Liliu ʻe he Tohi Tapú ʻa e Moʻuí

Ko e hā naʻe lava ke ne ueʻi ha mēmipa ʻo ha kengi toʻutupu Mekisikou naʻe ui ko e Fanga Kiʻi Sētané ke ne liliu pea hoko ko ha tangataʻifonua faitotonu mo ngāue mālohí? Ko e hā ne taʻofi ai ʻe ha fefine Siapani pisinisi lavameʻa ʻa e tuli ki he tuʻumālié ko e taumuʻa tefito ia ʻi he moʻuí, pea ʻoku anga-fēfē ʻene ongoʻi fekauʻaki mo e ngaahi liliu kuó ne faí? Ko e hā naʻá ne ueʻi ha tokotaha Lūsia tila meʻatau ke liʻaki ʻa ʻene ngāue fakatupu paʻanga lahi taʻefakalaó? Vakai angé ki he meʻa ʻoku leaʻaki ʻe he faʻahingá ni.

FAKAMATALA

HINGOA: ADRIAN PEREZ

TAʻUMOTUʻA: 30

FONUA: MEKISIKOU

HISITŌLIA: MĒMIPA ʻO HA KENGI

KUOHILÍ: ʻI heʻeku taʻu 13 nai, naʻe hiki ai hoku fāmilí ki Ecatepec de Morelos, ʻi he Vahefonua Mekisikoú. ʻI he taimi ko iá, naʻe uesia lahi ai ʻa e feituʻú ʻe he faihia ʻa e toʻutupú, maumauʻi ʻo e ngaahi feituʻú mo e maʻunimā ʻe he faitoʻo kona tapú. Naʻe vave ʻeku kamata ke ngāuekoviʻaki ʻa e ʻolokaholó, maumauʻi ʻa e ngaahi koloa pea kau ʻi he ʻulungāanga taʻetāú.

Ki mui ai, naʻa mau foki ai ki San Vicente, ko e kolo ia naʻe fāʻeleʻi ai aú. Kae kehe, naʻe hoko ʻa e maʻunimā ʻe he faitoʻo kona tapú ko ha palopalema lahi ia ʻi ai. Naʻe anga-maheniʻaki ʻa e sio ki he tākoto ʻi he halá ʻa e toʻutupu kuo nau mate. Naʻá ku kau ai ki ha kau kengi naʻe ui ko e Fanga Kiʻi Sētané. Naʻa mau kaihaʻa pea ngāueʻaki ʻa e faitoʻo kona tapú, ʻo failahia hono mihi ʻo e meʻa huʻi valí pe kuluú. Naʻe ʻikai te u faʻa manatuʻi pe naʻe anga-fēfē ʻeku aʻu ki ʻapí, pea ʻi he taimi ʻe niʻihi naʻá ku tokoto ai pē ʻi he loto halá ʻoku ʻikai teu ʻiloʻi ha meʻa. Ko e niʻihi ʻo hoku ngaahi kaungāmeʻá naʻa nau iku ki pilīsone ʻi he kaihaʻa mo e fakapō.

Neongo ʻa e ngaahi meʻa kotoa ko iá, naʻá ku tui ki he ʻOtuá. Ke fakasiʻisiʻi e halaia hoku konisēnisí, naʻá ku kau ai ʻi he ngaahi ouau fakalotú, hangē ko hono fakahoko ʻa e ouau fekauʻaki mo e kolosí lolotonga ʻa e Uike Tapú. Neongo ia, ʻi he hili iá, ko kimautolu kotoa ʻo kau ai ʻa e tangata naʻá ne ʻetiʻi  ʻa e konga ʻa Kalaisí, naʻa mau fakafiefiaʻi ʻa ʻemau kau aí ʻaki ʻemau konā.

