Kapau ko e mātuʻa koe ʻo ha taʻu hongofulu tupu, ko e fakakikihí ʻe ʻahiʻahiʻi nai ai ʻa hoʻo taukei ko ha mātuʻá—pea mo hoʻo kātakí. “ʻI he taimi ʻoku fakafepaki mai ai ʻeku taʻahiné ki heʻeku fekaú ʻoku ʻai ai au ke u matalili,” ko e lau ia ʻa Malia ko ha faʻē ʻo ha taʻu 14 ʻi Pelēsila. “Naʻá ma vākovi peá ma tauʻaki kaikaila.” Ko Kāmela, ʻi ʻĪtali naʻá ne fehangahangai mo ha palopalema meimei tatau. “Ko e fakakikihi mo hoku fohá ʻoku faʻa hoko ia ʻo fakatupu tōlili,” ko ʻene laú ia “pea iku atu ki heʻene tāpuni loki.”

Ko e hā ʻoku ngali fuʻu fakakikihi ai ʻa e kau taʻu hongofulu tupu ʻe niʻihi? ʻE tukuakiʻi nai honau toʻumeʻá? Mahalo pē. ʻOku pehē ʻe he Tohi Tapú ko e tokotaha ʻoku feohi mo ha taha ʻe lava ke hoko ia ko ha tākiekina mālohi ki he lelei pe kovi. (Palōveepi 13:20; 1 Kolinitō 15:33) Ko ia, ko e lahi fau ʻo e fakafiefia ʻoku fakamānako ki he toʻutupú ʻokú ne fakaʻaiʻai ai ʻa e sīpinga angatuʻu mo e fakafetau ʻi he taʻu hongofulu tupú.

Ka ʻoku ʻi ai ʻa e ngaahi moʻoniʻi meʻa kehe ke lāulea ki ai—ko e ngaahi moʻoniʻi meʻa ʻoku ʻikai ke fuʻu faingataʻa ke feangai mo ia ʻi he taimi te ke mahinoʻi ai ʻa e anga ʻo ʻene uesia hoʻo taʻu hongofulu tupú. Fakakaukau ki he ngaahi faʻifaʻitakiʻanga ʻe niʻihi.

Naʻe tohi ʻe he ʻapositolo ko Paulá: “ʻI he taimi naʻá ku kei tamasiʻi aí, naʻá ku faʻa lea ʻo hangē ha kiʻi tamasiʻí, fakakaukau hangē ha kiʻi tamasiʻí, fakaʻuhinga hangē ha kiʻi tamasiʻí; ka ko eni kuó u hoko ʻo fuʻu tangata, kuó u tuku atu ai ʻa e ngaahi tōʻonga ʻo e kei tamasiʻí.” (1 Kolinitō 13:11) Hangē ko e ngaahi lea naʻe fakahaaʻi ʻe Paulá, ko e fānaú mo e kakai lalahí ʻoku kehekehe ʻenau fakakaukaú. ʻI he founga fē?

ʻOku hehema ʻa e fānaú ke fakakaukau ko e meʻa kotoa pē ʻoku tonu pe hala. ʻI hono kehé, ko e kakai lalahí  ʻoku nau faʻa malava lelei ange ke nau fakaʻuhinga ʻi he ngaahi meʻa ʻoku ʻikai mahinó pea fakakaukau lahi ange ʻo aʻu ki ha fakamulituku pe fai ha ngaahi fili. Ko e fakatātaá, ʻoku lahi ange ʻa e fakakaukau ʻa e kakai lalahí ki he ngaahi ʻīsiu fakaʻēfika ʻoku muimui mai ʻi ha meʻa pea fakakaukau fekauʻaki mo e anga hono uesia ʻe heʻenau tōʻongá ʻa e niʻihi kehé. ʻOku angaʻaki nai ke nau fakakaukau pehē. ʻI hono fakahoa atú, ko e kau taʻu hongofulu tupú ʻoku nau foʻou ki he meʻá ni.

ʻOku fakalototoʻaʻi ʻe he Tohi Tapú ʻa e kau talavoú ke nau fakatupulekina ʻa e “ʻiloʻilo mo e fakakaukau.” (Palōveepi 1:4) Ko moʻoni, ʻoku ekinaki ʻa e Tohi Tapú ki he kau Kalisitiane kotoa pē ke nau ngāueʻaki ʻenau “mafai fakaefakaʻuhingá.” (Loma 12:1, 2; Hepelū 5:14) ʻI he taimi ʻe niʻihi, ko e pōtoʻi fakaefakaʻuhinga hoʻo taʻu hongofulu tupú te ne ʻai nai ia ke fakakikihi mo koe naʻa mo e meʻa ʻoku ʻikai loko mahuʻingá. Pe ʻokú ne fakahaaʻi ʻene fakakaukaú ʻo hā mahino kiate koe ʻoku hala ʻene fakakaukaú. (Palōveepi 14:12) ʻI ha tuʻunga pehē, ʻe lava fēfē ke ke fakaʻuhinga mo ia kae ʻoua ʻe fakakikihi?

