Mālohi ʻo e ʻOtuá Fakahaaʻi Ia ʻi he Ngaahi Fetuʻú

“Tangaki ki ʻolunga homou mata, ʻo vakai. Ko hai kuó ne fakatupu ʻa e ngaahi meʻa ko é? Ko ia ʻoku taki mai mo lau honau kongakau: ʻoku ne ui honau hingoa tāutaha; ko e meʻa ʻi he lahi hono ngaahi ivi, mo e tuʻu kaukaua hono ngu, ʻoku ʻikai ha taha ʻe to.”—AISEA 40:25e, 26.

KO HOTAU laʻaá ko ha foʻi fetuʻu lahi feʻunga pē ia. Naʻa mo ia, ko hono kakanó ʻoku liunga 330,000 ʻa hono lahí ʻi he kakano ʻo e foʻi māmaní. Ko e lahi taha ʻo e ngaahi fetuʻu ofi maí ʻoku nau siʻisiʻi ange kinautolu ʻi he laʻaá. Kae kehe, ko e ngaahi fetuʻu kehé, hangē ko e foʻi fetuʻu ko ia ʻoku ui ko e V382 Cygni, ko hono kakanó ʻoku liunga 27 ʻa hono lahí ʻi hotau laʻaá.

Ko e hā hono lahi ʻo e ivi ʻoku tukuange ʻe hotau laʻaá? Fakaʻuta atu ki he vela ʻoku ʻi ai ha afi kapau ʻoku kilomita ʻe 15 hoʻo mamaʻo mei aí pea kei lava pē ke ke ongoʻi ʻa hono mafaná. Ko e laʻaá ʻi hono fakaʻavalisí ʻoku kilomita nai ʻe 150 miliona ia mei he māmaní. Neongo ia, ʻi ha ʻaho laʻā, ʻe lava ke fohia ʻa e kilí ʻi hono mafaná! ʻOku fakaofó, he ko e vahe piliona pē ʻe taha nai ʻo e ivi ʻo e laʻaá ʻoku aʻu mai ki he māmaní. Ka ko e kiʻi konga siʻi ko eni ʻo e mālohi ʻo e laʻaá ʻoku feʻungaʻānoa pē ke ne tauhi ʻa e moʻui ʻi he foʻi palanité.

Ko hono moʻoní, kuo fakafuofuaʻi ʻe he kau saienisí ʻo pehē ko e ivi fakakātoa ʻoku haʻu mei hotau laʻaá pē taha ʻoku feʻungaʻānoa ia ke ne tauhi ha foʻi palanite nai ʻe 31 tiliona hangē ko e foʻi māmaní. Pe ke fakafuofua ʻa e tuʻunga lahi fau ko ení ʻi ha toe founga ʻe taha: Kapau ʻe lava ke tānaki fakataha ʻa e mālohi ʻo e laʻaá ʻi ha sekoni pē ʻe taha, te ne tokonaki mai ki ʻAmelika “ʻa e ivi feʻunga, ʻi he tuʻunga ivi ʻoku lolotonga ngāueʻaki ʻi aí, ʻo aʻu ki he taʻu ʻe 9,000,000 hoko maí,” ko e lau ia ʻa e Uepisaiti ki he Senitā Vakai Matangi ʻi he Vavaá (Space Weather Prediction Center, SWPC).

Ko e ivi ʻoku haʻu mei he uho ʻo e laʻaá ʻoku tukuange mai ai—ha meʻa fakaniukilia ʻokú ne laiki fakataha ʻa e fanga kiʻi ʻātomí pea faʻu ai ʻa e ivi lahi. ʻOku lahi fau ʻa e laʻaá pea ko hono uhó ʻoku matolu ʻaupito ʻo feʻunga ai mo e taʻu ʻe laui miliona kae toki ʻasi hake ai ki tuʻa ʻa e ivi ʻoku faʻu ʻi loto ʻi he uhó. “Kapau ʻe tuku ʻe he Laʻaá he ʻahó ni ʻa ʻene faʻu ʻo e iví,” ko e lau ia ʻa e Uepisaiti SWPC, “ʻe feʻunga mo e taʻu ʻe 50,000,000 kae toki ongoʻi ai ʻi he foʻi Māmaní ʻa e ngaahi nunuʻa lahi moʻoni!”

Fakakaukau angé he taimí ni ki he moʻoniʻi meʻa ko ení: ʻI hoʻo hanga hake ki ʻolunga ʻi ha pō tafitonga, ʻokú ke sio ai ki he foʻi fetuʻu ʻe laui afe, ʻoku nau taki taha tukuange mai ʻa e ivi lahi faufaua, ʻo meimei tatau mo hotau laʻaá. Pea ʻoku fakafuofua ʻe he kau saienisí ʻoku ʻi ai ʻa e ngaahi fetuʻu ʻe laulaui piliona ʻi he ʻunivēsí!

Ko e haʻu mei fē ʻa e ngaahi fetuʻu kotoa ko ení? ʻOku tui he taimí ni ʻa e tokolahi taha ʻo e kau fakatotoló ʻi ha ngaahi ʻuhinga ʻoku kei ʻikai pē ke nau mahinoʻi, naʻe fakafokifā pē kuo ʻi ai ʻa e ʻunivēsí ʻi he taʻu nai ʻe 14 piliona kuohilí. ʻOku pehē pē ʻe he Tohi Tapú: “I he kamataʻanga naʻe fakatupu ʻe he ʻOtua ʻa e ngaahi langi mo mamani.” (Senesi 1:1) ʻOku ʻikai ha veiveiua, ko e Tokotaha naʻá ne fakatupu ʻa e ngaahi fuʻu faʻuʻanga ivi lalahi fakaʻulia ʻoku tau ui ko e ngaahi fetuʻú ʻoku lava ke fakamatalaʻi ia ʻoku “tuʻu kaukaua hono ngu.”—Aisea 40:26.

