Ko e Fekumi ki he Talí

“ʻI hono solova ʻa e fehuʻi ki he ‘founga’ ke maʻu ai ha moʻui, ʻo takatakaiʻi kitautolu ʻe he ngaahi tuʻumālie naʻe ʻikai maʻu ki muʻa—hangē ko e ʻea fakamokomokó, CD ongo lelei, mo e fuaʻiʻakau foʻou ʻi he taʻú kotoa—ʻoku tau fifili ai pe ‘ko e hā e ʻuhinga’ ʻoku tau moʻui aí. Ko e hā ʻoku fai ai ʻa e fetulituliʻi feʻauʻauhí? Ko e hā ʻa e taumuʻá?”—David G. Myers, palōfesa ʻi he saienisi ʻo e ʻatamaí ʻi he Kolisi Hope, Holland, Michigan, ʻAmelika.

ʻE FĒFĒ haʻo tali ʻa e ongo fehuʻi ʻa e palōfesa ko ení? ʻOku fifili nai ʻa e niʻihi pe ʻoku mahuʻinga ke fakamoleki ʻa e taimí ʻi he fekumi ki he talí. Kae kehe, ko e feinga ke tukunoaʻi ʻa e ngaahi fehuʻi peheé ʻoku hangē ia ko e feinga ke tukunoaʻi ha kiʻi foʻi maka ʻi ho suú—ʻe lava ke hokohoko atu ʻa hoʻo lué, ka heʻikai fakafiefia ʻa hoʻo fonongá.

Kapau kuó ke fifili ʻi ha taimi pe ko e hā ʻa e taumuʻa ʻo e moʻuí, ʻoku ʻikai ko koe pē toko taha. Fakatatau ki he Savea ʻo e Ngaahi Meʻa Mahuʻinga ʻi he Māmaní, ko e taha ʻo e ngaahi fakatotolo lahi taha kuo fai fekauʻaki mo e ngaahi meʻa mahuʻinga ʻa e tangatá, ko ha tokolahi fakautuutu ʻo e kakai ʻi he ngaahi fonua lahi ʻoku nau fakakaukau fekauʻaki mo e “ʻuhinga pea mo e taumuʻa ʻo e moʻuí.”

Kapau ʻokú ke loto ke maʻu ʻa e nonga moʻoní, ʻoku fiemaʻu ke ke ʻiloʻi ʻa e tali ki he ngaahi fehuʻi lalahi ʻe tolu.

Naʻa tau haʻú mei fē?

Ko e hā ʻa e taumuʻa ʻo e moʻuí?

Ko e hā ʻoku tuku tauhi mei he kahaʻú?

Ko fē ʻe lava ke ke maʻu ai ʻa e tali fakafiemālie ki he ngaahi fehuʻi mahuʻinga ko ení? ʻI he ʻikai fai ha fakamahamahalo pe fakakaukau fakapotó, ko e ngaahi peesi hoko maí ʻe ʻoatu ai ʻa e tali ʻoku maʻu ʻi he Folofola ʻa e ʻOtuá, ko e Tohi Tapú. ʻOku mau fakaafeʻi atu koe ke ke fakaava ʻa hoʻo tatau ʻo e Tohi Tapú ʻo sio ki he meʻa ʻoku leaʻaki aí.