KO E hā ʻa e ngaahi palopalema ʻokú ke pehē ʻoku fiemaʻu ke fakaleleiʻi ʻe he ongo meʻa naʻe lave ki ai ʻi ʻolungá? ʻOku hā mahino ʻoku faingataʻa ki he husepānití ke mapuleʻi ʻa ʻene ʻitá. Kae tuku kehe ia, ʻoku hā ngali taʻefelotoi ʻa e ongo meʻá ki he lahi ʻo e tauʻatāina ʻoku totonu ke maʻu ʻe heʻena ongo tamaikí. Pea ʻoku hā foki ʻoku ʻi ai ha palopalema ʻi heʻena fetuʻutakí.

ʻOku ʻikai ha nofo mali ʻe haohaoa. ʻE fehangahangai ʻa e ngaahi hoa mali kotoa pē mo ha ngaahi palopalema kehekehe. Pe ʻoku lalahi pe iiki ʻa e palopalemá, ʻoku mahuʻinga ʻaupito ke ako ʻa e husepānití mo e uaifí ke fakaleleiʻi ia. Ko e hā hono ʻuhingá?

ʻI he faai mai ʻa e taimí, ko e ngaahi palopalema ʻoku taʻefakaleleiʻí ʻe hoko nai ia ko e ngaahi ʻā vahevahe ʻokú ne taʻofi ʻa e fetuʻutakí. Ko e ‘keé ʻoku hange ko e songo ʻo ha palasí,’ ko e fakamatala ia ʻa e tuʻi poto ko Solomoné. (Palovepi 18:19) ʻE lava fēfē ke ke fakaʻatā ke fai ha fetuʻutaki ola lelei ange ʻi he feangainga mo e ngaahi palopalemá?

Hangē ko hono fiemaʻu ʻa e mafú mo e maʻamaʻá kae malava ʻa e totó ʻo fai ʻene ngāué, ʻoku fiemaʻu ʻa e ʻofá mo e fakaʻapaʻapá kae lava ke ʻaonga ʻa e fetuʻutakí ki ha nofo mali. (Efeso 5:33) ʻI he taimi ke fakaleleiʻi ai ʻa e ngaahi palopalemá, ʻe ueʻi ʻe he ʻofá ha ongo meʻa ke na fakangaloʻi ʻa e ngaahi fehālaaki ʻi he kuohilí—mo e ngaahi kafo fakaeongo naʻe hoko aí—kae tokangataha ki he palopalema ʻokú na lolotonga fehangahangai mo iá. (1 Kolinito 13:4, 5; 1 Pita 4:8) Ko e ongo meʻa mali ʻokú na fakahāhā ʻa e fakaʻapaʻapá ʻokú na fakaʻatā ke na fetalanoaʻaki tauʻatāina pea feinga ke fanongo ki he meʻa ʻoku ʻuhinga ki aí, ʻo ʻikai ko e meʻa pē ʻoku leaʻakí.

Fakakaukau ki he sitepu ʻe fā ʻoku fakahokohoko ʻi laló, pea fakatokangaʻi ʻa e founga ʻe lava ke tokoniʻi ai koe ʻe he ngaahi tefitoʻi moʻoni Fakatohitapú ke fakaleleiʻi ʻa e ngaahi palopalemá ʻi ha founga ʻofa mo fakaʻapaʻapa.

 1. Fokotuʻu ha taimi ke talanoa ai ki he palopalemá.

“Ko e meʻa kotoa ʻoku ai hano taimi, . . . ko e ʻaho ke silongo, mo e ʻaho ke lea.” (Koheleti 3:1, 7) Hangē ko ia ne fakahāhā ʻi he fekīhiaki naʻe lave ki ai ki muʻá, ko e ngaahi palopalema ʻe niʻihi ʻe langaʻi nai ai ha ngaahi ongoʻi mālohi. Kapau ʻe hoko ia, maʻu ha mapuleʻi-kita ke kiʻi taʻofi fakataimi ʻa e fetalanoaʻakí—ke “silongo”—ki muʻa ke fakalalahi ʻa e ʻitá. ʻE lava ke ke fakahaofi ʻa homo vahaʻangataé mei ha maumau lahi kapau te ke tokanga ki he faleʻi ʻa e Tohi Tapú: “Ko hono kamata ha felāuaki ʻoku hangē ia ko ha mama ʻi ha fakatafenga vai, ko ia taʻofi ia ki muʻa ke kamata ha keé.”—Palovepi 17:14, New Century Version.

