Ko ha Kole ʻOku Fai Takatakai ʻi he Māmaní

FAKAʻUTA atu ki he kakai ʻe laui miliona, naʻa mo e laui piliona, ʻoku nau kole kotoa ʻa e meʻa tatau. ʻOku nau kole ki he mafai māʻolunga taha ʻi he ʻunivēsí ke fakahoko ha fiemaʻu makehe. Neongo ia, ko e tokosiʻi ʻaupito pē ʻo kinautolu ʻoku nau ʻiloʻi pe ko e hā koā ʻa e meʻa tofu pē ko ia ʻoku nau kolé. ʻE lava nai ke hoko moʻoni ha meʻa pehē? Ko hono moʻoní, ʻoku hoko ia he ʻaho kotoa pē. Ko e hā ʻoku kole ki ai ʻa e fuʻu kakai kotoa ko ení? Ke hoko mai ʻa e Puleʻanga ʻo e ʻOtuá!

ʻI he fakafuofua ʻe taha, ʻoku ʻi ai nai ʻa e ngaahi lotu ʻe 37,000 ʻa ia ʻoku nau lau ko e Kalisitiane kinautolu, ʻo taukaveʻi ko Sīsū Kalaisi ʻa honau Takí. ʻOku laka hake he ua pilioná ʻa e kau mēmipa ʻo e ngaahi lotu ko iá. Ko e fuʻu tokolahi ʻo kinautolú ʻoku nau lotuʻaki ʻa e meʻa ʻoku faʻa ui Ko ʻEmau Tamai Hēvaní pe ko e Lotu ʻa e ʻEikí. ʻOkú ke ʻiloʻi ʻa e lotu ko ʻení? Hangē ko ia ne akoʻi ʻe Sīsū ki hono kau muimuí, ʻoku kamata ia ʻo peheni: “ʻE ʻOtua, ko ʻemau Tamai koe ʻoku ʻafio ʻi Hēvani, ke kei toputapu ai pē ho Huafá, ke hoko mai ho Puleʻangá. Ke fai ho finangaló ʻi māmani, ʻo hangē ko ia ʻoku fai ʻi Hēvaní.”—Mātiu 6:9, 10, Ko e Taulua.

Kuo laui senituli eni hono toutou lotuʻaki ʻe he kau lotú ʻa e ngaahi lea ko iá ʻi he ngaahi siasí. Kuo nau toe lau maʻuloto ia ʻi he ngaahi kulupu fakafāmilí pea ʻi he tuʻunga ko e faʻahinga tāutahá, ʻi he faingamālie mo e faingatāmaki. Kuo nau leaʻaki ʻa e ngaahi leá ni ʻi he loto-moʻoni pea aʻu ki hono leaʻaki ia ʻi he ongoʻi. Kuo ako maʻuloto ia ʻe he tokolahi kehe pea leaʻaki ia ʻo ʻikai faʻa fakakaukau ki hono ʻuhingá. Ko e kau mēmipa ko eni ʻo e ngaahi lotu ʻoku nau lau ko e kau Kalisitiané ʻoku ʻikai ko kinautolu pē ʻa e faʻahinga kuo nau ʻamanaki mo lotu ke hoko mai ʻa e Puleʻanga ʻo e ʻOtuá.

Ko ha Kole Meimei Tatau ʻi he Ngaahi Lotu Taʻefakakalisitiané

Ko ha lotu ʻiloa ʻa e tui faka-Siú ko e Kaddish ʻa e tokotaha mamahí. Neongo ʻoku ʻikai loko ai hano kaunga ki he maté pe mamahí, ʻoku leaʻaki anga-maheni ia ʻi he ngaahi taimi ʻo e mamahi he mate ha taha. ʻOku kole ʻe he tokotaha lotú: “Fakatauange ke ne [ʻOtuá] fokotuʻu ʻa hono Puleʻangá ʻi he kotoa hoʻo moʻuí . . . pea aʻu ʻo fai fakavavevave ia.” a Ko ha toe lotu ʻi he sinakoke he kuonga muʻá ʻoku lea ai fekauʻaki mo e ʻamanaki ki he Puleʻanga ʻo e Mīsaia mei he fale ʻo Tēvitá.

