākaaʻi kitautolu. (2 Kol. 2:11) Fakapapauʻi ke talitekeʻi ʻa e ngaahi loi ʻa Sētané pea nofoʻaki mateaki kia Sihova mo ʻEne kautahá. Manatuʻi, heʻikai ʻaupito ke liʻaki koe ʻe Sihova. (Saame 28:7) Ko ia ai, ʻoua ʻaupito ʻe fakaʻatā ha meʻa ke ne fakamavaheʻi koe meia Sihova!​—Loma 8:35-39.

18. Ko e hā te tau lāulea ki ai ʻi he kupu hono hokó?

¹⁸ ʻI he kupu ko ení, naʻa tau lāulea ki he ngaahi pole te tau fehangahangai nai mo ia mei tuʻa ʻi he fakatahaʻangá. Ka ko ʻetau falala kia Sihova mo ʻene kautahá ʻe lava foki ke ʻahiʻahiʻi ʻe he ngaahi pole ʻoku haʻu mei he loto fakatahaʻangá. ʻE lava fēfē ke tau fekuki lavameʻa mo e ngaahi pole peheé? Te tau lāulea ki heni ʻi he kupu hono hokó.