KO E fepaki mo e mātuʻa-ʻi-he-fonó ko ha meʻa ia ʻoku huaʻaki ʻe he kau ʻeti faiva fakakatá, ka ʻoku ʻikai ko ha meʻa fakaoli ia ʻi he moʻui fakaʻahó. “Naʻe kaunoa ʻa ʻeku faʻē-ʻi-he-fonó ʻi heʻema nofo malí ʻi ha ngaahi taʻu,” ko e lau ia ʻa Lina, ko ha uaifi ʻi ʻInitia. “Naʻe faʻa tō ʻa ʻeku ʻitá ki hoku husepānití koeʻuhi ko e ʻikai lava ke u fai pehē ki heʻene faʻeé. Naʻe hā ngali naʻe pau maʻu pē ke ne fai ʻa e fili ʻi he vahaʻa ʻo e hoko ko ha husepāniti lelei mo e hoko ko ha foha lelei.”

Ko e hā ʻoku kaunoa ai ʻa e mātuʻa-ʻi-he-fonó ʻi he moʻui ʻa ʻenau fānau kuo malí? Ko Seni naʻe lave ki ai ʻi he kamatá, ʻokú ne fakahaaʻi ʻa e meʻa ʻoku ala hokó. “Mahalo pē ʻoku faingataʻa kia kinaua ke sio ki ha tokotaha kei siʻi mo taʻetaukei ʻoku hoko ʻo ne maʻu ʻa e fatongia ko hono tokangaʻi ʻa hona fohá pe ʻofefiné,” ko ʻene leá ia. Ko Tīlepi, ʻa e mali ʻo Liná, ʻokú ne toe ʻomai ha ʻuhinga. “Ko e ongo mātuʻa kuó na fai ʻa e feilaulau ki heʻena tamá mo tauhi hake iá ʻokú na ongoʻi nai kuo ʻikai haʻana toe kaunga ki heʻena tamá,” ko ʻene laú ia. “ʻOku toe lava moʻoni ke na hohaʻa naʻa ʻoku ʻikai maʻu ʻe hona fohá pe ʻofefiné ha poto ke hoko ai ʻo lavameʻa ʻa ʻene nofo malí.”

Ko hono moʻoní, ʻi he taimi ʻe niʻihi ʻoku koleʻi pē ʻa e ongo mātuʻa-ʻi-he-fonó ia ke na kau mai ki he nofo malí. Ko e fakatātaá, fakakaukau angé kia Maikolo mo Lieni, ko ha ongo meʻa mali ʻi ʻAositelēlia. “Ko e haʻu ʻa Liení mei he fāmili ʻoku nau vāofi ʻa ia ʻoku fetalanoaʻaki tauʻatāina ai ʻa e tokotaha kotoa,” ko e lau ia ʻa Maikoló. “Ko ia ʻi he ʻosi ʻema malí, naʻá ne kumi faleʻi ki heʻene tamaí ʻi he ngaahi fili ʻa ia ko hono moʻoní ko ia mo au naʻe fiemaʻu ke ma faí. Naʻe lahi e faleʻi fakapotopoto  ne fai mai ʻe heʻene tamaí, ka naʻá ku loto-mamahi ʻi heʻene ʻalu kiate ia kae ʻikai haʻu kiate aú!”

ʻOku hā mahino, ko e ngaahi meʻa ʻoku hoko fekauʻaki mo e mātuʻa-ʻi-he-fonó ʻoku lava ke ne fakamafasiaʻi ha nofo mali. ʻOku hoko moʻoni ia kiate koe? ʻOku fēfē ho vā mo e ongo mātuʻa ʻa ho hoá, pea ʻoku fēfē ʻa e vā ʻa ho hoá mo hoʻo ongo mātuʻá? Fakakaukau angé ki he ongo pole ʻe ua ʻoku lava ke malanga hake mo e meʻa ʻe lava ke ke fai fekauʻaki mo iá.

