Maʻu ʻa e Fakafiemālie Neongo ʻa e ʻIkai ha ʻAmanaki ʻi he Kei Siʻí

FAKAMATALA FAI ʻE EUSEBIO MORCILLO

ʻI Sepitema 1993, naʻá ku ʻaʻahi ai ki ha pilīsone leʻohi malu. Ko e meʻa naʻe fai aí ko e papitaiso ʻa ha pōpula, ko hoku tuofefine siʻisiʻi ko Mariví. Naʻe mamata fakaʻapaʻapa ha kau pōpula mo e kau ʻōfisa ʻe niʻihi ʻi he pilīsoné ʻi heʻeku fakahoko ʻa e papitaisó. Ki muʻa ke u fakahaaʻi ʻa e ʻuhinga naʻá ku ʻi ai ai mo hoku tuofefiné, tuku ke u fakamatala ki heʻema moʻui ʻi he kei siʻí.

NAʻE fāʻeleʻi au ʻi Sipeini ʻi Mē 5, 1954, ko e lahi taha au ʻi he fānau ʻe toko valu. Ko Mariví ʻa e fika tolú. Naʻe tauhi hake kimautolu ʻe heʻemau kui-fefiné ʻo mau mālohi ʻi he lotu Katoliká, pea ʻoku ou manatu lelei ki heʻeku ongoʻi līʻoa ki he ʻOtuá heʻeku kei siʻí lolotonga ʻeku nofo mo iá. Ka ko e ʻātakai ʻi he ʻapi ʻo ʻeku ongo mātuʻá naʻe ʻikai ʻaupito fakalaumālie. Naʻe faʻa tā ʻe he tangataʻeikí ʻa e fineʻeikí mo kimautolu fānaú. Naʻa mau nofo manavahē maʻu pē, pea naʻá ku loto-mamahi lahi ʻi he sio ki he faingataʻaʻia ʻa ʻeku fineʻeikí.

ʻI he ʻapiakó, naʻá ku fehangahangai ai mo e ngaahi tuʻunga fakalotosiʻi kehe. Ko e taha ʻo e kau faiakó, ko ha pātele, naʻá ne tuki homau ʻulú ki he holisí kapau naʻe hala ʻemau talí. Naʻe pāʻusiʻi ʻe ha pātele ʻe taha ʻa e kau akó lolotonga ʻene vakaiʻi ʻenau homueká. ʻIkai ko ia pē, ko e ngaahi akonaki faka-Katolika ko ia hangē ko e afi ʻo helí naʻá ne ʻai ke u puputuʻu mo ilifia. Naʻe vave ʻa e hoko ʻo hōloa ʻeku līʻoa ki he ʻOtuá.

Fihia ʻi ha Moʻui Taumuʻavalea

ʻI he ʻikai ha tataki fakalaumālié, naʻá ku kamata ke fakamoleki ai ʻa e taimí ʻi he feohi mo e kakai ʻulungāanga taʻetaau mo fakamālohi ʻi he ngaahi naitikalapú. Naʻe faʻa fai ai ʻa e ngaahi fuhu, ʻo ngāueʻaki ko ha ngaahi meʻatau ʻa e ngaahi hele, sēini, konga sioʻata mo e ngaahi seá. Neongo naʻe ʻikai te u fie kau ʻi he fakamālohí, ʻi he taimi ʻe taha naʻe tukiʻi ai au ʻo ʻikai te u toe ʻiloʻi ha meʻa.

Naʻe faifai pē ʻou foʻi ʻi he ʻātakai ko iá peá u kumi ai ki ha ngaahi naitikalapu naʻe lōngonoa angé. Kae kehe, naʻa mo e ngaahi feituʻu ko iá, naʻe ngāueʻaki lahi ai ʻa e faitoʻo kona tapú. Pea naʻe ʻai ʻe he faitoʻo kona tapú ke u maʻu ʻa e ongo-hala mo e puputuʻu, ʻo ʻikai ha fiefia mo ha nonga.