FOUNGA HONO LILIU ʻE HE TOHI TAPÚ ʻA ʻEKU MOʻUÍ: ʻI heʻeku taʻu hongofulu tupu lahí, naʻá ku kamata ako Tohi Tapu ai mo e Kau Fakamoʻoni ʻa Sihová. Naʻá ku ʻiloʻi naʻe ʻikai ha taumuʻa moʻoni ʻo ʻeku moʻuí pea kapau te u hokohoko atu ʻi he ʻalunga ko iá, heʻikai te u siaʻa. Ko e meʻa naʻe maongo kiate aú ko e fakakaukau ʻoku hiki ʻi he Kaletia 6:8: “Ko ia ʻoku ne to ʻi hono kakano, te ne utu mei he kakano ʻa e ʻauha: ka ko ia ʻoku ne to ʻi he laumalie, te ne utu mei he laumalie ʻa e moʻui taʻengata.” Naʻe ʻai au ʻe he konga Tohi Tapu ko ení ke u ʻiloʻi kapau ʻoku ou loto ke u siaʻa, ʻe pau ke u tō fakataha mo ha fakakaukau ki he kahaʻú.

ʻI heʻeku ako Tohi Tapú, naʻá ku kamata ai ke mahinoʻi ko Sihová ko ha ʻOtua moʻui ʻa ia ʻoku mahuʻingaʻia fakafoʻituitui ʻiate au, pea ʻokú ne loto-lelei ke fakamolemoleʻi ʻa e ngaahi angahala naʻá ku fai ʻi he kuohilí. Naʻá ku ako ʻo ʻiloʻi mei he meʻa naʻá ku hokosiá ʻokú ne fanongo mai pea tali ʻa e ngaahi lotú.

Naʻe ʻikai faingofua ke fai ha ngaahi liliu ʻi heʻeku founga moʻuí. Naʻe faingataʻa ʻa e mavahe mei he kau kengí. Naʻe tapui ʻa e ngaahi feituʻu ʻe niʻihi, pea naʻe ʻikai lava ke u fou ai, neongo naʻe ʻikai te u kei kau ʻi he kau kengí. ʻI he taimi ʻe niʻihi, naʻe pau ai ke u toi mei hoku ngaahi kaungāmeʻa ki muʻá koeʻuhí naʻa nau kumi holo au mo feinga ke tohoakiʻi mālohi au ke u foki ki heʻeku ngaahi tōʻonga motuʻá.

ʻI hono kehé, ʻi heʻeku kamata maʻu ʻa e ngaahi fakatahá fakataha mo e Kau Fakamoʻoní ʻi he Fale Fakatahaʻangá, naʻá ku ʻiloʻi ai ʻa e māfana mo e ʻofa ʻi he fakatahaʻangá. Naʻe maongo kiate au ʻa e tui mālohi ʻa e kakai ko ení mo ʻenau moʻui ʻo fehoanaki mo e meʻa naʻa nau akoʻí. Ko ha ʻātakai kehe ʻaupito ia mei he meʻa naʻá ku anga ki aí.

FOUNGA ʻO ʻEKU MAʻU ʻAONGÁ: Kuó u papitaiso ʻo hoko ko e taha ʻo e Kau Fakamoʻoni ʻa Sihová ʻi he taʻu eni ʻe hongofulu. ʻOku ou feinga mālohi ke ngāueʻaki ʻa e ngaahi akonaki ʻa e Tohi Tapú ʻi heʻeku moʻuí. Ko hono olá, ʻoku ou maʻu ʻa e tokaʻi ʻa hoku fāmilí. ʻOku nau ʻiloʻi au he taimí ni ko ha tokotaha ngāue mālohi, pea kuo aʻu ʻou malava ke tokoniʻi fakapaʻanga kinautolu. Naʻe kamata ako Tohi Tapu ʻa ʻeku faʻeé pea kuó ne hoko he taimí ni ko e taha ʻo e Kau Fakamoʻoni ʻa Sihová. ʻOku toe fai ʻe heʻeku tamaí ʻa e ngaahi liliu ʻi heʻene founga moʻuí. Ko e tokolahi taha ʻo hoku fāmilí ʻoku ʻikai ko e Kau Fakamoʻoni ʻa Sihova, ka ʻi he hili e sio ki he meʻa kuo hoko kiate aú, ʻoku nau pehē ʻoku lava ke tokoniʻi ʻe he Tohi Tapú ha tokotaha ke laka ki muʻa ʻa ʻene moʻuí.

