Langa Hake Ho Fāmilí ʻAki ʻa e “Ngaahi Lea Vovo”

ʻI HE matolo māmālie atu ha laui minití, naʻe ʻāsili ai pē ʻa e ongoʻi matalili ʻa David. ʻI heʻene tatali ʻi he kaá ki hono uaifí, naʻá ne toutou fakasio ki hono uasí. ʻI he taimi naʻe iku ʻo hū mai ai ki tuʻa ʻa Diane, ko hono uaifí mei he falé, naʻe ʻikai kei lava ʻo mataʻotaʻofi ʻa e lele hake ʻene ʻitá.

“ʻOku ʻikai ke ke sio mai ki he fakahela moʻoni ʻa e tali atu kia koé?” ko ʻene kailá ia. “ʻOkú ke tōʻohi maʻu pē! Ko e hā ʻoku ʻikai ʻai ai mo ke feinga tuʻo taha ke maau ki muʻa ʻi he taimí?”

Naʻe loto-mamahi ai ʻa Diane. Naʻá ne tangi peá ne lele ki fale. ʻI he taimi pē ko iá, naʻe ʻiloʻi ai ʻe David ʻa ʻene fehālaakí. Ko ʻene kaikailá kuo ʻai pē ai ke toe kovi ange ʻa e ngaahi meʻá. Ko e hā ʻe lava ke ne fai he taimi ko ení? Naʻá ne tāmateʻi ʻa e kaá, ʻai ʻene fuʻu māpuhoi, pea luelue māmālie atu ki hono uaifí ki fale.

Ko e fakatātā ko ení ʻoku ʻomai ai ha meʻa moʻoni ʻoku lava ke hoko, ʻikai ko ia? Kuó ke fakaʻamu nai ʻi ha taimi ke folo hoʻo leá? ʻI he taimi ʻoku tau lea taʻefakakaukau aí, ʻoku tau faʻa leaʻaki ai ʻa e ngaahi meʻa ʻoku tau toki fakaʻiseʻisa ai ki mui. ʻI he ʻuhinga lelei ʻoku pehē ʻe he Tohi Tapú: “Ko e loto ʻo e faitotonu ʻoku ne fakakaukau ha tali lelei.”—Palovepi 15:28.

Kae kehe, ʻoku lava ʻo faingataʻa ke fakakaukau lelei ki muʻa ke leá, tautefito ʻi he taimi ʻoku tau ongoʻi ʻita, ilifia pe loto-mamahi aí. Tautefito ʻi he ngaahi mēmipa ofi ʻi he fāmilí, ko ha feinga pē ke fakahaaʻi ʻetau ngaahi ongoʻí ʻoku lavangofua ke iku ia ki hono tukuakiʻi pe fakaangaʻi ʻa e tokotaha ʻe tahá. Ko e meʻa ko iá ʻoku iku ʻo fakatupunga nai ai ʻa e ngaahi ongoʻi mamahi pe langaʻi ha fakakikihi.

Ko e hā nai te tau fai ke maʻu ai ha ngaahi ola lelei angé? ʻE lava fēfē ke tau taʻofi hono ikunaʻi kitautolu ʻe heʻetau ngaahi ongoʻí? ʻOku lava ke maʻu ha faleʻi ʻaonga mei he tokotaha-tohi Tohi Tapu ko Solomoné.

Fakakaukau ki he Meʻa ke Leaʻakí mo e Founga ke Leaʻakí

ʻI hono hiki ʻe Solomone ko e tokotaha-tohi ʻo e tohi Koheletí ʻa ʻene fakamatala moʻoni ki he muna ʻa e moʻuí, ʻoku hā mahino naʻá ne maʻu ʻa e ngaahi ongoʻi mālohi fekauʻaki mo e tuʻunga naʻá ne fakamatalaʻí. “Naʻa ku fehiʻa ki he moʻui,” ko ʻene leá ia. ʻI he taimi ʻe taha, naʻá ne ui ia ko e “muna ʻa e meʻa kotoa pe.” (Koheleti 2:17; 12:8) Neongo ia, ko e Koheletí ʻoku ʻikai ko ha lisi ia ʻo e ngaahi ongoʻi feifeitamaki ʻa Solomoné. Naʻe ʻikai te ne fakakaukau ʻoku feʻungamālie ke talanoa pē ki he ngaahi tuʻunga koví. ʻI he fakaʻosi ʻo e tohí, ʻoku fakaeʻa ai ʻe Solomone naʻá ne haʻao “ke maʻu ha ngaahi lea vovo, mo e meʻa kuo tohi totonu.” (Fakaʻītali ʻamautolu; Koheleti 12:10) ʻOku pehē ʻi ha liliu ʻe taha naʻá ne “feinga ke fakamatalaʻi ʻa e ngaahi meʻá ni ʻi he founga lelei taha mo tonu tahá.”—Contemporary English Version.

