Ko Hai ʻE Lava Ke Ne Fakaʻuhingaʻi ʻa e Kikité?

Ko e foʻi noʻo Gordium naʻe pehē ko e meʻa fifilingataʻa taha ia ʻi he ngaahi ʻaho ʻo ʻĀlekisānita ko e Lahí. Ko e potó ia—pea tuʻu-ki-muʻa ʻene ikuná—ʻa e tokotaha ʻe lava ke ne vete ʻa e foʻi noʻo fihi ko iá. * Naʻe solova ʻe ʻĀlekisānita ʻa e meʻa fifilingataʻa ko iá, ko e lau ia ʻa e talatupuʻá, ʻaki ha foʻi hapo ʻe taha ʻene heletaá.

ʻI HE faai mai ʻa e ngaahi kuongá, ko e kau tangata potó naʻa nau fekumi ke vete ʻo ʻikai ngata pē ʻi he ngaahi foʻi noʻo faingataʻá kae pehē foki ke solova ʻa e ngaahi tupuʻá, fakaʻuhingaʻi ʻa e ngaahi kikité, pea naʻa mo hono tomuʻa tala ʻa e kahaʻú.

Kae kehe, ʻi he taimi lahi tahá, ko e ngaahi malava ko iá ne ʻikai te nau maʻu. Ko e fakatātaá, ko e kau tangata poto ʻo Pāpiloné, ne ʻikai te nau malava ke fakaʻuhingaʻi ʻa e tohi nima naʻe hā fakaemana ʻi he holisi ʻo e palasi ʻo Tuʻi Pelisasá lolotonga ha fuʻu kātoanga kai longoaʻa. Ko Taniela pē—ʻa e palōfita taʻumotuʻa ʻa Sihova ko e ʻOtuá, naʻe ʻiloa ʻi heʻene “vete ʻo e ngaahi meʻa ʻoku fihi”—ne fakamoʻoniʻi tokotaha ia naʻe lava ke ne fakaʻuhingaʻi ʻa e pōpoaki fakaekikité. (Taniela 5:12) Ko e kikite ko iá, ʻa hono tomuʻa tala ʻa e ikuʻanga ʻo e ʻEmipaea ʻo Pāpiloné, naʻe fakahoko ʻi he pō tonu pē ko iá!—Taniela 5:1, 4-8, 25-30.

Ko e Hā ʻa e Kikite?

Ko e kikité kuo fakamatalaʻi ia ko e fakaeʻa ʻo e kahaʻú, ko e lēkooti ʻo e ngaahi meʻa ʻi hono taimi ki muʻa ke nau hokó. Ko e kikite moʻoní ko ha pōpoaki fakamānavaʻi ia, kuo tohi pe leaʻaki, ko ha fakahā ʻo e finangalo mo e taumuʻa fakaʻotuá. ʻOku maʻu ʻi he Tohi Tapú ʻa e ngaahi kikite fekauʻaki mo e hā pea mo e fakaʻilonga ʻo e Mīsaiá mo e “fakaʻosiʻosi ʻo e fokotuʻutuʻu lolotongá,” pea pehē ki he ngaahi pōpoaki fakaefakamaau mei he ʻOtuá.—Mātiu 24:3; Taniela 9:25.

Ko e “kau tangata poto” ʻo e ʻaho ní—ʻa e kau mataotao ʻi he saienisí, ʻekonōmiká, moʻuí, politikí, ʻātakaí, mo e ngaahi malaʻe lahi kehe—ʻoku nau feinga ke tomuʻa tala ʻa e kahaʻú. Neongo ko e lahi ʻo e ngaahi tomuʻa tala ko iá ʻoku fakahaaʻi lahi ʻe he mītiá—pea vēkeveke ʻa e kakaí ke tali—ko hono moʻoní, ko e ngaahi fakamahalo fakapoto ia mo e ngaahi fakakaukau fakafoʻituitui. ʻIkai ko ia pē, ki he fakakaukau kotoa pē kuo fakahāʻí, ʻoku ʻi ai maʻu pē ʻa e ngaahi fakakaukau fakafepaki mo e ngaahi fakakikihi lahi fau. Ko e pisinisi ʻo hono tomuʻa tala ʻo e kahaʻú ʻoku fakatuʻutāmaki ʻaupito.

