Poto ʻo e ʻOtuá Hā Ia ʻi Natula

“ʻEne ako kitautolu ke poto ange ʻi he fanga manu ʻo e fonua, ʻo ne ngaohi kitautolu ke tau poto ange ʻi he fanga manu ʻo e ʻatā.”—SIOPE 35:11.

ʻOKU maʻu ʻe he fanga manupuná ʻa e ngaahi malava fakaofo. ʻOku nau fakahoko ha ngaahi founga puna ʻi he ʻataá ʻa ia ʻoku mānumanu ki ai ʻa e kau faʻu vakapuná. ʻOku fononga ʻa e faʻahinga manupuna ʻe niʻihi ʻi he kilomita ʻe laui afe ʻi he vaha noá pea aʻu taʻetoefehālaaki ki he feituʻu naʻe fakataumuʻa ki ai ʻenau fonongá.

Ko ha talēniti tuʻu-ki-muʻa ʻe taha ʻo e manupuná—ko ha talēniti ʻoku toe hā mai ai ʻa e poto ʻo honau Tokotaha Ngaohí—ko ʻenau malava ko ia ke fetuʻutaki fakafou ʻi he ngaahi tangi mo e ngaahi hiva. Vakai angé ki ha ngaahi fakatātā.

Fetuʻutaki ʻa e Manupuná

Ko e faʻahinga ʻe niʻihi ʻo e manupuná ʻoku kamata pē ʻenau fetuʻutakí naʻa mo e ki muʻa ke fōfoaʻi kinautolú. Ko e fakatātaá, ko ha kueili fefine ʻokú ne fakatō ʻo aʻu ki he foʻi fua ʻe valu, ʻi he lahi ko e foʻi fua ʻe taha ʻi he ʻaho. Kapau ko e fuá kotoa ʻe maliuliu ʻenau tupu ʻi lotó ʻi he vave tatau, ʻe fōfoaʻi mai kinautolu ʻi he vahaʻa taimi ko e ʻaho ʻe valu. ʻE fehangahangai leva ai ʻa e faʻeé mo e ngāue faingataʻa ʻo hono tokangaʻi ʻa e fanga kiʻi ʻuhiki kuo uike ʻe taha mo longomoʻuí lolotonga ia ʻene kei tataʻo ʻa e foʻi fua ʻoku teʻeki ke fōfoaʻí. Ka ʻi hono kehe mei hení, ko e fānganga kueili ʻe valú te nau ʻasi kotoa mai ki tuʻa mei honau ngeʻesí ʻi loto ʻi he houa ʻe ono. ʻOku malava fēfē ia? Ko ha ʻuhinga tefito ʻe taha, kuo pehē ʻe he kau fakatotoló, ko e fanga kiʻi kueili teʻeki ke fōfoaʻí ʻoku nau fetuʻutaki fakaekinautolu pē mei he loto fuá pea nau fokotuʻutuʻu ʻi ha faʻahinga founga ʻa hono meimei fōfoaʻi taimi taha mai kinautolú.

ʻI he lalahi ʻa e manupuná, ʻoku meimei ko e manupuna tangatá ʻokú ne fai ʻa e hivá. ʻOku tautefito ʻene fai ení ʻi he taimi fakaoʻó ke fakaʻilongaʻi ʻa e feituʻu ʻoku ʻi aí pe ke tohoakiʻi mai ʻaki ha hoa. Ko e faʻahinga taki taha ʻe laui afe ʻo e manupuná ʻoku ʻi ai pē ʻenau faʻahinga fetuʻutaki, pea ʻoku tokoni eni ki he fanga manupuna fefiné ke nau ʻiloʻi ʻa e fanga manupuna tangata ʻo honau faʻahingá.

ʻOku meimei ke hiva ʻa e manupuná ʻi he ata ʻa e ʻahó pea ʻi he tō ʻa e laʻaá pea ʻoku ʻi ai hono ʻuhinga lelei. ʻI he taimi ko iá, ʻoku siʻi ai ke havili mo longoaʻa. Kuo ʻiloʻi ʻe he kau fakatotoló ʻoku aʻu ki he liunga 20 ʻa e lelei ange ʻa e hiva ʻa e manupuná ʻi he pongipongí mo e efiafí ʻi he hoʻataá.

Lolotonga ko e manupuna tangatá ʻoku meimei lahi taha ke nau fai ʻa e hivá, fakatouʻosi ʻa e manupuna tangatá mo e manupuna fefiné ʻoku nau fai ʻa e ngaahi tangi kehekehe, pe ko ha tangi nounou, ʻa ia ʻoku ʻi ai hono ngaahi ʻuhinga kehekehe. Ko e fakatātaá, ko e kalasi manupuna ko e chaffinch ʻoku ʻi ai ʻenau ngaahi tangi kehekehe ʻe hiva. ʻOku nau fai ʻa e faʻahinga tangi ʻe taha ke fakatokanga fekauʻaki mo ha fakatuʻutāmaki mei he ʻataá—hangē ko ha manupuna ʻoku puna ʻo kumi kai—ka  ʻokú ne fai ha tangi kehe ke fakatokanga ai ʻo fekauʻaki mo ha fakatuʻutāmaki ʻoku fakaofiofi mai ʻi lalo.