Ko ho hoá ʻoku hā ngali ʻokú ne fuʻu pipiki ki heʻene ongo mātuʻá, “Naʻe ongoʻi ʻe hoku uaifí kapau naʻe ʻikai te ma nofo ofi ki heʻene ongo mātuʻá, te ne hoko ai ʻo taʻemateaki kia kinaua,” ko e lau ia ʻa ha husepāniti ʻi Sipeini ko Luisi. “ʻI he tafaʻaki ʻe tahá,” ko e hoko atu ia ʻene leá, “ʻi he taimi naʻe fāʻeleʻi ai ʻa homa fohá, naʻe meimei ʻaʻahi mai ai ʻeku ongo mātuʻá ʻi he ʻaho kotoa pē, ʻo mafasia ai ʻa hoku uaifí. Naʻe fakatupunga ʻe he meʻá ni haʻama toutou fepaki.”

Ngaahi poini:

ʻI hono fakamatalaʻi ʻa e fokotuʻutuʻu ki he nofo malí, ʻoku pehē ʻe he Tohi Tapú ʻe aʻu ki he taimi “ʻe tukuange ʻe he tangata ʻene tamai mo ʻene faʻe, kae pikitai ki hono uaifi: pea te na hoko ko e kakano pe taha.” (Senesi 2:24) Ko e hoko ko e “kakano pe taha” ʻoku fakahuʻunga ai ʻa e meʻa lahi ange ʻi he nofo fakatahá pē. Ko hono moʻoní, ʻoku ʻuhinga iá ko e husepānití mo e uaifí ʻokú na faʻu ha fāmili foʻou—ko e fāmili ʻoku muʻomuʻa ia ʻi he fāmili naʻá na tupu hake aí. (1 Kolinito 11:3) Ko e moʻoni, ʻoku kei fiemaʻu fakatouʻosi pē ʻa e husepānití mo e uaifí ke na fakaʻapaʻapa ki heʻena ongo mātuʻá, ʻoku faʻa kau ki ai ʻa e tokanga kia kinaua. (Efeso 6:2) Fēfē kapau ko e founga hono fakahoko ʻe ho hoá ʻa e fatongia ko iá ʻokú ke ongoʻi ʻoku tukunoaʻi pe fakaliʻeliʻaki ai koe?

Meʻa ʻe lava ke ke faí:

Siofi fakalelei ʻa e tuʻungá. ʻOku fuʻu pipiki moʻoni ho hoá ki heʻene ongo mātuʻá, pe ʻoku lava ke pehē ʻoku ʻikai pē te ke maʻu ʻe koe ha vā pehē mo hoʻo ongo mātuʻá? Kapau ko e tuʻungá ia, ko e hā nai e kaunga ho puipuituʻa fakafāmilí ki he anga hoʻo vakai ki he tuʻungá? ʻOku kau nai ki ai ha fuaʻa ʻi hoʻo tafaʻakí?—Palovepi 14:30; 1 Kolinito 13:4; Kaletia 5:26.

ʻOku fiemaʻu ʻa e sivisiviʻi-kita faitotonu ke tali ʻa e ngaahi fehuʻi ko iá. Ka ʻoku mahuʻinga ke ke fai pehē. He ko ē, kapau ko e ngaahi meʻa ʻoku hoko fekauʻaki mo e mātuʻa-ʻi-he-fonó ko ha tupuʻanga hokohoko ia ʻo hoʻo fekīhiaki mo ho hoá, tā ko e palopalema moʻoni ia ʻi hoʻo nofo malí—ʻo ʻikai ko ha palopalema mo e mātuʻa-ʻi-he-fonó.