Ko e Matavai ʻo e Kikite Moʻoní

Ko fē leva ʻoku tupu mei ai ʻa e ngaahi kikite moʻoní, pea ko hai ʻe lava ke ne fakaʻuhingaʻi iá? Naʻe tohi ʻe he ʻapositolo ko Pitá: “ʻOku ʻikai ha kikite ʻa e Folofolá ʻe tupu mei ha fakaʻuhinga fakafoʻituitui.” (2 Pita 1:20) Ko e foʻi lea faka-Kalisi ki he “fakaʻuhinga,” ko hono ʻuhingá ko e “fakaleleiʻanga, fakahaaʻi,” fakataha mo e fakakaukau ko e “meʻa ko ia ʻoku fakahomoki pe veté naʻe haʻi ki muʻa.” Ko ia ai, ko e Amplified New Testament ʻoku fakalea ai ʻa e ngaahi lea ʻa Pitá: “ʻOku ʻikai ha kikite ʻi he Folofolá [ko ha meʻa] fekauʻaki mo hano vete . . . fakafoʻituitui pē.”

Sioloto atu ki ha kaivai ʻokú ne haʻi pōtoʻi ha maea ki ha foʻi noʻo fihi. ʻI heʻene ʻosí, ko ha tangata taʻetaukei ʻe lava ke ne sio ki he ngaahi tuʻoni maeá ʻi hono noʻó, ka ʻoku ʻikai te ne fakapapauʻi pe ʻe vete fēfē ia. ʻI he tuʻunga meimei tatau, ʻoku lava ke sio ʻa e kakaí ki he ngaahi liliu lolotongá ʻoku taki atu ki ha kahaʻu ʻoku haʻi ʻi ha tuʻunga fihi, ka ʻoku ʻikai te nau fakapapauʻi pe ʻe vete pe iku fēfē ia.

 Ko e kau palōfita fakamānavaʻi ʻo e kuonga muʻá, hangē ko Tanielá, naʻe ʻikai te nau ʻanalaiso fakafoʻituitui ʻa e ngaahi liliu lolotonga ʻi honau taimí pea feinga leva ke vete ha kahaʻu fihi ʻaki hono leaʻaki ha kikite. Kapau naʻa nau feinga ke fakamālohiʻi ʻa e kahaʻú ke fakahaaʻi ʻi he foungá ni, ko ha kikite pehē ʻe tupu nai ia ʻi he fakakaukau pē ʻanautolú. Ne mei hoko leva nai ia ko ha tomuʻa tala fakaetangata, ko ha tala ki muʻa naʻe langa ʻi ha makatuʻunga taʻehaohaoa. ʻI hono kehé, naʻe hoko atu ʻa Pita ʻo fakamatala: “Ko e kikité naʻe teʻeki ʻi ai ha taimi ia ʻe ʻomi ai ia ʻe he tuʻutuʻuni ʻa e tangatá, ka naʻe lea mei he ʻOtuá ha kau tangata ʻi hono ueʻi kinautolu ki ai ʻe he laumālie māʻoniʻoní.”—2 Pita 1:21.

“ʻOku ʻi he ʻOtua ʻa e Fakaʻuhinga”

ʻI he taʻu nai ʻe 3,700 kuohilí, naʻe kiiʻi ai ha ongo tangata ʻi ha pilīsone ʻi ʻIsipite. Naʻá na taki taha maʻu ha misi fakatoʻoaloto. ʻI he ʻikai lava ke na aʻu ki he kau tangata poto ʻo e fonuá, naʻá na fakamatalaʻi ʻena ongoʻi puputuʻú ki ha kaungāpōpula, ko Siosifa, ʻo fakahaaʻi: “Kuo ma misi, pea ʻoku ʻikai ha taha ke vete hono ʻuhinga.” Ko e sevāniti ko ia ʻa e ʻOtuá naʻá ne fakaʻaiʻai ke na fakamatalaʻi kiate ia ʻena misí, ʻaki ʻene pehē: “ʻIkai ʻoku ʻi he ʻOtua ʻa e fakaʻuhinga?” (Sēnesi 40:8) Ko Sihova ko e ʻOtuá pē ʻokú ne maʻu ʻa e malava ke vete ʻa e ngaahi kikité, hangē pē ko e lava ʻe ha kaivai taukei ke vete ʻa e ngaahi noʻo fihí. He ko ē, ko e ʻOtuá naʻá ne ngaohi pe haʻi ʻa e ngaahi kikite ko ení ʻi he muʻaki taimí. ʻI he ʻuhinga lelei, kuo pau ke tau hanga kiate ia ki hono vete ʻa honau ʻuhingá. ʻIo, naʻe tonu ʻa Siosifa ʻi hono tuku ko e meʻa ia ʻa e ʻOtuá.