ʻOku hā mahino naʻe ʻiloʻi ʻe Solomone naʻe pau ke ne mapuleʻi ʻene ngaahi ongoʻí. Ko hono moʻoní, naʻá ne hanganaki ʻeke hifo kiate ia: ‘ʻOku moʻoni mo tonu koā ʻa e meʻa ʻoku ou palani ke leaʻakí? Kapau te u ngāueʻaki ʻa e ngaahi lea  ko ení, ʻe vovo mo ala tali ia ʻe he niʻihi kehé?’ ʻI he fekumi ki he “ngaahi lea vovo” ʻo e moʻoní, naʻá ne malava ai ke taʻofi ʻene ngaahi ongó mei hono ʻai ke puputuʻu ʻene fakakaukaú.

Ko e olá ʻoku ʻikai ko ha ngāue mataotao fakaefaʻu tohi pē ia ka ko ha matavai lahi foki ia ʻo e poto fakamānavaʻi fakaʻotua ʻo kau ki he ʻuhinga ʻo e moʻuí. (2 Timote 3:16, 17) ʻOku lava ke tokoniʻi kitautolu ʻe he founga ʻa Solomone ʻi he lāulea ki ha tuʻunga-lea ʻoku felāveʻi lahi mo e ongó ke tau fetuʻutaki lelei ange ai mo e faʻahinga ʻoku tau ʻofa aí? Fakakaukau angé ki ha fakatātā.

Ako ke Mapuleʻi Hoʻo Ongoʻí

Ko ha fakatātā, tau pehē pē ʻoku foki mai ha tamasiʻi ki ʻapi mei he akó ʻokú ne toʻo mai ʻene laʻi līpōtí mo mata mamahi. ʻOku vakai hifo ʻene tamaí ki he lisi ʻo e ngaahi lēsoní pea fakatokangaʻi ha maaka māʻulalo ʻi he taha ʻo e ngaahi lēsoní. ʻOku ʻita leva ai ʻa e tamaí, ʻi heʻene fakakaukau atu ki he taimi lahi naʻe tolotoloi ai ʻe he tamasiʻí hono fai ʻene homueká. ʻOku lele hake ʻi he tamaí ʻa e ongoʻi fie homo atu ʻene tafulu ʻo pehē: “ʻOkú ke fakapikopiko pē koe! Kapau te ke hokohoko atu eni, heʻikai ʻaupito ke ke lavameʻa!”

Ki muʻa ke ne fakaʻatā ke puleʻi ʻe he ngaahi ongoʻi ʻitá ʻa ʻene talí, ʻoku lelei ki he tamaí ke ne ʻeke hifo kiate ia, ‘ʻOku moʻoni pe tonu koā ʻa e meʻa ʻoku ou fakakaukau ki aí?’ Ko e fehuʻí ni ʻe lava ke tokoniʻi ai ia ke ʻoua te ne fakaʻatā ʻene ngaahi ongoʻí ke ne fakanenefuʻi ʻa e meʻa moʻoni ʻoku hokó. (Palovepi 17:27) ʻE hoko moʻoni ʻa e fohá ʻo ʻikai hano ʻaonga koeʻuhi ko ʻene faingataʻaʻia ʻi ha foʻi lēsoni ʻe taha? ʻOkú ne angaʻaki ʻa e fakapikopikó, pe ko ʻene tolotoloi pē ʻene homueká koeʻuhi ko ʻene fāinga ke mahinoʻi ʻa e niʻihi ʻo e ngaahi lēsoní? ʻOku toutou fakamamafaʻi ʻe he Tohi Tapú ʻa e mahuʻinga ʻo hono maʻu ha vakai fakalelei mo totonu ki he ngaahi meʻá. (Taitusi 3:2; Semisi 3:17) Ke fakalototoʻaʻi ha kiʻi leka, ʻoku fiemaʻu ki ha mātuʻa ke ne leaʻaki ʻa e ‘meʻa ʻoku totonú.’

