KAPAU ʻoku fekīhiaki ha ongo meʻa, ʻoku ʻuhinga ai hení ʻoku ʻikai te na kei feʻofaʻaki? ʻIkai! Ko Fenanitō mo Sela, naʻe lave ki ai ʻi ʻolungá, ʻokú na feʻofaʻaki ʻaupito. Kae kehe, naʻa mo e ʻi he ngaahi nofo mali lelei tahá, ʻe ʻi ai pē ʻi he taimi ki he taimi ha taʻefelotoi.

Ko e hā ʻoku malanga hake ai ʻa e taʻefelotoí, pea ko e hā ʻe lava ke ke fai ke taʻofi ai ʻene maumauʻi ʻa hoʻo nofo malí? Koeʻuhi ko e nofo malí ko ha fokotuʻutuʻu ia naʻe faʻufaʻu ʻe he ʻOtuá, ʻoku ʻuhinga lelei ke sivisiviʻi ʻa e meʻa ʻoku leaʻaki ʻe heʻene Folofolá, ʻa e Tohi Tapú ʻi he kaveingá ni.—Senesi 2:21, 22; 2 Timote 3:16, 17.

Ko e lahi taha ʻo e ngaahi hoa malí ʻoku nau feveitokaiʻaki ʻi ha founga ʻofa mo anga-lelei. Kae kehe, ʻoku fakahaaʻi moʻoni ʻe he Tohi Tapú “kuo fai angahala kotoa pe, pea ʻoku ʻikai te nau aʻusia ʻa e hōifua ʻa e ʻOtua.” (Loma 3:23) Ko ia ʻi he taimi ʻoku malanga hake ai ʻa e ngaahi taʻefelotoí, ʻe faingataʻa nai ai ke mapuleʻi ʻa e ngaahi ongoʻí. Pea kapau ʻoku kamata ha ngaahi fekīhiaki, ʻoku ʻiloʻi ʻe he niʻihi ko ha fāinga moʻoni ia ke talitekeʻi ʻa e ngaahi tōʻonga ʻoku koví, hangē ko e kaikailá mo e lea koví. (Loma 7:21; Efeso 4:31) Ko e hā ʻa e ngaahi meʻa kehe ʻe lava ke ne fakatupunga ʻa e fetēlení?

ʻOku faʻa maʻu ʻe ha husepāniti mo ha uaifi ʻa e ngaahi founga kehekehe ʻo e fetuʻutakí. ‘“I he ʻuluaki taimi ʻo ʻema malí,” ko e lau ia ʻa Mikikó, “naʻá ku ʻiloʻi ai naʻe kehekehe ʻaupito ʻema fakakaukaú ʻi he ngaahi meʻa naʻá ma lāulea ki aí. ʻOku ou saiʻia au ʻi he talanoa ʻo ʻikai ki he meʻa pē naʻe hokó kae toe pehē foki ki he ʻuhinga mo e founga ʻo ʻene hokó. ʻOku hā ngali mahuʻingaʻia pē ʻa hoku husepānití ʻi he meʻa naʻe iku ki aí.”

Ko e palopalema ʻa Mikikó ʻoku ʻikai foʻou. ʻI he ngaahi nofo mali lahi, ʻoku loto nai ai ʻa e hoa ʻe taha ke lāulea fakaikiiki ki ha taʻefelotoi, lolotonga ia ʻoku fehiʻa ʻa e tokotaha ia ʻe tahá ʻi he fekīhiakí pea loto ia ke ʻoua ʻe fai ha talanoa ki ai. ʻI he taimi ʻe niʻihi, ko e lahi ange ʻa e talanoa ʻa ha hoa ʻe taha ki he meʻá, ko e lahi ange ia ʻa e feinga ʻa e tokotaha ia ʻe tahá ke fakaʻehiʻehi mei aí. Kuó ke fakatokangaʻi ʻoku hoko ʻa e sīpinga ko ení ʻi hoʻo nofo malí? ʻOku hā ngali loto ʻa e tokotaha ʻia kimoua  ke talanoa ki he meʻá, pea ko e tokotaha ʻe tahá, ʻoku fakaʻehiʻehi ia mei ai?

