“‘E Faka‘auha ‘e he Tangatá ‘a e Fo‘i Māmani Ko ení?”

● Mei he vavaá, ko e palanite ko Māmaní ‘oku hā ia ‘o hangē ha fo‘i siueli faka‘ofo‘ofa lanu pulū mo hinehiná. Ka ‘i hano vakai‘i ofi angé ‘oku fakahaa‘i ai ko hotau ‘apí ‘oku ‘i he tu‘unga fakatu‘utāmaki. Ko e hā hono ‘uhingá? Ko e talí ‘oku faingofua: Ko e tangatá kuo ‘ikai te nau tokanga‘i lelei ia. ‘Ikai ko ia pē, ‘oku nau faka‘auha ‘a e māmaní ‘o ‘ikai ngata pē ‘i hono fai fakahangatonu fakafou ‘i he ‘uli‘i ‘o e ‘eá, tā ‘a e ‘ulu‘akaú, ‘o maumau‘i kae toe ‘i he tu‘unga fakae‘ulungaanga mo fakalaumālie fakafou he fakamālohí, lingitotó, mo e fehokotaki fakasino ta‘etāú.

Ko e tu‘unga fakamamahi ko eni ‘o e ngaahi me‘á na‘e tomu‘a tala ia ‘i he ta‘u nai ‘e ua afe kuohilí ‘i he ngaahi kikite fakaofo na‘e hiki ‘i he Tohi Tapú. (2 Timote 3:1-5; Fakahā 11:18) Na‘e toe tomu‘a tala ‘e he Tohi Tapú ko e ‘Otuá—‘o ‘ikai ko ha tangata—te ne fakatonutonu kakato e ngaahi me‘á. Ko e ngaahi tōpiki mahu‘inga ko ení ‘e lāulea ki ai ‘i he malanga ma‘á e kakaí “‘E Faka‘auha ‘e he Tangatá ‘a e Fo‘i Māmani Ko Ení?” Ko e malangá ‘e fakahoko ia ‘i he Ngaahi Fakataha-Lahi Fakavahe ‘a e Kau Fakamo‘oni ‘a Sihová ‘Ke Hoko Mai ‘a e Pule‘anga ‘o e ‘Otuá!,’ kamata ‘i Mē ‘i ‘Amelika pea hokohoko atu ai takatakai ‘i he māmaní.

‘Oku fakaafe‘i loto-māfana atu koe ke ke ma‘u ‘a e fakataha-lahi ofi taha kiate koé. Ki ha ngaahi fakaikiiki pau, kātaki ‘o fetu‘utaki ki he Kau Fakamo‘oni ‘a Sihova ‘i ho feitu‘ú pe tohi ki he kau faipulusi ‘o e makasini ko ení. Ko e Uepisaiti www.pr418.com ‘oku fakahokohoko atu ai ‘a e ngaahi feitu‘u fai‘anga fakataha-lahi ‘i he vahefonua ‘o e Pasifikí.