KAPAU naʻe tala atu ʻe ha taha, “Kuo vavé ni ke ʻikai toe ʻi ai ha ngaahi fakatamaki,” ʻe fēfē haʻo fakafeangai? Te ke tali nai, “ʻOku pau pē ko hoʻo misi. Ko e ngaahi fakatamakí ko ha moʻoniʻi meʻa pē ia ʻi he moʻuí.” Pe te ke fakakaukau pē nai ʻiate koe, ‘ʻOkú ne pehē ko ʻene fakakatá kia hai?’

Neongo ko e ngaahi fakatamaki fakanatulá ʻoku hā ʻe ʻi heni maʻu pē ia, ʻoku ʻi ai ha makatuʻunga ki ha ʻamanaki moʻoni ʻe liliu ʻa e meʻá ni. Kae kehe, ko e liliú, heʻikai hoko mai ia fakafou he ngaahi feinga ʻa e tangatá. ʻOku ʻikai malava ʻa e tangatá ke mahinoʻi kakato ʻa e founga mo e ʻuhinga ʻoku hoko ai ʻa e ngaahi meʻa ʻi natulá, huanoa ange ai ʻenau mapuleʻi pe liliu ia. Ko Tuʻi Solomone ʻo ʻIsileli ʻo e kuonga muʻá, naʻe ʻiloa ʻi hono potó mo ʻene mātuʻaki fakatokanga meʻá, naʻá ne tohi: “ʻOku ʻikai lava ʻa e tangata ke aʻusia ʻa e ngaue ʻoku fai ʻi he lalo laʻa; neongo pe ko e ha ʻa e fakafitefitaʻa ʻa e tangata ke hakule, ka ʻikai te ne aʻusia; ʻio neongo foki ʻe pehe ʻe he poto te ne ʻilo pe, kae ʻikai te ne lava ke tatae ki ai.”—Koheleti 8:17.

Kapau heʻikai lava ke mapuleʻi ʻe he tangatá ʻa e ngaahi fakatamaki fakanatulá, ko hai te ne lavá? ʻOku tala mai ʻe he Tohi Tapú ko hotau Tokotaha-Fakatupú ko e tokotaha ia te ne fai ʻa e liliu ko ení. Ko e Tokotaha ia ʻokú ne fokotuʻu ki hono tuʻungá ʻa e ngaahi sisitemi felāveʻiʻaki fakaeʻātakai ʻo e māmaní, hangē ko e vilo ʻa e vaí. (Koheleti 1:7) Pea ʻi he kehe ʻaupito mei he tangatá, ko e ʻOtuá ʻokú ne maʻu ʻa e mālohi taʻefakangatangata ke ne faʻiteliha ki ai. ʻI he fakamoʻoni ki he foʻi moʻoni ko ení, naʻe pehē ʻe he palōfita ko Selemaiá: “E Eiki ko Jihova! vakai, kuo ke gaohi ae lagi bea mo mamani i ho malohi lahi bea moe nima mafao, bea oku ikai ha mea e taha oku faigataa kiate koe.” (Selemaia 32:17, PM) Koeʻuhi ko e ʻOtuá naʻá ne ngaohi ʻa e māmaní mo e kotoa hono ngaahi ʻelemēnití, ʻoku ʻuhinga lelei ʻene ʻiloʻi ʻa e founga ke fakalele ai ʻa e ngaahi meʻá koeʻuhi ke lava ʻa e kakaí ʻo nofo ai ʻi he melino mo e malu.—Saame 37:11; 115:16.