Ko e toe meʻa tefito ʻe taha ke fakakaukau ki ai, ʻe lava ke tākiekina nai ʻe ha puipuituʻa fakafāmili ʻo ha taha ʻa ʻene mahinoʻi ʻa e founga ʻoku totonu ke faiʻaki ʻa e fetuʻutaki ʻa e ngaahi hoa malí. Ko Sasitini ʻa ia kuó ne mali ʻo feʻunga mo e taʻu ʻe nima, ʻokú ne pehē: “Ko ʻeku haʻu mei ha fāmili fakamāhuʻi pea ʻoku ou ʻiloʻi ʻoku faingataʻa ke talanoa hangatonu ʻo fekauʻaki mo ʻeku ngaahi ongoʻí. ʻOku ongoʻi feifeitamaki heni ʻa hoku uaifí. Ko hono fāmilí ʻoku nau faʻa fetalanoaʻaki, pea ʻoku ʻikai haʻane palopalema ʻi hono fakahaaʻi mai ke u ʻiloʻi ʻa e anga ʻo ʻene ongoʻí.”

Kuo ʻiloʻi ʻe he kau fakatotoló ko e fakaʻilonga falalaʻanga taha ki he fiefia ʻe ʻi ai ʻa e nofo malí ʻoku ʻikai ko e tuʻo lahi ko ia ʻo e pehē ʻe he ongo meʻá ʻokú na feʻofaʻakí. Ko e feongoongoi ʻi he fehokotaki fakasinó mo e malu fakapaʻangá ʻoku ʻikai foki ko e ongo meʻa mahuʻinga tahá ia. ʻI hono kehé, ko e fakaʻilonga alafalalaʻanga taha ʻo e lavameʻa ʻi he malí ko e anga hono solova ʻe he husepānití mo e uaifí ha ngaahi taʻefelotoi pē ʻoku malanga hake.

Tānaki atu ki ai, naʻe pehē ʻe Sīsū ʻi he taimi ʻoku mali ai ha ongo meʻá, ʻoku ʻikai ko e tangatá ka ko e ʻOtuá ʻokú ne fakatahaʻi kinauá. (Mātiu 19:4-6) Ko ia ai, ko ha nofo mali lelei ʻoku fakalāngilangiʻi ai ʻa e ʻOtuá. ʻI he tafaʻaki ʻe tahá, kapau ʻoku ʻikai lava ha husepāniti ke fakahāhā ʻa e ʻofa mo e fakaʻatuʻi ki hono uaifí, heʻikai nai fanongo mai ʻa e ʻOtua ko Sihová ki he ngaahi lotu ʻa e tangata ko iá. (1 Pita 3:7) Kapau ʻoku ʻikai fakaʻapaʻapa ha uaifi ki hono husepānití, ʻokú ne taʻefakaʻapaʻapa moʻoni kia Sihova, ʻa ia kuó ne fakanofo ʻa e husepānití ko e ʻulu ʻo e fāmilí.—1 Kolinito 11:3.

Tatau ai pē pe ko e hā ʻa e founga ʻo hoʻo fetuʻutakí pe puipuituʻa fakafāmilí, ʻoku ʻi ai ʻa e ngaahi sīpinga fakatupu maumau ʻo e leá kuo pau ke fakaʻehiʻehi mei ai kapau ʻokú ke fiemaʻu ke ngāueʻaki ʻa e ngaahi tefitoʻi moʻoni Fakatohitapú pea ngāue ke fakaleleiʻi ʻa e ngaahi taʻefelotoí. ʻEke hifo kiate koe ʻa e ngaahi fehuʻi hokó:

‘ʻOku ou talitekeʻi ʻa e holi ke sāuní?’

