ʻI he Taimi ʻOku Mate Ai ha Taha ʻOfeina

ʻI he efiafi Tūsite ʻo Siulai 17, 2007, ʻi he taimi fitú nai, naʻe sīfā ai ha vakapuna uta pāsese mei he leleʻangá ʻi he malaʻe vakapuna femoʻuekina taha ʻi Pelēsilá, ʻi he uhouhonga ʻo São Paulo. Naʻe kolosi ai e vakapuná ʻi ha fuʻu hala lahi ʻo tuiʻi ha fale tukuʻanga uta. Ko e kakai fakafuofua ki he toko 200 ne mate ʻi he fakatuʻutāmakí.

KO E meʻa kuo fakamatalaʻi ko e fakatamaki kovi taha ʻi he malaʻe vakapuna ʻo Pelēsilá heʻikai ʻaupito ngalo ia ʻi he faʻahinga ne mole ai meiate kinautolu ʻa e faʻahinga ʻofeiná. Naʻe kau ʻa Claudete ʻi he faʻahinga naʻa nau hokosia ʻa e mole ko iá. Naʻá ne sio TV ʻi he taimi naʻá ne fanongo ai ki he ongoongo ʻo fekauʻaki mo e pā ʻa e vakapuná. Ko ʻene tamasiʻí, ko Renato, naʻe ʻi he vakapuná. Naʻá ne kei taʻu 26 pē. Naʻá ne palani ke mali ʻi ʻOkatopa. Naʻe feifeingavale ʻa Claudete ke fetuʻutaki kiate ia ʻi heʻene telefoni toʻotoʻó, ka naʻe ʻikai ke tali mai. Naʻá ne hoholo hifo ki lalo ʻo tangi pea ʻikai lava ke fakafiemālieʻi.

Naʻe mate ʻa e tangata naʻe fakamaʻu mo Antje ʻi he fakatuʻutāmaki ʻi ha kā ʻi Sanuali 1986. ʻI heʻene fanongo ki he ongoongó, naʻá ne ʻi ha tuʻunga moʻutāfuʻua. “Ko ʻeku fuofua tali ki aí ko e taʻetui. Naʻá ku ongoʻi ko ha misi fakamanavahē ia pea te u ʻā fakafokifā hake pē ʻo ʻiloʻi ʻoku ʻikai ke moʻoni. Naʻá ku tete mo ongoʻi ʻa e langa lahi fakaʻulia ʻo hangē ia ne tukiʻi ʻe ha taha ʻa hoku keté.” Naʻe puke ʻa Antje ʻi he loto-mafasiá ʻi he taʻu ʻe tolu. Neongo ko e taʻu laka hake eni he 20 kuo mahili mei he fakatuʻutāmakí, ʻokú ne kei tete pē ʻi heʻene manatu ki he meʻa naʻe hokó.

ʻOku ʻikai ke fakamatalaʻi ʻe ha ngaahi foʻi lea pē ʻa e ngaahi ongoʻi taulōfuʻu ʻo e moʻutāfuʻua, taʻetui, ilifia mo e siva e ʻamanakí ʻa ia ʻoku lava ke hoko ʻi he ngaahi mate fakamamahi mo taʻeʻamanekina peheé. Kae kehe, naʻa mo e ʻamanekina ʻa e mate ʻa ha taha ʻofeina, ʻa ia ko e tuʻungá nai ia hili ʻa ʻene puke ʻi ha taimi lōloa, ʻoku kei lava pē ke lahi ʻaupito e mamahí. ʻOku ʻikai ʻaupito mateuteu kakato ha taha ia ki he mate ʻa ha taha ʻofeina. Ko e faʻē ʻa Nanci naʻá ne mate ʻi he 2002 ʻi he hili haʻane puke ʻi ha taimi lōloa. Neongo ia, ʻi he ʻaho ne mate ai ʻene faʻeé, naʻe tangutu ai ʻa Nanci ʻi he falikí he falemahakí ʻi ha tuʻunga moʻutāfuʻua fakaʻaufuli. Ne hā ngali taʻeifo e meʻa kotoa pē kiate ia. Kuo hili eni mei ai ʻa e taʻu ʻe nima, ka ʻokú ne kei tangi pē ʻi he taimi ʻokú ne fakakaukau ai ki heʻene faʻeé.

“ʻOku ʻikai ʻaupito ngalo mei he kakaí ha mole ʻi he maté, ʻoku nau feinga pē ke fekuki mo ia,” ko e fakamatala ia ʻa Dr. Holly G. Prigerson. Kapau kuo mole ha taha naʻá ke ʻofa ai ʻi he maté, ʻo taʻeʻamanekina pe ʻikai, te ke fifili nai: ‘ʻOku fakanatula pē ke mamahi? ʻE malava fēfē ke fekuki mo e mole ʻa ha taha ʻofeina? ʻE faifai ange peá u toe sio ki he tokotaha naʻá ku ʻofa aí?’ ʻE lāulea ʻa e kupu hokó ki he ngaahi meʻá ni mo haʻo toe ngaahi fehuʻi kehe nai.

[Maʻuʻanga ʻo e Tā ʻi he peesi 3]

EVERTON DE FREITAS/AFP/Getty Images