ʻE fēfē leva hono fakahoko ʻe he ʻOtuá ʻa e liliu ʻoku fiemaʻú? Te ke manatuʻi ko e konga hono ua ʻo e ngaahi kupu hokohoko ko ení naʻe lave ai ko e ngaahi meʻa fakalilifu lahi ʻoku hoko ʻi he māmaní he ʻaho ní ʻoku faʻuʻaki ia ha “fakaʻilonga” ʻoku fakaʻilongaʻi ʻaki ʻa e “fakaʻosiʻosi ʻo e fokotuʻutuʻu lolotongá.” Naʻe pehē ʻe Sīsū: “ʻI hoʻomou sio ʻoku hoko ʻa e ngaahi meʻá ni, ʻiloʻi leva ʻoku ofi ʻa e Puleʻanga ʻo e ʻOtuá.” (Mātiu 24:3; Luke 21:31) Ko e Puleʻanga ʻo e ʻOtuá, ko ha founga-pule fakahēvani ia ko e faʻu ʻe he ʻOtuá, te ne fakahoko ʻa e ngaahi liliu lahi ki he māmaní, naʻa mo hono puleʻi ʻa e ngaahi ʻelemēniti ʻo natulá. Neongo ʻoku maʻu ʻe Sihova ko e ʻOtuá ʻa e mālohi ke ne fai tonu eni, kuó ne fili ke vaheʻi ʻa e ngāué ki hono ʻAló. ʻI he lea fekauʻaki mo e tokotaha ko ení, naʻe pehē ʻe he palōfita ko Tanielá: “Naʻe tuku kiate ia ha hau, mo ha langilangi, mo ha pule, koeʻuhi ke tauhi  kiate ia ʻe he ngaahi kakai, matakali, mo faʻahinga lea kehekehe.”—Taniela 7:14.

Ko e ʻAlo ʻo e ʻOtuá, ʻa Sīsū Kalaisi, kuo ʻoange kiate ia ʻa e mālohi ʻoku fiemaʻú ke fakahoko ʻaki ʻa e ngaahi liliu kotoa ʻoku fiemaʻú ke ʻai ʻa e māmaní ko ha feituʻu fakafiefia. ʻI he taʻu ʻe ua afe kuohilí, ʻi he taimi naʻe ʻi māmani ai ʻa Sīsuú, naʻá ne fakahāhā ʻi ha tuʻunga siʻisiʻi ʻene malava ke puleʻi ʻa e ngaahi ʻelemēniti ʻo natulá. ʻI he tuʻunga ʻe taha, ʻi he taimi naʻá ne ʻi ha vaka ai mo ʻene kau ākongá ʻi he Tahi Kālelí, “naʻe hoko ha fuʻu matangi mālohi ʻaupito, pea naʻe toutou pā ʻa e ngaahi peaú ʻo hake ki he vaká, ko ia naʻe meimei ngoto ai ʻa e vaká.” Naʻe manavahē ʻa ʻene kau ākongá. ʻI he ilifia naʻa nau maté, naʻa nau hanga kia Sīsū. Ko e hā ne fai ʻe Sīsuú? Naʻá ne hanga pē ʻo “valokiʻi ʻa e matangí peá ne pehē ki he tahí: ‘ʻEi! Fakalongolongo!’ Pea naʻe tuʻu leva ʻa e matangí, pea naʻe hoko ha fuʻu tofukī.” Naʻe ofo ʻa ʻene kau ākongá pea nau ʻeke: “Ko hai moʻoni eni? Naʻa mo e matangí mo e tahí ʻokú na talangofua kiate ia?”—Maʻake 4:37-41.

Talu mei ai, mo hono hakeakiʻi ʻa Sīsū ki he nofoʻanga laumālié pea mo hono ʻoange kiate ia ʻa e toe mālohi mo e mafai lahi ange. ʻI hono tuʻunga ko e Tuʻi ʻo e Puleʻanga ʻo e ʻOtuá, ʻokú ne maʻu ʻa e fatongia pea pehē ki he malava ke fakahoko ʻa e ngaahi liliu kotoa ʻoku fiemaʻú ke ʻoange ai ki he kakaí ha moʻui melino mo malu ʻi he māmaní.

Kae kehe, hangē ko ia kuo tau sio ki aí, ko e lahi ʻo e ngaahi palopalemá mo e ngaahi fakatamakí ko e ngāue ʻa e tangatá, ko e fakatupunga pe ʻai ke toe kovi ange ʻe he ngaahi ngāue ʻa e faʻahinga siokita mo mānumanu. Ko e hā ʻe fai ʻe he Puleʻangá fekauʻaki mo e faʻahinga ko ia ʻoku nau kīvoi ʻi he ngaahi founga peheé pea fakafisi ke liliú? ʻOku lea ʻa e Tohi Tapú fekauʻaki mo e ʻEiki ko Sīsuú ʻokú ne haʻu “mei hēvani fakataha mo ʻene kau ʻāngelo mālohí ʻi ha uloʻi afi, ʻi heʻene faisāuni ki he faʻahinga ko ia ʻoku ʻikai te nau ʻiloʻi ʻa e ʻOtuá pea mo e faʻahinga ko ia ʻoku ʻikai te nau talangofua ki he ongoongo lelei fekauʻaki mo hotau ʻEiki ko Sīsuú.” ʻIo, te ne “fakaʻauha ʻa e faʻahinga ʻoku nau fakaʻauha ʻa e māmaní.”—2 Tesalonaika 1:7, 8; Fakahā 11:18.