ʻOku “tubu ae toto i he mioi oe ihu: oku behe, oku tubu ae fekeikei i he ita fakamalohi.” (Palovepi 30:33, PM) Ko e hā e ʻuhinga ʻo e meʻa ko iá? Fakakaukau angé ki he fakatātā ko ení. Ko e meʻa ko ia ʻoku kamata ko ha fefaikehekeheʻaki ʻi he founga ke ʻai ke mafamafatatau ʻa e tuʻunga fakapaʻanga ʻo e fāmilí (“ʻoku fiemaʻu ke ta mapuleʻi ʻa e fakamoʻua he falekoloá”) ʻoku lava ke liliu vave ia ki ha fefakaangaʻaki (ʻokú ke mātuʻaki taʻefalalaʻanga”). Ko e moʻoni, kapau ʻoku hanga ʻe ho hoá ʻo ‘mioi ho ihú’ ʻaki ʻene kamata ke fakaangaʻi koe, te ke ongoʻi nai ʻokú ke holi ke fai e meʻa tatau kiate ia. Kae kehe, ko e sāuní ʻoku iku pē ia ki he ʻita mo e fakalalahi ʻo e taʻefetaulakí.

Naʻe fakatokanga ʻa e tokotaha-tohi Tohi Tapu ko Sēmisí: “Vakai, hono ʻuke ʻa e meʻi afi ʻoku vela ai ʻa e fuʻu vao! Pea ko e ʻelelo ko ha afi ia.” (Semisi 3:5, 6) ʻI he ʻikai lava ʻa e ngaahi hoa malí ke mapuleʻi honau ʻeleló, ko e fanga kiʻi taʻefetaulaki īkí ʻe lava ke hoko vave ia ko e ngaahi taʻefelotoi taʻemapuleʻi. Pea ko e nofo mali ʻa ia ʻoku toutou maumauʻi ʻe he ngaahi fekīhiaki fakaeongó ʻoku ʻikai ke pouaki ai ha ʻātakai ʻa ia ʻe lava ke tupulaki ai ʻa e ʻofá.

ʻI he ʻikai sāuní, ʻe lava ke ke faʻifaʻitaki kia Sīsū, ʻa ia ʻi he taimi naʻe leakoviʻi aí “naʻe ʻikai te ne tali ʻaki ha leakovi”? (1 Pita 2:23) Ko e founga vave taha ke taʻofi ai ʻa e hoko ʻo fakalalahi ha kē ko e lāuʻilo ʻoku pau pē ʻoku ʻi ai ʻa e fakakaukau lelei ʻa ho hoá pea ke kole fakamolemole ʻi he meʻa kuó ke fai ʻo hoko ai ʻa e taʻefelotoí.

‘ʻOku ou fakamaʻamaʻaʻi pe fakasiʻisiʻi ʻa e ngaahi ongoʻi ʻa hoku malí?’

“Ke mou uouanga taha, ke mou tauʻaki kaungāmamahi,” ko e fekau ia ʻa e Folofola ʻa e ʻOtuá. (1 Pita 3:8) Fakakaukau angé ki he ʻuhinga ʻe ua ʻe ʻikai nai ai lava ke ke ngāueʻaki ʻa e faleʻí ni. Ko e taha ko e ʻikai nai te ke mahinoʻi ʻa e fakakaukau pe ko e ngaahi ongoʻi ʻa ho hoá. Ko e fakatātaá, kapau ʻoku hohaʻa lahi  ange ʻa ho malí ʻiate koe ki ha meʻa, te ke hehema nai ai ke pehē, ‘ʻOkú ke fuʻu hohaʻa tōtuʻa.” Ko hoʻo taumuʻá nai ke tokoniʻi ʻa ho hoá ke ne sio ki he palopalemá ʻi he tafaʻaki totonú. Kae kehe, ʻoku siʻi ʻa e kakai ʻoku nau fiemālie ʻi he lea peheé. ʻOku fiemaʻu ke fakatou ʻiloʻi ʻe he ngaahi uaifí mo e husepānití ko e kakai ʻoku nau ʻofa aí ʻoku nau mahinoʻi pea kaungāongoʻi kinautolu.

