‘Oku lāulea ‘a e kupu ko ení ki he ngaahi fehu‘i kuó ke ‘eke nai pea fakahaa‘i ai ‘a e feitu‘u ‘e lava ke ke lau ai ‘a e ngaahi talí ‘i ho‘o Tohi Tapú. ‘E fiefia ‘a e Kau Fakamo‘oni ‘a Sihová ke fetalanoa‘aki mo koe ki he ngaahi tali ko ení.

1. Ko e hā ‘oku ‘uhinga ki ai ‘a e papitaiso faka-Kalisitiané?

Ko e papitaisó ko ha kole ki ha vaha‘angatae lelei mo e ‘Otuá. Ko ia, ‘oku totonu ki ha Kalisitiane ke papitaiso, ‘o ‘ikai ‘i he‘ene kei pēpeé, ka ‘i he taimi ‘okú ne ‘i he ta‘umotu‘a fe‘unga ai ke ako fekau‘aki mo e ‘Otuá pea hoko ko ha ākonga ‘a Sīsū. (Ngāue 8:12; 1 Pita 3:21) ‘Oku tau hoko ko ha ākonga ‘a Sīsū ‘i he taimi ‘oku tau ako ai mo fai ‘a e ngaahi me‘a na‘á ne fekau maí.—Lau ‘a e Mātiu 28:19, 20.

‘I he ngaahi ‘aho ‘o e kau ‘apositolo ‘a Sīsuú, ko e kakai tokolahi na‘a nau fai leva ha ngāue ‘o ‘ikai toe toloi ke ako ai fekau‘aki mo e ‘Otuá mo Sīsū. Ko e fakatātaá, ‘i he taimi na‘e ‘ilo ai ‘e he tangata ‘e taha ko e pekia ‘a Sīsuú na‘e fakaava ai ‘a e hala ki he fakamo‘uí, na‘á ne hoko leva ‘i he taimi pē ko iá ko ha ākonga. ‘I he ‘ahó ni, ko e kakai loto-mo‘oni tokolahi kuo nau fai ha fili ke hoko ko e kau muimui ‘o Sīsū.—Lau ‘a e Ngāue 8:26-31, 35-38.

2. Ko e hā na‘e papitaiso ai ‘a Sīsuú?

Na‘e ta‘u 30 nai ‘a Sīsū ‘i he taimi na‘e fakauku ai ia ‘e Sione ko e Faipapitaisó ‘i he vai ‘o e Vaitafe Sioataní. Ko e papitaiso ‘a Sīsuú ‘okú ne fakafofonga‘i ‘a ‘ene fili ke fai ‘a e finangalo ‘o e ‘Otuá kiate iá. (Hepelū 10:7) ‘E kau ki heni ‘ene tuku atu ‘ene mo‘uí ko ha feilaulau ma‘á e ngaahi angahala ‘a e fa‘ahinga ‘o e tangatá. Na‘a mo e ki mu‘a ke ne ‘alu hifo mei hēvani ke mo‘ui he māmaní, na‘e ‘ofa ma‘u pē ‘a Sīsū mo talangofua ki he‘ene Tamaí, ‘a Sihova.—Lau ‘a e Ma‘ake 1:9-11; Sione 8:29; 17:5.

  3. Ko e hā ‘oku totonu ai ke papitaiso ha Kalisitiané?

Ko hotau tu‘ungá ‘oku kehe ia mei he tu‘unga ‘o Sīsuú—‘oku fanau‘i mai kitautolu ko e kau angahala. Neongo ia, ko e pekia fakaefeilaulau ‘a Sīsuú ‘okú ne ‘ai ai ke tau malava ‘o ma‘u ha vaha‘angatae lelei mo e ‘Otuá. (Loma 5:10, 12; 12:1, 2) ‘Oku malava mo‘oni ke tau hoko ko e me‘a ‘a‘ana ‘i he tu‘unga ko ha konga ‘o hono fāmilí. (2 Kolinitō 6:18) ‘Oku anga-fēfē ‘etau ma‘u ‘a e monū ko iá? ‘I ha lotu fakafo‘ituitui, ‘oku tau fakatapui ai kitautolu kia Sihova, ‘o fai ‘a e fuakava ke fai hono finangaló ‘i he toenga ‘etau mo‘uí. ‘I he hili hono fai ‘a e fakatapui ko iá, ‘oku tau faka‘ilonga‘i ia ‘i he ‘ao ‘o e kakaí ‘aki ‘a e hoko ‘o papitaiso.—Lau ‘a e Mātiu 16:24; 1 Pita 4:2.

4. ‘E lava fēfē ke ke mateuteu ki he papitaisó?

‘Oku ako ‘e he Kau Fakamo‘oni ‘a Sihová ‘a e Tohi Tapú mo ha taha pē ‘oku loto ke ‘unu‘unu ofi ki he ‘Otuá. Ko hono ako ‘a e Tohi Tapú pea kau ki he ngaahi fakataha faka-Kalisitiané ‘e fakaivimālohi‘i ai ‘a ho‘o ‘ofa ki he ‘Otuá pea mo ho‘o tui kiate iá. ‘E toe tokoni foki ia kiate koe ke ke fakatupulekina ‘a e ngaahi fakakaukau mo e ngaahi tō‘onga lelei. Ko hono fakatupulekina ‘a e ‘ofa, tui mo e ngaahi ‘ulungaanga faka‘otua kehé ‘e tokoni ia kia koe ke ke mo‘ui ‘o fakatatau mo ho‘o fuakava ke tauhi ‘a Sihova ‘o ta‘engatá.—Lau ‘a e Sione 17:3; Hepelū 10:24, 25.

Ki ha fakamatala lahi ange, sio ki he vahe 18 ‘o e tohi ko ení, Ko e Hā ‘Oku Ako‘i Mo‘oni ‘e he Tohi Tapú?, ko e pulusi ‘e he Kau Fakamo‘oni ‘a Sihová.