Founga Hono Ngāueʻaki ʻe he ʻOtuá ʻa Hono Mālohí

ʻOku ngāueʻaki ʻe Sihova ko e ʻOtuá ʻa hono mālohí ke fakaivia ʻaki ʻa e faʻahinga ʻoku nau fai ʻa hono finangaló. Ko e fakatātaá, naʻe ngāueʻaki ʻe he ʻapositolo ko Paulá ʻa hono iví ʻi hono akoʻi ʻa e niʻihi kehé ʻo fekauʻaki mo e ʻOtuá. Naʻe ʻikai ke mahulu hake ʻa Paula ʻi he tangatá, ka naʻá ne malava ke fai ʻa e meʻa lelei lahi neongo ʻa e fakafepaki  kakahá. Anga-fēfē? Naʻá ne fakahaaʻi naʻá ne maʻu mei he ʻOtuá ʻa e “makehe atu ʻo e mafai” pē mālohí.—2 Kolinito 4:7-9.

Kuo toe ngāueʻaki ʻe he ʻOtua ko Sihová ʻa hono mālohí ke fakaʻauha ʻa e faʻahinga ʻoku nau maumauʻi ʻosi fakakaukauʻi ʻa ʻene ngaahi tuʻunga fakaeʻulungāangá. Naʻe fakahaaʻi ʻe Sīsū Kalaisi ʻa e fakaʻauha ʻo Sōtoma mo Komolá pea mo e Lōmaki ʻi he ʻaho ʻo Noá ko e ongo fakatātā ia ʻo hono fili ʻe Sihova ke ngāueʻaki ai ʻa hono mālohi fakaefakaʻauhá. Naʻe kikiteʻi ʻe Sīsū ʻe vavé ni ke toe ngāueʻaki ʻe Sihova ʻa hono mālohí ke fakaʻauha ʻa e faʻahinga ʻoku nau tukunoaʻi ʻa ʻEne ngaahi tuʻungá.—Mātiu 24:3, 37-39; Luke 17:26-30.

ʻOku Ueʻi Fēfē Ai Koé?

Hili e fakalaulauloto ki he mālohi ʻo e ʻOtuá ʻoku hā mahino ʻi he ngaahi fetuʻú, te ke ongoʻi tatau nai mo Tuʻi Tēvita, ʻa ia naʻá ne pehē: “Kau ka vakai ho ngaahi langi na, ko e ngaue ʻa ho louhiʻinima, ʻa e mahina mo e ngaahi fetuʻu, ʻa ia kuo ke fokotuʻu; ko e ha ʻa e tangata ke ke manatu ai kiate ia? Mo e hako ʻo Atama, ʻoku ke aʻahi ai ia?”—Sāme 8:3, 4.

ʻIo, ʻoku fakatupunga ongoʻi fakatōkilalo ʻa e ʻiloʻi ʻoku hā ngali ʻikai hatau mahuʻinga ʻi hono fakahoa atu ki he lahi kāfakafa ʻo e ʻunivēsí. Neongo ia, ʻoku ʻikai fiemaʻu ke tau ongoʻi lōmekina ʻi he mālohi ʻo e ʻOtuá. Naʻe fakamānavaʻi ʻe Sihova ʻa e palōfita ko ʻAiseá ke ne tohi ʻa e ngaahi lea fakafiemālie ko ení: “ʻOku ne [ʻOtua ]ʻatu ngu ki he vaivai; pea ko ia ʻoku ʻikai hano ivi ʻoku ne fakalahi hono malohi.Naʻa mo e toʻutupu ʻoku meʻa mo vaivai pea ongosia, pea ko e kau talavou te nau matuʻaki humu; ka ko haʻa matatali kia Sihova te nau fakafoʻou honau ngu: te nau puna ki ʻolunga hange ko e ikale; te nau lele ʻo ʻikai ongosia; te nau haʻele ʻo ʻikai vaivai.”—Aisea 40:29-31.

Kapau ʻokú ke holi ke fai e finangalo ʻo e ʻOtuá, ʻe lava ke ke fakapapauʻi te ne ʻoatu kiate koe ʻa hono laumālie māʻoniʻoní ke fakaivia koe. Ka kuo pau ke ke kole ia. (Luke 11:13) ʻI he tokoni ʻa e ʻOtuá, ʻe lava ke ke kātekina ha faʻahinga ʻahiʻahi pē pea maʻu ʻa e mālohi ke fai ʻa e meʻa ʻoku totonú.—Filipai 4:13.

[Fakamatala ʻi he peesi 7]

ʻI he tokoni ʻa e ʻOtuá, ʻe lava ke ke maʻu ai ʻa e mālohi ke fai ʻa e meʻa ʻoku totonú

[Fakatātā ʻi he peesi 7]

Takai fakatoʻomataʻu mei he toʻohema ʻi ʻolungá: Kaniva Whirlpool, pupunga fetuʻu Pleiades, Orion Nebula, kaniva Andromeda

[Fakatātā ʻi he peesi 7]

Ko e kakano ʻo e laʻaá ʻoku liunga 330,000 hono lahí ʻi he kakano ʻo e foʻi māmaní

[Maʻuʻanga Tā ʻi he peesi 7]

Pleiades: NASA, ESA and AURA/Caltech; meʻa kehe kotoa ʻi ʻolungá: National Optical Astronomy Observatories