ʻEke ʻe he Kau Lautohí

Ko e Fakatamaki Fakanatulá ko e Tautea mei he ʻOtuá?

ʻOku ʻikai ke ngāueʻaki ʻe he ʻOtuá ʻa e ngaahi fakatamaki fakanatulá ke tauteaʻiʻaki ʻa e kakai tonuhiá. Kuo ʻikai ʻaupito, pea heʻikai ʻaupito te ne fai pehē. Ko e hā hono ʻuhingá? Koeʻuhí “ko e ʻOtua ko e ʻOfa,” ko e lau ia ʻa e Tohi Tapú ʻi he 1 Sione 4:8.

Ko e ʻofá ʻa e tupuʻanga ʻo e meʻa kotoa pē ʻoku fai ʻe he ʻOtuá. Ko e ʻofá ʻoku ʻikai te ne fakatupunga ha mamahi ki he tonuhiá, he ʻoku fakahaaʻi ʻe he Tohi Tapú “talaʻehai ʻoku fai ʻe ʻofa ha kovi ki hono kaungāʻapi.” (Loma 13:10) ʻI he Siope 34:12 (PM), ʻoku fakahaaʻi ai ʻi he Tohi Tapú: “Koe mooni e ikai fai kovi ae Otua.”

Ko e moʻoni, naʻe tomuʻa tala ʻe he Tohi Tapú ʻa e ngaahi fakatamaki ʻi hotau ʻahó, hangē ko e “ngaahi fuʻu mofuike.” (Luke 21:11) Ka ʻoku ʻikai tupu meia Sihova ʻa e fakaʻauha ʻoku hoko aí ʻo hangē pē ko e ʻikai tupu mei he tangata vakai matangí ʻa e maumau ʻoku fai ʻe ha afā lahi ʻa ia ʻokú ne tala ki muʻá. Sai, kapau ʻoku ʻikai fakatupunga ʻe he ʻOtuá ʻa e faingataʻaʻia ʻoku ʻomai ʻe he ngaahi fakatamaki fakanatulá ki he tangatá, ko e hā ʻa e tupuʻangá?

“Ko hono kotoa ʻo mamani ʻoku ʻi he nima ʻo e Fili,” ʻa Sētane ko e Tēvoló, ko e fakahaaʻi ia ʻe he Tohi Tapú. (1 Sione 5:19) Kuó ne hoko ko ha tokotaha tāmate tangata mei heʻene angatuʻu ʻi he kamataʻanga ʻo e faʻahinga ʻo e tangatá ʻo aʻu mai ki hotau ʻahó ni. (Sione 8:44) ʻOku vakai ʻa Sētane ki he moʻui ʻa e tangatá ko ha meʻa noaʻia mo taʻeʻaonga. ʻOkú ne ngāue fakatuʻunga ʻi he taumuʻa siokita, ko ia ʻoku ʻikai ha ofo ʻi heʻene faʻu ha fokotuʻutuʻu fakaemāmani lahi ʻoku tupu ʻāfaʻafa ai ʻa e siokitá. Ko e fokotuʻutuʻu ʻi he māmaní he ʻaho ní ʻoku fakamolemoleʻi ai ʻa e ngāue taʻetotonu ʻa e tangatá ʻo aʻu ki he tuʻunga ʻoku moʻui ai ʻa e kakai tokolahi ʻoku ʻikai hanau maluʻi ʻi he founga fakatupu maumau, ʻi he ngaahi feituʻu ʻoku ngalingali ʻe hoko ai ʻa e ngaahi fakatamaki fakanatula pe fakatupunga ʻe he tangatá. (Efeso 2:2; 1 Sione 2:16) Ko ia ai, ko e faʻahinga mānumanu ʻo e tangatá kuo pau ke tukuakiʻi ki he niʻihi ʻo e fakatamaki ʻoku hokosia ʻe he faʻahinga maʻukoviá. (Koheleti 8:9) ʻO anga-fēfē?

Ko ha ngaahi fakatamaki ʻoku fakaʻohovale ʻa ʻene lahí ko e fakatupunga hano konga ʻe he tangatá. Ko e fakatātaá, fakakaukau angé ki he ngaahi faingataʻa naʻá ne uesia ʻa e kau nofo ʻi he kolo afā-tāfea ko New Orleans, ʻAmelika, pe ko e ngaahi fale naʻe holofa ʻi he holo ʻa e pelepelá ʻi he ʻotu moʻunga he matāfanga ʻo Venisuelá. ʻI he tuʻunga ko iá mo e ngaahi tuʻunga kehe, ko e ngaahi meʻa fakanatula, hangē ko e matangí mo e ʻuhá, naʻe hoko ko ha fakatamaki ʻi he tuʻunga lahí koeʻuhi ko e taʻetokanga ʻa e tangatá ki he ʻātakaí, ʻikai lelei ʻa e langá, ʻikai sai ʻa e palaní, taʻetokanga ki he ngaahi fakatokangá mo e fehālaaki ʻa e founga ngāue ʻa e kau maʻu mafaí.

Fakakaukau angé ki ha fakatamaki ʻi he taimi ʻo e Tohi Tapú. ʻI he ʻaho ʻo Sīsuú, naʻe mole ai ha moʻui ʻe 18 ʻi he holo fakafokifā ʻa ha fuʻu taua. (Luke 13:4) Ko e fakatamakí ni ko e ola nai ia ʻo e fehālaaki ʻa e tangatá, ko e “taimí mo e meʻa ʻoku hoko taʻeʻiloá,” pe fakatouʻosi—ka ko hono moʻoní ʻoku ʻikai ko e tupu ia mei he fakamaau ʻa e ʻOtuá.—Koheleti 9:11, NW.

Kuo ʻosi fakatupunga tuʻo taha nai ʻe he ʻOtuá ke hoko ha ngaahi fakatamaki? ʻIo, ka ʻi he ʻikai tatau mo e ngaahi fakatamaki fakanatulá pe fakatupunga ʻe he tangatá, naʻá ne filifili ʻe ia ʻa e faʻahinga ke tauteaʻí, naʻe ʻi ai hono taumuʻa, pea naʻe tātātaha ʻaupito ʻene hokó. Ko e Lōmaki fakalūkufua ʻi he ngaahi ʻaho ʻo e pēteliake ko Noá mo e fakaʻauha ʻo e ongo kolo ko Sōtoma mo Komolá lolotonga ʻa e ngaahi ʻaho ʻo Loté ko e fakatātā ia ʻe ua. (Senesi 6:7-9, 13; 18:20-32; 19:24) Ko e ongo fakamaau fakaʻotua ko iá naʻá ne tafiʻi ʻosi ʻa e kakai fulikivanu taʻefakatomalá kae fakahaofi moʻui ʻa e kakai naʻa nau māʻoniʻoni ʻi he vakai mai ʻa e ʻOtuá.

Ko hono moʻoní, ʻoku maʻu ʻe Sihova ko e ʻOtuá ʻa e malava, ko e holi, pea mo e mālohi ke fakangata ʻa e faingataʻa kotoa pē pea ke ʻomai ʻa e fakafiemālie mei he ngaahi nunuʻa ʻo e ngaahi fakatamaki fakanatulá. Naʻe tomuʻa tala ʻi he Sāme 72:12 ʻo fekauʻaki mo e Tuʻi fakanofo ʻa e ʻOtuá, ʻa Sīsū Kalaisi: “ʻOku ne fakahaofi ʻa e masiva ʻo ka tangi; ko e vaivai foki mo ia ʻoku ʻikai hano tokoni.”