Ko e niʻihi ʻi he ngaahi lotu taʻefakakalisitiane kehé kuo fakamānako kiate kinautolu ʻa e fakakaukau fekauʻaki mo e Puleʻanga ʻo e ʻOtuá. Fakatatau ki he Times of India, ko ha taki lotu ʻInitia ʻiloa ʻi he senituli hono 19, ʻa ia naʻá ne mahuʻingaʻia ʻi hono fakafehokotaki ʻa e tui faka-Hinituú, Mosilemí mo e tui faka-Kalisitiané, naʻá ne pehē: “Ko e puleʻanga moʻoni ʻo e ʻOtuá heʻikai ʻiloʻi ia kae ʻoua kuo fakatahaʻi ʻa e hahaké mo e hihifó.” Pea ko ha pule ako ʻo ha kolisi ʻIsilami ʻi Strathfield, ʻAositelēlia, naʻá ne fai ki muí ni ha tohi ki ha nusipepa: “ʻI he hangē ko e kau Mosilemi kotoa pē, ʻoku ou tui ʻe foki mai ʻa Sīsū ʻo fokotuʻu ʻa e Puleʻanga moʻoni ʻo e ʻOtuá.”

ʻOku ʻikai ha veiveiua, ko e faʻahinga ʻoku nau ʻamanaki pea kole he taimí ni ke hoko mai ʻa e Puleʻanga ʻo e ʻOtuá ʻoku laui piliona honau  tokolahí. Kae fakakaukau angé ki ha foʻi moʻoni mahuʻinga.

ʻOku pau pē ʻokú ke ʻiloʻi ko kimautolu Kau Fakamoʻoni ʻa Sihová, ʻa ia ʻoku mau pulusi ʻa e makasini ko ení, ʻoku mau ʻalu mei he fale ki he fale ʻi homou feituʻú ke fai ʻa e ngaahi fetalanoaʻaki mo e kakaí fekauʻaki mo e Tohi Tapú. ʻI he taimí ni ʻoku mau fai ʻa e ngāué ni ʻi he māmaní kotoa ʻi he ngaahi fonua ʻe 236 pea ʻi he ngaahi lea laka hake he 400. Ko e kaveinga tefito ʻo ʻemau malangá ko e Puleʻanga ʻo e ʻOtuá. Ko hono moʻoní, fakatokangaʻi ange ʻa e ʻuluʻi kaveinga kakato ʻo e makasini ko ení Ko e Taua Leʻo ʻOku Fanongonongo Ai ʻa e Puleʻanga ʻo Sihová. ʻOku mau faʻa ʻeke ki he kakaí pe ʻoku nau lotu ke hoko mai ʻa e Puleʻanga ko iá. ʻOku tali ʻio ʻa e fuʻu kakai tokolahi. Kae kehe, ʻi hono ʻeke pe ko e hā ʻa e Puleʻanga ko iá, ko e tokolahi taha ʻo e kakaí ʻoku nau tali, ʻo pehē, “ʻOku ʻikai haʻaku ʻilo ki ai,” pe ʻoku taʻemahino mo taʻepau ʻenau talí.

Ko e hā ʻoku kole ai ʻa e fuʻu tokolahi ki he meʻa ʻoku ʻikai lava ke nau mahinoʻí? ʻOku peheé koeʻuhi ko e Puleʻanga ʻo e ʻOtuá ko ha foʻi fakakaukau fihi ia mo taʻemahino? ʻIkai. Ko e Puleʻangá ʻoku fakamatalaʻi fakaʻāuliliki mo mahino ia i he Tohi Tapú. ʻIkai ko ia pē, ko e pōpoaki ʻa e Tohi Tapú fekauʻaki mo e Puleʻangá ʻoku lava ke ne ʻoatu ʻa e ʻamanaki moʻoni ʻi he ngaahi taimi fakapōpōʻuli ko ení. ʻI he kupu hoko maí, te tau sio ai ki he anga hono fakamatalaʻi ʻe he Tohi Tapú ʻa e ʻamanaki ko iá. Pea te tau toki sio leva ki he taimi ʻe hoko mai ai ʻa e tali ki he lotu ʻa Sīsū ke hoko mai ʻa e Puleʻangá.

[Fakamatala ʻi lalo]