Meʻa ʻOku Tomuʻa Tala ʻe Sihová ʻOku Hoko Moʻoni

“KO E ʻOtua au, pea ʻoku ʻikai haku tuha; heʻeku tala mei he kamataʻanga ʻa e meʻa ʻe hoko ʻamui, mo tala mei he kuonga muʻa ʻa e meʻa kuo teʻeki fai.” (Aisea 46:9, 10) Ko e folofola ia ʻa Sihová, ʻa e tokotaha ʻoku malava ke ne tomuʻa tala taʻetoefehālaaki ʻa e kahaʻú.

ʻOku ʻiloa ʻa e taʻemalava ʻa e tangatá ke tomuʻa tala totonu ki muʻa ʻa e kahaʻú. Ko e pehē ko ia ko e Tohi Tapú ko ha tohi ʻo e kikité ʻoku totonu ke ueʻi ai ʻa e kau fekumi kotoa pē ki he moʻoní ke nau fakatotoloʻi ʻa ʻene pehē ko ia ko e faʻu-tohí ko e ʻOtuá. Tau lāulea angé ki he niʻihi ʻo e ngaahi kikite Fakatohitapu kuo ʻosi hoko moʻoní.

Ngaahi Puleʻanga Motuʻa

Naʻe tomuʻa tala ʻe he ʻOtuá ko Pāpiloné ʻe fakaʻauha tuʻuloa ia pea ko ʻĪtomi, Mōape mo ʻĀmoni ʻe fakaʻauha taʻengata foki kinautolu. (Selemaia 48:42; 49:17, 18; 51:24-26; ʻOpataia 8, 18; Sefanaia 2:8, 9) Ko e pulia ko ia ʻa e kakai ko ení ʻi honau tuʻunga ko e ngaahi kulupu fakafonua makehé ʻoku fakamoʻoniʻi ai ʻa e tonu ʻa e Folofola fakaekikite ʻa e ʻOtuá.

Ko e moʻoni, ʻe fakakikihiʻi nai ʻe ha taha ʻe lava pē ke tala ki muʻa ʻe ha taha pē ʻe faifai pē pea mole atu ha puleʻanga ʻo tatau ai pē ko e hā ʻa hono mālohí. Ka ko e fakakikihi ko iá ʻoku tukunoaʻi ai ʻa e moʻoniʻi meʻa mātuʻaki mahuʻinga naʻe toe ʻomai ʻe he Tohi Tapú. Ko e fakatātaá, naʻe ʻomai ai ʻa e ngaahi fakaikiiki ki he founga tofu pē ʻe liua ai ʻa Pāpiloné. Naʻe tomuʻa tala ʻe he Tohi Tapú ʻe ikunaʻi ʻa e koló ʻe he kau Mītiá, ko e kau sōtia fakatūʻutá te nau ʻi he malumalu ʻo e taki ʻa Kōlesi, pea ko e vaitafe naʻá ne maluʻi ʻa e koló ʻe mātuʻu.—Aisea 13:17-19; 44:27–45:1.

Naʻe ʻikai tomuʻa tala ʻe he Tohi Tapú ʻe ʻikai ke toe ʻi ai ʻo taʻengata ʻa e ngaahi puleʻanga pe kakai kotoa pē ne ikunaʻí. ʻI hono kehé, ʻi hono tomuʻa tala ʻa e liua ʻo Selusalema ʻe he kau Pāpiloné, naʻe folofola ʻa e ʻOtuá ʻo pehē ko e koló ʻe toe fakafoʻou, neongo ʻa e lao ʻa Pāpilone ki hono ʻikai ʻaupito tukuange ʻenau kau pōpulá. (Selemaia 24:4-7; 29:10; 30:18, 19) Naʻe fakahoko eni, pea ko e hako ʻo e kau Siú ʻoku hokohoko atu ʻenau ʻi ai ko ha kakai makehé ʻo aʻu mai ki he ʻahó ni.