Ko e fuʻu lahi ʻa e hīkisiá ʻe fakatupunga nai ai ha taha ke ne fakasiʻisiʻi ʻa e ngaahi ongoʻi ʻa hono hoá. ʻOku feinga ha tokotaha hīkisia ke hiki hake ia ʻaki ʻene toutou tuku hifo ʻa e niʻihi kehé. ʻOkú ne fai nai ia ʻaki hono ngāueʻaki ha hingoa fakamāʻulaloʻi pe ngaahi fakahoa ʻikai lelei. Fakakaukau angé ki he fakatātā fekauʻaki mo e kau Fālesi mo e kau sikalaipe ʻi he ʻaho ʻo Sīsuú. ʻI he fakahaaʻi ʻe ha taha—naʻa mo ha kaungā Fālesi—ha fakakaukau naʻe kehe mei he fakakaukau ʻa e faʻahinga hīkisia ko ení, naʻa nau ngāueʻaki ʻa e ngaahi hingoa fakamāʻulaloʻi mo e ngaahi fakamatala ololalo. (Sione 7:45-52) Naʻe kehe ʻa Sīsū ia. Naʻá ne ongongofua ki he niʻihi kehé ʻi heʻenau fakahaaʻi kiate ia ʻenau fakakaukaú.—Mātiu 20:29-34; Maake 5:25-34.

Fakakaukau fekauʻaki mo e founga hoʻo talí ʻi he taimi ʻoku fakamatala ai ʻa ho hoá ki he ngaahi meʻa ʻokú ne hohaʻa ki aí. ʻOku fakahaaʻi ʻi hoʻo leá, tō ʻo ho leʻó mo e anga ʻo ho matá ha kaungāongoʻi? Pe ʻokú ke hehema vave ke tukunoaʻi ʻa e ngaahi ongoʻi ʻa ho hoá?

‘ʻOku ou faʻa pehē ʻoku taumuʻa siokita ʻa hoku hoá?’

“He ʻoku ʻapasia ʻa Siope ki he ʻAfiona tuʻungaʻa pe? ʻIkai kuo ke ʻaʻi takai ia mo hono fale, mo e meʻa kotoa ʻoku ne maʻu?” (Siope 1:9, 10) ʻI he ngaahi lea ko iá, naʻe fehuʻia ai ʻe Sētane ʻa e ngaahi taumuʻa ʻa e tangata faitōnunga ko Siopé.

Kapau ʻoku ʻikai ke tokanga ʻa e ngaahi hoa malí, te nau tō nai ai ki ha sīpinga meimei tatau. Ko e fakatātaá, kapau ʻoku fai ʻe ho hoá ha meʻa lelei maʻau, ʻokú ke fifili pe ko e hā nai ʻokú ne fiemaʻú pe feinga ke fufuú? Kapau ʻoku fai ʻe ho hoá ha hala, ʻokú ke vakai ki he hala ko ení ko e fakamoʻoni ia ʻokú ne siokita pe taʻetokanga? ʻOkú ke fakamanatuʻi vave ʻa e ngaahi fehālaaki meimei tatau he kuohilí ʻo tānaki atu ia ki he lisí?

Naʻe tohi ʻe he ʻapositolo ko Paulá: “Ko ʻOfa . . . ʻoku ʻikai te ne lau ʻa e kovi.” (1 Kolinito 13:4, 6 [1Ko 13:4, 5, PM]) Ko e ʻofa moʻoní ʻoku ʻikai ke kui. Pea ʻoku ʻikai foki ke ne lau ʻa e koví. Naʻe toe pehē ʻe Paula ko ʻofá “ʻoku ne tui ʻi he meʻa kotoa pe.” (1 Kolinito 13:7) ʻOku ʻikai pehē ia ko e faʻahinga ʻofa ko ení ʻoku kākaaʻingofua, ka ʻoku hehema ia ke falala. ʻOku ʻikai ke taʻefalala ia, ʻo huʻuhuʻu. Ko e faʻahinga ʻofa ʻoku fakalototoʻaʻi mai ʻe he Tohi Tapú ʻoku mateuteu ia ke fakamolemole pea ʻoku loto-lelei ke fakakaukau ʻoku lelei ʻa e taumuʻa ʻa e niʻihi kehé. (Sāme 86:5; Efeso 4:32) ʻI he taimi ʻoku fakahāhā ai ʻe he ngaahi hoa malí ʻiate kinautolu ʻa e faʻahinga ʻofa ko ení, te nau maʻu ai ha nofo mali fiefia.