KUO faifai ange peá ke fiemaʻu lahi ha meʻa?— * Kapau ko ia, ʻokú ke hangē pē ko e kakai tokolahi tahá. Ka ʻoku totonu ke ke feinga ke maʻu ʻa e meʻa ʻokú ke fiemaʻú ʻaki hono tala ha loi?— ʻIkai, ʻoku ʻikai totonu. Ko ha tokotaha ʻoku fai pehē ko e mānumanú ia. Tau sio angé ki he founga naʻe fakaʻauha ai ʻe he mānumanú ha tangata ko hono hingoá ko Kēhesi. Ko ha sevāniti ia ʻa ʻIlaisa, ko ha palōfita ʻa e ʻOtua moʻoní, ʻa Sihova.

Ko ʻIlaisa mo Kēhesí naʻá na moʻui he taimi fuoloá, mahalo ko ha taʻu nai ʻe taha afe ki muʻa ke ʻaloʻi mai ki māmani ʻa e ʻAlo ʻo e ʻOtuá, ʻa Sīsū. Naʻe ngāueʻaki ʻe Sihova ʻa ʻIlaisa ke ne fai ʻa e ngaahi meʻa fakaofo moʻoni—ke fakahoko ʻa e ngaahi mana! Ko e fakatātaá, ʻoku fakamatala ʻa e Tohi Tapú fekauʻaki mo ha tangata mahuʻinga ʻi he kau tau Sīliá ʻa ia naʻá ne maʻu ʻa e mahaki kovi ko e kiliá. Naʻe ʻikai lava ʻe ha taha ke fakamoʻui ia, ka naʻe lava ʻe ʻIlaisa.

ʻI he taimi naʻe ngāueʻaki ai ʻe Sihova ʻa ʻIlaisa ke tokoniʻi ʻa e kakaí ke nau moʻuí, naʻe ʻikai ʻaupito ke ne tali ha paʻanga. ʻOkú ke ʻiloʻi hono ʻuhingá?— Koeʻuhi naʻe ʻilo ʻe ʻIlaisa ko e ngaahi mana ko iá ko e haʻú meia Sihova—ʻikai meiate ia tonu. ʻI he taimi naʻe fakamoʻui ai ʻa Neamaní, naʻá ne fuʻu fiefia ʻo ne fiemaʻu ke ʻoange kia ʻIlaisa ha ngaahi meʻaʻofa ʻo e koula, siliva mo e ngaahi kofu fakaʻofoʻofa. Naʻe ʻikai ke toʻo ʻe ʻIlaisa ha meʻa ʻe taha, ka naʻe fuʻu fiemaʻu ʻe Kēhesi ʻa e ngaahi meʻaʻofa ko ení.

Hili ʻa e mavahe ʻa Neamaní, naʻe tulimui atu ʻa Kēhesi ʻo ʻikai te ne tala kia ʻIlaisa. ʻI he taimi naʻá ne maʻu atu ai ʻa Neamaní, ʻokú ke ʻiloʻi ʻa e meʻa naʻe tala ange ʻe Kēhesi ki aí?— ‘Kuo fekau au ʻe ʻIlaisa ke fakaha, kuo toki aʻu mai ha ongo ʻaʻahi. ʻOkú ne loto ke maʻu ha ongo kofu kotoa ʻe ua koeʻuhi ke ne lava ʻo ʻoange ki he ongo tangatá.’

 Ka ko ha foʻi loi ia! Naʻe faʻufaʻu ʻe Kēhesi ha talanoa fekauʻaki mo e ongo ʻaʻahí. ʻOkú ne fai iá koeʻuhi ʻokú ne loto ke maʻu ʻa e ngaahi kofu naʻe feinga ʻa Neamani ke ʻoange kia ʻIlaisá. Ko e moʻoni ko Neamaní, ʻoku ʻikai ke ne ʻiloʻi ʻa e meʻá ni. Ko ia ʻokú ne fiefia ke ʻoange kia Kēhesi ʻa e ngaahi meʻaʻofá. ʻOku aʻu ʻo ʻoange ʻe Neamani ʻa e meʻa lahi ange kia Kēhesi ʻi he meʻa ʻoku kole ʻe Kēhesí. ʻOkú ke ʻiloʻi ʻa e meʻa ʻoku hoko atu aí?—

ʻI he foki atu ʻa Kēhesi ki ʻapí, ʻoku ʻeke ange ʻe ʻIlaisa kiate ia: ‘Naʻá ke ʻi fē?’

‘ʻIkai ki ha feituʻu,’ ko e tali ia ʻa Kēhesí. Kae kehe, naʻe ʻai ʻe Sihova ke ʻilo ʻe ʻIlaisa ʻa e meʻa kuo fai ʻe Kēhesí. Ko ia ʻoku pehē ʻe ʻIlaisa: ‘ʻOku ʻikai ko e taimi eni ke maʻu paʻanga mo e kofu!’

Kuo ʻave ʻe Kēhesi ʻa e paʻanga mo e ngaahi kofu ʻoku ʻikai ko haʻane meʻa. Ko ia ʻoku ʻai ʻe he ʻOtuá ʻa e kilia ʻo Neamaní ke maʻu ʻe Kēhesi. Ko e hā ʻokú ke fakakaukau ʻoku lava ke ta ako mei hení?— Ko e meʻa ʻe taha ʻokú ne akoʻi mai kiate kitauá ko e totonu ke ʻoua te ta faʻufaʻu pea fai ha talanoa ʻa ia ʻoku ʻikai moʻoni.

Ko e hā naʻe faʻufaʻu ai ʻe Kēhesi ha talanoa, ko hono moʻoní, ko ha foʻi loi?— Koeʻuhí naʻe mānumanu ʻa Kēhesi. Naʻá ne loto ke maʻu ʻa e meʻa naʻe ʻikai ko haʻane meʻa, pea feinga ke maʻu ʻa e ngaahi meʻa ko iá ʻaki ha loi. Koeʻuhi ko e meʻá ni naʻá ne faingataʻaʻia ai ʻi ha mahaki fakalilifu ʻi he toenga ʻo ʻene moʻuí.

Ko hono moʻoní, naʻe tofanga ʻa Kēhesi ʻi he meʻa naʻe kovi ange ia ʻi he kiliá. ʻOkú ke ʻiloʻi pē ko e hā ia?— Ko e mole ʻa e hōifua ʻa e ʻOtuá, ko e mole ʻa ʻene ʻofá. Fakatauange ke ʻoua ʻaupito naʻa tau fai ha faʻahinga meʻa ke ʻai ai ke mole meiate kitautolu ʻa e meʻa ko iá! ʻI hono kehé, tau hoko ʻo anga-ʻofa pea mateuteu ke vahevahe atu ʻa e ngaahi meʻa ʻoku tau maʻú.