Neongo naʻá ku taʻefiemālie, naʻá ku tohoakiʻi ʻa e taha ʻo hoku fanga kiʻi tehiná, ko José Luis, mo haku kaumeʻa ofi, ko Miguel, ki he founga moʻui  tatau. Naʻa mau fihia fakataha mo e toʻutupu tokolahi kehe ʻi Sipeini ʻi he taimi ko iá ʻi ha māmani fulikivanu. Naʻá ku fai ha meʻa pē ke maʻu ai ha paʻanga ki he faitoʻo kona tapú. Naʻe mole ʻosi ʻa hoku ngeiá.

Fakahaofi Au ʻe Sihova

Lolotonga ʻa e taimi ko ení, naʻá ku talanoa lahi ai mo hoku ngaahi kaumeʻá fekauʻaki mo e ʻi ai ʻa e ʻOtuá pea mo e ʻuhinga ʻo e moʻuí. Naʻá ku kamata fekumi ki he ʻOtuá ʻaki ʻeku fakasio ha taha ke fakahaaʻi ki ai ʻeku ngaahi ongoʻí. Naʻá ku fakatokangaʻi ai ʻa Francisco, ko e taha ʻo hoku ngaahi kaungāngāué, ʻa ia naʻá ne kehe mei he niʻihi kehé. Naʻá ne hā ngali fiefia, faitotonu mo anga-lelei, ko ia naʻá ku fili ai ke fakahaaʻi kiate ia ʻeku ongoʻí. Ko Francisco ko e taha ia ʻo e Kau Fakamoʻoni ʻa Sihová, pea naʻá ne ʻomai kiate au ha ʻīsiu ʻo e Taua Leʻo naʻe ʻi ai ha kupu ʻi he faitoʻo kona tapú.

Hili hono lau ʻa e kupú, naʻá ku lotu ai ki he ʻOtuá ʻo kole ha tokoni: “ʻEiki, ʻoku ou ʻiloʻi ʻokú ke ʻi ai, pea ʻoku ou loto ke ʻiloʻi koe mo fai ho finangaló. Afeitaulalo muʻa ʻo tokoniʻi au!” Naʻe ngāueʻaki ʻe Francisco mo e Kau Fakamoʻoni kehe ʻa e Tohi Tapú ke fakalototoʻaʻi au pea ʻomai ʻa e ʻū tohi makatuʻunga he Tohi Tapú ke u lau. Naʻá ku ʻiloʻi ai naʻa nau ʻomai ʻa e tokoni ko ia naʻá ku kole mei he ʻOtuá. Naʻe vave ʻa e kamata ke u talanoa ki hoku ngaahi kaumeʻá pea mo José Luis ʻo fekauʻaki mo e ngaahi meʻa naʻá ku akó.

ʻI he ʻaho ʻe taha ʻi heʻemau mavahe mei ha koniseti fasi ngatūtū mo e niʻihi ʻo hoku ngaahi kaumeʻá, naʻá ku fakamavaheʻi ai au mei he kulupú. Naʻá ku sio kia kinautolu ʻi he tuʻunga ko ha tokotaha mamata pē, pea naʻá ku toki ʻiloʻi ai ʻa e palakū ʻa homau ʻulungāangá koeʻuhi ko e ngāue ʻa e faitoʻo kona tapú. ʻI he mōmeniti pē ko iá, naʻá ku fakapapauʻi ai ke liʻaki ʻa e founga moʻui ko iá pea hoko ko e taha ʻo e Kau Fakamoʻoni ʻa Sihová.

Naʻá ku kole ai ha Tohi Tapu kia Francisco, pea naʻá ne ʻomai kiate au ha Tohi Tapu fakataha mo e tohi Ko e Moʻoni ʻa ia ʻOku Fakatau ki he Moʻui Taʻengata. a ʻI heʻeku lau fekauʻaki mo e talaʻofa ʻa e ʻOtuá te ne holoholo ʻa e loʻimata kotoa pē pea toʻo naʻa mo e maté, naʻe ʻikai haʻaku veiveiua kuó u maʻu ʻa e moʻoni ʻa ia ʻe lava ke ne fakatauʻatāinaʻi ʻa e faʻahinga ʻo e tangatá. (Sione 8:32; Fakahā 21:4) Ki mui ai, naʻá ku maʻu ha fakataha ʻi he Fale Fakatahaʻanga ʻo e Kau Fakamoʻoni ʻa Sihová. Ko e anga-fakakaumeʻa mo e māfana naʻá ku maʻu aí naʻe maongo lahi kiate au.