FAKAMATALA

HINGOA: YAYOI NAGATANI

TAʻUMOTUʻA: 50

FONUA: SIAPANI

HISITŌLIA: FEFINE PISINISI LAVAMEʻA

KUOHILÍ: Naʻá ku tupu hake ʻi ha kiʻi kolo ʻuta naʻe fonu ʻi he kakai anga-fakakaumeʻa. Naʻe ʻi ai ha fuʻu falekoloa ʻa ʻeku tamaí ʻi he koló naʻe ngāue ai ha kau ngāue ʻe toko hongofulu. Naʻe hoko atu pē homau ʻapí ki he falekoloá, ko ia neongo naʻe femoʻuekina ʻa e tangataʻeikí mo e fineʻeikí, naʻe ʻikai ʻaupito te u ongoʻi taʻelata.

 Ko e lahi taha au ʻi he tamaiki fefine ʻe toko tolu, pea mei he kei taʻu siʻí, naʻe akoʻi ai au ke u fakalele e pisinisi ʻa e fāmilí. Naʻá ku mali kei siʻi. Naʻe tukuange ʻe hoku husepānití ʻa ʻene ngāue ʻi he pangikeé pea haʻu ke tokoni ki he pisinisi fakafāmilí. Naʻe fāʻeleʻi hokohoko ʻema fānau ʻe toko tolu. Naʻe tokangaʻi ʻe heʻeku faʻeé ʻa e fānaú ʻi heʻene fai ʻa e ngaahi ngāue fakaʻapí, lolotonga ia naʻá ku ngāue mei he pongipongí ʻo aʻu ki he poʻulí ʻi he falekoloá. Naʻa mo ia, naʻa mau kei maʻu pē ha taimi ʻatā ke fakamoleki fakataha ʻi he tuʻunga ko ha fāmilí.

Naʻe faai atu pē pea uesia ʻa e feituʻu fakatauʻangá ʻe ha tōlalo fakaʻekonōmika, pea naʻe kamata ke lavetukia ai ʻemau pisinisí. ʻI he feinga ke fakaleleiʻi ʻa e tuʻungá ni, naʻa mau fili ai ke fakaava ha falekoloa naunau ʻapi ofi ki ha hala lahi. ʻI he ʻaho ki muʻa ʻi he ouau ke kamata ʻa e langá, naʻe uesia fakafokifā ai ʻa ʻeku tamaí, ʻa ia ko e palesiteni ia ʻo ʻemau kautahá, ʻe ha mahaki ʻi hono ʻutó. Naʻe hoko ai ʻo ʻikai toe mahino ʻa ʻene leá, ko ia naʻe hilifaki mai kiate au ʻa e fatongia ki hono tokangaʻi ʻo e falekoloa foʻoú. Naʻe hokohoko atu pē ʻa hoku husepānití ʻi he falekoloa motuʻá. Naʻe hoko ai ʻo ma moʻui femoʻuekina ʻaupito.

Naʻe lele lelei ʻaupito ʻa homau falekoloa foʻoú. Naʻá ku laukau ʻi heʻeku ngaahi lavameʻá pea feilaulauʻi mo hoku ngaahi houa mohé ʻi he ngāué. Neongo naʻá ku ʻofa ʻi heʻeku fānaú, ko e meʻa pē naʻe ʻi hoku ʻatamaí ko e ngāué. Naʻe ʻikai meimei ʻi ai haku taimi ke talanoa ai ki hoku husepānití, pea ʻi he taimi naʻá ma talanoa aí, naʻe lahi ʻema tau tutuʻú. Ke fekuki mo e loto-mafasiá, naʻe kamata ai ke u ʻalu ʻi he meimei pō kotoa ʻo inu mo hoku ngaahi kaumeʻá pea mo e kaungā pisinisí. Ko e meʻa pē naʻá ku faí ko e ngāue, inu mo e mohe. Naʻá ku lavameʻa fakapaʻanga ka naʻe fakautuutu ʻa e taʻefiefiá pea naʻe ʻikai lava ke u mahinoʻi ʻa hono ʻuhingá.

