Naʻá Ke ʻIloʻi?

Naʻe maʻu mei fē ʻa e ngaahi maka mahuʻinga ʻi he sifa-fatafata ʻo e taulaʻeiki lahi ʻo ʻIsilelí?

▪ Hili ʻa e mavahe ʻa e kau ʻIsilelí mei ʻIsipite pea nau hū ki he toafá, naʻe ʻoange ʻe he ʻOtuá kiate kinautolu ʻa e ngaahi tuʻutuʻuni ki hono ngaohi ʻo e sifa-fatafata ko ení. (ʻEkisoto 28:15-21) Ko e sifa-fatafatá naʻe ʻi ai ʻa e ngaahi maka sātio, tōpasi, ʻemalata, kapukeli , sāfaia, pēlili, siasini, ʻāketi, ʻametisi, kalisolaite, maka-ʻōnike mo e siasipa. * Naʻe malava moʻoni ʻe he kau ʻIsilelí ke maʻu ʻa e faʻahinga maka-koloa ko iá?

ʻI he taimi ʻo e Tohi Tapú, naʻe fakamahuʻingaʻi ai ʻe he kakaí ʻa e ngaahi maka mahuʻingá pea fai ʻaki ʻa e fefakatauʻakí. Ko e fakatātaá, ko e kau ʻIsipite ʻo e kuonga muʻá naʻa nau maʻu ʻa e ngaahi maka koloá mei he mamaʻo ʻa ē ʻoku ʻiloa he taimí ni ko ʻIulani, ʻAfikānisitani pea naʻa mo ʻInitia nai. Ko e ngaahi keliʻanga makakoloa ʻi ʻIsipité naʻe ngaohi ai ʻa e ngaahi maka mahuʻinga kehekehe. Ko e haʻa tuʻi ʻIsipité ko kinautolu pē naʻa nau puleʻi ʻa e ngaahi maka koloa naʻe maʻu hake ʻi he ngaahi vahefonua naʻa nau puleʻí. Naʻe fakamatala ʻa e pēteliake ko Siopé ki hono ngāueʻaki ʻe hono toʻumeʻá ʻa e ngaahi ʻa e saafi mo e ngaahi halanga ʻi lalofonua ke kumi ki he ngaahi koloá. ʻOku kau ʻi he ngaahi meʻa naʻe keli hake mei lalo fonuá, ʻa e sāfaia mo e tōpasi ʻa ia ʻoku fakamatalaʻi tonu ʻe Siopé.—Siope 28:1-11, 19.

ʻOku pehē ʻi he fakamatala ʻa e ʻEkisotó ko e kau ʻIsilelí naʻa nau “matuʻaki vete ʻa e kau Isipite” ʻo ʻenau ngaahi meʻa mahuʻingá ʻi he taimi naʻa nau mavahe ai mei he fonuá. (ʻEkisoto 12:35, 36) Ko ia ai, ʻoku malava ke pehē naʻe maʻu ʻe he kau ʻIsilelí mei ʻIsipite ʻa e ngaahi maka naʻe ngāueʻaki ki he sifa-fatafata ʻo e taulaʻeiki lahí.

Ko e hā naʻe ngāueʻaki ai ʻa e uainé ko ha faitoʻo lolotonga ʻa e ngaahi taimi ʻo e Tohi Tapú?

▪ ʻI he taha ʻo ʻene ngaahi pealapelí, naʻe lea ʻa Sīsū fekauʻaki mo ha tangata ʻa ia naʻe tā ʻe he kau kaihaʻa ʻakaú. Naʻe pehē ʻe Sīsū ko e tangatá naʻe tokoniʻi ʻe ha Samēlia ʻaki hono haʻi hono ngaahi laveá pea lilingi ai ʻa e “lolo mo e uaine.” (Luke 10:30-34) ʻI heʻene tohi ki hono kaumeʻa ko Tīmoté, naʻe akonekina ia ʻe he ʻapositolo ko Paulá: “Tuku hoʻo inu pē ʻa e vaí, kae ʻai ha meʻi uaine koeʻuhí ko ho keté pea mo hoʻo faʻa puké.” (1 Tīmote 5:23) Ko e ngāue fakatouʻosi naʻe fakamatalaʻi ʻe Sīsuú mo e akonaki naʻe fai ʻe Paulá naʻe ongo fakafaitoʻo?

Ko e tohi Ancient Wine ʻoku fakamatalaʻi ai ʻa e uainé ko ha “faitoʻo taʻofi langa, tāmate siemu mo fakaleleiʻanga fakalūkufua ʻoku iku ki he meʻa ʻe taha.” ʻI he kuonga muʻá ko e uainé naʻe ʻi ai hono taumuʻa tefito ʻi he faitoʻo moʻui lelei ʻa e kau ʻIsipité, kau Mesopotēmiá mo e kau Sīliá. ʻOku fakamatalaʻi ʻe he The Oxford Companion to Wine “ko e faitoʻo lelei motuʻa taha ʻa e faʻahinga ʻo e tangatá.” Hangē ko e akonaki ʻa Paula kia Tīmoté, ʻoku pehē ʻe he tohi The Origins and Ancient History of Wine: “Kuo fakapapauʻi mei hano siviʻi ko e meʻamoʻui ʻoku nau fakatupunga ʻa e taifotí mo e ngaahi siemu fakatuʻutāmaki kehé ʻoku nau mate vave ʻi hono huʻi mo e uainé.” Ko e ngaahi fakatotolo ʻi onopōní ʻokú ne fakapapauʻi ko e niʻihi ʻo e ngaahi meʻa kehekehe ʻe 500 ʻoku maʻu ʻi he uainé ʻoku nau maʻu ia mo e ngaahi meʻa fakafaitoʻo ʻaonga kehe.

[Fakamatala ʻi lalo]

[Fakatātā ʻi he peesi 18]

Kau ngāue malamalaki kālepi, mei he faʻitoka nakht, ʻi Thebes, ʻIsipite

[Credit Line]

Gianni Dagli Orti/The Art Archive at Art Resource, NY