Ko ha Meʻaʻofa Mahulu Hake

Ko e poto fakanatula ʻo e manupuná ʻoku fakaofo moʻoni ia. Ka ʻi he fekauʻaki mo e fetuʻutaki pōtoʻí, ʻoku toe fakaofo ange ʻa e tangatá ia. Kuo ngaohi ʻe he ʻOtuá ʻa e faʻahinga ʻo e tangatá ke “poto ange ʻi he fanga manu ʻo e ʻatā,” ko e lau ia ʻa e Siope 35:11. ʻOku makehe ange ʻa e tangatá ia ʻi heʻene malava ke fakahoko atu ʻa e ngaahi fakakaukau faingataʻa mo fihi fakafou ʻi he ngaahi ongo ʻoku tuku mai ʻe he ʻōkani leá pe ʻi hono fakatātaaʻi.

ʻI he ʻikai hangē ko ha toe meʻa fakatupu kehe, ʻoku hangē ʻoku fakapolokalamaʻi ʻa e fanga kiʻi pēpē fakaetangatá ia ke nau ako ha ngaahi lea ʻoku fihi. ʻOku pehē ʻe he pepa ʻi he ʻinitanetí ko e American Scientist: “ʻOku malava ke ako lea ʻa e fanga kiʻi pēpē toki ako ʻalú naʻa mo e ʻikai ke talanoa hangatonu ange kiate kinautolu ʻa ʻenau ongo mātuʻá; ko e fānau tulí ʻe aʻu ʻo nau faʻu ʻenau founga talanoa tuhutuhu pē ia ʻakinautolu kapau ʻoku ʻikai ke akoʻi kinautolu ki ai ʻi ʻapi.”

Ko e malava ke fakahoko atu ʻetau ngaahi fakakaukaú mo ʻetau ngaahi ongó fakafou ʻi he lea pe ʻi he talanoa tuhutuhú ko ha meʻaʻofa fakaofo moʻoni ia mei he ʻOtuá. Ka ko ha meʻaʻofa ʻoku toe mahulu hake kuo foaki ki he tangatá, ko e malava ko ia ke fetuʻutaki mo e ʻOtuá fakafou ʻi he lotu. Ko hono moʻoní, ʻoku fakaafe mai ʻa Sihova ko e ʻOtuá ke tau talanoa ange kiate ia. “Neongo pe ko e ha ʻa e meʻa, ʻoua te mou lotomoʻua ai,” ko e fakamatala ia ʻi he Folofola ʻa e ʻOtuá ko e Tohi Tapú, “ka ʻi he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi.”—Filipai 4:6.

ʻI he taimi ʻoku tau fehangahangai ai mo ha ngaahi fili faingataʻa, ʻoku fiemaʻu mai ʻe Sihova ke tau ngāueʻaki ʻa e fuʻu tukuʻanga poto lahi kuó ne ʻai ke hiki ʻi he Tohi Tapú. Te ne toe tokoniʻi foki kitautolu ke tau ʻiloʻi ʻa e founga ke ngāueʻaki ai ʻa e faleʻi ʻoku tau maʻu aí. “ʻO kapau ko e poto ʻoku masiva ai ha taha,” ko e lau ia ʻa e tokotaha hiki Tohi Tapu ko Sēmisí, “ke ne kole mei he ʻOtua, ʻa ia ʻoku ne foaki ʻataʻatā pe ki he kakai kotoa pe, ʻo ʻikai ʻatu mo e lau; pea ʻe foaki ia ki ai.”—Semisi 1:5.

Anga-Fēfē ʻEne Kaunga Kiate Koé?

ʻOku anga-fēfē ʻene kaunga kiate koe ʻa hoʻo fanongo ki he hiva mālie ʻa ha foʻi manupuna pe ko e ako ha kiʻi tama ke puʻaki ʻa ʻene ʻuluaki ngaahi foʻi leá? ʻOkú ke sio ki he poto ʻo e ʻOtuá ʻi he ngaahi meʻa kuó ne ngaohí?

ʻI he hili ʻa e fakalaulauloto ʻa e tokotaha-tohi-saame ko Tēvitá ki he founga naʻe ngaohi ai iá, naʻe ueʻi ai ia ke ne pehē ki he ʻOtuá: “Te u fakafetaʻi kiate koe; hono kuo fakangeingei mo fakaofo hoku ngaohi e. Ko hoʻo ngaahi ngaue ko e koto fakaofo pe, pea ʻoku matuʻaki ʻilo ia ʻe hoku laumalie.” (Sāme 139:14) ʻI hoʻo vakaiʻi ʻi he loto-houngaʻia ʻa e poto ʻo e ʻOtuá ʻoku hā ʻi he fakatupú, ʻe tupulaki moʻoni ai ʻa hoʻo tui ki heʻene malava ke tokonaki kiate koe ʻa e tataki leleí.

[Fakamatala ʻi he peesi 5]

Ko e malava ke fetuʻutakí ko ha meʻaʻofa ia mei he ʻOtuá

[Maʻuʻanga Tā ʻi he peesi 4]

© Dayton Wild/Visuals Unlimited