ʻI he vēkeveke ke talanoaʻi ki he niʻihi kehé ʻa ʻeku hokosia ʻi he Fale Fakatahaʻangá, naʻá ku fakatahatahaʻi mai leva ʻa José Luis mo hoku ngaahi kaumeʻá ʻo talanoa kia kinautolu fekauʻaki mo ia. ʻI ha ngaahi ʻaho ki mui ai, naʻa mau maʻu kotoa ai ʻa e fakatahá. Ko ha taʻahine naʻe tangutu ʻi he ʻotu sea ʻi muʻá naʻá ne hila mai kia kimautolu. ʻOku hā mahino naʻá ne ʻohovale ʻi he sio ki he kau hipi ʻulu loloa ko ení, pea naʻá ne feinga lahi ke ʻoua ʻe toe hanga mai. ʻOku pau naʻá ne ʻohovale ʻi heʻemau toe foki atu ki he Fale Fakatahaʻangá ʻi he uike hoko maí, he ʻi he taimi ko ení naʻa mau tui suti ai mo e hēkesi.

ʻIkai fuoloa mei ai, naʻá ku toe maʻu ai mo Miguel ha ʻasemipilī fakasēketi ʻa e Kau Fakamoʻoni ʻa Sihová. Kuo teʻeki ai ʻaupito ke ma hokosia ha meʻa hangē ko iá ki muʻa—ko ha fetokouaʻaki moʻoni ʻo e kakai ʻo e taʻumotuʻa kehekehe. Pea ko e meʻa naʻe faikehé, he naʻe fai ʻa e ʻasemipilií ʻi he falefaiva tatau ʻa ia ne ma toki ʻi ai ʻi ha koniseti fasi ngatūtū. Ka ʻi he taimi ko ení, ko e ʻātakai mo e fasi naʻá ma fanongoá naʻe fakalotofiefia.

Naʻe kamata ke mau ako Tohi Tapu kotoa. ʻI ha  māhina nai ʻe valu ki mui ai, ʻi Siulai 26, 1974, naʻá ku papitaiso ai mo Miguel. Naʻá ma fakatou taʻu 20. Ko e toko fā kehe heʻemau kulupú naʻa nau papitaiso ʻi ha ngaahi māhina siʻi mei ai. Ko e ako Tohi Tapu naʻá ku maʻú naʻá ne ueʻi au ke u kamata tokoni ʻi he ngāue fakaʻapí ki heʻeku faʻē anga-kātakí pea ke vahevahe kiate ia ʻa ʻeku tui foʻoú. Naʻá ma hoko ai ʻo vāofi. Naʻá ku toe vaheʻi ʻa e taimi lahi ke tokoniʻi ai hoku fanga tehiná mo e tuofāfiné.

Ne aʻu ki ha taimi naʻe ako ai ʻa e moʻoni Fakatohitapú ʻe heʻeku faʻeé mo ʻemau fānaú pea nau papitaiso kotoa ʻo hoko ko e Kau Fakamoʻoni ʻa Sihova, tuku kehe pē ʻa e toko taha. ʻI he 1977, naʻá ku mali ai mo Soledad. Ko e kiʻi taʻahine ia naʻá ne ʻohovale ʻi heʻene sio mai kia kimautolu ʻi heʻemau ʻuluaki ʻaʻahi ki he Fale Fakatahaʻangá. ʻI loto ʻi ha ngaahi māhina siʻi, naʻá ma fakatou hoko ai ko e ongo tāimuʻa, hangē ko ia ʻoku uiʻaki ʻe he Kau Fakamoʻoni ʻa Sihová ʻa e kau malanga taimi-kakato ʻo e ongoongo leleí.

