Ngaahi Kōsipeli Faka‘apokalifá​—Ko ha Ngaahi Mo‘oni Fufū Fekau‘aki mo Sīsū?

“KO HA me‘a lahi eni. Ko e kakai tokolahi te nau loto-mamahi.” “‘Oku liliu ‘e he me‘á ni ‘a e hisitōlia ‘o e mu‘aki lotu faka-Kalisitiané.” Ko e ngaahi fakamatala faka‘ohovale ko ení na‘e ha‘u ia mei ha kau mataotao ‘a ia na‘a nau talitali lelei ‘a e tohi ‘o e “Kōsipeli ‘a Siutasí,” ko ha fakamatala na‘e hiki ‘a ia ‘oku fai ‘a e fakakaukau na‘e puli ‘o laka hake ‘i he senituli ‘e 16 (‘oku hā atu ‘i ‘olungá).

‘Oku ‘i ai ‘a e toe mahu‘inga‘ia fo‘ou ‘i he ngaahi kōsipeli faka‘apokalifa ko iá. ‘Oku taku ‘e he kakai ‘e ni‘ihi ko e ngaahi fakamatala na‘e hiki ko ení ‘okú ne tatala ha ngaahi me‘a mahu‘inga na‘e hoko mo e ngaahi akonaki mei he mo‘ui ‘a Sīsuú ‘a ia na‘e fuoloa hono tuku fufuú. Ka ko e hā ‘a e ngaahi kōsipeli faka‘apokalifá? ‘E lava ke nau ako‘i mo‘oni mai ha ngaahi mo‘oni fekau‘aki mo Sīsū mo e lotu faka-Kalisitiané ‘a ia ‘oku ‘ikai lava ke tau ma‘u ia ‘e kitautolu ‘i he Tohi Tapú?

Ngaahi Kōsipeli Mo‘oní mo e Ngaahi Kōsipeli Faka‘apokalifá

‘I he vaha‘a ‘o e 41 ki he 98 T.S., ko Mātiu, Ma‘ake, Luke mo Sione na‘a nau hiki ‘a e “hisitōlia ‘o Sīsū Kalaisi.” (Mātiu 1:1) Ko e ngaahi fakamatala ko ení ‘oku ui ia ‘i he taimi ‘e ni‘ihi ko e ngaahi kōsipeli, ‘o ‘uhingá ko e “ongoongo lelei” fekau‘aki mo Sīsū Kalaisi.—Ma‘ake 1:1.

Lolotonga na‘e ‘i ai nai ‘a e ngaahi talatukufakaholo tala ngutu pea pehē ki he ngaahi hiki tohi kehe fekau‘aki mo Sīsū, ko e ngaahi Kōsipeli ‘e fā ko ení ko kinautolu pē ia na‘e fai ‘a e vakai ki ai na‘e fakamānava‘i ‘e he ‘Otuá pea ‘oku taau ke hoko ko e konga ‘o e Folofola Mā‘oni‘oní—‘o ne tokonaki mai ‘a e ‘ngaahi me‘a papau’ fekau‘aki mo e mo‘ui ‘a Sīsū ‘i he māmaní mo ‘ene ngaahi akonakí. (Luke 1:1-4; Ngāue 1:1, 2; 2 Tīmote 3:16, 17) Ko e ngaahi Kōsipeli ‘e fā ko ení ‘oku fai ‘a e lave ki ai ‘i he kotoa ‘o e ngaahi katiloka motu‘a ‘o e Ngaahi Konga Tohi Tapu Faka-Kalisi Kalisitiané. ‘Oku ‘ikai ha makatu‘unga ke fehu‘ia ai honau tu‘unga mo‘oní—‘a honau tu‘unga ko e konga ‘o e Folofola fakamānava‘i ‘a e ‘Otuá.

Neongo ia, ‘i he faai mai ‘a e taimí, na‘e kamata ke ‘asi hake ‘a e ngaahi hiki tohi kehe ‘a ia na‘e toe fakahingoa foki ko e ngaahi kōsipeli. Ko e ngaahi kōsipeli kehe ko ení na‘e ui ia ko e faka‘apokalifa. *

‘I he ngata‘anga ‘o e senituli hono uá, ko ‘Ileniasi ‘o Lyon na‘á ne tohi ko e fa‘ahinga ko ia na‘a nau tafoki ‘o fakafepaki ki he lotu faka-Kalisitiané na‘a nau ma‘u “‘a e ngaahi tohi faka‘apokalifa lahi ‘aupito mo loi,” ‘o kau ai ‘a e ngaahi kōsipeli ‘a ia “ko kinautolu tonu na‘a nau fa‘u, ke fakapuputu‘u‘i ‘a e ‘atamai ‘o e kau tangata valé.” Ko ia ai, ko e ngaahi kōsipeli faka‘apokalifá na‘e iku ia ‘o fai ‘a e vakai ki ai ‘oku fakatu‘utāmaki ‘o ‘ikai ngata pē ‘i hono lau iá ka na‘a mo hano ma‘u ia ko ha‘ate me‘a.