ʻIkai ko ia pē, naʻe tomuʻa tala ʻe Sihova ʻe liua ʻa ʻIsipite ʻi hono tuʻunga ko ha puleʻanga hau ʻo e māmaní ka ʻi he “hili ia, ʻe toe nofoʻia ʻo hange ko e taimi muʻa.” Ko e puleʻanga hau  motuʻa ko ení ʻe ʻi ai ʻa e taimi ʻe ‘hoko ai ko e puleʻanga oloololalo.’ (Selemaia 46:25, 26; Isikeli 29:14, 15) Naʻe hoko moʻoni foki ʻa e meʻá ni. Tānaki atu ki ai, naʻe tomuʻa tala ʻe Sihova ʻe liua ʻa Kalisi ʻi hono tuʻunga ko ha puleʻanga hau ʻo e māmaní, ka naʻe ʻikai ʻaupito te ne pehē heʻikai ke toe ʻi ai ʻa e puleʻangá ni. Ko e hā ʻoku tau ako mei he mole atu ʻa e ngaahi puleʻanga ʻa ia naʻe tomuʻa tala ʻe Sihova ʻe fakaʻauhamālié pea mo e kei ʻi ai ʻa e ngaahi puleʻanga kehe ʻa ia naʻe ʻikai te ne tala ki muʻa ʻe fakaʻauha ʻaupitó? Ko e lēsoní leva ʻoku ʻi he Folofola ʻa e ʻOtuá ʻa e kikite moʻoni mo alafalalaʻanga.

Fakaikiiki Fakaofo

Hangē ko ia ne lave ki ai ʻi ʻolungá, naʻe tokonaki mai ʻe Sihova ʻa e ngaahi fakaikiiki lahi ʻo fekauʻaki mo e anga ʻo e tō ʻa Pāpiloné. ʻI he founga meimei tatau, ʻi hono tomuʻa tala ʻa e tō ʻa Taiá, naʻe pehē ʻi he tohi Isikelí ko hono ngaahi maká, meʻa ne ngaohi mei he papá, mo e efú ʻe tuku ia ʻi “loto tahi.” (Isikeli 26:4, 5, 12) Naʻe fakahoko ʻa e kikite ko ení ʻi he 332 K.M. ʻi hono ngāueʻaki ʻe ʻAlekisānita ko e Lahi mo ʻene kau taú ʻa e ngaahi toetoenga ʻo e konga tefito ʻo e koló naʻe ikunaʻí ke langaʻaki ha ʻaluʻanga ki he konga ʻo Taia ʻa ia naʻe tuʻu ko e motú, pea naʻe toe ikunaʻi ai mo ia foki.

Ko e kikite naʻe lēkooti ʻi he Taniela 8:5-8, 21, 22 mo e 11:3, 4 naʻe toe ʻomai ai ʻa e ngaahi fakaikiiki fakaueʻiloto fekauʻaki mo ha fuʻu “Tuʻi Kalisi” anga-kehe. Ko e tuʻí ni ʻe tuʻusi ia ʻi he tumutumu ʻo hono mālohí, pea ko hono puleʻangá e vahevahe leva ia ki he toko fā kae ʻikai ki heʻene fānaú. Laka hake he taʻu ʻe 200 hili hono hiki ʻa e kikite ko ení, naʻe fakamoʻoniʻi ai ko ha tuʻi mālohi ʻa ʻAlekisānita ko e Lahi. ʻOku tala mai ʻe he hisitōlia fakaemāmaní naʻá ne mate mutukia pea ko hono ʻemipaeá naʻe faifai pē ʻo vahevahe ia ʻe heʻene kau seniale ʻe toko fā—ʻo ʻikai ko ʻene fānaú.

Kuo taukaveʻi ʻe he kau fakaangá ko e kikité ni kuo pau pē naʻe hiki ia hili ʻa ʻene hokó. Neongo ia, toe sio angé ki he fakamatala naʻe hiki ʻi ʻolunga ʻi he tohi Tanielá. ʻI he vakai ki ai mei he tuʻunga ʻo e kikité, ko hono ngaahi fakaikiikí  ʻoku fakaofo. Ka ʻi he taimi ʻoku vakai ai ki ai ko e hisitōlia ʻoku fakangalingali ko e kikité, ʻikai ʻoku hā ngali ʻikai poupouʻi ʻe he fakamoʻoní ʻa e taukaveʻi ko ení? Kapau naʻe feinga ha tokotaha kākā ʻa ia naʻe moʻui hili ʻa ʻAlekisānitá ke ʻai ke maongo ki he kau lautohí ha kikite fakangalingali, ko e hā naʻe ʻikai te ne fakakau atu ai ki ai ʻa e fakaikiiki ʻo e taimi ko ia ʻi he hili pē ʻa e mate ʻa ʻAlekisānitá, ʻa ia naʻe feinga ai ʻa e toko ua ʻo hono ngaahi fohá ke fokotuʻu ʻa hona tuʻunga-tuʻí ka naʻe fakapoongi kinaua? Ko e hā naʻe ʻikai te ne fakahaaʻi ai ʻe ʻi ai ʻa e ngaahi taʻu lahi ki muʻa ke pule ʻa e kau seniale kotoa ʻe toko faá ki he ngaahi feituʻu kehekehe ʻo e ʻemipaea ʻo ʻAlekisānitá? Ko e moʻoni, ko e hā naʻe ʻikai te ne fakahaaʻi ai ʻa e hingoa ʻo e tuʻi lahí mo ʻene kau seniale ʻe toko faá?

