ʻI he ʻikai hangē ko ha toe tangata kehé, naʻe moʻui ʻa Sīsū ʻi hēvani ko ha tokotaha laumālie ki muʻa ke ʻaloʻi ia ʻi he māmaní. (Sione 8:23) Ko e ʻuluaki fakatupu ia ʻa e ʻOtuá, pea naʻá ne tokoni ʻi hono fakatupu ʻo e meʻa kehé kotoa. Ko ia pē ʻa e toko taha naʻe fakatupu fakahangatonu ʻe Sihová pea ko ia ʻoku ui ai ko e “ʻalo-tofu-pe-taha” ne fakatupu ʻo e ʻOtuá. Naʻe ngāue ʻa Sīsū ko e Tangata-Lea ʻa e ʻOtuá, ko ia ʻoku toe ui ai ia ko e “Folofola.”—Sione 1:1-3, 14; lau ʻa e Palovepi 8:22, 23, 30; Kolose 1:15, 16.

Naʻe fekauʻi ʻe he ʻOtuá ʻa hono ʻAló ki he māmaní ʻaki hono hiki ʻa ʻene moʻuí mei hēvani ki he manava ʻo ha tāupoʻou Siu ko Mele. Ko ia naʻe ʻikai ha tamai fakaetangata ʻa Sīsū. (Luke 1:30-35) Naʻe haʻu ʻa Sīsū ki māmaní (1) ke akoʻi ʻa e moʻoni fekauʻaki mo e ʻOtuá (2) ke fokotuʻu ha faʻifaʻitakiʻanga ʻi hono fai ʻa e finangalo ʻo e ʻOtuá, pea ko e (3) ke foaki ʻene moʻui haohaoá ko ha ‘huhuʻi.’—Lau ʻa e Mātiu 20:28; Sione 18:37.

Ko ha huhuʻi ko ha totongi ia ʻoku fai ke fakatauʻatāinaʻi mai ai ha tokotaha mei ha nofo pōpula. Ko e maté mo e taʻumotuʻá naʻe ʻikai ko e konga ia ʻo e muʻaki taumuʻa ʻa e ʻOtuá ki he faʻahinga ʻo e tangatá. ʻOku anga-fēfē ʻetau ʻiloʻi iá? Naʻe tala ʻe he ʻOtuá ki he ʻuluaki tangatá, ʻa ʻĀtama, kapau te ne fai ʻa e meʻa ʻoku ui ʻe he Tohi Tapú ko e angahalá, te ne mate. Kapau naʻe ʻikai faiangahala ʻa ʻĀtama, naʻe ʻikai ʻaupito te ne mei mate. Neongo ko e moʻui ʻa ʻĀtamá naʻe toki ngata ia ʻi ha ngaahi senituli ki mui, naʻá ne kamata mate ʻi he ʻaho pē naʻá ne talangataʻa ai ki he ʻOtuá. (Senesi 2:16, 17; 5:5) Naʻe tuku mai ai ʻe ʻĀtama ki he kotoa ʻo hono hakó ʻa e angahalá mo hono tauteá, ko e mate. Ko ia ai, naʻe “hoko” ʻa e maté ki he māmani ʻo e faʻahinga ʻo e tangatá fakafou ʻia ʻĀtama. Ko e ʻuhinga ia ʻoku tau fiemaʻu ai ha huhuʻí.—Lau ʻa e Loma 5:12; 6:23.

Ko hai naʻe lava ke ne totongi ʻa e huhuʻí ke fakatauʻatāinaʻi kitautolu mei he maté? ʻI he taimi ʻoku tau mate aí, ʻoku tau totongi ai ʻa e tautea ki he ngaahi angahala pē ʻatautolú. ʻOku ʻikai ha tangata taʻehaohaoa ʻe lava ke ne totongi ʻa e ngaahi angahala ʻa e niʻihi kehé.—Lau ʻa e Sāme 49:7-9.

Koeʻuhi naʻe ʻikai ke maʻu tukufakaholo ʻe Sīsū ʻa e taʻehaohaoá mei ha tamai fakaetangata, naʻá ne pekia, ʻo ʻikai koeʻuhi ko haʻane ngaahi angahala, ka ko e angahala ʻa e niʻihi kehé. Naʻe fekauʻi mai ʻe he ʻOtuá ʻa hono ʻAló ke pekia maʻatautolu ko ha fakahāhā ʻa ʻEne ʻofa makehe ki he faʻahinga ʻo e tangatá. Naʻe toe fakahaaʻi ʻe Sīsū ʻa e ʻofa kia kitautolu ʻi heʻene talangofua ki heʻene Tamaí pea foaki ʻa ʻene moʻuí koeʻuhi ko ʻetau ngaahi angahalá.—Lau ʻa e Sione 3:16; Loma 5:18, 19.

ʻI hono fakamoʻui ʻa e mahakí, fokotuʻu hake ʻa e maté, mo hono fakahaofi ʻa e kakaí mei he fakatuʻutāmakí, naʻe fakahāhā ai ʻe Sīsū ʻa e meʻa ʻe faifai pē peá ne fai maʻá e faʻahinga talangofua kotoa ʻo e tangatá. (Luke 18:35-42; Sione 5:28, 29) Hili e pekia ʻa Sīsuú, naʻe toe fakafoki ia ʻe he ʻOtuá ki he moʻuí ko ha tokotaha laumālie. (1 Pita 3:18) Naʻe tatali leva ai ʻa Sīsū ʻi he nima toʻomataʻu ʻo e ʻOtuá kae ʻoua kuo ʻoange kiate ia ʻe Sihova ʻa e mafai ke ne pule ko e Tuʻi ki he māmaní kotoa. (Hepelu 10:12, 13) ʻOku pule he taimí ni ʻa Sīsū ko e Tuʻi ʻi hēvani, pea ko hono kau muimui ʻi he māmaní ʻoku nau fanongonongo ʻi māmani lahi ʻa e ongoongo leleí.—Lau ʻa e Taniela 7:13, 14; Mātiu 24:14.

Kuo vavé ni ke ngāueʻaki ʻe Sīsū ʻa hono mafai ko e Tuʻí ke fakangata ʻa e faingataʻá kotoa mo kinautolu ʻoku nau fakatupunga iá. Ko e laui miliona ʻoku nau ngāueʻi ʻa e tui kia Sīsū mo talangofua kiate iá te nau fiefia ʻi he moʻuí ʻi ha palataisi he māmaní.—Lau ʻa e Sāme 37:9-11.