Kī ki he Fiefia ‘a e Fāmilí

Founga Hono Liliu ‘e he Fānaú ha Nofo Mali

Sālesi: * “Ko au mo Melé na‘á ma fiefia ‘i he fanau‘i ‘o ‘ema pēpē fefiné. Ka na‘e si‘i ‘eku mohé ‘i he ‘uluaki ngaahi māhina si‘i hili hono fanau‘í. Ne ‘i ai ‘ema palani kehekehe ki he founga ke fakafeangai ai kiate iá, ka na‘e mole kotoa leva ia.”

Mele: “‘I he fanau‘i ‘o ‘ema pēpeé, na‘e ‘ikai te u kei pule ai ki he‘eku mo‘uí. Fakafokifā pē, na‘e fekau‘aki e me‘a kotoa mo e fo‘i hina huhu hono hokó, ko e fetongi taipa hono hokó, pe ko e feinga hono hoko ke fakana‘ana‘a ‘a e pēpeé. Na‘e lahi fau ‘a e fe‘unu‘akí. Na‘e fe‘unga mo e laui māhina ki mu‘a ke foki ki he tu‘unga anga-mahení ‘a hoku vā mo Sālesí.”

‘ELOTO-TATAU e tokolahi ko hono ma‘u e fānaú ‘a e taha ‘o e ngaahi fiefia lahi taha ‘i he mo‘uí. ‘Oku fakamatala‘i ‘e he Tohi Tapú ‘a e fānaú ko ha “totongi” pe pale mei he ‘Otuá. (Sāme 127:3) Ko e ngaahi mātu‘a fo‘ou hangē ko Sālesi mo Melé ‘oku nau toe ‘ilo‘i ko e fānaú ‘oku lava ke nau liliu ha nofo mali ‘i he ngaahi founga ta‘e‘amanekina. Ko e fakatātaá, ‘e tokangataha nai ha fa‘ē fo‘ou ki he‘ene pēpeé pea ‘ohovale he anga ‘o e fakafeangai hono sinó mo hono mafú ki he ki‘i fiema‘u taki taha ‘a e pēpē fo‘oú. Ka ki he tamai fo‘oú, te ne ‘ohovale nai he vāofi ‘oku hoko he vaha‘a ‘o hono uaifí mo e pēpeé, ka te ne toe hoha‘a foki fekau‘aki mo hano tukunoa‘i fakafokifā ia.

Ko hono mo‘oní, ko e fanau‘i ‘o e ‘uluaki pēpeé ‘e tupu nai ai ha tu‘unga faingata‘a ‘i ha nofo mali. ‘E malanga hake nai ai ‘a e ‘ikai malu fakaeongo ‘a ha tokotaha mo ha ngaahi ‘īsiu ‘a ha ongo me‘a kuo te‘eki ai fakalelei‘i, ‘o e‘a pea ‘ai ke hā mahino ange ‘i he loto-mo‘ua he tauhi fānaú.

‘E lava fēfē ke fe‘unu‘aki e ongo mātu‘a fo‘oú ki he ‘uluaki ngaahi māhina mo‘umo‘uá ‘i he taimi ‘oku fiema‘u ai ‘e he pēpē fo‘oú ‘a ‘ena tokangá kotoa? Ko e hā ‘e lava ke fai ‘e ha ongo me‘a ke tauhi ma‘u ai ‘ena fekoekoe‘í? ‘E lava fēfē ke na fakalelei‘i ‘a e ta‘efelotoi fekau‘aki mo e tauhi fānaú? Tau sivisivi‘i taki taha angé ‘a e ngaahi pole ko iá pea fakakaukau ki he founga ‘e lava ke tokoni ai e ngaahi tefito‘i mo‘oni Fakatohitapú ki ha ongo me‘a ke na a‘usia ia.

POLE 1: Fakafokifā ‘a e tokangataha ki he ki‘i tamá.