Fakahaofi ha Tokotaha ʻOfeina

Naʻe pāʻusiʻi ʻa hoku tuofefine siʻisiʻi ko Mariví ʻi heʻene kei siʻí, pea ko e puipuituʻa fakalilifu ko iá naʻe uesia lahi ai ia. ʻI heʻene taʻu hongofulu tupú, naʻá ne kamata ai ha founga moʻui ʻulungāanga taʻetaau ʻa ia naʻe kau ki ai ʻa e faitoʻo kona tapu, kaihaʻa mo e paʻumutu. ʻI hono taʻu 23, naʻe ʻave ai ia ki pilīsone, ʻa ia naʻá ne hokohoko atu ai ʻene moʻui taʻemāú.

ʻI he taimi ko iá, naʻá ku ngāue ai ko ha ʻovasia sēketi, ko ha faifekau fefonongaʻaki ʻa e Kau Fakamoʻoni ʻa Sihová. ʻI he 1989, naʻe vaheʻi ai au mo Soledad ki he feituʻu naʻe tuku pilīsone ai ʻa Mariví. Naʻe toki ʻosi ʻave fakamālohi meiate ia ʻe he kau maʻu mafaí ʻa hono fohá; naʻá ne ongoʻi lōmekina, ʻo ʻikai te ne toe fie moʻui. ʻI he ʻaho ʻe taha naʻá ku ʻaʻahi ai kiate ia ʻo fokotuʻu ange ke ma ako Tohi Tapu, pea naʻá ne tali ʻeku tuʻuakí. Hili ʻa e ako ʻi ha māhina ʻe tahá, naʻe tuku ai ʻene ngāueʻaki ʻa e faitoʻo kona tapú mo e tapaká. Naʻá ku fiefia ʻaupito ʻi he sio ki hono ʻoange ʻe Sihova kiate ia ʻa e mālohi ke ne fai ai ʻa e ngaahi liliu ko eni ʻi heʻene moʻuí.—Hepelu 4:12.

Taimi nounou mei heʻene kamata ke akó, naʻe kamata vahevahe atu ai ʻe Mariví ʻa e ngaahi moʻoni Fakatohitapú ki hono kaungā pōpulá mo e kau ʻōfisa ʻi he pilīsoné. Neongo naʻe hiki ia ʻo ʻave mei he pilīsone ki he pilīsone, naʻá ne hokohoko atu ʻa ʻene ngāue fakamalangá. ʻI he pilīsone ʻe taha naʻe aʻu ai ʻo ne faifakamoʻoni mei he loki ki he loki. ʻI he faai mai ʻa e ngaahi taʻú, naʻe kamata ako Tohi Tapu ai ʻa Mariví mo e kau pōpula tokolahi ʻi he ngaahi ʻapi pōpula kehekehe.

ʻI he ʻaho ʻe taha naʻe fakahaaʻi mai ai ʻe Mariví ʻa ʻene holi ke fakatapui ʻa ʻene moʻuí kia Sihova pea papitaiso. Ka naʻe ʻikai ʻoange kiate ia ha ngofua ke ne mavahe mei he pilīsoné, pea naʻe ʻikai fakaʻatā ha taha ʻi loto, ke ne papitaiso ia. Naʻá ne kātekina ʻa e toe taʻu ʻe fā ʻi he ʻātakai kovi ʻo e pilīsone ko iá. Ko e hā naʻá ne tokoniʻi ia ke ne tauhi maʻu ʻa ʻene tuí? ʻI he taimi tofu pē ko ia naʻe fai ai ʻe he fakatahaʻanga fakalotofonuá ha fakatahá, naʻá ne vakaiʻi ʻa e polokalama tatau ʻi he loki pilīsoné. Naʻá ne toe fakahoko foki ha polokalama tuʻumaʻu ʻo e ako Tohi Tapu fakafoʻituitui pea mo e lotu.

Naʻe hiki ʻi ha taimi ʻa Mariví ki ha pilīsone leʻohi malu ʻa ia naʻe ʻi ai ha vai kaukau. Naʻá ne ongoʻi ko e tuʻunga foʻou ko ení ʻe malava ai ke ne papitaiso. Pea ko e meʻa ia naʻe hokó, naʻe faifai pē pea ʻaonge ha ngofua kia Mariví. Ko e ʻuhinga leva ia naʻá ku ʻi ai ai ʻo fai ʻa e malanga papitaisó. Naʻá ma fakataha ʻi he mōmeniti mahuʻinga taha ʻo ʻene moʻuí.

