Naʻá ku tupu ʻi ha kiʻi kolo ʻuta ko Warialda, ʻi Niu Sau Uele. Ko Warialda ko ha feituʻu faama ʻa ia ʻoku tauhi hake ai ʻa e fanga sipi, pulu, uite mo e ngaahi ngoue iiki kehe ʻoku tō aí. ʻOku maʻa ʻa e koló, mo siʻi ʻa e faihiá.

ʻI heʻeku hoko ko e lahi taha ʻi he fānau ʻe toko hongofulú, naʻá ku kamata ngāue ai ʻi hoku taʻu 13 ke tokoni ki he tokonaki maʻá e fāmilí. Koeʻuhi naʻe ʻikai ke sai ʻeku akó naʻá ku ngāue ai ʻi he ngaahi fāmá. ʻI heʻeku taʻu 15, naʻá ku hoko ai ko ha tokotaha tauhi fanga manu, ʻi hono fakalalata ʻa e fanga hōsí.

Ko e ngāue ʻi he ngaahi fāmá naʻe ʻi ai hono lelei mo hono kovi. ʻI he tafaʻaki ʻe tahá, naʻá ku saiʻia moʻoni ʻi he ngāué, pehē foki ki he ʻātakaí. Naʻá ku tangutu pē ʻi he veʻe afi ʻi he kemi he poʻulí ʻo sio ki he māhiná mo e langi fetuʻuá ʻi hono ʻomi ʻe he ʻea mokomoko ʻo e efiafí ʻa e ʻalaha ʻo e kakala ʻi he vaó. ʻOku ou manatuʻi ʻeku fakakaukau, ʻoku pau pē naʻe ʻi ai ʻa e Tokotaha naʻá ne ngaohi kotoa ʻa e ngaahi meʻa fakaofo ko iá. ʻI he tafaʻaki ʻe tahá, naʻá ku maʻu ʻa e ngaahi tākiekina kovi ʻi he ngaahi fāmá. Naʻá ku faʻa fanongo ʻi he kapekapé, pea naʻe faingofua ʻeku maʻu ʻa e sikaletí. Ko e ifí mo e kapekapé naʻe hoko ia ko ha konga anga-maheni ʻo ʻeku moʻuí.

ʻI heʻeku taʻu 18, naʻá ku hiki ai ki Senē. Naʻá ku feinga ke hū ʻo sōtia ka naʻe ʻikai tali koeʻuhí ko e ʻikai sai ʻeku akó. Naʻe maʻu ʻeku ngāue peá u nofo ʻi Senē ʻi ha taʻu ʻe taha. ʻI he lolotonga ʻa e taimi ko iá naʻá ku kamata fetuʻutaki ai mo e Kau Fakamoʻoni ʻa Sihová. Naʻá ku tali ha fakaafe ke maʻu ʻa e taha ʻo ʻenau ngaahi fakatahá, pea naʻá ku fakatokangaʻi leva ai ko ʻenau ngaahi akonakí ko e moʻoní ia.

Kae kehe taimi nounou mei ai, naʻá ku fakakaukau ke u foki ki ʻuta. Naʻá ku iku ai ki Goondiwindi, Kuinisilani. Naʻá ku maʻu ai ʻeku ngāue, maʻu mo e mali pea ko e meʻa fakamamahí naʻá ku toe kamata ke inu.

Naʻe ʻi ai ʻeku fānau ʻe toko ua mo hoku uaifí. Hili hono fāʻeleʻi hoku ongo fohá, naʻá ku kamata ke fakakaukau fakamātoato fekauʻaki mo e feituʻu naʻe huʻu ki ai ʻeku moʻuí. Naʻá ku manatuʻi  ʻa e meʻa naʻá ku fanongo ai ʻi he fakataha ʻa e Kau Fakamoʻoní ʻi Senē, peá u fili ke fai ha meʻa fekauʻaki mo ia.

Naʻá ku maʻu ha tatau motuʻa ʻo e Taua Leʻo naʻe ʻi ai ʻa e tuʻasila ʻo e ʻōfisi vaʻa ʻo e Kau Fakamoʻoni ʻa Sihova ʻi ʻAositelēliá. Naʻá ku ʻoatu ha tohi ʻo kole ha tokoni. ʻI he tali ki aí, naʻe ʻaʻahi mai ai ha tokotaha Fakamoʻoni anga-lelei mo anga-ʻofa. ʻI he ʻikai fuoloa naʻá ne ako Tohi Tapu mo au.

ʻI heʻeku ako ʻa e Tohi Tapú, naʻá ku ʻiloʻi ai ʻa e fiemaʻu ke u fai ha ngaahi liliu lahi ki heʻeku moʻuí. Ko ha veesi Tohi Tapu ʻe taha naʻe tautefito ʻene maongo kiate aú ko e 2 Kolinitō 7:1. ʻOku fakalototoʻaʻi kitautolu ʻi he veesi ko iá ke “fakamaʻa kitautolu mei he ʻuli kotoa pē ʻo e kakanó.”