Kae kehe, ko e kau mōnike mo e kau hiki-tatau ‘o e kuonga lotolotó na‘a nau tauhi ‘a e ngaahi tohi ko iá mei ha‘ane mole atu. ‘I he senituli hono 19, na‘e fakautuutu lahi ‘a e mahu‘inga‘ia ‘i he kaveingá ni pea ko e ngaahi tānekinga lahi ‘o e ngaahi hiki fakamatala mo e ngaahi pulusinga anga-fakaanga fekau‘aki mo e ‘apokalifá, ‘o kau ai ‘a e ngaahi kōsipeli ‘e ni‘ihi, na‘e  hoko ia ‘o ‘ilo‘i. ‘I he ‘ahó ni ‘oku ‘i ai ‘a e ngaahi pulusinga ‘oku pulusi ‘i he konga lahi ‘o e ngaahi lea lalahi ‘o onopōní.

Ngaahi Kōsipeli Faka‘apokalifá: Ngaahi Fakamatala ‘Ikai Ngali Mo‘oni Fekau‘aki mo Sīsū

Ko e ngaahi kōsipeli faka‘apokalifá ‘oku fa‘a fakahanga ia ki he kakai ‘oku si‘i pe ‘ikai teitei fai ha lave ki ai ‘i he ngaahi Kōsipeli mo‘oní. Pe ‘oku nau fakamatala ki ha ngaahi me‘a ‘oku taku tokua na‘e hoko ‘i he fekau‘aki mo e kei valevale ‘a Sīsuú. Vakai angé ki ha ngaahi fakatātā ‘e ni‘ihi.

▪ Ko e “mu‘aki kōsipeli ‘a Sēmisí,” ‘oku toe ui ia “Ko e Fā‘ele‘i ‘o Melé,” ‘oku fakamatala ai ki hono fā‘ele‘i ‘o Melé mo ‘ene kei si‘í pea pehē ki he‘ene mali kia Siosifá. Kuo fakamatala‘i ia ‘i ha ‘uhinga lelei ko ha talanoa fa‘u fakalotu pea ko ha talatupu‘a. ‘Okú ne pouaki ‘a e fo‘i fakakaukau ‘o e nofo tāupo‘ou ai pē ‘a Melé pea ‘oku hā mahino na‘e hiki ia ke fakahīkihiki‘i ‘a Mele.—Mātiu 1:24, 25; 13:55, 56.

▪ Ko e “Kōsipeli ‘a Tōmasi ki he Kei Si‘í” ‘oku fakahangataha ia kia Sīsū ‘i he‘ene kei tamasi‘í—‘i he vaha‘a ‘o e ta‘u 5 ki he 12—‘oku fakahaa‘i ai na‘á ne fakahoko ha ngaahi holongā mana ‘oku ‘ikai ngali mo‘oni. (Sio ki he Sione 2:11.) ‘Oku fakahaa‘i ‘a Sīsū ko ha ki‘i tamasi‘i pau‘u, ‘itangofua, mo anga-sāuni, ‘a ia ‘okú ne ngāue‘aki ‘a hono ngaahi mafai fakaemaná ke faisāuni ki he kau faiakó, ngaahi kaungā‘apí, pea mo e fānau kehé, ‘a ia ko honau ni‘ihi ‘okú ne fakakuihi, ‘ai ke nau heke, pea a‘u ‘o ne tāmate‘i.

▪ Ko e ngaahi kōsipeli faka‘apokalifa ‘e ni‘ihi, hangē ko e “Kōsipeli ‘a Pitá,” ‘oku nōfo‘i ia ‘i he ngaahi me‘a na‘e fekau‘aki mo e hopo, pekia pea mo e toetu‘u ‘a Sīsuú. Ko e ni‘ihi, hangē ko e “Ngaahi Ngāue ‘a Pailató,” ko ha konga ‘o e “Kōsipeli ‘a Nikotīmasí,” ‘oku fakahanga ia ki he kakai na‘e fekau‘aki mo e ngaahi me‘a ko ia na‘e hokó. Koe‘uhi ‘oku lave ‘a e ngaahi hiki fakamatalá ni ki he ngaahi mo‘oni‘i me‘a ‘oku ‘ikai mo‘oni pea mo e kakai na‘e ‘ikai te nau ‘i ai, ‘oku ‘ikai falala‘anga ai ‘a e ngaahi hiki fakamatala ko ení. Ko e “Kōsipeli ‘a Pitá” ‘oku feinga ai ke fakatonuhia‘i ‘a Ponitō Pailato pea fakamatala‘i ‘a e toetu‘u ‘a Sīsuú ‘i ha founga ‘ikai mo‘oni.