ʻI he ʻuhinga fē leva, ʻoku ‘ʻi he ʻOtuá ai ʻa e fakaʻuhingá’? ʻOku ʻi ai ʻa e ngaahi ʻuhinga ʻoku fakamoʻoniʻi ai ko e tuʻungá eni. Ko e ngaahi kikite Fakatohitapu ʻe niʻihi ʻoku lēkooti fakataha ia mo hono fakahokó. Ko e ngaahi kikite leva ko ení, ʻoku ʻi ha tuʻunga faingofua ia ke vete, ʻo hangē pē ko e ngaahi noʻo ʻoku fakamatalaʻi tauʻatāina ʻe ha kaivai pe ʻe vete fēfē ia.—Sēnesi 18:14; 21:2.

Ko e ngaahi kikite kehé ʻoku lava ke fakamatalaʻi mo vete ia ʻi hano sivisiviʻi ʻa e potutohí. Ko e palōfita ko Tanielá naʻe ʻi ai ʻene vīsone fakaekikite fekauʻaki mo ha ‘sipi tangata naʻe ʻiate ia ha nifo ʻe ua’ pe meʻatui naʻe taaʻi mālohi ʻe ha “kosi tangata fulufulua,” naʻe ʻi ai ha meʻatui “naʻe fotu, ʻi he vahaʻa ʻo hono ongo mata.” ʻOku fakahaaʻi ʻi he potutohí ko e sipi tangata naʻe ua hono meʻatuí naʻá ne fakafofongaʻi ʻa e ‘ngaahi tuʻi ʻo Mitia mo Pesiá’ pea ko e kosí, “ko e Tuʻi Kalisi ia.” (Taniela 8:3-8, 20-22) ʻI he taʻu ʻe 200 tupu ki mui ai, “ko e fuʻu nifo” pe meʻatuí—ʻa ʻĀlekisānita ko e Lahi—naʻe kamata ai ʻene ikunaʻi ʻa Pēsiá. Naʻe taku ʻe ha faihisitōlia Siu ko Siosifasi ʻo pehē lolotonga ʻa e feingangāue fakakautau ʻa ʻĀlekisānita ʻi he feituʻu takatakai ʻo Selusalemá, naʻe fakahaaʻi kiate ia ʻa e kikite tonu ko ení pea naʻá ne tui naʻe ʻuhingá kiate ia.

“ʻOku ʻi he ʻOtua ʻa e fakaʻuhinga” ʻi ha toe ʻuhinga ʻe taha. ʻI hono tataki ʻe he laumālie māʻoniʻoní, ko Siosifa, ko ha sevāniti faitōnunga ʻa Sihova ko e ʻOtuá, naʻá ne malava ke mahinoʻi ʻa e ʻuhinga ʻo e ongo misi fakatupu puputuʻu naʻe fakamatalaʻi kiate ia ʻe hono ongo kaungāpōpulá. (Sēnesi 41:38) ʻI he taimi ʻoku ʻikai fakapapauʻi ai ʻe he kau sevāniti ʻa e ʻOtuá he lolotonga ní ʻa e ʻuhinga ʻo ha kikite pau, ʻoku nau lotu ʻo kole ʻa e laumālie ʻo e ʻOtuá pea ako tōtōivi leva mo fekumi ʻi he Folofola ʻa e ʻOtuá kuo fakamānavaʻi ʻe he laumālié. ʻI he tataki ʻa e ʻOtuá ʻoku lava ai ke nau ʻiloʻi ʻa e ngaahi konga Tohi Tapu ʻokú ne fakahaaʻi ʻa e ʻuhinga ʻo e ngaahi kikite ʻe niʻihi. Ko e fakaʻuhingá ʻoku ʻikai hoko fakaemana mai ia fakafou ʻi ha tangata pē. ʻOku haʻu ia mei he ʻOtuá koeʻuhí ʻoku fakafou ʻi hono laumālié mo ʻene Folofolá ʻa e hoko ʻo mahino ʻa e ʻuhingá. Ko e fakaʻuhingá ʻoku ʻikai ʻomai ia mei tuʻa ʻi he Tohi Tapú ʻe ha kau tala meʻa ki muʻa fakaetangata.—Ngāue 15:12-21.