Tupu mei heʻene founga moʻui ki muʻá, naʻe maʻu ʻe Mariví ʻa e ʻeitisí. Kae kehe, ko hono ʻulungāanga leleí naʻe tukuange ai ia ki muʻa ke ʻosi hono tauteá mei pilīsone ʻi Maʻasi 1994. Naʻá ne nofo ʻi ʻapi mo e fineʻeikí ʻo ne ʻi he tuʻunga longomoʻui faka-Kalisitiane ʻo aʻu ki heʻene maté ʻi he taʻu ʻe ua ki mui ai.

Ikuʻi ʻa e Ongoʻi Fakatupu Maumau

Ko au foki kuo ʻikai te u hao fakaʻaufuli mei he ngaahi nunuʻa ʻo ʻeku moʻui ki muʻá. Ko e ngaohikoviʻi naʻe fai kiate au ʻe heʻeku tamaí pea pehē ki heʻeku founga moʻui ʻi hoku taʻu hongofulu tupú naʻe uesia ai ʻa hoku angaʻitangatá. ʻI heʻeku hoko  ko ha tokotaha lahí, naʻe fakahohaʻasi maʻu pē au ʻe he ngaahi ongoʻi halaia mo e ongoʻi ʻoku ʻikai haku mahuʻinga. ʻI he taimi ʻe niʻihi ʻoku ou hoko ai ʻo loto-mafasia lahi. Neongo ia, ʻoku taʻehanotatau e mahuʻinga ʻo e Folofola ʻa e ʻOtuá ʻi heʻene tokoniʻi au ke u tauʻi ʻa e ngaahi ongoʻi fakahohaʻa ko ení. Ko e toutou fakalaulauloto ki he ngaahi konga Tohi Tapu hangē ko e Aisea 1:18 mo e Sāme 103:8-13 kuó ne tokoniʻi au ʻi he faai mai ʻa e ngaahi taʻú ke fakasiʻisiʻi ʻa e faʻa ongoʻi halaiá.

Ko e lotú ko ha toe meʻatau fakalaumālie ia ʻoku ou ngāueʻaki ke tauʻiʻaki ʻa e ngaahi ongoʻi ʻoku ʻikai haku mahuʻingá. Kuó u faʻa lotu kia Sihova fakataha mo e loʻimataʻia. Kae kehe, ko e ngaahi lea ʻoku hiki ʻi he 1 Sione 3:19, 20 ʻokú ne fakaivimālohiʻi au: “Ko e meʻa ko ia te tau ʻilo ai ʻoku tau mei he Moʻoni, pea te tau fakanonga ʻaki hotau loto ʻi he ʻao ʻo ʻEne ʻAfio. He kapau ʻoku fakahalaia kitautolu ʻe hotau loto, ko hono ʻuhinga he ʻoku lahi ʻa e ʻOtua ʻi hotau loto, pea ʻoku ne meaʻi ʻa e meʻa kotoa pe.”

Koeʻuhi ko ʻeku ʻunuʻunu loto-moʻoni ki he ʻOtuá fakataha mo e “loto lavea mo mafesifesi,” ʻoku ou ʻiloʻi ai ʻoku ʻikai te u fuʻu kovi fau ʻo hangē ko ʻeku fakakaukau ki muʻá. ʻOku fakapapauʻi mai ʻe he Tohi Tapú ki he faʻahinga kotoa ʻoku kumi kia Sihová ʻoku ʻikai te ne taʻetokaʻi ʻa e faʻahinga ʻoku nau fakatomala moʻoni ʻi honau ʻulungāanga he kuohilí pea kuo nau tafoki ʻo fai hono finangaló.—Sāme 51:17.