Kae kehe, ʻoku toe ʻi ai ʻa e “ʻaho ke lea” ai. Ko e ngaahi palopalemá, ʻi heʻene hangē ko e vaó, ʻoku tupu ʻāfaʻafa ia ʻi he taimi ʻoku taʻetokangaʻi aí. Ko ia ʻoua ʻe tukunoaʻi ʻa e palopalemá, ʻi he ʻamanaki ʻe mole atu pē iá. Kapau ʻokú ke kiʻi taʻofi ha fetalanoaʻaki, fakahaaʻi ʻa e fakaʻapaʻapa ki ho hoá ʻaki hono fili ha taimi ʻi he kahaʻu vave maí ʻa ia te mo talanoa ai fekauʻaki mo e palopalemá. Ko ha palōmesi pehē ʻe lava ke ne tokoniʻi fakatouʻosi ai kimoua ke ngāueʻaki ʻa e fakakaukau ʻi he akonaki ʻa e Tohi Tapú: “ʻOua ʻe tuku ke to ʻa e laʻa ʻoku mou kei mamahi [pe ʻita].” (Efeso 4:26) Ko e moʻoni, ʻe fiemaʻu leva ke ke fai ki hoʻo palōmesí.

2. Fakahaaʻi faitotonu pea ʻi he fakaʻapaʻapa ʻa hoʻo fakakaukaú.

“Mou taki taha lea moʻoni ʻi he feangai mo hono kaungaʻapi.” (Efeso 4:25) Kapau ʻokú ke mali, ko ho kaungāʻapi ofi tahá ʻa ho hoá. Ko ia faitotonu pea lea hangatonu fekauʻaki mo hoʻo ngaahi ongoʻí ʻi he talanoa ki ho hoá. Ko Makeleta, a ʻa ia kuó ne mali feʻunga mo e taʻu ʻe 26, ʻokú ne pehē: “ʻI he taimi naʻá ku mali foʻou aí, naʻá ku ʻamanekina ʻe au ʻe ʻiloʻi pē ʻe hoku husepānití ʻa e anga ʻo ʻeku ongoʻí ʻi he taimi kuo malanga hake ai ha palopalema. Naʻá ku ako ʻo ʻiloʻi naʻe taʻetotonu ʻa e ʻamanaki peheé. ʻOku ou feinga he taimí ni ke fakahāhā mahino ʻa ʻeku ngaahi fakakaukaú mo e ongoʻí.”

Manatuʻi, ko hoʻo taumuʻa ʻi he lāulea ki ha palopalemá, ʻoku ʻikai koeʻuhi ke mālohi ʻi ha tau pe ikunaʻi ha fili, ka ko e ʻai pē ke ʻiloʻi ʻe ho hoá ʻa hoʻo ngaahi fakakaukaú. Ke fai ola lelei iá, fakahaaʻi ʻa e meʻa ʻokú ke fakakaukau ko e palopalemá, leaʻaki leva ia ʻi he taimi ʻoku hoko aí, pea toki fakamatalaʻi leva ʻa e anga ʻo hoʻo ongoʻí ʻi he meʻa ko iá. Ko e fakatātaá, kapau ʻoku fakapiko kiate koe ʻa e taʻemaau ʻa ho hoá, ʻe lava ke ke lea ʻi he fakaʻapaʻapa, ‘ʻI hoʻo foki mai mei he ngāué pea laku ho valá ʻi he falikí [ko e taimi mo e meʻa ʻa ia ko e palopalemá], ʻoku ou ongoʻi ai ʻoku ʻikai ke fakahoungaʻi ʻa ʻeku ngaahi feinga ke tokangaʻi ʻa hota ʻapí [fakamatalaʻi ʻa e anga tofu pē ʻo hoʻo ongoʻí].’ Pea fokotuʻu fakapotopoto ange leva ʻa e meʻa ʻokú ke fakakaukau ʻe hoko ko ha fakaleleiʻanga ki he palopalemá.

