KO E ngaahi fakatamaki fakanatulá ʻoku hā ʻoku lahi ʻaupito ʻene ʻasi ʻi he ongoongó. Ko e kakai tokolahi ange ʻi ha toe taimi ki muʻa ʻoku maʻukovia kinautolu ʻi he fakatamaki ki he fakatamaki. ʻOku līpooti ʻe he Senitā ki he Fakatotolo ʻi he Fakalalahi ʻa e Ngaahi Fakatamakí ʻi Pelisiumé ʻo pehē ʻi he 2010 ʻataʻatā pē naʻe ʻi ai ʻa e ngaahi fakatamaki ʻe 373 pea ʻikai siʻi hifo he kakai ʻe toko 296,000 ne nau mate tupu mei ai.

Ko e lahi ʻo e ngaahi fakatamaki kuo līpōtí kuo ʻilonga ʻaupito ʻene ʻalu ki ʻolungá ʻi he ngaahi hongofuluʻi taʻu lahi kuohilí. Ko e fakatātaá, ʻi he vahaʻa ʻo e 1975 mo e 1999, naʻe lēkooti ai ʻa e ngaahi fakatamaki ʻi lalo ʻaupito he 300 ʻi he taʻu taki taha. Kae kehe, ʻi he vahaʻa ʻo e 2000 mo e 2010, ko e ʻavalisí naʻe ofi ia ki he 400 he taʻu. Mahalo pē ʻokú ke kau he faʻahinga ko ia ʻoku nau fifili, ‘Ko e hā koā ʻoku lahi fau ai ʻa e ngaahi fakatamakí he taimi ní?’

Neongo ʻoku faʻa lau ʻe he kakaí ʻa e ngaahi fakatamaki peheé ko e “ngaahi ngāue ʻa e ʻOtuá,” ʻoku ʻikai moʻoni pehē ia. ʻOku ʻikai tupu mei he ʻOtuá ʻa e ngaahi fakatamaki ʻokú ne uesia ʻa e fuʻu kakai tokolahi he ʻaho ní. Neongo ia, naʻe tomuʻa tala ʻe he Tohi Tapú ʻe ʻi ai e ngaahi fakatamaki ʻi hotau taimí. Ko e fakatātaá, ʻi he Mātiu 24:7, 8, ʻoku tau lau ai ʻa e ngaahi lea ʻa Sīsū: “ʻE ʻi ai ʻa e ngaahi nounou fakameʻatokoni mo e ngaahi mofuike ʻi he feituʻu ki he feituʻu. Ko e ngaahi meʻá ni kotoa ko e kamataʻanga pē ia ʻo e ngaahi langa ʻo e mamahi.” Ko e hā ne tomuʻa tala ai ʻe Sīsū ʻa e ngaahi meʻá ni, pea ko e hā ʻenau ʻuhinga kia kitautolú?

Ko e ʻAlo ʻo e ʻOtuá, ʻa Sīsū, naʻá ne lea ʻi he tali ki he fehuʻi naʻe fai ange kiate ia: “Ko e hā ʻa e fakaʻilonga . . . [ʻo e] fakaʻosiʻosi ʻo e fokotuʻutuʻu lolotongá?” (Mātiu 24:3) Naʻá ne tala ʻa e ngaahi meʻa kehekehe ʻe hoko, ʻo kau ai ʻa e ngaahi fakatamaki hangē ko ia naʻe lave ki ai ʻi ʻolungá. Naʻá ne hoko atu leva ʻo fai ʻa e fakamatala mahuʻinga ko ení: “ʻI hoʻomou sio ʻoku hoko ʻa e ngaahi meʻá ni, ʻiloʻi leva ʻoku ofi ʻa e Puleʻanga ʻo e ʻOtuá.” (Luke 21:31) Ko ia ai, ko e ngaahi fakatamaki fakanatula ko iá, ʻoku ʻi ai hono ʻuhinga lahi kia kitautolu. ʻOku nau tuhu ki ha taimi ʻo e ngaahi liliu mahuʻinga ʻi muʻá ni mai pē.

Kae kehe, ʻoku kei ʻeke pē ʻe he kakai tokolahi, Kapau ʻoku ʻikai tupu mei he ʻOtuá ʻa e ngaahi fakatamakí, ko hai pe ko e hā ʻoku tupu mei aí? Te tau toki lava pē ke mahinoʻi ʻa e talí kapau ʻoku tau ʻiloʻi ha foʻi moʻoni mahuʻinga ʻoku lave ki ai ʻi he Tohi Tapú: “Ko e māmaní kotoa ʻoku tokoto ia ʻi he mafai ʻo e tokotaha fulikivanú.” (1 Sione 5:19) Ko e vēsí ni ʻoku fakahaaʻi ai ʻoku ʻikai ko e ʻOtuá ʻoku  tupu mei ai ʻa e ngaahi tuʻunga fakamamahi ʻi he māmaní, ka ʻi he ngaahi tuʻunga lahi, ko hono filí, ʻa e “tokotaha fulikivanú”—ʻa ē ʻoku lave ki ai ʻi he Tohi Tapú “ko e Tēvoló.”—Fakahā 12:9, 12.