Kumi ki he Ngaahi Foʻi Lea Totonu

ʻI he fakapapauʻi pē ʻe he tamaí ʻa e meʻa ke leaʻakí, te ne ʻeke hifo nai kiate ia, ‘ʻE lava fēfē ke u leaʻaki ia ʻi he ngaahi foʻi lea ʻe ongoʻi ai ʻe hoku fohá ʻoku vovo pea ala talí?’ Ko hono moʻoní, ko hono maʻu ʻa e ngaahi foʻi lea totonú ʻoku ʻikai faingofua. Ka ʻoku fiemaʻu ke manatuʻi ʻe he ngaahi mātuʻá ko e kau talavoú ʻoku nau faʻa maʻu ʻa e hehema ke fakakaukau ko e ʻikai pē ke nau haohaoá ʻoku nau taʻelavameʻa. Te nau ngāueʻaki nai ha taʻelavameʻa pe vaivaiʻanga ʻe taha pea vakai tōtuʻa ki hono mafatukitukí, ʻo kamata ai ke ne fakapapauʻi ʻa e anga ʻo ʻenau vakai hifo kia kinautolú. Kapau ʻoku ʻita tōtuʻa ha mātuʻa, te ne fakamālohiʻi nai ai ki heʻene kiʻi tamá ʻa e fakakaukau ʻoku ʻikai haʻane leleí. ʻOku pehē ʻi he Kolose 3:21: “ʻOua te mou fakahohaʻasi hoʻomou fanau, naʻa faifai pea nau loto kina.”

Ko e ngaahi foʻi lea hangē ko e “maʻu pē” mo e “ʻikai ʻaupitó” ʻoku faʻa fakafuofuahalaʻi pe fakalahiʻi ai ʻa e tuʻunga moʻoni ʻoku hokó. ʻI he taimi ʻoku pehē ai ʻe ha mātuʻa, “ʻE ʻikai ʻaupito pē hao ʻaonga ʻou,” ʻe lava fēfē ke kei tauhi ʻe he kiʻi tamá ʻa hono ngeiá? Kapau ko e ngaahi tuʻunga lahi ʻi he moʻuí ʻoku angaʻaki ai ʻa e lea fakaanga peheé, ʻe kamata nai ai ha kiʻi leka ke sio hifo kiate ia ʻoku ʻikai ʻaupito toe ʻi ai haʻane siaʻa. Ko e moʻoni, ko e meʻa ko iá ʻoku ʻikai ngata pē heʻene fakalotosiʻí ka ʻoku toe taʻemoʻoni foki.

ʻOku faʻa lelei ange ke fakamamafaʻi ʻa e ngaahi tafaʻaki lelei ʻo ha tuʻunga pē. Ko e tamai ʻi heʻetau talanoa fakatātaá te ne leaʻaki nai ha meʻa hangē ko ení: “Tamasiʻi, ʻoku lava ke u sio ʻokú ke loto-mamahi koeʻuhi ko e māʻulalo ho māká. Neongo ia, ʻoku ou ʻiloʻi ko hono fakalūkufuá ʻokú ke tokanga ʻaupito ki hoʻo ʻū ʻasainimení. Ko ia ai fēfē ke ta talanoa fekauʻaki mo e lēsoni ko ení mo kumi ha founga ke ikuʻi ha ngaahi palopalema pē ʻokú ke fehangahangai nai mo ia.” Ke fakapapauʻi ʻa e founga lelei taha ke tokoniʻi ai ʻa hono fohá, ʻe toe ʻeke nai ʻe he tamaí ha ngaahi fehuʻi pau ke sio ai pe ʻoku ʻi ai ha ngaahi palopalema tefito.