ʻOku malanga hake ʻa e ngaahi palopalema lahi ʻi he nofo malí koeʻuhí ʻoku ʻikai ha ongo meʻa te na maʻu ha fakakaukau tatau tofu pē fekauʻaki mo ha meʻa. ʻE lava ke ke feinga ke sio ki he ngaahi meʻá mei he anga ʻa e vakai ki ai ʻa ho hoá? (Filipai 2:4; 4:5) Ko e meʻa ia naʻe fai ʻe ha husepāniti ʻi Mekisikou ko ʻEtiliani. “Naʻe ʻohake ʻa hoku uaifí ʻi ha puipuituʻa fakafāmili naʻe ʻikai lelei,” ko ʻene laú ia, “ko ia naʻá ku fakaʻehiʻehi ai mei he feohi vāofi mo ʻeku ongo mātuʻa-ʻi-he-fonó. Naʻe faifai atu pē ʻou fakafisi ke toe fai ha feohi mo kinaua—ʻi ha ngaahi taʻu. Naʻe fakatupunga ʻe he meʻá ni ke hoko ha fepaki ʻi heʻema nofo malí koeʻuhi naʻe kei loto pē ʻa hoku uaifí ke vāofi mo hono fāmilí, tautefito ki heʻene faʻeé.”

Naʻe aʻu ki he taimi naʻe ʻai ai ʻe ʻEtiliani ke ʻi ha tuʻunga mafamafatatau ʻa e meʻá ni. “Neongo naʻá ku ʻiloʻi ko e feohi ʻo fuʻu lahi mo ʻene ongo mātuʻá naʻe ʻi ai ʻene kaunga kovi ki he tuʻunga fakaeongo ʻa hoku uaifí, ko e ʻikai toe fai ha fetuʻutakí ʻe lava ke toe iku ia ki he ngaahi palopalema,” ko ʻene laú ia. “ʻI he lahi taha naʻe ala lavá, kuó u feinga ai ke fakaleleiʻi pea tauhi maʻu ha vahaʻangatae lelei mo ʻeku mātuʻa-ʻi-he-fonó.” *

ʻOku hokohoko kaunoa ʻa hoʻo ongo mātuʻa-ʻi-he-fonó ʻi hoʻo nofo malí, ʻo na fai ha faleʻi naʻe ʻikai fiemaʻu. “Ko e ʻuluaki taʻu ʻe fitu ʻo ʻema nofo malí naʻá ma nofo ai mo e fāmili ʻo hoku husepānití,” ko e lau ia ʻa ha uaifi ʻi  Kāsakisitani ko Nēlia. “Naʻe hokohoko malanga hake ha fepaki ʻi he founga ʻo ʻema tauhi ʻa ʻema fānaú pea pehē foki ʻi he ngaahi meʻa fekauʻaki mo ʻeku feimeʻatokoní mo e fakamaʻá. Naʻá ku talanoa ki hoku husepānití mo ʻeku faʻē-ʻi-he-fonó fekauʻaki mo ia, ka naʻe iku pē eni ki he toe fepaki lahi ange!”

Ngaahi poini:

ʻI hoʻo malí, ʻoku ʻikai te ke kei ʻi he mafai ai ʻo hoʻo ongo mātuʻá. ʻI hono kehé, ʻoku pehē ʻe he Tohi Tapú “ko e ʻulu ʻo e tangata kotoa pe ko Kalaisi; pea ko e ʻulu ʻo e fefine ko e tangata”—ʻa ia ko hono husepānití. (1 Kolinito 11:3) Neongo ia, hangē ko ia naʻe lave ki ai ki muʻá, ʻoku totonu fakatouʻosi ki he husepānití mo e uaifí ke na fakaʻapaʻapa ki heʻena ongo mātuʻá. Ko hono moʻoní, ʻoku tala mai ʻi he Palovepi 23:22 (PM): “Fakaogo ki hoo tamai naa ke tubu ai, bea oua naa ke tae ofa ki hoo faʻe oka motua ia.” Kae fēfē kapau ko hoʻo ongo mātuʻá—pe ko e mātuʻa ʻa ho hoá—ʻokú na kaunoa ʻo feinga ke tuʻu ʻa ʻena fakakaukaú?