ʻI hono tataki ʻe heʻene taumuʻa siokita ʻaʻaná, ko e fili ko eni ʻo e ʻOtuá ʻokú ne vakai ki he kakaí ko ha meʻa ke faʻiteliha ki ai. Koeʻuhi ko e māmaní kotoa ʻoku ʻi he malumalu ʻo ʻene pulé, kuó ne pouaki ʻa e laumālie tatau ko iá ʻi he faʻahinga ʻo e tangatá. Ko e moʻoni, ʻoku fakahaaʻi ʻe he Tohi Tapú ʻa e meʻá ni ʻaki ʻene tomuʻa tala ʻo pehē ʻi he “ngaahi ʻaho fakaʻosí,” ko e kakaí te nau hoko ko e “kau ʻofa kiate kinautolu pē, ko e kau ʻofa ki he paʻangá, loto-mahikihiki, hīkisia.” (2 Tīmote 3:1, 2) Ko ia ai, ʻoku ʻikai fai ha ofo he kuo fakatupu ʻe he Tēvoló ha sisitemi fakaemāmani lahi ʻoku lakalakaimonū ʻi he ngaahi ʻulungaanga ko iá mo e ngaahi ʻulungaanga taʻefakaʻotua kehe. ʻOkú ne fakaʻaiʻai ʻa e ngāue siokita mo mānumanu ʻoku faʻa tuku ai ʻa e kakaí ki he tuʻunga fakatuʻutāmaki.

ʻI he founga fē ʻoku pouaki ai ʻe he sisitemi mānumanu he ʻaho ní ʻa e ngaahi fakatamakí? Ko ha līpooti ʻa e Ngaahi Puleʻanga Fakatahatahá ki he ngaahi fakatamaki ʻi māmani lahí ʻoku pehē ai: “Ko e kakaí ʻoku nau faʻa nofo tokolahi ʻi he ngaahi feituʻu fakatuʻutāmaki hangē ko e ngaahi tokalelei ʻoku faʻa tāfeá. ʻIkai ko ia pē, ko e fakaʻauha ʻo e ngaahi vaotaá mo e ngaahi feituʻu anó ʻokú ne maumauʻi ʻa e malava ʻa e ʻātakaí ke ne matuʻuaki ʻa e ngaahi fakatamakí. ʻOku maluʻaki mai ʻi he kotoa ʻo e meʻa ko ení ʻa e fakamanamana ʻo e liliu ʻi he anga ʻo e ʻeá ʻi he māmaní mo e ʻalu ki ʻolunga ʻa e lēvolo ʻo e tahí ko e tupu mei he fakautuutu ʻo e matolu ʻa e kasa ʻokú ne ʻai ke mafana ʻa e ʻeá . . . ko e fakatupunga ʻe he ngāue ʻa e tangatá.” Neongo ko e lahi ʻo e “ngāue [ko eni] ʻa e tangatá” ʻoku pehē ʻe hoko ai ʻa e fakalakalaka fakaʻekonōmika, ko hono moʻoní ko e ngāue ia ʻa e laumālie siokita mo mānumanu ʻoku hūhū ʻi he māmaní.

Ko ia ai, ko e kau mataotao tokolahi ʻoku nau ʻiloʻi he taimí ni ko e ngāue taʻetokanga ʻa e tangatá kuó ne ʻai ke fakautuutu ʻa e ngaahi ola fakatupu ʻauha ʻo e ngaahi fakatamaki ʻoku hokó. Ko hono moʻoní, kuo kaungāfai ʻa e tangatá mo e ngaahi ngāue ʻa e Tēvoló ʻi hono poupouʻi ha sisitemi ʻoku ʻai ke toe fakautuutu ange ai ʻa e ngaahi fakatamakí.

ʻOku tau sio leva ai, ko e ngaahi fakatamaki lahi ko e tupu ia mei he ngāue taʻetokanga ʻa e tangatá. Ko e niʻihi ʻo e ngaahi fakatamakí naʻe ʻikai mei fuʻu lahi ʻene fakaʻauhá ka ne taʻeʻoua ʻa e feituʻu naʻe hoko aí. ʻI he ngaahi konga lahi ʻo e māmaní, ko e ola ʻo e ngaahi fakatamaki fakanatulá naʻe ʻai ʻo kovi lahi ange ia ʻe he ngaahi tila kākā ʻa e faʻahinga taʻefaitotonu pe tupu mei he meʻa ko ia ko e pau ke nofo ʻa e fuʻu kakai tokolahi ʻi he ngaahi feituʻu fakatuʻutāmakí tupu mei he ngaahi taʻepotupotutatau fakaʻekonōmiká pe fakasōsialé ʻa ē ko e konga ia ʻo e māmaní he ʻaho ní. Ko e moʻoni, ko e kakai ʻe niʻihi ʻoku nau faingataʻaʻia ʻi he ngaahi fakatamakí, ʻo ʻikai koeʻuhí ko ha foʻui pe taʻetokanga ʻa ha tokotaha pau, ka koeʻuhí “ʻoku hokonoa ki he faʻahinga kotoa pe ʻa e faingamalie mo e tuʻutamaki.”—Koheleti 9:11.

Ko e hā pē ʻa e ʻuhingá, kapau ko e tokotaha maʻukovia koe ʻo ha fakatamaki fakanatula, ʻe lava fēfē ke ke fekuki mo ia? Te tau sio he taimí ni ki he meʻa ʻe lava ke fai ke fakasiʻisiʻi ai ʻa e maumaú ʻi he taimi ʻoku hoko ai ʻa e ngaahi fakatamakí.