Ko ha founga anga-ʻofa mo fakakaukauʻi lelei pehē ʻoku ngalingali ʻe ola lelei ʻaupito ange ia ʻi ha kaikaila. “Ko e ngaahi lea ʻofa,” ko e fakapapauʻi mai ia ʻe he Tohi Tapú, ʻoku “melie ki he loto, pea ko e faitoʻo ki hoto ngaahi hui.” (Palovepi 16:24) Ko e fānaú—ko hono moʻoní, ko e ngaahi mēmipa kotoa ʻo e fāmilí—ʻoku nau lakalakaimonū ʻi ha ʻātakai melino mo ʻofa.

“Mei he Meʻa ʻi he Loto ʻOku Hulu”

Toe fakakaukau ki he husepāniti naʻe lave ki ai ʻi he kamatá. ʻIkai naʻe mei lelei ange kapau naʻá ne vaheʻi ha taimi ke kumi ai ki he “ngaahi lea vovo” ʻo e moʻoní kae ʻikai ko e puhiʻi atu pē ʻa ʻene ongoʻi matalilí ki hono uaifí? Ko ha  husepāniti ʻi ha tuʻunga pehē ʻe lelei ke ne ʻeke hifo kiate ia: ‘Tatau ai pē pe ʻoku fiemaʻu ke ngāue ʻa hoku uaifí ke toe tauhi taimi ange, ko e moʻoni ʻokú ne tōmui maʻu pē? Ko e taimi lelei taha eni ke ʻohake ai ʻa e meʻá ni? ʻE faifai ange pea ueʻi ia ʻe he ngaahi lea ʻita mo fakaangá ke ne loto ke fakaleleiʻi hono tuʻungá?’ Ko e kiʻi tuʻu ʻo ʻeke hifo kia kitautolu ʻa e ngaahi fehuʻi peheé ʻe lava ke tokoni ia ke tau fakaʻehiʻehi mei hono fakalotomamahiʻi taʻefakakaukauʻi ʻa e faʻahinga ko ia ʻoku tau ʻofa aí.—Palovepi 29:11.

Ko ia ai, fēfē kapau ʻoku toutou iku ʻetau ngaahi fetalanoaʻaki fakafāmilí ki ha fakakikihi? ʻE fiemaʻu nai ke tau sio ke toe loloto ange, ʻo fakakaukauʻi ʻa e ngaahi ongoʻi ʻoku ʻia kitautolu ʻi he ngaahi lea ʻoku tau filí. Ko e meʻa ʻoku tau leaʻakí, tautefito ʻi he taimi ʻoku tau loto-mamahi ai pea ʻi he malumalu ʻo ha tengé, ʻe fakahaaʻi nai ai ʻa e meʻa lahi fekauʻaki mo e tuʻunga moʻoni ʻo hotau lotó. Naʻe pehē ʻe Sīsū: “Ko e talanoa ʻa e ngutu ʻoku mei he meʻa ʻi he loto ʻoku hulu.” (Mt. 12:34) ʻI hono toe fakaleá, ʻoku faʻa tapua atu ʻi heʻetau leá ʻa ʻetau ngaahi fakakaukau ʻi lotó, ngaahi holí mo e ngaahi tōʻongá.

ʻOku moʻoni, fakatuʻamelie mo mohu ʻamanaki ʻetau vakaí? Ko e tō leva mo e ngaahi lea ʻo ʻetau ngaahi fetalanoaʻakí ʻoku ngalingali ʻe tapua atu ai. ʻOku tau hehema ke anga-fefeka, fakatuʻatamaki pe fakaanga? Kapau ko ia, te tau fakalotosiʻi nai ai ʻa e niʻihi kehé ʻi he meʻa ʻoku tau leaʻakí pe ʻi he founga ʻoku tau leaʻakí. ʻOku ʻikai nai ke tau lāuʻilo ki he hoko ʻa ʻetau fakakaukaú pe leá ʻo ʻikai leleí. ʻE aʻu nai ʻo tau tui ko e founga ʻo ʻetau sio ki he ngaahi meʻá ʻoku tonu. Ka kuo pau ke tau tokanga fekauʻaki mo e kākaaʻi-kitá.—Palovepi 14:12.