3. Fanongo pea fakahaaʻi ʻokú ke ʻiloʻi ʻa e ongoʻi ʻa ho hoá.

Naʻe tohi ʻe he ākonga ko Sēmisí ʻo pehē ko e kau Kalisitiané ʻoku totonu ke nau ‘vave ki he fanongó, kae fakatotoka ki he leá, pea fakatotoka ki he ʻitá.’ (Semisi 1:19) ʻOku fakatupunga ʻe ha ngaahi meʻa siʻi ʻa e taʻefiefia lahi ange he nofo malí ʻi he fakakaukau ʻoku ʻikai ke mahinoʻi ʻe ho hoá ʻa e anga hoʻo ongoʻi fekauʻaki mo ha palopalemá. Ko ia fakapapauʻi ke ʻoua ʻe ʻai ke fakakaukau pehē ʻa ho hoá!—Mātiu 7:12.

Ko Lofikeni, ʻa ia kuó ne mali ʻo feʻunga mo e taʻu ʻe 35, ʻokú ne pehē: “ʻI he taimi ʻokú ma talanoaʻi ai ha ngaahi palopalemá, ʻoku hangē ʻoku ou kiʻi hohaʻá, tautefito ʻi he taimi ʻoku ou ongoʻi ai ʻoku ʻikai mahinoʻi ʻe hoku uaifí ʻa e anga ʻo ʻeku fakakaukaú.” Ko Taiana, kuó ne mali eni ʻo feʻunga mo e taʻu ʻe 20, ʻokú ne fakahaaʻi, “ʻOku ou faʻa lāunga ki hoku husepānití ʻo pehē ʻoku ʻikai moʻoni te ne fanongo mai kiate au ʻi he taimi ʻokú ma fetalanoaʻaki ai ki ha ngaahi palopalemá.” ʻE lava fēfē ke ke ikuʻi ʻa e palopalema ko ení?

 ʻOua ʻe pehē ʻokú ke ʻiloʻi ʻa e fakakaukau pe ko e ongoʻi ʻa ho hoá. “Ko e fielahi ko hono fua ko e kē pe: Ka ko e fua ʻoku maʻu ʻe he kau tali faleʻi [pe fetalanoaʻaki fakatahá] ko e poto,” ko e fakamatala ia ʻa e Folofola ʻa e ʻOtuá. (Palovepi 13:10) Fakahā ʻa e fakaʻapaʻapa ki ho hoá ʻaki hono fakaʻatā ke fakahaaʻi ʻene fakakaukaú ʻo ʻikai fakahohaʻasi. Pea ke fakapapauʻi leva ʻokú ke mahinoʻi ʻa e meʻa naʻá ne leaʻakí, toe fakalea ʻa e meʻa naʻá ke fanongo ki aí pea toe leaʻaki ia ki ho hoá, ʻo fai ʻikai ʻi he manuki pe ʻita. Fakaʻatā ho hoá ke ne fakatonutonu koe kapau naʻe ʻikai te ke mahinoʻi ʻa e meʻa naʻá ne leaʻakí. ʻOua te ke lea pē koé. Taufetongi ʻi he founga ko eni ʻo e fetalanoaʻakí kae ʻoua kuó mo felotoi kuó mo fakatou mahinoʻi ʻa e ngaahi fakakaukaú mo e ngaahi ongoʻí.

Ko e moʻoni, ʻoku fiemaʻu ʻa e anga-fakatōkilalo mo e kātaki ke fanongo tokanga ai ki ho hoá pea ke ʻiloʻi ʻa ʻene fakakaukaú. Ka ʻo kapau ʻokú ke takimuʻa ʻi hono fakahāhā ʻa e fakaʻapaʻapa pehē ki ho hoá, ʻe hehema ange ai ho hoá ke ne fakaʻapaʻapaʻi koe.—Mātiu 7:2; Loma 12:10.