FOUNGA HONO LILIU ʻE HE TOHI TAPÚ ʻA ʻEKU MOʻUÍ: ʻI he taimi naʻá ku kamata ako Tohi Tapu ai mo e Kau Fakamoʻoni ʻa Sihová, naʻe maongo lahi kiate au ʻa e konga Tohi Tapu ʻe tolu. Naʻá ku tangi ʻi he taimi naʻá ku mahinoʻi ai ʻa e ʻuhinga ʻo e Mātiu 5:3 (NW): “Fiefiaā ka ko kinautolu ʻoku nau ʻiloʻi ʻa ʻenau fiemaʻu fakalaumālié, koeʻuhi ʻoku ʻonautolu ʻa e puleʻanga ʻo hēvaní.” Naʻe fakamatalaʻi ʻe he veesi ko ení ʻa e ʻuhinga naʻá ku ongoʻi ngeʻesi ai neongo naʻá ku lavameʻa fakapaʻanga pea saiʻia ʻiate au ʻa hoku ngaahi kaungāmeʻá. Naʻá ku mahinoʻi ko hono toki ʻiloʻi pē pea fakalato ʻa ʻeku fiemaʻu fakalaumālié ʻe lava ai ke u fiefia moʻoní.

ʻI he taimi ko iá, naʻe hoko ʻo tōlalo lahi ʻa e ʻekonōmika ʻa Siapaní, pea naʻá ku sio ʻi he lotolotonga ʻo hoku ngaahi kaungā feohí ki he moʻoni ʻo e 1 Timote 6:9: “Ko kinautolu kuo pau honau loto ke koloaʻia, ʻoku nau to ki he ʻahiʻahi, mo e tauhele, mo e ngaahi holi kehekehe, ʻa ia ʻoku fakasesele pea ko e meʻa ʻoku te lavea ai; ko e faʻahinga meʻa ʻoku nau lomekina ʻa e kakai ki he ʻauha mo e malaʻia.” Naʻá ku ongoʻi ko e lea ʻa Sīsū ʻoku hiki ʻi he Mātiu 6:24, “ʻoku ʻikai te mou lava ke eikiʻaki ʻa e ʻOtua mo Koloa fakatouʻosi,” naʻe kaunga fakafoʻituitui kiate au, ko ia naʻá ku fili ai ke fai ha ngaahi liliu ʻi heʻeku moʻuí.

Naʻá ku fakatokangaʻi hifo kuó u liʻaki ʻa ʻeku ongo mātuʻá, ko hoku husepānití pea mo ʻeku fānaú. Naʻe toe hoko ʻo hā mahino kuó u fakatupulekina ha ngaahi tōʻonga fakaeʻulungāanga ʻikai lelei. Naʻá ku hoko ʻo hīkisia. Naʻe siʻi ʻeku kātaki ʻi he feangai mo e kakaí. Pea naʻá ku ʻita vave. ʻI he fuofua taimí, naʻá ku fakakaukau ai ʻe faingataʻa ke u liliu pea hoko ko ha Kalisitiane. Kae kehe, naʻá ku ʻofa moʻoni ʻi heʻeku fānaú peá u fakatokangaʻi ʻi heʻeku ngāueʻaki ʻa e akonaki ʻa e Tohi Tapú ʻi he feangainga mo hoku fāmilí, naʻe lelei ʻaupito e tali ʻa e fānaú. Naʻá ku fakamoleki ʻa e taimi lahi ange mo kinautolu pea ʻalu mo kinautolu ki he ngaahi fakataha faka-Kalisitiané.