Pehē foki “ʻoku ʻi he ʻOtua ʻa e fakaʻuhinga” ʻi heʻene fakapapauʻi mo tataki ʻa e taimi ke mahinoʻi ai ha kikite ʻe heʻene kau sevāniti faitōnunga ʻi he māmaní. Ko e ʻuhinga ʻo ha kikite ʻe lava ke ʻiloʻi ia ki muʻa, lolotonga, pe ʻi he hili hono fakahokó. Koeʻuhi ko e ʻOtuá naʻá ne haʻi ʻa e ngaahi kikité, te ne vete ia ʻi he taimi totonu—ʻi heʻene taimí.

ʻI he talanoa kia Siosifa mo e ongo pōpulá, naʻá ne fakaʻuhingaʻi ʻa e ongo misí ʻi he ʻaho ʻe tolu ki muʻa ke fakahokó. (Sēnesi 40:13, 19) Ki mui ai, ʻi hono ʻomai ʻa Siosifa ki he ʻao ʻo Felo mālohi ke ne fakamatalaʻi ʻene ongo misí, naʻe teu  ke kamata ai ʻa e taʻu mahu ʻe fitú. ʻAki ʻa e laumālie ʻo e ʻOtuá, naʻe vete ai ʻe Siosifa ʻa e ʻuhinga ʻo e ongo misi ʻa Feló, koeʻuhi ke lava ʻo fai ha ngaahi fokotuʻutuʻu ke tānaki ʻa e meʻakai lahi ne tomuʻa talá.—Sēnesi 41:29, 39, 40.

Ko e ngaahi kikite kehé ʻoku mahinoʻi kakato ia ʻe he kau sevāniti ʻa e ʻOtuá ʻi he toki hili honau fakahokó. Ko e ngaahi meʻa lahi naʻe hoko ʻi he moʻui ʻa Sīsuú naʻe kikiteʻi ia he laui senituli ki muʻa ʻi hono ʻaloʻi ia, ka naʻe ʻikai ke mahinoʻi kakato eni ʻe heʻene kau ākongá ka ʻi he toki hili ʻene toetuʻú. (Saame 22:18; 34:20; Sione 19:24, 36) Fakaʻosí, fakatatau ki he Taniela 12:4, ko e ngaahi kikite ʻe niʻihi naʻe “silaʻi” ia “ʻo aʻu ki he taimi fakamui,” ʻa e taimi, naʻe pehē ʻe Taniela, ‘ʻe fakautuutu ai ʻa e ʻiló.’ ʻOku tau moʻui ʻi he taimi tonu ʻa ia ʻoku fakahoko ai ʻa e ngaahi kikite ko iá. *

Ngaahi Kikite Fakatohitapú mo Koe

Ko Siosifa mo Tanielá naʻá na tuʻu he ʻao ʻo e ongo tuʻi ʻi hona ʻahó ʻo leaʻaki ʻa e ngaahi pōpoaki fakaekikite naʻe uesia ai e ngaahi fonuá mo e ngaahi puleʻangá. Ko e kau Kalisitiane ʻi he ʻuluaki senitulí naʻa nau tuʻu ʻi he ʻao ʻo e kakai ʻi honau ʻahó ko e kau tangata-lea ʻa Sihova, ko e ʻOtua ʻo e kikité, pea ʻomai ai ʻa e ʻaonga lahi ki he faʻahinga naʻa nau tali ʻenau ngaahi pōpoakí.

ʻI he ʻahó ni, ko e Kau Fakamoʻoni ʻa Sihova ʻi māmani lahí ʻoku nau fakaongo atu ha pōpoaki fakaekikite—ko e ongoongo lelei ʻo e Puleʻanga ʻo e ʻOtuá—ʻo tala ki he kakaí ko e kikite ʻa Sīsū ki he “fakaʻosiʻosi ʻo e fokotuʻutuʻu lolotongá” ʻoku lolotonga hoko. (Mātiu 24:3, 14) ʻOkú ke ʻiloʻi ʻa e kikite ko iá mo e founga ʻe uesia ai koé? ʻOku fiefia ʻa e Kau Fakamoʻoni ʻa Sihová ke tokoniʻi koe ke ke mahinoʻi mo maʻu ʻaonga mei he meʻa ʻoku papau ko e taha ia ʻo e kikite maʻongoʻonga taha ʻi he kotoa ʻo e ngaahi kikite Fakatohitapú.

[Fakamatala ʻi lalo]

[Fakatātā ʻi he peesi 29]

Ko Siosifa mo Taniela fakatouʻosi naʻá na tuku ko e meʻa ia ʻa e ʻOtuá ʻi he taimi hono fakamatalaʻi ʻo e kikité