‘Oku ma‘u ‘e ha pēpē fo‘ou ‘a e taimi mo e fakakaukau ‘a ‘ene fa‘eé. Te ne ma‘u nai ha ongo‘i  lavame‘a fakaeongo ‘i hono tokanga‘i ‘ene pēpeé. Lolotonga iá, ‘e ongo‘i lī‘ekina nai hono husepānití. Ko Manuele, ‘a ia ‘oku nofo ‘i Pelēsila, ‘okú ne pehē: “Ko e hiki meiate au ‘a e tokanga ‘a hoku uaifí ki he‘ema pēpeé ‘a e liliu faingata‘a taha kiate au ke u talí. Ki mu‘á, ko kimaua toko ua pē, pea fakafokifā leva, ko hoku uaifí pē mo e pēpeé.” ‘E lava fēfē ke ke fekuki mo e liliu ko ení?

Ko ha kī ki he lavame‘á: Kātaki. “Ko ‘Ofa ‘oku ne angamokomoko, mo angalelei,” ko e lau ia ‘a e Tohi Tapú. Ko ‘ofá “‘oku ‘ikai te ne kumi ‘ene lelei a‘ana, ‘oku ‘ikai te ne faka‘ita.” (1 Kolinito 13:4, 5) ‘I he ma‘u ha pēpē fo‘oú, ko e hā ‘e lava ke fai fakatou‘osi ‘e ha husepāniti mo ha uaifi ke ngāue‘aki ai ‘a e akonaki ko iá?

Ko ha husepāniti poto ‘okú ne fakamo‘oni‘i ‘ene ‘ofa ki hono uaifí ‘aki hono ako‘i tonu ia fekau‘aki mo e me‘a ‘oku maongo fakaesino mo fakae‘atamai ‘i he fā‘elé ki ha fefine. Kapau ‘okú ne fai ia, te ne ‘ilo‘i ai ‘a e ‘uhinga ‘oku hehema nai ai ‘a hono uaifí ki he maliuliu fakafokifā ‘a e ongó. * Ko ‘Ātama, ‘a ia ‘oku nofo ‘i Falanisē pea ko e tamai ia ‘a ha ta‘ahine māhina 11, ‘okú ne fakahaa‘i: “Ko e maliuliu e ongo ‘a hoku uaifí ‘oku faingata‘a he taimi ‘e ni‘ihi ke fekuki mo ia. Ka ‘oku ou feinga ke manatu‘i ko ‘ene ongo‘i feifeitamakí ‘oku ‘ikai mo‘oni ke fakahanga mai ia kiate au fakafo‘ituitui. ‘I hono kehé, ko ha fakafeangai ia ki he loto-mafasia ‘ikai anga-maheni ‘i homa tu‘unga fo‘oú.”

‘Oku ‘ikai mahino‘i he taimi ‘e ni‘ihi ‘e ho uaifí ho‘o feinga ke tokoní? Kapau ko ia, ‘oua ‘e vave ke ‘itá. (Koheleti 7:9) ‘I hono kehé, kumi anga-kātaki ki he me‘a ‘e lelei kiate iá, ‘o ‘ikai ki ha‘aú, pea te ke kalofi ai e hoko ‘o loto-mamahí.—Palovepi 14:29.

‘I he tafa‘aki ‘e tahá, ko ha uaifi ‘ilo‘ilo te ne feinga ke faka‘ai‘ai hono husepānití ki hono ngafa fo‘oú. Te ne fakakau mai ia ki hono tokanga‘i ‘o e ki‘i tamá, ‘o fakahaa‘i anga-kātaki ange ‘a e founga ke fetongi ai ‘a e taipá pe ko hono teuteu ‘a e hina huhú—neongo te ne hā ngali fakahelengavale nai ‘i he ‘uluaki taimí.