FOUNGA ʻO ʻEKU MAʻU ʻAONGÁ: Ko hono ʻiloʻi ʻa e taumuʻa ʻo e moʻuí pea malava ke tauhi ki he ʻOtuá, ko e moʻui ʻo fakahōifua kiate iá, kuó ne ʻomai kiate au ʻa e fiefia mo e fiemālie moʻoni. ʻOku ʻikai te u kei fakamuʻomuʻa e ngāué ʻi hoku fāmilí, ko ia kuó u malava ai ke toe maʻu ʻa hoku ngeia naʻe molé.

Ko e sio ki he liliu ʻo lelei ange ʻa hoku angaʻitangatá ʻi heʻeku ngāueʻaki ʻa e ngaahi tefitoʻi moʻoni Fakatohitapú naʻe ueʻi ai ʻa ʻeku faʻeé ke ne ako Tohi Tapu pea hoko ko ha Kalisitiane. Ko e meʻa fakafiefiá ʻa e ʻikai ke fakafepakiʻi ʻe heʻeku tamaí pe ko hoku husepānití ʻa ʻema ngaahi filí. Ko hoku vahaʻangatae mo ʻeku fānaú kuo hoko ʻo toe ofi ʻaupito ange, pea ʻoku ou maʻu he taimí ni ha moʻui fakafāmili fiefia moʻoni.

 FAKAMATALA

HINGOA: MIKHAIL ZUYEV

TAʻUMOTUʻA: 51

FONUA: LŪSIA

HISITŌLIA: TOKOTAHA TILA MEʻATAU TAʻEFAKALAO

KUOHILÍ: Ko hoku koló, ʻa Krasnogorsk, ʻoku takatakaiʻi ia ʻe he ʻuluʻakau lanu mata maʻuiʻui. ʻOku lele ki he tongá ʻa e Vaitafe Mosikoú. Ko e ngaahi kolo ʻuta ʻi he hihifó mo e tokelaú ʻoku meimei ke vaotā ʻatā ia.

ʻI heʻeku kei siʻí, naʻá ku manako he fuhú mo hono vaʻingaʻaki ʻa e ngaahi meʻataú. Naʻá ku fakamoleki ʻa e taimi lahi ʻi he fakamālohisinó. Naʻá ku toe ngaohi taʻefakalao ʻa e ngaahi meʻafana, mahafu mo e ngaahi hele. Naʻe faifai pē ʻou ʻai ʻa e meʻá ni ko ʻeku pisinisi. Naʻe maau ʻaupito mo lavameʻa lahi ʻa ʻeku fakatau atu ʻeku koloá ki he kau faihiá.

FOUNGA HONO LILIU ʻE HE TOHI TAPÚ ʻA ʻEKU MOʻUÍ: ʻI he konga ki muʻa ʻo e 1990 tupú, naʻá ku fetaulaki ai mo e Kau Fakamoʻoni ʻa Sihová, ka ʻi he ʻuluaki taimí naʻe ʻikai te u falala kiate kinautolu. Naʻá ku fakakaukau ne fuʻu lahi ʻa e fehuʻi ne nau ʻeke maí.

ʻI he ʻaho ʻe taha, naʻe lau mai ai ʻe ha taha ʻo kinautolu kiate au ʻa e Loma 14:12: “Te tau taki taha fai ha fakamatala ki he ʻOtua maʻata.” Naʻá ku fifili ai pe ko e hā te u leaʻaki ki he ʻOtuá. Naʻe ueʻi au ʻe he konga Tohi Tapu ko ení ke u ako ʻa e meʻa naʻe fiemaʻu mai ʻe he ʻOtuá.

