Liliu ʻe he Tohi Tapú ʻa e Moʻuí

KO E HĀ naʻá ne ueʻi ha finemui ke ne foki ki he akonekina fakalotu ne ʻohake ʻaki iá ʻa ē naʻá ne hē mei aí? Lau angé ʻa e meʻa kuo pau ke ne leaʻakí.

“ʻOku ou maʻu he taimí ni ha taumuʻa moʻoni ʻi he moʻuí.”​—LISA ANDRÉ

TAʻU FĀʻELEʻI: 1986

FONUA TUPUʻANGA: LUXEMBOURG

HISITŌLIA: TAʻAHINE MAUMAU-KOLOA

KO HOKU KUOHILÍ: Naʻá ku tupu hake ʻi Bertrange, ko ha kiʻi kolo maʻa, malu, mo tuʻumālie ofi ki he kolo lahi ko Luxembourg. Ko e siʻi taha au he fānau ʻe toko nima. Ko ʻeku ongo mātuʻá ko e ongo Fakamoʻoni ʻa Sihova, pea naʻá na ngāue mālohi ke fakahūhū ʻa e ngaahi tefitoʻi moʻoni fakaeʻulungaanga faka-Kalisitiané ki hoku ongo tuongaʻané mo hoku ongo tokouá pea mo au.

ʻI heʻeku aʻu ki hoku muʻaki ngaahi taʻu hongofulu tupú, naʻá ku kamata ke maʻu ʻa e ngaahi veiveiua lahi fekauʻaki mo e meʻa ʻoku akoʻi ʻe he Kau Fakamoʻoni ʻa Sihová. ʻI he kamatá, naʻá ku tukunoaʻi ʻa e ngaahi veiveiua ko ení, ka naʻe faifai pē ʻo hoko ʻo vaivai mo vaivai ange ʻeku tuí. Naʻe fai ʻe heʻeku ongo mātuʻá ʻa e meʻa kotoa naʻá na malavá ke tataki au ʻi he hala totonú, ka naʻá ku talitekeʻi ʻena tokoní. ʻI he ʻikai te na ʻilo ki aí, naʻá ku fakamoleki ʻa e taimí mo e toʻutupu naʻe ʻikai ke nau loko tokaʻi ʻa e tuʻunga mafaí. Naʻá ku fiemaʻu ʻa e tauʻatāina naʻe hā ngali tuʻuaki mai ʻi heʻenau founga moʻuí. Naʻa mau faʻa paati, fakaʻaluʻalu, pea ngāuekoviʻaki ʻa e ngaahi faitoʻo kona tapú mo e ʻolokaholó. Naʻá ku muʻaki fiefia ke feohi mo e kakai ne nau hā ngali fiefia kakato ʻi he moʻuí.

Kae kehe, ko hono moʻoní, naʻe ʻikai te u fiefia moʻoni au. Ko e moʻui ʻi he ngaahi feohi ko iá naʻe ʻikai ʻaupito hano ʻuhinga; naʻe ʻikai ha taha ʻe fakakaukau lahi ki ha meʻa. ʻI hono kehé, naʻe fakahohaʻasi au ʻe he ngaahi ʻīsiu hangē ko e mafolalahia ʻa e fakamaau taʻetotonu ʻi he māmaní. ʻI he faai atu ʻa e taimí, naʻá ku ongoʻi loto-mafasia lahi ange.

FOUNGA HONO LILIU ʻE HE TOHI TAPÚ ʻA ʻEKU MOʻUÍ: ʻI he ʻaho ʻe taha ʻi heʻeku taʻu 17, naʻá ku ongoʻi mātuʻaki tōlalo moʻoni. ʻI hono ʻiloʻi ʻa ʻeku taʻefiefiá, naʻe kole mai ʻeku faʻeé ke u toe ako ʻa e Tohi Tapú. Naʻá ne fakalototoʻaʻi au ke u sivisiviʻi ʻa e ngaahi akonaki ʻa e Tohi Tapú pea fili leva ʻiate au pe te u loto ke moʻui ʻo fakatatau ki ai pe ʻikai. Ko e fetalanoaʻaki hangatonu ko iá naʻá ne liliuʻi au. Naʻá ku loto-lelei ke ako Tohi Tapu mo hoku tokoua lahí ko Caroline mo hono husepānití, ʻa Akif. Naʻe ʻikai ʻohake ia ko e taha ʻo e Kau Fakamoʻoni ʻa Sihová ka naʻá ne hoko ko e Fakamoʻoni ʻa Sihova heʻene fuʻu lahí. Koeʻuhi ko e kuohili ʻo Akif, naʻá ku ongoʻi ʻe lava ke u talanoa tauʻatāina mo ia, ʻa ia naʻe mahuʻinga ia kiate au.

