Ko e anga-fakatōkilaló ʻoku kau ki ai ʻa e mavahe mei he loto-fieʻeikí pe pōlepolé. Ko ha tokotaha anga-fakatōkilalo ʻoku ʻikai ke ne vakai ki he niʻihi kehé ʻoku nau māʻulalo ange ʻiate ia. Ko ha faʻahinga tangata taʻehaohaoa pē ʻoku anga-fakatōkilalo ʻoku totonu ke ne toe fakanānā, ʻa ia ko ʻene ʻiloʻi hono ngaahi ngataʻangá.

Naʻe ʻikai ke hoko ʻa Mōsese ʻo pōlepole ʻi heʻene maʻu ʻa e mafaí. ʻI he taimi ʻoku faʻa hoko ai ha tangata ʻo maʻu ha kiʻi mafai, ko ʻene anga-fakatōkilaló—pe ʻoku siʻi—ʻoku vave ʻene hā mahinó. Naʻe peheni hono fakalea ʻe ha faʻutohi ko Robert G. Ingersoll ʻi he senituli hono taha hivá: “ʻOku lava ʻa e tokolahi ke fekuki mo e fakafilí. Ka ʻo kapau ʻokú ke loto ke ʻiloʻi ʻa e tuʻunga totonu ʻo ha tangata, ʻoange ki ai ha mafai.” ʻI he tuʻunga ko iá, naʻe fokotuʻu ʻe Mōsese ha faʻifaʻitakiʻanga lelei ʻaupito ʻo e anga-fakatōkilaló. ʻO anga-fēfē?

Naʻe maʻu ʻe Mōsese ha mafai lahi, naʻe fekauʻi ia ʻe Sihova ke ne taki ʻa ʻIsileli. Ka, ko e mafai ko iá naʻe ʻikai ke ʻai ai ʻa Mōsese ke pōlepole. Ko e fakatātaá, fakakaukau ki he founga fakanānā naʻá ne ngāue ai ki he fehuʻi faingataʻa fekauʻaki mo e totonu ki he ngaahi tofiʻá. (Nōmipa 27:1-11) Ko e fehuʻí naʻe faingataʻa, he ko e filí te ne fokotuʻu ha faʻifaʻitakiʻanga fakalao ki he ngaahi toʻutangata ka hoko maí.

ʻE anga-fēfē ha tali ʻa Mōsese? Te ne fakaʻuhinga koeʻuhi ko e taki ia ʻo ʻIsilelí, ko ia naʻe taau ke ne fai ha fili ki he meʻa ko iá? Te ne falala ki heʻene malava fakanatulá, ko e laui taʻu ʻene ngāué, pe ko ʻene ʻiloʻi lelei ʻa e fakakaukau ʻa Sihová?

Mahalo ko ha tangata pōlepole te ne fai pehē. Ka naʻe ʻikai pehē ʻa Mōsese. ʻOku tala mai ʻe he lēkooti ʻo e Tohi Tapu kiate kitautolu: “Naʻe ʻomi ʻe Mosese ʻenau meʻa ki he ʻao ʻo Sihova.” (Nōmipa 27:5) Fakakaukau angé! Ko e hili ē ʻa e taʻu ʻe 40 ʻene taki ʻa e puleʻanga ʻo ʻIsilelí, naʻe ʻikai falala ʻa Mōsese kiate ia, ka kia Sihova. ʻOku tau sio heni ki he fuʻu anga-fakatōkilalo ʻa Mōsesé.

Naʻe ʻikai ke fakakaukau ʻa Mōsese ia ko ia tokotaha pē ʻoku totonu ke ne maʻu ʻa e mafaí. Naʻá ne fiefia ʻi he taimi naʻe fakaʻatā ai ʻe Sihova ʻa e kau ʻIsileli kehé ke nau hoko ko ha kau palōfita. (Nōmipa 11:24-29) ʻI he taimi naʻe fokotuʻu ange ai ʻe heʻene tamai ʻi he fonó ke vahevahe atu ha niʻihi hono ngaahi fatongiá, naʻe ngāueʻaki anga-fakatōkilalo ʻe Mōsese ʻa e fokotuʻú. (ʻEkisoto 18:13-24) Pea ʻi he ofi ki he ngataʻanga ʻo ʻene moʻuí, neongo naʻe kei mālohi hono sinó, naʻe kole ʻa Mōsese kia Sihova ha taha ke fetongi ia. ʻI he taimi naʻe fili ai ʻe Sihova ʻa Siosiuá, naʻe poupou loto-kakato ʻa Mōsese ki he tangata naʻe siʻi ange aí, ʻo fakaʻaiʻai ʻa e kakaí ke muimui ki he tataki ʻa Siosiua ki he Fonua ʻo e Talaʻofá. (Nōmipa 27:15-18; Teutalōnome 31:3-6; 34:7) Ke fakapapauʻí, naʻe lau ia ʻe Mōsese ko ha monū ke tataki ʻa e kau ʻIsilelí ʻi he lotú. Ka naʻe ʻikai ke ne ʻai hono mafaí ke muʻomuʻa ia ʻi he lelei ʻa e niʻihi kehé.

ʻOku ʻikai ke tau loto ke ʻai ʻa e mālohí, mafaí pe malava fakanatulá ke tau pōlepole ai. Manatuʻi: Ke ngāueʻaki kitautolu ʻe Sihova, ko ʻetau anga-fakatōkilaló ʻoku mahuʻinga ange ia ʻi heʻetau malavá. (1 Sāmiuela 15:17) ʻI he taimi ʻoku tau anga-fakatōkilalo loto-moʻoni aí, te tau feinga ke ngāueʻaki ʻa e akonaki fakapotopoto ʻa e Tohi Tapú: “Falala ki he ʻEiki [pe Sihova] ʻaki ʻa e kotoa ʻo ho loto, ʻo ʻouae fāki ki ho poto oʻou.”—Palōveepi 3:5, 6.

Ko e faʻifaʻitakiʻanga ʻa Mōsesé ʻokú ne toe akoʻi mai kiate kitautolu ke ʻoua ʻe fakamahuʻingaʻi tōtuʻa hotau tuʻungá pe mafaí.

ʻOku tau maʻu ʻaonga mei he faʻifaʻitaki ki he faʻifaʻitakiʻanga ʻa Mōsese ʻo e anga-fakatōkilaló? ʻIkai toe fehuʻia! ʻI he taimi ʻoku tau fakatupulekina ai ʻa e anga-fakatōkilalo moʻoní, ʻoku tau ʻai ʻa e moʻuí ke faingofua ange ki he kakai takatakai ʻiate kitautolú, ʻo nau ʻofeina ai kitautolu. Kae mahuʻinga angé, ʻe ʻofeina ai kitautolu ʻe Sihova ko e ʻOtuá, ʻa ia tonu ʻokú ne fakahāhā ʻa e ʻulungaanga fakaʻofoʻofa ko ení. (Saame 18:35) “ʻOku talitekeʻi ʻe he ʻOtuá ʻa e kau hīkisiá, ka ʻokú ne foaki ʻa e ʻofa maʻataʻataá ki he kau anga-fakatōkilaló.” (1 Pita 5:5) He ʻuhinga mālohi ē ke faʻifaʻitaki ki he anga-fakatōkilalo ʻa Mōsesé!