Ko e taukaveʻi ko ia naʻe hiki ʻa e kikite ʻa e Tohi Tapú ʻi he hili ʻene hokó ko ha fakamatala taʻefakapapauʻi fuoloa ia naʻe fai ʻe he faʻahinga ʻa ia naʻa nau fakapapauʻi ki muʻa ke nau sivisiviʻi ʻa e fakamoʻoní ʻoku taʻemalava ke tomuʻa tala ʻa e ngaahi meʻa ʻe hoko ʻi he kahaʻú. Koeʻuhi ko ʻenau fakafisi ke tali ko e Tohi Tapú ko e Folofola ʻa e ʻOtuá, ʻoku fakamālohiʻi ai kinautolu ke nau fakamatalaʻi ʻa e meʻa kotoa pē mei ha fakaʻuhinga fakaetangata ʻataʻatā pē. Kae kehe, naʻe fakamānavaʻi ʻe he ʻOtuá ʻi he poto ʻa e fakaikiiki fakaekikite feʻunga ke fakapapauʻi ai ʻa hono tuʻunga ko e faʻu-tohí. a

Ko e kikite ʻi he Tohi Tapú ʻoku lava ke ne fakaivimālohiʻi hoʻo tuí kapau ʻokú ke vaheʻi ʻa e taimi ke fakalaulauloto ai ki he ngaahi kikite pau pea mo honau fakahokó. Ko e hā ʻoku ʻikai te ke ako ai ʻa e kikite ʻi he Tohi Tapú? Ko e saati ʻi he peesi 343 ki he 346 ʻo e tohi “All Scripture Is Inspired of God and Beneficial” ʻe tokoni lahi nai kiate koe ʻi he meʻa ko iá. b Kapau te ke muimui ʻi he fokotuʻu ko ení, kamata ia fakataha mo e taumuʻa ke langa hake hoʻo tuí. ʻOua ʻe fakavavevave, ʻo lau pē ʻa e fakamatalá. ʻI hono kehé, fai ha fakakaukau houngaʻia ki he moʻoniʻi meʻa ko ia ko e hā pē ʻoku tomuʻa tala ʻe Sihová ʻoku hoko taʻetoefehālaaki ia.

[Fakamatala ʻi lalo]

[Puha/Fakatātā ʻi he peesi 24]

NGAAHI TEFITOʻI MOʻONI KI HE MOʻUÍ

Ko e toe fakakaukau eni ʻe taha ke fakalaulauloto ki ai. Ko e ʻOtuá ʻa ia naʻá ne tomuʻa tala totonu ʻa e tuʻu hake mo e tō ʻa e ngaahi puleʻanga hau ʻo e māmaní ko e toe Matavai foki ia ʻo e ngaahi tefitoʻi moʻoni Fakatohitapu ki he moʻuí. Ko e niʻihi eni ʻo kinautolu:

ʻOkú ke utu pē ʻa e meʻa naʻá ke toó.—Kaletia 6:7.

ʻOku ʻi ai ʻa e fiefia lahi ange ʻi he foaki atú ʻi he maʻu maí.—Ngāue 20:35.

ʻOku fakatuʻunga ʻa e fiefiá ʻi hono fakalato ʻa e ngaahi fiemaʻu fakalaumālié.—Mātiu 5:3.

Kapau te ke ngāueʻaki ʻa e ngaahi tefitoʻi moʻoni ko ení ʻi hoʻo moʻuí, ʻe lava ke ke falala pau ʻe hoko moʻoni ia ʻiate koe.

[Fakatātā ʻi he peesi 22, 23]

Naʻe tomuʻa tala ʻe he Folofola ʻa e ʻOtuá ʻa e ngataʻanga tuʻuloa ʻo e ngaahi puleʻanga ko ení . . .

ʻĪTOMI

PĀPILONE

. . . kae ʻikai ko eni

KALISI

ʻISIPITE

[Maʻuʻanga]

Pictorial Archive (Near Eastern History) Est.

WHO photo by Edouard Boubat

[Fakatātā ʻi he peesi 23]

ʻAlekisānita ko e Lahi