4. Felotoi ki ha fakaleleiʻanga.

“ʻOku ngutuhuaange ke toko ua ʻi heʻete toko taha; he ʻoku ʻi heʻena ngaue ha totongi lelei. He kapau te na to, ʻe lava ʻe he taha ke ʻohake hono kaumeʻa.” (Koheleti 4:9, 10) ʻOku lava ke fakaleleiʻi ha fanga kiʻi palopalema ʻi ha nofo mali ʻo kapau pē ʻe ngāue fakataha ʻa e ongo meʻá mo fepoupouaki.

Ko e moʻoni, naʻe fakanofo ʻe Sihova ʻa e husepānití ko e ʻulu ʻo e fāmilí. (1 Kolinito 11:3; Efeso 5:23) Ka ko e tuʻunga-ʻulú ʻoku ʻikai ʻuhinga iá ko e pule fakatikitato. Ko ha husepāniti poto heʻikai te ne fai ha ngaahi fili fakaeia pē. Ko Tēvita, kuó ne mali ʻo feʻunga mo e taʻu ʻe 20, ʻokú ne pehē, “ʻOku ou feinga ke maʻu ha tuʻunga felotoi mo hoku uaifí pea kumi ki ha fili ʻe fai ʻe lava ke ma fakatou poupouʻí.” Ko Tānia, kuó ne mali ʻo feʻunga mo e taʻu ʻe fitu, ʻokú ne pehē: “ʻOku ʻikai ko e meʻá pe ko hai ʻoku tonú pea ko hai ʻoku halá. ʻI he taimi ʻe niʻihi ko e kehekehe pē ʻa e ngaahi fakakaukau ki he founga ke fakaleleiʻi ai ha palopalema. Kuó u ʻiloʻi ko e kī ki he lavameʻá ko e ngaofengofua mo e fakaʻatuʻi.”

Naʻe pehē ʻe Sīsū ʻo fekauʻaki mo e nofo malí: “Ko e meʻa kuo fakahoko ʻe he ʻOtua, ke ʻoua naʻa fakamavae ʻe ha tangata.” (Mātiu 19:6) Ko e foʻi lea ko e “fakahoko” ko e liliu ia mei he lea faka-Kalisi ʻoku ʻuhingá ki he “ʻioke.” ʻI hono ʻahó, ko e ʻioké ko ha vaʻakau naʻá ne haʻihaʻi fakataha ha ongo monumanu koeʻuhi ke na lava ai ʻo fai ha ngāue. Kapau naʻe ʻikai ngāue fāitaha ʻa e ongo monumanú, ʻe siʻi ʻa e ngāue ʻe lava ke na fakahokó pea ʻe mamahi hona kiá ʻi he ʻioké. Kapau naʻá na ngāue fakataha, ʻe lava ke na toho ha uta mamafa pe palau ha ngoue.

ʻI he tuʻunga meimei tatau, ko ha husepāniti mo e uaifi ʻoku ʻikai ke na ngāue fakataha ko ha timí te na faingataʻaʻia ʻi he ʻioke ʻo e nofo malí. ʻI he tafaʻaki ʻe tahá, kapau te na ako ke na toho fakataha, ʻe lava ke na fakaleleiʻi ha meimei palopalema pē pea lavaʻi ai ʻa e lelei lahi. Ko ha tangata mali fiefia ko Kalala ʻokú ne fakanounou ʻa e meʻá ʻo peheni, “Kuó u fakaleleiʻi mo hoku uaifí ʻi he taʻu ʻe 25 ʻema ngaahi palopalemá ʻaki ʻema fetalanoaʻaki faitotonu, ʻaki hono ʻai kimaua ki he tuʻunga ʻo e tokotaha ʻe tahá, ʻaki ʻa e lotu ʻo kole ʻa e tokoni ʻa Sihová, pea ʻi hono ngāueʻaki ʻa e ngaahi tefitoʻi moʻoni ʻi he Tohi Tapú.” ʻE lava ke ke fai ʻa e meʻa tatau?