Ko ‘Ēleni, ko ha fa‘ē ta‘u 26, na‘á ne ‘ilo‘i na‘e fiema‘u ke ne fai ha fe‘unu‘aki ‘i he anga ‘ene tō‘ongafai ki hono husepānití. “Na‘e pau ke fakasi‘isi‘i ‘eku feinga ke ma‘u toko taha pē ‘a e tokanga ‘a e pēpeé,” ko ‘ene laú ia. “Pea na‘e pau ke u fakamanatu kiate au ke ‘oua ‘e fu‘u filifili ‘i he taimi na‘e feinga ai hoku husepānití ke ngāue‘aki ‘eku fokotu‘u fekau‘aki mo hono tokanga‘i ‘o e ki‘i valevalé.”

‘AHI‘AHI‘I ENI: Ngaahi uaifi, kapau ‘oku fai ‘e ho husepānití ha ngāue ko hono tokanga‘i ‘a e ki‘i tamá ‘i ha founga kehe mei ho‘o foungá, taliteke‘i ‘a e holi ke fakaanga‘i ia pe toe fai ‘a e ngāué. Fakaongoongolelei‘i ia ‘i he me‘a fe‘unga ‘okú ne faí, pea te ke langa hake ai ‘ene loto-ma‘ú pea ‘e faka‘ai‘ai ai ia ke ne fai atu kiate koe ‘a e poupou ‘okú ke fiema‘ú. Ngaahi husepāniti, fakasi‘isi‘i ‘a e ngāue ‘oku ‘ikai fiema‘ú koe‘uhi ke ke ma‘u ai ‘a e taimi lahi taha ‘e ala lavá ke tokoni‘i ho uaifí, tautefito lolotonga e ‘uluaki ngaahi māhina si‘i hili hono fā‘ele‘i ‘o e pēpeé.

POLE 2: Ko homo vā ko ha ongo me‘a malí ‘e vaivai.

‘I he ongosia he ‘ikai mohe leleí mo e ngaahi faingata‘a ta‘e‘amanekiná, ‘oku fāinga ai ‘a e mātu‘a fo‘ou tokolahi ke kei vāofi ai pē. Ko Viviena, ko ha fa‘ē Falanisē ‘a e ongo leka ‘e toko ua, ‘okú ne fakahaa‘i: “‘I he ‘uluaki taimí, na‘á ku mātu‘aki tokangataha ai ki hoku fatongia ko ha fa‘eé ‘o meimei ngalo ai ‘iate au hoku ngafa ko ha uaifí.”

‘I he tafa‘aki ‘e tahá, ‘e ‘ikai nai malava ke ‘ilo‘i ‘e ha husepāniti kuo uesia lahi ‘e he feitamá ‘a hono uaifí—fakaesino mo fakaeongo fakatou‘osi. Ko ha pēpē fo‘ou ‘e lava ke ne ma‘u ‘a e taimi mo e ivi na‘á mo fakatou ngāue‘aki ki mu‘a ke kei fekoekoe‘i fakaeongo mo fakaefehokotaki fakasino ai pē. ‘E lava fēfē leva ke fakapapau‘i ‘e ha ongo me‘a ko ‘ena pēpē fiema‘u tokoní mo ‘ofa‘í ‘oku  ‘ikai hoko ko ha fakafaingata‘a‘ia‘anga ia ‘okú ne ‘ai kinaua ke na mavaeua?

Ko ha kī ki he lavame‘á: Toe fakapapau‘i ho‘omo fe‘ofa‘akí. ‘I hono fakamatala‘i ‘a e nofo malí, ‘oku fakahaa‘i ‘e he Tohi Tapú: “‘E tukuange ‘e he tangata ‘ene tamai mo ‘ene fa‘e, kae pikitai ki hono uaifi: pea te na hoko ko e kakano pe taha.” * (Senesi 2:24) Na‘e fakataumu‘a ‘a e ‘Otua ko Sihová ‘e faifai pē pea tukuange ‘e he fānaú ‘enau ongo mātu‘á. ‘I hono kehé, ‘oku ‘amanekina ‘e he ‘Otuá e ha‘i kakano-taha ‘i he vaha‘a ‘o ha husepāniti mo hono uaifí ke tu‘uloa. (Mātiu 19:3-9) ‘E lava fēfē ke tokoni hono ‘ilo‘i e mo‘oni‘i me‘a ko iá ki ha ongo me‘a ‘oku ‘i ai ‘ena pēpē fo‘oú ke na tauhi ma‘u e ‘ū me‘a totonu ke fakamu‘omu‘á?

