KAVEINGA TEFITO: MEʻA ʻOKU TAU AKO MEIA MŌSESÉ
Ko Hai ʻa Mōsese?
Ko e hā ʻoku haʻu ki hoʻo fakakaukaú ʻi hoʻo fanongo ki he hingoa Mōsesé? ʻOkú ke fakakaukau ko ha . . .
-
pēpē ʻoku fūfuuʻi ʻe heʻene faʻeé ʻi ha kato ʻi he Vaitafe Nailá?
-
tamasiʻi naʻe ʻohake ʻi he founga moʻui tuʻumālie ʻi ʻIsipite ʻe he ʻofefine ʻo Feló—ka naʻe ʻikai ngalo ko iá ko ha ʻIsileli?
-
tangata naʻá ne moʻui ko ha tauhi-sipi ʻi Mitiani ʻi ha taʻu ʻe 40?
-
tangata naʻá ne fetalanoaʻaki mo Sihova * ʻi muʻa ʻi ha fuʻu ʻakau ʻoku vela?
-
tangata naʻá ne fehangahangai mo e tuʻi ʻo ʻIsipité, ʻo kōlenga loto-toʻa ke fakatauʻatāinaʻi ʻa e kau ʻIsilelí mei he pōpulá?
-
tangata ʻa ia ʻi he tataki ʻa e ʻOtuá naʻá ne fanongonongo ʻa e Mala ʻe Hongofulu ki ʻIsipité ʻi he taimi naʻe fakafepaki ai ʻa e tuʻí ki he ʻOtua moʻoní?
-
tangata naʻá ne tataki ʻa e kau ʻIsilelí ʻi ha mavahe fakaofo mei ʻIsipite?
-
tangata naʻe ngāueʻaki ki hono taaʻi ʻo e Tahi Kulokulá?
-
tangata naʻá ne ʻoange ki he kau ʻIsilelí ʻa e Fekau ʻe Hongofulu mei he ʻOtuá?
NAʻE fakahoko kotoa ʻe Mōsese ʻa e ngaahi meʻá ni mo e meʻa lahi ange. Tāneʻineʻi ke fakaʻapaʻapaʻi lahi ʻa e tangata faitōnungá ni ʻe he kau Kalisitiané, kau Siú mo e kau Mosilemí!
ʻOku hā mahino, ko Mōsesé ko ha palōfita naʻá ne fakahāhā ha “fuʻu fakangeingei.” (Teutalōnome 34:10-12) Naʻá ne fakaʻatā ia ke ngāueʻaki ʻe he ʻOtuá ʻi ha founga mālohi. Neongo ia, ko Mōsesé ko ha tangata anga-maheni pē ia. Hangē pē ko e palōfita ko ʻIlaisiaá, naʻá ne hā ʻi he tafaʻaki ʻo Mōsesé ʻi ha vīsone lolotonga ʻa e ngāue fakafaifekau ʻa Sīsū he māmaní, ko Mōsesé ko ha tangata “naʻá ne maʻu ʻa e ngaahi ongo ʻo hangē pē ko kitautolú.” (Sēmisi 5:17; Mātiu 17:1-9) Naʻe fehangahangai ʻa Mōsese mo e ngaahi palopalema tatau ʻoku tau fehangahangai mo iá, pea naʻá ne ikuʻi ola lelei ia.
Te ke loto ke ʻilo ki he founga naʻá ne fai ai iá? Fakakaukau ki he ngaahi ʻulungaanga lelei ʻe tolu naʻe fakahāhā ʻe Mōsese pea mo e meʻa ʻoku lava ke tau ako mei heʻene faʻifaʻitakiʻangá.
^ pal. 7 Ko Sihová ko e huafa ia ʻo e ʻOtuá ʻoku fakahaaʻi ʻi he Tohi Tapú.