Naʻá ku ngāue mālohi ʻi hono ngāueʻaki ʻa e akonaki ʻa e Tohi Tapú ʻoku hiki ʻi he Kolose 3:5-10: “Ko ia mou ʻai ke mate leva homou ngaahi kupu ʻoku ʻi mamani, ko e feʻauaki, angaʻuli, havala, holi pango; kaeʻumaʻā ʻa e manumanu, ʻa ia ko e tauhi aitoli tofu pe ia: he ko e ngaahi meʻa ko ia ʻoku hoko mei ai ʻa e houhau ʻa e ʻOtua. . . . Ke mou tuku ʻe kimoutolu foki ʻa e meʻa pehe kotoa pe, ʻa e ʻita, ʻa e lili, ʻa e lotokovi; taʻofi homou ngutu mei he lauʻikovi mo e kape. ʻOua ʻe loi ʻi hoʻomou feangai, he kuo mou huʻihuʻi ʻa e motuʻa tangata, mo ʻene ngaahi falengā ngaue; pea . . . ʻai ʻa e tangata foʻou.”

Naʻe faingataʻa ʻaupito kiate au ke fai ʻa e ngaahi liliu ko iá. Ko hoku “ngaahi kaungā pisinisi” ki muʻá naʻa nau hanganaki fakaʻali mai kiate au ʻa e paʻanga kae ʻoange ʻa e ngaahi meʻatau, pea naʻá ku faingataʻaʻia ʻi he feinga ke mapuleʻi au ʻi he taimi naʻe fakaʻitaʻi ai au ʻe he kakaí. Neongo ia, naʻá ku fakaʻauha ʻa ʻeku fokotuʻunga meʻatau lahi mo mahuʻingá. ʻI heʻeku ako fekauʻaki mo e ʻofa kuo fakahaaʻi mai ʻe he ʻOtuá mo Kalaisi maʻakú, naʻe ueʻi ai au ke u ʻofa kiate kinaua. Naʻá ku kītaki ʻi heʻeku ako Tohi Tapu fakafoʻituituí, maʻu ʻa e ngaahi fakataha ʻi he fakatahaʻanga fakalotofonuá, pea lotu ʻo kole e tokoni ʻa e ʻOtuá.

FOUNGA ʻO ʻEKU MAʻU ʻAONGÁ: ʻI he feinga lahi māmālie fakataha mo e tokoni ʻa hoku fanga tokoua Kalisitiané, kuo u fakatupulekina ai ha angaʻitangata lelei ange. ʻI hono mahinoʻi ʻoku tokanga mai ʻa e ʻOtua ko Sihová kiate kitautolu taki taha, naʻa mo e kakai kuo nau maté, ʻokú ne ʻai au ke u fiefia lahi. (Ngāue 24:15) ʻOku ou fakamahuʻingaʻi ʻa e loto-moʻoni mo e faitotonu ʻoku ou sio ai ʻi he lotolotonga ʻo e Kau Fakamoʻoni ʻa Sihová. Pea ʻoku hounga kiate au ʻa e mahuʻingaʻia moʻoni kuo nau fakahāhā kiate aú mo ʻenau mateaki ki he ʻOtuá.

ʻI he ʻuluaki taimí, naʻe fakafepakiʻi ai ʻe he niʻihi ʻo hoku fāmilí mo e ngaahi kaumeʻá ʻa ʻeku tui foʻoú. Ka naʻa nau fiemālie kinautolu ʻi he fakakaukau naʻe lelei ange ʻa ʻeku kau ki he lotú kae ʻikai ko e ngāue taʻefakalaó. ʻOku ou fiefia ʻi he ʻikai kei līʻoa ʻeku moʻuí ki hono fakatau atu ʻa e ngaahi meʻataú ka ʻoku līʻoa ia ki hono tokoniʻi ʻo e niʻihi kehé ke ako fekauʻaki mo e ʻOtua ʻo e melinó.

[Fakatātā ʻi he peesi 27]

Naʻá ku kau ʻi he ouau faka-Katoliká ke fakafiemālieʻi ʻa hoku konisēnisí

[Fakatātā ʻi he peesi 28]

Naʻá ku lavameʻa fakapaʻanga ka naʻe ʻikai ʻaupito ke u fiefia