Ko Viviena, na‘e lave ki ai ki mu‘á, ‘okú ne pehē: “Na‘á ku fakakaukau fekau‘aki mo e lea ‘i he Senesi 2:24, pea na‘e tokoni‘i au ‘e he veesi ko iá ke u ‘ilo‘i kuó u hoko ko e ‘kakano pe taha’ mo hoku husepānití—‘o ‘ikai mo ‘eku tamá. Na‘á ku sio ai ki he fiema‘u ke ‘ai ke mālohi ‘ema nofo malí.” Ko Telesa, ko e fa‘ē ia ‘a ha ki‘i ta‘ahine ta‘u ua, ‘okú ne pehē: “Kapau ‘oku ou ongo‘i mama‘o mei hoku husepānití, ‘oku ou fai leva e feinga ke ‘oange kiate ia ‘eku tokanga kakató, neongo kapau ‘oku fai ia ‘i ha ki‘i taimi nounou he ‘aho taki taha.”

Kapau ko ha husepāniti koe, ko e hā ‘e lava ke ke fai ke ‘ai ke mālohi ‘a e nofo malí? Tala ki ho uaifí ‘okú ke ‘ofa ai. Poupou‘i ho‘o leá ‘aki e tō‘onga anga-‘ofa. Fai ha feinga fakamākukanga ke fakasi‘isi‘i ha ongo‘i ta‘emalu pē nai ‘oku ma‘u ‘e ho uaifí. Ko Selá, ko ha fa‘ē ta‘u 30 ia, ‘okú ne pehē: “‘Oku fiema‘u ke ‘ilo ‘e ha uaifi ‘oku kei fakamahu‘inga‘i ia mo ‘ofa‘i, neongo ‘oku ‘ikai kei tatau hono sinó mo ia ne ‘i ai ki mu‘a he‘ene feitamá.” Ko ‘Ālaní, ‘oku nofo ia ‘i Siamane pea ko e tamai ‘a ha ongo tamaiki tangata, ‘okú ne sio ki he fiema‘u ke tokonaki ha poupou fakaeongó. ‘Okú ne pehē: “Kuó u feinga ma‘u pē ke hoko ko ha uma ke tangi ai hoku uaifí.”

‘Oku mahinongofua, ko e ma‘u ‘o ha pēpeé ‘oku veuki ai e vā fakafehokotaki fakasino ‘o e ongo me‘á. Ko ia ai, ‘oku fiema‘u ki ha husepāniti mo ha uaifi ke na fetalanoa‘aki ki he‘ena fiema‘ú taki taha. ‘Oku fakahaa‘i ‘e he Tohi Tapú ko e liliu ‘i ha vā fakaefehokotaki fakasino ‘o ha ongo me‘a ‘oku totonu ke fai ia ‘aki ‘a e “loto taha.” (1 Kolinito 7:1-5) ‘Oku fiema‘u ki ai e fetu‘utaki. Fakatu‘unga ‘i hono ‘ohake koé pe puipuitu‘a fakafonuá, te ke toumoua nai ke talanoa fekau‘aki mo e me‘a fakaefehokotaki fakaesinó mo ho hoá. Ka ko e talanoa peheé ‘oku mātu‘aki mahu‘inga ia ‘i he tu‘unga ko ha ongo me‘á ke fe‘unu‘aki ai ‘a e founga-tu‘uma‘u ‘o e tauhi fānaú. Hoko ‘o kaungāongo‘i, kātaki, mo faitotonu. (1 Kolinito 10:24) Te ke faka‘ehi‘ehi ai mo ho hoá mei he ta‘efemahino‘akí pea ‘e fakalahi ai ho‘omo fe‘ofa‘akí.—1 Pita 3:7, 8.