ʻI heʻene malanga hake pē ʻa e ngaahi ongoʻi halaiá, ʻoku ou feinga ke fakafonu hoku ʻatamaí ʻaki ʻa e ngaahi fakakaukau lelei, ʻa e ngaahi meʻa fakalaumālie ko ia ʻoku lave ki ai ʻi he Filipai 4:8. Kuó u ako maʻuloto ʻa e Sāme 23 mo e Malanga ʻi he Moʻungá. ʻI heʻene ʻalu hake pē ki hoku ʻatamaí ʻa e ngaahi fakakaukau ʻikai leleí, ʻoku ou lau loto pē ʻiate au ʻa e ngaahi veesi Fakatohitapu ko ení. Ko e toʻo ko eni mei hoku ʻatamaí ʻa e fakakaukau ʻikai leleí ʻoku tautefito ʻene ʻaongá ʻi he lolotonga ʻa e ngaahi pō taʻemamohé.

Ko e toe maʻuʻanga tokoni ʻe taha ko e fakaongoongolelei ʻoku ou maʻu mei hoku uaifí mo e kau Kalisitiane matuʻotuʻa kehé. Neongo naʻe ʻuluaki faingataʻa kiate au ke tali ʻenau ngaahi lea fakalototoʻá, kuo tokoniʻi au ʻe he Tohi Tapú ke u mahinoʻi ko e ʻofá “ʻoku ne tui ʻi he meʻa kotoa pe.” (1 Kolinito 13:7) Pea ko e moʻoni, kuo faifai pē ʻou ako ke tali anga-fakatokilalo ʻa hoku ngaahi vaivaiʻangá mo e ngātangá.

Ko e ʻaonga ʻe taha ʻoku ou maʻu aí, kuo tokoniʻi au heʻeku fāinga fekauʻaki mo e ngaahi ongoʻi ʻikai leleí ke u hoko ko ha ʻovasia fefonongaʻaki kaungāongoʻi. Ko au mo hoku uaifí kuó ma taki taha fakamoleki ʻa e meimei taʻu ʻe 30 ʻi he hoko ko e ongo faifekau taimi-kakato ʻo e ongoongo leleí. Ko e fiefia ʻoku ou maʻu mei he tauhi ki he niʻihi kehé ʻoku tokoni ia ke tekeʻi ki mui ʻa e ngaahi ongoʻi mo e manatu tamaki ki he meʻa palakū naʻá ku hokosiá.

ʻI heʻeku sio atu he taimí ni mo fakakaukauloto ki he ngaahi tāpuaki kotoa kuo tuku mai ʻe Sihova kiate aú, ʻoku ueʻi au ke u lea ʻo hangē ko ia naʻe fai ʻe he tokotaha-tohi-sāmé: “Fakafetaʻi kia Sihova, . . . ʻa ia ʻoku ne fakamolemole hoʻo angahala fuape; ʻa ia ʻoku ne faitoʻo ho ngaahi mahaki kotoa pe; ʻa ia ʻoku ne huhuʻi mei he ʻauha ʻa hoʻo moʻui; ʻa ia ʻoku ne fakakalauni ʻaki koe ʻa e ʻofa mo e fai fakaʻatuʻi.”—Sāme 103:1-4.

[Fakamatala ʻi lalo]

[Fakamatala ʻi he peesi 30]

Naʻe fakahohaʻasi maʻu pē au ʻe he ngaahi ongoʻi halaia mo e ongoʻi ʻoku ʻikai haku mahuʻinga. Neongo ia, ʻoku taʻehanotatau e mahuʻinga ʻo e Folofola ʻa e ʻOtuá ʻi heʻene tokoniʻi au ke u tauʻi ʻa e ngaahi ongoʻi fakahohaʻa ko ení

[Fakatātā ʻi he peesi 27]

Ko hoku tehina ko José Luis mo hoku kaumeʻa ko Miguel naʻá na muimui fakatouʻosi ʻi heʻeku faʻifaʻitakiʻanga koví mo e leleí

[Fakatātā ʻi he peesi 28, 29]

Ko e fāmili Morcillo ʻi he 1973

[Fakatātā ʻi he peesi 29]

Ko Mariví ʻi heʻene hoko ko ha pōpula ʻi he pilīsoné

[Fakatātā ʻi he peesi 30]

Mo hoku uaifí ko Soledad