Ko e tokotaha faikovi ʻe lava ke tau ako mei aí ko e tokotaha ʻokú ke sio ʻoku lea ki ai ʻa Sīsū ʻi he fakatātaá. ʻOku fakaʻiseʻisa ʻa e tokotaha faikovi ko iá ʻi heʻene ngaahi faihiá. ʻOkú ne kole kia Sīsū: “Manatuʻi au ʻi hoʻo hoko ki ho Puleʻangá.” Ko ia, ʻe lava ke ke sio ʻi he fakatātaá, ʻoku lea ʻa Sīsū ki he tokotaha faikovi ko ení. ʻOkú ke ʻilo ʻa e meʻa ʻoku leaʻaki ʻe Sīsū kiate iá?— * ʻOku talaʻofa ʻe Sīsū kiate ia: “ʻOku ou tala moʻoni atu kiate koe ʻi he ʻahó ni, Te ke ʻi Palataisi mo au.”

ʻOkú ke fakakaukau ʻe fēfē ʻa e Palataisí?— Ke fakapapauʻi ʻoku tau maʻu ʻa e tali totonú, tau lāulea ki he Palataisi ko ia naʻe faʻu ʻe he ʻOtuá maʻá e ʻuluaki tangatá mo e fefiné, ʻa ʻĀtama mo ʻIvi. Naʻe ʻi fē ʻa e Palataisi ko iá? Naʻe ʻi hēvaní, pe naʻe ʻi māmani ia?—

ʻOkú ke tonu kapau ʻokú ke pehē naʻe ʻi māmani ia. Ko ia ʻi he taimi ʻoku tau fakakaukau ai ki he tokotaha faikoví ʻoku “ʻi Palataisí,” ʻoku totonu ke tau fakakaukau kiate ia ʻokú ne moʻui ʻi heni tonu ʻi he māmaní he taimi ʻe hoko ai ia ko ha palataisí. ʻE fēfē ʻa e Palataisi ko iá?— Tau sio angé ki aí.

Hili hono fakatupu ʻe Sihova ko e ʻOtuá ʻa e ʻuluaki ongo meʻa fakaetangatá, ʻa ʻĀtama mo ʻIvi, ʻoku pehē ʻe he Tohi Tapú naʻá ne tuku kinaua ʻi ha palataisi ʻi heni tonu ʻi he māmaní. Naʻe ui ia ko ha “ngouetapu ʻi Iteni.” ʻE lava ke ke sioloto atu ki he fakaʻofoʻofa kuo pau naʻe ʻi ai ʻa e “ngouetapu ʻi Iteni?”— Ko e moʻoni, ko ha feituʻu lelei ange ia mo fakaʻofoʻofa ange ke nofo ai ʻi ha feituʻu pē kuo faifai ange ʻo sio ai ha taha!

Ko e hā hoʻo fakakaukaú? ʻE ʻi māmani ʻa Sīsū fakataha mo e tokotaha faikovi naʻá ne fakaʻiseʻisa ʻi heʻene ngaahi angahalá?— ʻIkai, ʻe ʻi hēvani ʻa Sīsū ia ʻo pule mai ko e Tuʻi ki he māmani Palataisí. Ko ia ʻe fakataha ʻa Sīsū mo e tokotaha faikoví ʻi he ʻuhinga  te ne fokotuʻu hake ia mei he maté pea sio ʻoku tokangaʻi lelei ia ʻi he Palataisi he māmaní. Ka ko e hā ʻe tuku ai ʻe Sīsū ha tangata naʻe hoko ko ha tokotaha faikovi ke ne moʻui ʻi he Palataisí?— Tau talanoa angé fekauʻaki mo e meʻá ni.

Ko e moʻoni naʻe fai ʻe he tokotaha faikovi ko ení ʻa e ngaahi meʻa kovi ʻaupito. Kae pehē foki ki he laui piliona ʻo e kakai kehe ʻa ia kuo nau moʻui ʻi he māmaní. Kae kehe, ko e tokolahi taha ʻo kinautolú, naʻa nau fai ʻa e ngaahi meʻa kovi koeʻuhí naʻe ʻikai ʻaupito ke akoʻi kinautolu fekauʻaki mo Sihova pea mo e meʻa ʻokú ne loto ke nau faí.

Ko ia ko e kakai peheé, kau ai ʻa e tokotaha faikovi naʻe lea ki ai ʻa Sīsū ʻi he ʻakaú, te ne toetuʻu ke moʻui ʻi he Palataisí ʻi heni tonu ʻi he māmaní. ʻE akoʻi kia kinautolu ʻa e finangalo ʻo e ʻOtuá. Pea ʻe lava leva ke nau fakamoʻoniʻi ʻenau ʻofa kia Sihová.

ʻOkú ke ʻilo ʻa e founga ʻe lava ai ke nau fakamoʻoniʻi iá?— ʻAki hono fai ʻa e meʻa ʻoku loto ʻa e ʻOtuá ke nau faí. He fakaofo ē ke moʻui ʻi he Palataisí pea fakataha maʻu pē mo e kakai ʻoku nau ʻofa kia Sihova mo nau feʻofaʻakí!