 Naʻá ku ʻiloʻi ko ʻeku founga moʻuí naʻe ʻikai tuha ia mo ha tokotaha Fakamoʻoni, ka ʻi he kamatá, naʻá ku ongoʻi ai ko e meʻa naʻá ku fai ʻaki ʻeku moʻuí ko ha meʻa fakafoʻituitui ia. Kae kehe, ʻi hono ako ʻa e Tohi Tapú, naʻá ku ʻiloʻi ai ko hoku ʻulungāngá ʻoku uesia ai ʻa e ngaahi ongoʻi ʻa Sihová. (Saame 78:40, 41; Palōveepi 27:11) Naʻá ku toe hoko ʻo mahinoʻi ʻoku uesia ai mo e kakai kehé foki.

ʻI heʻeku sivisiviʻi lahi ange ʻa e Tohi Tapú, naʻá ku ʻiloʻi ai ʻoku ʻi ai e ngaahi ʻuhinga totonu mo fakatuipau ke tui ai ko e Folofola ia ʻa e ʻOtuá. Ko e fakatātaá, naʻá ku ʻiloʻi ai ʻa e ngaahi kikite Fakatohitapu lahi fau kuo hoko moʻoni—ʻi ha tuʻunga fakaofo ʻo e tonu mātē. Ko e ʻilo ko iá naʻe tokoniʻi ai au ke fakaleleiʻi ʻeku ngaahi veiveiua ki muʻá.

Hili nai ha taʻu ʻeku kamata ako ʻa e Tohi Tapú, naʻá ku ʻaʻahi ai mo ʻeku ongo mātuʻá ki hoku tuongaʻane lahí ʻa ia ko ha tokotaha ngāue pole ʻi he ʻōfisi vaʻa ʻo e Kau Fakamoʻoni ʻa Sihova ʻi Siamané. ʻI heʻeku sio ki he fiefia ʻa hoku tuongaʻané, naʻá ku ongoʻi kuo ueʻi loloto ai au. Ko e fiefia ko iá ko e meʻa tofu pē ia naʻá ku kumi ki aí! Naʻe toe maongo foki kiate au ʻa e Kau Fakamoʻoni kehe naʻa nau ngāue pole aí. Naʻa nau kehe ʻaupito mei he kakai taʻefaitotonu mo kumi ki he mālié ʻa ia naʻá ku feohi mo iá. Taimi nounou mei ai, naʻá ku fai ai ha lotu fakamātoato kia Sihova, ʻo palōmesi ke tauhi kiate ia ʻi he toenga ʻeku moʻuí. ʻI heʻeku taʻu 19, naʻá ku fakahāhā ai ʻeku fakatapui kia Sihová ʻaki ʻa e papitaiso.

FOUNGA ʻO ʻEKU MAʻU ʻAONGÁ: ʻOku ou maʻu he taimí ni ha taumuʻa moʻoni ʻi he moʻuí. ʻOku ou maʻu ʻa e fiefia ʻi hono akoʻi ki he niʻihi kehé ʻa e Tohi Tapú, ʻo tokoniʻi kinautolu ke nau ako fekauʻaki mo Sihova mo ʻene ngaahi talaʻofa ki he kahaʻú. Kuo toe maʻu ʻaonga foki mo hoku fāmilí—ʻoku ʻikai te nau kei hohaʻa fekauʻaki mo au.

ʻOku ou lāuʻilo ki heʻeku ngaahi fehālaaki he kuohilí, ka ʻoku ou feinga ke ʻoua ʻe nōfoʻi ai. ʻI hono kehé, ʻoku ou tokangataha ki he fakamolemole ʻa Sihová pea ʻi heʻene mahuʻingaʻia anga-ʻofa ʻiate aú. ʻOku ou loto-tatau ʻaufuatō mo e ngaahi lea ʻo e Palōveepi 10:22, ʻa ia ʻoku pehē ai: “Ko e tapuaki ʻa Sihova, ko ia ia ʻoku fakakoloa: Pea ʻoku ʻikai te ne ʻatu mo ia ha mamahi.”

[Fakamatala ʻi he peesi 12]

“Naʻa mau faʻa paati, fakaʻaluʻalu, pea ngāuekoviʻaki ʻa e ngaahi faitoʻo kona tapú mo e ʻolokaholó”

[Fakamatala ʻi he peesi 13]

“ʻOku ou lāuʻilo ki heʻeku ngaahi fehālaaki he kuohilí, ka ʻoku ou feinga ke ʻoua ʻe nōfoʻi ai”