Hili iá, ko e “Tuʻi ʻo e ngaahi tuʻi” ko ení, ʻa Sīsū Kalaisi, te ne fakamahino ʻa e pule fakaʻaufuli ki he ngaahi ʻelemēniti ʻo e māmaní. (Fakahā 19:16) Te ne fakapapauʻi heʻikai kei faingataʻaʻia ʻa e faʻahinga ʻe pule ki ai ʻa e Puleʻangá ʻi ha ngaahi fakatamaki. Te ne ngāueʻaki ʻa hono mālohí ke puleʻiʻaki ʻa e ngaahi ʻelemēniti ki he anga e tuʻu ʻa e ʻeá koeʻuhi ke ngāue ʻa e ngaahi vilo ʻa e ʻeá mo e faʻahitaʻú ke ʻaonga ki he faʻahinga ʻo e tangatá. Ko e olá ko hono fakahoko ʻa e meʻa naʻe talaʻofa he kuohilí ʻe he ʻOtua ko Sihová ki hono kakaí: “Teu toki ʻatu haʻamou ʻuha ʻi hono taimi totonu, pea ʻe lakuna ʻe he kelekele hono mahu, pea ko e ngaahi ʻakau ʻo e ngoue te nau laku mai ʻenau fua.” (Livitiko 26:4) ʻE malava ʻa e kakaí ke langa ʻa e ngaahi fale ʻo ʻikai ha manavahē ki haʻanau mole ʻi ha fakatamaki: “Te nau langa fale, ʻo nofo ai; pea te nau to ngouevaine, pea kai hono fua.”—ʻAisea 65:21.

ʻOku ʻikai ha veiveiua ko koe, hangē ko e niʻihi kehe tokolahi, ʻoku tohoaki koe ki he foʻi fakakaukau ʻo e moʻui ʻi ha māmani ʻikai toe ʻi ai ha ngaahi fakatamaki fakaefakaʻauha. Ko e hā leva, kuo pau ke ke fai ka ke ʻi aí? Koeʻuhi “ko e faʻahinga ko ia ʻoku ʻikai te nau ʻiloʻi ʻa e ʻOtuá” mo e “faʻahinga ko ia ʻoku ʻikai te nau talangofua ki he ongoongo lelei” heʻikai te nau taau ke moʻui ʻi he māmani ka hoko mai ʻoku ʻatā mei he fakatamakí, ʻoku mahino kuo pau ke te ako he taimí ni fekauʻaki mo e ʻOtuá pea poupouʻi ʻene fokotuʻutuʻu ki he tuʻunga-pule ʻo e māmaní. ʻOku fiemaʻu ʻe he ʻOtuá ke tau hoko ʻo ʻiloʻi ia pea talangofua ki he ongoongo lelei ʻo e Puleʻanga kuó ne fokotuʻu fakafou ʻi hono ʻAló.

Ko e founga lelei taha ke ako ai ke fai ení ʻoku fakafou ʻi hano ako fakalelei ʻa e Tohi Tapú. ʻOku ʻi ai e ngaahi fakahinohino ke taau ai ke moʻui ʻi he ʻātakai malu ʻa ia ʻe ʻi ai ʻi he malumalu ʻo e tuʻunga-pule ʻa e Puleʻangá. Ko e hā ʻoku ʻikai te ke kole ai ki he Kau Fakamoʻoni ʻa Sihová ke nau tokoniʻi koe ke ʻilo ʻa e meʻa ʻoku akoʻi ʻe he Tohi Tapú? ʻOku nau mateuteu ki haʻo fiemaʻu koeʻuhi ko e taumuʻa tonu ko iá. Ko e meʻa ʻe taha ʻoku papaú—kapau te ke fai ʻa e feinga ke ʻiloʻi ʻa e ʻOtuá pea talangofua ki he ongoongo leleí, ʻe hoko moʻoni leva ʻi ho tuʻungá ʻa e ngaahi lea ʻi he Palōveepi 1:33: “Ka ko ia ʻoku fakaongo kiate au te ne nofo nonga, pea te ne ʻatā mei he manavahe ki he kovi [‘fakatamakí,’ NW].”