‘Oku lava ke toe ‘ai ‘e ha ongo me‘a ke lahi ‘ena fe‘ofa‘akí ‘i hono fakahāhā ‘a e hounga‘iá. Ko ha husepāniti poto te ne ‘ilo‘i ko e lahi ‘o e ngāue kuo fakahoko ‘e he fa‘ē fo‘oú ‘oku ‘ikai fakatokanga‘i. ‘Oku pehē ‘e Viviena: “‘I he ‘osi ange ‘a e ‘ahó, ‘oku ou fa‘a ongo‘i hangē kuo ‘ikai te u lava‘i ha me‘á—neongo ia kuó u femo‘uekina ‘i hono  tokanga‘i hokohoko ‘o e pēpeé!” Neongo ‘a e femo‘uekiná, ko ha uaifi ‘ilo‘ilo ‘e tokanga ia ke ‘oua te ne fakasi‘isi‘i ‘a e tokoni ‘a hono husepānití ki he fāmilí.—Palovepi 17:17.

‘AHI‘AHI‘I ENI: Ngaahi fa‘ē, kapau ‘e ala lava, ki‘i mohe ‘i he taimi ‘oku mohe ai ho‘o pēpeé. Ko ia ‘i hono “fakafonu ho‘o puha ‘uhilá,” te ke ma‘u ai ‘a e ivi lahi ange ki ho‘o nofo malí. Ngaahi tamai, ‘i he taimi ‘oku ala lavá, tu‘u hake he po‘ulí ‘o fafanga pe fetongi ‘a e pēpeé koe‘uhi ke lava ‘o mālōlō ho uaifí. Toutou fakapapau‘i ho‘o ‘ofá ki ho hoá ‘aki hono fai ha ki‘i tohi kiate ia, ‘ave ki ai ha pōpoaki he telefoni to‘oto‘ó, pe lea kiate ia he telefoní. ‘I ha tu‘unga ko ha ongo me‘a malí, vahe‘i ha taimi ke talanoa fakaekimoua ai. Talanoa fekau‘aki mo kimoua, ‘o ‘ikai fekau‘aki pē mo ho‘omo ki‘i tamá. Tauhi ho‘o kaume‘a mo ho hoá ke mālohi, pea te ke malava lelei ange ai ke fakalelei‘i ‘a e pole ‘o e tauhi fānaú.

POLE 3: ‘Okú mo ta‘efelotoi fekau‘aki mo e tauhi fānaú.

‘Oku lava ke ‘ilo ‘e ha ongo me‘a ‘oku fakatupunga ‘i hona puipuitu‘á ke na fakafekiki. Ko ha fa‘ē Siapani ko ‘Asami mo hono husepānití ko Katisulo, na‘á na fehangahangai mo e pole ko ení. ‘Oku pehē ‘e ‘Asami: “Na‘á ku ongo‘i na‘e fu‘u fakaoleole‘i ‘e Katisulo ‘ema ta‘ahiné, lolotonga ia na‘á ne ongo‘i na‘á ku fu‘u fefeka kiate ia.” ‘E lava fēfē ke mo faka‘ehi‘ehi mei he ta‘efelotoí?

Ko ha kī ki he lavame‘á: Fetu‘utaki mo ho hoá, peá mo fepoupouaki. Na‘e tohi ‘e Tu‘i Solomone: “Ko e fielahi ko hono fua ko e kē pe: Ka ko e fua ‘oku ma‘u ‘e he kau tali fale‘i ko e poto.” (Palovepi 13:10) Ko e hā e lahi ho‘o ‘ilo ki he founga hono tauhi ‘o e fānaú ‘e ho hoá? Kapau ‘okú ke tatali kae ‘oua ke toki fā‘ele‘i ho‘o pēpeé ki mu‘a ke lāulea ki he ‘īsiu pau ‘o e ako‘i ‘o e ki‘i tamá, ‘okú ke ‘ilo‘i nai ai te mo iku ai ki he fāinga fakaekimoua kae ‘ikai fekuki lavame‘a mo e polé.

