“Ko e ngaahi ongoʻi taʻeʻaongá ko ha fakafaingataʻaʻiaʻanga lahi taha nai ia ʻoku ou feinga ke ikuʻí. Ko e lea ia ʻa ha fefine ʻe taha ʻa ia naʻe faingataʻa ke ne tui ʻe faifai ange ʻo maʻu ʻe Sihova ha ʻuhinga ke tokanga mai ai kiate ia. ʻOkú ke faʻa ongoʻi pehē? Kapau ko ia, te ke fifili nai, ‘ʻOku tokanga moʻoni mai ʻa Sihova ki heʻene kau lotú ʻi he tuʻunga tāutahá?’ Ko e talí ko e ʻio! ʻOku tau maʻu ʻa e fakamoʻoni ʻo e tokanga fakafoʻituitui mai ʻa Sihová ʻi he lea ʻa Sīsuú.—Lau ʻa e Sione 6:44.

Ko e hā naʻe leaʻaki ʻe Sīsū, ʻa ia ʻokú ne ʻilo lelei ange ʻi ha toe taha kehe ʻa e ʻulungaanga mo e finangalo ʻo Sihová? (Luke 10:22) Naʻe fakamatala ʻa Sīsū: “ʻOku ʻikai ha tangata ʻe lava ke haʻu kiate au kae ʻoua ke tohoaki mai ia ʻe he Tamaí, ʻa ia naʻá ne fekau mai aú.” Ko ia, ʻe ʻikai ke tau lava ʻo hoko ko ha muimui ʻo Kalaisi—pea mo ha tokotaha lotu ki heʻetau Tamai fakahēvaní, ʻa Sihova—kae ʻoua ke tohoakiʻi fakafoʻituitui kitautolu ʻe Sihova. (2 Tesalonaika 2:13) Kapau te tau mahinoʻi ʻa e ʻuhinga ʻa Sīsuú, te tau sio leva ʻi heʻene leá ki he fakamoʻoni mālohi ʻo e tokanga fakafoʻituitui mai ʻa e ʻOtuá.

ʻOku ʻuhinga ki he hā ʻa hono tohoakiʻi kitautolu ʻe Sihová? Ko e foʻi veape faka-Kalisi naʻe liliu ko e “tohoaki” ʻoku toe ngāueʻaki ia ki hono toho ha kupenga ika. (Sione 21:6, 11) ʻOku toho kitautolu ʻe Sihova, ʻo fakamālohiʻi ke tauhi kiate ia? ʻIkai. Naʻe ʻomai ʻe Sihova kia kitautolu ʻa e tauʻatāina ke filí, ko ia ʻoku ʻikai ke ne fakamālohiʻi ke fakaava hotau lotó. (Teutalōnome 30:19, 20) ʻOku fakamatalaʻi peheni ia ʻe ha mataotao ʻe taha: “ʻOku ʻikai ha kau ia ʻi he tafaʻaki ki tuʻa ʻo e matapā ki he loto ʻo e tangatá. Kuo pau pē ke fakaava ia mei loto.” ʻOku hakule ʻe Sihova ʻa e loto ʻo e laui piliona ʻi he māmani ko ení, ʻo kumi ki he faʻahinga tāutaha ʻoku loto-totonú. (1 Kalonikali 28:9) ʻI heʻene maʻu ha tokotaha pehē, ʻokú ne tali ʻi ha founga fakaueʻiloto. ʻO anga-fēfē?

ʻOku tohoakiʻi anga-fakaalaala ʻe Sihova ʻa e loto ʻo ha tokotaha ʻoku “hehema totonu.” (Ngāue 13:48) ʻOku fai pehē ʻa Sihova ʻi he founga ʻe ua—fakafou ʻi he pōpoaki ʻo e ongoongo lelei ʻi he Tohi Tapú, ʻa ia ʻoku aʻu mai kia kitautolu tāutaha, pea fakafou ʻi hono laumālie māʻoniʻoní. ʻI he taimi ʻoku ʻafioʻi ai ʻe Sihova ha loto ʻokú ne tali lelei ʻa e moʻoni Fakatohitapú, ʻokú ne ngāueʻaki hono laumālié ke tokoniʻi ʻa e tokotaha tāutaha ko iá ke ne mahinoʻi pea ngāueʻaki ʻa e moʻoní ʻi heʻene moʻuí. (1 Kolinitō 2:11, 12) ʻI he ʻikai ha tokoni fakaʻotuá, heʻikai ʻaupito lava ke tau hoko ko e kau muimui moʻoni ʻo Sīsū mo e kau lotu līʻoa kia Sihova.

Ko e hā leva ʻoku akoʻi mai kia kitautolu ʻe he lea ʻa Sīsū ʻoku lēkooti ʻi he Sione 6:44 fekauʻaki mo Sihova ko e ʻOtuá? ʻOku tohoakiʻi ʻe Sihova ʻa e kakaí koeʻuhí he ʻokú ne ʻafioʻi ʻa e meʻa lelei ʻi honau lotó pea tokanga kia kinautolu ʻi he tuʻunga tāutahá. Ko hono mahinoʻi ʻa e moʻoni papau ko ení naʻe fakafiemālieʻi ai ʻa e fefine naʻe lave ki ai ʻi he kamataʻangá. ʻOkú ne pehē: “ʻI he hoko ko ha sevāniti ʻa Sihová ko ha monū mahuʻinga taha ia ʻe lava ke maʻu ʻe ha taha. Pea kapau naʻe fili au ʻe Sihova ke hoko ko ha sevāniti ʻaʻana, pea kuo pau leva ʻoku ou mahuʻinga kiate ia.” Fēfē koe? Ko hono ʻiloʻi ʻoku tokanga mai ʻa Sihova ki heʻene kau lotú ʻi he tuʻunga tāutahá ʻoku ueʻi ai koe ke ke loto ke fakaava ʻa e matapā ho lotó?