Ko ha Fakatokanga: ʻI he taimi ʻokú ke fakaʻuhinga ai mo hoʻo taʻu hongofulu tupú, ʻoua te ke fakakaukau ko koe te ke aofangatukú. Neongo ko e meʻa te ke leaʻakí ʻoku hangē ʻe ʻikai fiefanongo ki aí, ko hoʻo taʻu hongofulu tupú ʻe ngalingali heʻikai ke ne tali ʻa e meʻa lahi ange ʻi he meʻa naʻá ke ʻamanekiná—pe te ne toki tali ia ʻamui ange. ʻOua te ke ofo ʻi ha ngaahi ʻaho siʻi pē ʻe loto-tatau ai hoʻo taʻu hongofulu tupú mo e anga hoʻo fakakaukaú—mahalo naʻa mo haʻane tala atu ko ʻene fakakaukaú ia.

“ʻI he taimi ʻe niʻihi naʻá ku fakakikihi mo hoku fohá ʻi he ngaahi meʻa iiki—ko e fakatātaá, ke tuku ʻene maumau taimí mo e fakamataliliʻi hono kiʻi tuofefiné. Ka ʻi he ngaahi meʻa lahi ngalingali naʻá ne loto ke u ʻeke ange pe ko e hā ʻene fakakaukaú pea mahinoʻi ia mo pehē, ‘ʻŌ, ko e meʻa ia naʻe hokó pe ‘Ko hoʻo ʻuhingá ia.’ ʻI he toe vakai ki aí, naʻá ku mahinoʻi leva kapau naʻá ku leaʻaki ʻa e ngaahi meʻa ko iá, ngalingali heʻikai lahi ʻema fakakikihí.”—Keni, Siapani.

Ko e tafaʻaki tefito hono ʻohake ha talavou ko hono teuteuʻi ia ki ha ʻaho ʻe malava ai ke mavahe mei ʻapi pea moʻui ko ha tokotaha lahi fua fatongia. (Sēnesi 2:24) Ko e konga ʻo e meʻa ko iá ʻoku kau ki ai ʻa e fokotuʻu ha tuʻunga—ko ʻene ngaahi malavá, tuí pea mo e ngaahi meʻa ʻokú ne mahuʻingaʻia aí ʻo fakahaaʻi ai pe ko e tokotaha fēfē ʻokú ne loto ke hoko ki aí. ʻI he taimi ʻoku fehangahangai ai mo e tenge ke faihalá, ko ha taʻu hongofulu tupu ʻokú ne ʻosi fakakaukau ki hono tuʻungá te ne fai ʻa e meʻa lahi ange ʻi he fakakaukau pē ki he ngaahi ikuʻangá. Te ne toe ʻeke hifo kiate ia: ‘Ko e faʻahinga tokotaha fēfē au? Ko e hā ʻoku ou fakamahuʻingaʻí? Ko e hā ʻe fai ʻe ha taha ʻokú ne maʻu ʻa e ngaahi mahuʻingaʻia ko iá ʻi he tuʻunga ko ení?’—2 Pita 3:11.

ʻOku tala mai kia kitautolu ʻe he Tohi Tapú fekauʻaki mo Siosifa, ko ha talavou naʻe mālohi ʻene ongoʻi fekauʻaki mo hono tuʻungá. Ko e fakatātaá, ʻi he taimi naʻe fakaʻaiʻai ai ʻe he uaifi ʻo Pōtifá ke na mohé, naʻe tali ʻe Siosifa: “Pea fefe ai haʻaku fai ʻa e fuʻu angahala lahi ni, ʻo te hia ai ki he ʻOtua?” (Sēnesi 39:9) Neongo naʻe teʻeki ai ke ʻave ki ʻIsileli ʻa e lao ke tapui ʻa e tonó, naʻe maʻu ʻe Siosifa ia ʻa e anga ʻo e vakai ʻa e ʻOtuá ki he meʻa ko iá. ʻIkai ko ia pē, ko e ngaahi leá ni “Pea fefe ai haʻaku” ʻokú ne fakamahino ai naʻá ne ʻai ʻa e vakai ʻa e ʻOtuá ko ʻene meʻa tonu—ko e konga ia hono tuʻungá tonu.—ʻEfesō 5:1.