Meʻa ʻe lava ke ke faí:

ʻI ha laumālie ʻo e kaungāongoʻí, feinga ke ʻiloʻi ʻa e ʻuhinga naʻe tupu ai e meʻa naʻe hā ngali ko e kaunoá. “ʻI he tuʻunga ʻe niʻihi ʻoku fiemaʻu ʻe he ongo mātuʻá ke ʻiloʻi ʻoku kei ʻi ai pē hona mahuʻinga ki heʻena fānaú,” ko e lau ia ʻa Laieni, ʻa ia naʻe lave ki ai ʻi he kamatá. Ko e kaunoa peheé ʻoku ʻikai nai ko ha fai ʻosi fakakaukauʻi pea ʻe lava nai ke fakaleleiʻi ia ʻaki hono ngāueʻaki ʻa e ekinaki ʻi he Tohi Tapú “ka ai ha taha ʻoku ne koviʻia ʻi ha taha ʻi ha meʻa, ke mou fekatakiʻaki pe mo fefakamolemoleʻaki.” (Kolose 3:13) Kae fēfē kapau ko e kaunoa ʻoku fai mai ʻe hoʻo mātuʻa-ʻi-he-fonó kuo hoko ʻo mafatukituki feʻunga ke fakatupunga ai haʻo fepaki mo ho hoá?

Kuo ako ʻa e ngaahi hoa mali ʻe niʻihi ke fokotuʻu ha fakangatangata feʻungamālie ki heʻena ongo mātuʻá. ʻOku ʻikai ʻuhinga ení ia kuo pau ke ke fokotuʻu ha lao kia kinaua. * Ko ha meʻa pē ia fekauʻaki mo hono ʻai ke mahino ʻi hoʻo tōʻongá ʻe kei muʻomuʻa pē ʻa ho hoá kiate koe. Ko e fakatātaá, ko ha husepāniti ʻi Siapani ko Masaki ʻokú ne pehē: “Neongo kapau ʻe fakahaaʻi ʻe he ongo mātuʻá ʻa ʻena fakakaukaú, ʻoua leva ʻe tali leleí. Manatuʻi, ʻokú ke langa hake ha fāmili foʻou. Ko ia ʻuluaki vakaiʻi pe ko e hā e ongoʻi ʻa ho hoá fekauʻaki mo e faleʻí.”

Ko e fepaki lahi mo e mātuʻa-ʻi-he-fonó ʻe lava ke fakasiʻisiʻi ia ʻi hono ʻiloʻi ʻa ʻenau taumuʻá pea ʻi he ʻikai ke fakaʻatā ʻa e fepaki ko ení ke ne fakatupunga ʻa e fekīhiaki ʻiate koe mo ho hoá. ʻI he fekauʻaki mo e meʻá ni, ʻoku fakahaaʻi ʻe Seni: “ʻI he taimi ʻe niʻihi ko ʻeku fetalanoaʻaki mo hoku husepānití fekauʻaki mo ʻema ongo mātuʻá naʻe meimei kau lahi ki ai ʻa e tuʻunga fakaeongó, pea naʻe ʻosi hā mahino ʻe lava ke fakatupunga ʻa e mamahi lahi ʻi he talanoa fekauʻaki mo e taʻehaohaoa ʻa e ongo mātuʻá ʻi he ongo tafaʻakí fakatouʻosi. Neongo ia, naʻe faifai pē ʻo ma ako ke tuku hono ngāueʻaki ʻa e ngaahi taʻehaohaoa ʻa ʻema mātuʻa-ʻi-he-fonó ko ha meʻataú ka ke fekuki mo e palopalema ʻoku hokó. Ko hono olá, kuó ma hoko ai ʻo vāofi ange ʻi he tuʻunga ko e husepāniti mo e uaifi.”