Ngaahi Kōsipeli Faka‘apokalifá mo e Tafoki ‘o Fakafepaki ki he Lotu Faka-Kalisitiané

‘I Tīsema 1945, ofi ki Nag Hammadi, ‘i he tafa‘aki ki ‘olunga ‘o ‘Isipité, na‘e ma‘u fāinoa ai ‘e ha kau ngoue ha ngaahi maniusikilipi pepailo ‘e 13 na‘e ‘i ai ‘a e ngaahi hiki fakamatala ‘e 52. Ko e ngaahi tohi fakamatala ko eni ‘o e senituli hono faá na‘e taku ia ki ha kulupu fakalotu mo fakafilōsofia na‘e ui ko e kau tui faka-Nositiká. ‘I hono fio ‘a e ngaahi ‘elemēniti ‘o e tui fakapanganí, filōsofia faka-Kalisí, lotu faka-Siú, lotu faka-Kalisitiané, mo e feinga ke fetu‘utaki fakahangatonu ki he ‘Otuá, na‘e hoko ai ‘a e kulupú ni ko ha tākiekina fakamele‘i ‘i he fa‘ahinga ‘e ni‘ihi na‘a nau lau ko e kau Kalisitiane kinautolú.—1 Tīmote 6:20, 21.

Ko e “Kōsipeli ‘a Tōmasí,” mo e “Kōsipeli ‘a Filipé,” pea mo e “Kōsipeli ‘o e Mo‘oní,” ‘a e tānekinga maniusikilipi na‘e ma‘u ‘o ofi ki Nag Hammadi, ‘oku fakahaa‘i mai ai ‘a e ngaahi fo‘i fakakaukau kehekehe faka-Nositika mo e feinga ke fetu‘utaki fakahangatonu ki he ‘Otuá ‘o hangē ia na‘e ha‘u meia Sīsuú. Ko e “Kōsipeli ‘a Siutasi” na‘e toki ma‘u ki mui ní ‘oku toe lau foki ia ‘i he lotolotonga ‘o e ngaahi kōsipeli faka-Nositiká. ‘Oku tapua lelei mai ai ‘a Siutasi ko e ‘apositolo pē ia ‘e taha na‘á ne mahino‘i mo‘oni pe ko hai ‘a Sīsū. Ko e mataotao ‘e taha ‘i he kōsipeli ko ení ‘okú ne fakahaa‘i ‘oku fakamatala‘i ai ‘a Sīsū ‘i he tu‘unga “ko ha faiako mo ha tokotaha ‘okú ne fakae‘a ‘a e potó mo e ‘iló, kae ‘ikai ko ha tokotaha faifakahaofi ‘a ia ‘okú ne mate ma‘á e ngaahi angahala ‘a e māmaní.” ‘Oku ako‘i ‘e he ngaahi Kōsipeli fakamānava‘í na‘e pekia ‘a Sīsū ko ha feilaulau ma‘á e ngaahi angahala ‘a e māmaní. (Mātiu 20:28; 26:28; 1 Sione 2:1, 2) ‘Oku hā mahino, ko e ngaahi kōsipeli faka-Nositiká ‘oku fakataumu‘a ia ke fakavaivai‘i, kae ‘ikai ko hono fakaivimālohi‘i, ‘a e tui ki he Tohi Tapú.—Ngāue 20:30.

Ko e Tu‘unga Mā‘olunga Ange ‘o e Ngaahi Kōsipeli Mo‘oní

Ko ha vakai fakalelei ki he ngaahi kōsipeli faka‘apokalifá ‘oku fakae‘a ai ‘a honau tu‘unga totonú. ‘I hono fakafehoanaki mo e ngaahi Kōsipeli mo‘oní, ‘oku fakahaa‘i mā‘ala‘ala ai ‘a e ‘ikai ke fakamānava‘i faka‘otua kinautolú. (2 Tīmote 1:13) ‘I hono hiki ‘e he kakai na‘e ‘ikai ‘aupito te nau ‘ilo ‘a Sīsū pe ko ‘ene kau ‘apositoló, ‘oku ‘ikai fakae‘a mai ai ha ngaahi mo‘oni fufū fekau‘aki mo Sīsū mo e lotu faka-Kalisitiané. ‘I hono kehé, ‘oku ‘i ai ‘a e ngaahi fakamatala ‘ikai totonu, ko e fa‘u, mo ‘ikai mo‘oni ‘a ia ‘oku ‘ikai ha‘ane tokoni ‘i he feinga ke ‘ilo‘i ‘a Sīsū pea mo ‘ene ngaahi akonakí.—1 Tīmote 4:1, 2.

‘I he tafa‘aki ‘e tahá, ko Mātiu ia mo Sione na‘á na kau kinaua ‘i he kau ‘apositolo ‘e toko 12; ko Ma‘ake mo Luké ko ha ongo takanga ofi taki taha ia ‘o e ongo ‘apositolo ko Pita mo Paulá. Na‘a nau hiki ‘enau ngaahi Kōsipelí ‘i he tataki ‘a e laumālie mā‘oni‘oni ‘o e ‘Otuá. (2 Tīmote 3:14-17) ‘I he ‘uhinga ko ení, ko e ngaahi Kōsipeli ‘e faá ‘oku ‘i ai ‘a e me‘a kotoa ‘oku fiema‘u ki ha taha ke hoko ai ‘o tui “ko Sīsū ‘a e Kalaisí ko e ‘Alo ‘o e ‘Otuá.”—Sione 20:31.

[Fakamatala ‘i lalo]

[Picture Credit Line ‘i he peesi 18]

Kenneth Garrett/National Geographic Stock