Ko hoʻo taʻu hongofulu tupú foki ʻokú ne fokotuʻu pau hono tuʻungá. ʻOku lelei eni, ko ʻene ngaahi tuipaú ʻe tokoniʻi ai ia ke fekuki mo e tenge mei hono toʻumeʻá pea fakafepakiʻi kinautolu. (Palōveepi 1:10-15) ʻI he tafaʻaki ʻe tahá, ko e tuʻunga tatau pē ko iá ʻe ʻai ai ia ke fakafepaki kiate koe. Kapau ʻe hoko ia, ko e hā ʻe lava ke ke faí?

Ko hono fakatupulekina ha tuʻungá—fakataha mo e tuipaú—ʻoku ʻikai ko ha meʻa anga-maheni ia ka ʻoku ʻaonga foki. ʻIkai ko ia pē, ʻoku pehē ʻe he Tohi Tapú ko e kau Kalisitiané ʻoku totonu ke ʻoua ʻe hangē ko e fānau īkí ʻo “fepālekina holo ʻo hangē ko ia ʻoku fai ʻe ha ngaahi peaú mo feʻaveʻaki holo ʻe he matangi kotoa pē ʻo e akonaki.” (ʻEfesō 4:14) Ko ia fakaʻatā mo fakalototoʻaʻi hoʻo taʻu hongofulu tupú ke fakatupulekina ha tuʻunga fakataha mo ha ngaahi tuipau mālohi.

“ʻI he taimi naʻá ku fakahaaʻi ai ki heʻeku fānau fefiné ʻoku ou loto-lelei ke fanongo kia kinautolú, naʻa nau hehema lahi ange ke tokanga ki heʻeku fakakaukaú neongo naʻe kehe ia mei haʻanautolú. ʻOku ou tokanga ke ʻoua ʻe fakamālohiʻi kinautolu ki he meʻa ʻoku ou fakakaukau ki aí ka ke tuku kinautolu ke fai ʻenau ngaahi fakakaukaú.”—ʻIva, Lepupilika Seki.

ʻI he hangē ko e fānau īkí, ko e kau taʻu hongofulu tupu ʻe niʻihi naʻa nau faʻa ʻohake ʻa e ngaahi meʻá ke fakakikihi ai mo ʻenau mātuʻá. Tokanga kapau ʻoku faʻa hoko eni ʻi homou ʻapí. Neongo ia, ko e tukuloló ʻe hoko nai ia ko ha fakanonga fakataimi pē, ka ko hono akoʻi ia hoʻo taʻu hongofulu tupú ke hoko ʻa e fakakikihí ko e founga ia ke maʻu ai ʻa e meʻa ʻokú ne loto ki aí. Ko e hā ʻa e fakaleleiʻangá? Muimui ki he faleʻi ʻa Sīsuú: “ʻAi pē hoʻomou lea ‘ʻió’ ke ʻuhingá ko e ʻio, mo hoʻomou ‘ʻikaí’ ke ʻikai.” (Mātiu 5:37) Ko e kau taʻu hongofulu tupú ʻe ngalingali ʻe ʻikai ke nau fakakikihi mo koe ʻi heʻenau ʻiloʻi ʻokú ke tuʻumaʻú.

ʻI he taimi tatau, hoko ʻo fakakaukau lelei. Tuku hoʻo taʻu hongofulu tupú ke fakamatala, ko e fakatātaá, ko e ʻuhinga ʻokú ne ongoʻi ai ʻoku totonu ke fakaleleiʻi ʻa e fakataputapuí ʻi ha meʻa pau. ʻI he tuʻunga hangē ko ení, ʻoku ʻikai totonu ke ke foʻi ʻi he tengé, kae muimui ʻi he faleʻi ʻa e Tohi Tapú: “Tuku ke hoko hoʻomou fakakaukau leleí ʻo ʻiloʻi.”—Filipai 4:5.

Ko e moʻoni, ʻoku ʻikai ha mātuʻa ʻe haohaoa. ʻOku pehē ʻe he Tohi Tapú: “ʻOku tau tūkia kotoa pē ʻo tā-tuʻo-lahi.” (Sēmisi 3:2) Kapau ʻokú ke ʻiloʻi ko koe ʻokú ke fakatupunga ʻa e fakakikihí, ʻoua ʻe toumoua ke kole fakamolemole ki hoʻo taʻu hongofulu tupú. ʻI he fakahaaʻi hoʻo tōnounoú ʻokú ke fokotuʻu ai ha faʻifaʻitakiʻanga ʻo e anga-fakatōkilaló pea ʻe fakatoka ai ha hala ki hoʻo taʻu hongofulu tupú ke fai ʻa e ʻulungaanga tatau.

“Hili ha fakakikihi, ʻi he taimi naʻá ku mokomoko hifo aí, naʻá ku kole fakamolemole ai ki hoku fohá ʻi he lau ki ai ʻi heʻeku ʻitá. Naʻe tokoniʻi ai hoku fohá ke mokomoko hifo pea faingofua ai ke ne fanongo mai kiate au.”—Keni, Siapani.