Naʻá ku fili ke u tuku ifi mo tuku ʻa ʻeku ngāuehalaʻaki ʻa e ʻolokaholó. Naʻe ʻikai ke faingofua hono fai ʻa e ngaahi liliu ko iá, he ko e ngaahi tōʻonga ko ení naʻe hoko ia ko e konga ʻeku moʻuí ʻi ha taimi fuoloa. Ka naʻá ku fakapapauʻi ke moʻui ʻi ha founga ʻa ia ʻoku fakahōifua ki he ʻOtuá. Ko e tokoni lahi tahá ko hono ngāueʻaki ʻa e tefitoʻi moʻoni ʻoku hiki ʻi he Loma 12:2: “Tuku ʻa e fakaangatatau ki he fokotuʻutuʻu ko ení, ka ke fai homou liliú ʻaki hono fakafoʻou homou ʻatamaí.” Naʻá ku ʻiloʻi koeʻuhi ke liliu ʻeku ngaahi tōʻonga ʻa ia naʻe fakatupu maumaú, naʻe fiemaʻu ke liliu mo ʻeku fakakaukaú pea ke vakai ki heʻeku ngaahi tōʻongá ʻi he founga ʻo e vakai ʻa e ʻOtuá. ʻI heʻene tokoní naʻá ku lavameʻa ʻo tuku ʻa e ifí mo e ngāuehalaʻaki ʻo e ʻolokaholó.

Neongo ia ko e pole lahi tahá, ko ʻeku fāinga ke tuku ʻa e kapekapé. Naʻá ku ʻiloʻi ʻa e faleʻi ʻa e Tohi Tapú ʻoku hiki ʻi he ʻEfesō 4:29: “Tuku ke ʻoua ʻe haʻu mei homou ngutú ha lea palakū.” Naʻa mo ia, naʻe ʻikai ke u lavameʻa leva ʻi hono fakaleleiʻi ʻa e founga ʻeku leá. Naʻá ku ʻiloʻi naʻe tokoni ʻa e fakalaulauloto ki he ngaahi lea ʻi he ʻAisea 40:25, 26 [40:26, PM]. ʻI he fekauʻaki mo e langi fetuʻuá ʻoku pehē ʻe he veesi ko iá: “Tangaki ki ʻolunga homou mata, ʻo vakai. Ko hai kuo ne fakatupu ʻa e ngaahi meʻa ko é? Ko ia ʻoku taki mai mo lau honau kongakau: ʻoku ne ui honau hingoa tāutaha; ko e meʻa ʻi he lahi hono ngaahi ivi, mo e tuʻu kaukaua hono ngu, ʻoku ʻikai ha taha ʻe to.” Naʻá ku fakaʻuhinga kapau naʻe maʻu ʻe he ʻOtuá ʻa e mālohi ke fakatupu ʻa e ʻuniveesi kāfakafa—ʻa ia naʻá ku saiʻia ke sio ki aí—ko e moʻoni ʻe lava ke ne ʻomai kiate au ha mālohi ke fai ha ngaahi liliu koeʻuhi ke fakahōifua kiate ia. ʻI he lotu mo e feinga naʻe faai atu pē ʻou mapuleʻi ʻeku leá.

ʻI he hoko ko ha tokotaha tauhi fanga manu, naʻe ʻikai ke lahi haku faingamālie ke fetalanoaʻaki mo e kakaí, he naʻe tokosiʻi pē ʻa e kakai ia ʻi he ngaahi faama naʻá ku ngāue aí. Neongo ia, fakafou he ako naʻe tokonaki ʻe he ngaahi fakataha ʻa e Kau Fakamoʻoni ʻa Sihová, naʻá ku ako ai ʻa e founga ʻo e fakafeangai mo e kakaí. ʻOku lahi mo e ngaahi meʻa kehe, ʻoku ʻai ʻe he ako ko ení ke u malava ʻo talanoa ki he niʻihi kehé fekauʻaki mo e ongoongo lelei ʻo e Puleʻanga ʻo e ʻOtuá.—Mātiu 6:9, 10; 24:14.

ʻI he ngaahi taʻu kuo maliu atú, kuó u fiefia ai ʻi he hoko ko ha mātuʻa ʻi he fakatahaʻangá. ʻOku ou lau ia ko ha monū ke fai ha meʻa pē ʻoku ou lava ke tokoniʻi ai ʻa hoku kaungātuí.

Naʻá ku fakamālō kia Sihova ki hono fakaʻatā au—ko ha tokotaha naʻe ʻikai sai ʻene akó—ke ako ʻiate ia. (ʻAisea 54:13) ʻOku ou loto-tatau fakaʻaufuli mo e ngaahi lea ʻi he Palōveepi 10:22, ʻa ia ʻoku pehē: “Ko e tapuaki ʻa Sihova, ko ia ia ʻoku fakakoloa.”