Ko e meʻa mālié ko ʻetau maʻu ʻa e Folofola ʻa e ʻOtuá. ʻOku lava ke tokoniʻi kitautolu ʻe he Tohi Tapú ke sivisiviʻi ʻetau fakakaukaú pea fakafuofuaʻi ʻa e ngaahi fakakaukau ʻoku tonú mo ia ʻoku fiemaʻu ke fakatonutonú. (Hepelu 4:12; Semisi 1:25) Tatau ai pē pe ko e hā nai hotau anga ne tau tupu mo iá pe naʻe fēfē hotau ʻohaké, ko kitautolu kotoa ʻoku lava ke tau fili ke liliuʻi ʻa e anga ʻo ʻetau fakakaukaú pea ngāue ki ai ʻo kapau ʻoku tau fiemaʻu moʻoni ke fai pehē.—Efeso 4:23, 24.

Tānaki atu ki hono ngāueʻaki ʻo e Tohi Tapú, ʻe lava ke tau fai ha toe meʻa kehe ke fakafuofuaʻi ʻaki ʻetau founga fetuʻutakí. ʻEke pē ki he niʻihi kehé. Ko e fakatātaá, kole ki ho hoá pe ki hoʻo kiʻi leká ke ne tala totonu atu pe ʻokú ke fēfē ʻi he fekauʻaki mo e meʻa ko ení. Talanoa ki ha kaumeʻa matuʻotuʻa ʻokú ne ʻiloʻi lelei koe. ʻE fiemaʻu ʻa e anga-fakatōkilalo ke tali ai ʻa e meʻa te nau leaʻakí pea ke fai ha ngaahi feʻunuʻaki ʻa ia ʻe fiemaʻu nai.

Fakakaukau ki Muʻa Ke Ke Leá!

Fakaʻosí, kapau ʻoku tau loto moʻoni ke fakaʻehiʻehi mei hono fakalotomamahiʻi ʻa e niʻihi kehé ʻi heʻetau leá, kuo pau ke tau fai ʻa e meʻa ʻoku leaʻaki ʻe he Palovepi 16:23: “Ko e kakai ʻatamaiʻiá [ʻa ia ʻoku nau potó] ʻoku nau fakakaukau ki muʻa ke nau leá; ko e meʻa leva ʻoku nau leaʻakí ʻoku fakaueʻiloto ange.” (Today’s English Version) Heʻikai nai faingofua maʻu pē ke mapuleʻi ʻetau ngaahi ongoʻí. Neongo ia, kapau ʻoku tau feinga ke mahinoʻi ʻa e niʻihi kehé kae ʻikai ke tukuakiʻi pe tuku hifo kinautolu, ʻe faingofua ange ai hono maʻu ʻa e ngaahi foʻi lea totonu ke tau leaʻakí.

Ko e moʻoni, ʻoku ʻikai ha taha ʻia kitautolu ʻe haohaoa. (Semisi 3:2) ʻI he taimi ʻe niʻihi, ʻoku tau lea taʻefakakaukau kotoa pē ai. (Palovepi 12:18) Ka ʻi he tokoni ʻa e Folofola ʻa e ʻOtuá, ʻoku lava ai ke tau ako ke fakakaukau ki muʻa ke tau leá pea ke fakamuʻomuʻa ʻa e ngaahi ongoʻi mo e meʻa ʻa e niʻihi kehé ʻi haʻatautolú. (Filipai 2:4) Tau fakapapauʻi ke fekumi ki he “ngaahi lea vovo” ʻo e moʻoní, tautefito ʻi he taimi ʻoku tau lea ai ki he ngaahi mēmipa ʻi he fāmilí. Heʻikai leva ke fakalotomamahi mo holoki hifo ʻetau leá, ka te ne fakamoʻui mo langa hake ʻa e faʻahinga ʻoku tau ʻofa aí.—Loma 14:19.

[Fakatātā ʻi he peesi 12]

ʻE lava fēfē ke ke fakaʻehiʻehi mei hono leaʻaki ha meʻa te ke toki fakaʻiseʻisa ai ʻamui?