Ko e fakatātaá, ko e hā e tali ki he fehu‘i hoko kuó mo felotoi ki aí: “‘E lava fēfē ke ta ako‘i ‘eta ki‘i tamá ki ha tō‘onga kai mo e mohe lelei? ‘Oku totonu ke ta fua ma‘u pē ‘a e pēpeé kapau ‘okú ne tangi he taimi mohé? ‘Oku totonu ke fēfē ‘eta fakafeangai ki hono ako‘i ‘a e ki‘i tamá ki hono ngāue‘aki ‘o e falemālōloó?” ‘Oku hā mahino, ko e fili ‘okú mo faí ‘e kehe ia mei he fili ko ia ‘a e ngaahi hoa mali kehé. Ko ‘Ētaní, ko e tamai ia ‘a ha toko ua, ‘okú ne pehē: “‘Oku fiema‘u ke mo talanoa‘i e ngaahi me‘á koe‘uhi ke mo felotoi ai. Pea te mo malava fakataha leva ai ke fakafeangai ki he fiema‘u ‘a ho‘omo ki‘i tamá.”

‘AHI‘AHI‘I ENI: Fakakaukau fekau‘aki mo e ngaahi founga tauhi fānau ne ngāue‘aki ‘e ho‘o ongo mātu‘á ‘i he‘ena tauhi hake koé. Fili pe ko fē ‘i he‘ena fakakaukaú mo e tō‘ongá te ke sai‘ia ke fa‘ifa‘itaki ki ai ‘i hono ‘ohake ho‘o tamá. Toe fili foki ‘a e fakakaukau mo e tō‘onga, kapau ‘oku ‘i ai, ‘a ia ‘okú ke loto ke faka‘ehi‘ehi mei hono toe faí. Lāulea mo ho hoá ki ho‘o fakamulitukú.

E Lava ke Liliu ‘e ha Ki‘i Tama ha Nofo Mali ke Lelei

Hangē pē ko e fiema‘u ‘a e taimi mo e kātaki ki ha hoa sikeiti ta‘etaukei ke na lava ai ‘o palanisi he ‘aisí, ‘okú mo fiema‘u ‘a e taimi ke fe‘unu‘aki ai ki homo ngafa fo‘ou he tu‘unga ko e ongo mātu‘á. Neongo ia, ‘e faifai pē ‘o mo ma‘u ‘a e loto-ma‘u.

Ko e tauhi fānaú ‘e ‘ahi‘ahi‘i ai ho‘o tukupā ki ho‘o nofo malí pea liliu ta‘engata ai homo vā fakaekimouá. Kae kehe, ‘e toe ‘oatu ai ‘a e faingamālie ke ke fakatupulekina ‘a e ngaahi ‘ulungaanga mahu‘ingá. Kapau te ke ngāue‘aki ‘a e fale‘i fakapotopoto ‘a e Tohi Tapú, ko ho‘o hokosiá ‘e tatau ia mo e hokosia ‘a ha tamai ko Kēneti. ‘Okú ne pehē: “Ko e tauhi ‘o e fānaú kuo ola lelei ia kiate au mo hoku uaifí. ‘Oku si‘i he taimí ni ‘ema siokitá, pea kuó ma anga-‘ofa mo ma‘u e mahino lahi ange.” Ko e fa‘ahinga liliu pehē ‘oku tali lelei mo‘oni ia ‘i ha nofo mali.

[Fakamatala ‘i lalo]

‘EKE HIFO KIATE KOE . . .

▪ Lolotonga e uike kuo ‘osí, ko e hā kuó u fai ke fakahaa‘i ai ki hoku hoá ‘oku ou hounga‘ia he me‘a ‘okú ne fai ma‘á e fāmilí?

▪ Ko fē taimi na‘á ku vahe‘i fakamuimui ke fai ai ha talanoa loto-mo‘oni mo hoku hoá ‘a ia ne ‘ikai fekau‘aki pē mo hono tauhi ‘o e ki‘i tamá?

[Fakatātā ‘i he peesi 13]