Naʻe tuʻu ʻa e tukuʻanga paʻanga ʻa e temipalé ʻi he Lotoʻā ʻo e Kakai Fefiné. Naʻe pehē ʻe he tohi ko e The Temple—Its Ministry and Services: “Ko e ngaahi fakafaletolo takatakai aí naʻe fokotuʻu ai ha ngaahi puha ʻe 13 pe ‘talupite’ ki he holisí, ʻa ia ne tānaki ki ai ʻa e ngaahi meʻaʻofá.”

Naʻe ui ʻa e ngaahi puhá ko e talupite koeʻuhí he naʻe fāsiʻi ki ʻolunga pea fālahi ki lalo. Ko e ngaahi puha taki taha naʻe fakaʻilongaʻi ʻo fakatatau ki he faʻahinga kehekehe ʻo e foakí, pea ko e ngaahi meʻaʻofa naʻe tānakí naʻe ngāueʻaki ia ʻo fakatatau ki he meʻa naʻe fakataumuʻa ki aí. Naʻe ʻi he Lotoʻā ʻo e Kakai Fefiné ʻa Sīsū ʻo ne fakatokangaʻi ai ʻa e kakai tokolahi, ʻo kau ai mo e uitou masivá ʻoku nau lī ʻenau ngaahi meʻaʻofá.—Luke 21:1, 2.

Ko e puha ʻe ua ai naʻe tauhi ia ki he tukuhau ʻo e temipalé—ko e taha ki he taʻu lolotongá pea ko e taha ki he taʻu kuohilí. Ko e puha hono 3 ki he 7 naʻe tānaki ai ʻa e paʻanga ko ia naʻe vaheʻi ʻo fakatatau ki he mahuʻinga ʻo ha kulukulu, lupe, fefie, ʻinisēnisi mo e ngaahi ipu koula ʻa ia naʻe tuʻutuʻuni pau ki aí. Kapau naʻe ʻosi vaheʻi ʻe he tokotaha foakí ha paʻanga ʻoku lahi ange ia ʻi he mahuʻinga naʻe tuʻutuʻuni pau ke foakí, te ne lī leva ʻa e toengá ʻi ha taha ʻo e ngaahi puha kehé. Ko e puha hono 8 naʻe lī ki ai ʻa e paʻanga naʻe toe mei he ngaahi feilaulau angahalá. Ko e puha hono 9 ki he 12 naʻe lī ki ai ʻa e paʻanga naʻe toe mei he ngaahi feilaulau halaiá, feilaulau manupuna, feilaulau ʻa e kau Nāsilí pea mo e feilaulau ʻo e kau kiliá. Ko e puha hono 13 leva ki he ngaahi meʻaʻofa loto-fiefoakí.

Naʻe tohi ʻe Luke ʻa e kōsipeli naʻe uiʻaki hono hingoá pea mo e tohi ʻa e Ngaahi Ngāue ʻa e Kau ʻApositoló. Naʻe pehē ʻe Luke naʻá ne “fakatotoloʻi ʻa e ngaahi meʻa kotoa pē mei he kamataʻangá ʻo tonu,” ka naʻe fehuʻia ʻe he kau mataotao ʻe niʻihi ʻene ngaahi fakamatala ki he meʻa naʻe hokó. (Luke 1:3) Ko ia ai, naʻe anga-fēfē ʻa e tonu ʻene ngaahi fakamatalá?

Naʻe lave ʻa Luke ki he ngaahi moʻoni fakahisitōlia ʻa ia naʻe lava ke fakamoʻoniʻi. Ko e fakatātaá, naʻá ne ngāueʻaki ʻa e ngaahi hingoa fakalakanga ʻo e kau ngāue fakapuleʻanga Lomá, ʻo hangē ko e kau pule ʻo e vāhenga ʻi Filipaí; kau pule kolo ʻi Tesalonaiká; pea mo e kau taki ʻi ʻEfesoó. (Ngāue 16:20, 17:6, 19:31) Naʻe ui ʻe Luke ʻa Hēlota ʻAnitipasa ko e pule ʻo e vahefonuá, pea mo Sēsio Paulo ko e kōvana ʻo Saipaló.—Ngāue 13:1, 7.

ʻOku taau ke fakatokangaʻi hono ngāueʻaki totonu ʻe Luke ʻa e ngaahi hingoa fakalakangá koeʻuhí ʻi he taimi naʻe liliu ai ʻa e ngaahi tuʻunga mafai ʻo e vāhenga ʻo Lomá, naʻe liliu mo e ngaahi hingoa fakalakanga ki he ngaahi tuʻunga ko iá. Neongo ia, “ʻi he taimi ki he taimi ko e ngaahi fakaikiiki ʻi he tohi ʻa Ngāué ʻoku fakamoʻoniʻi ʻene tonu ʻi he feituʻu mo e taimi neongo hono fehuʻiá,” ko e lau ia ʻa e mataotao Tohi Tapu ko Bruce Metzger. Naʻe ui ʻe he mataotao ko William Ramsay ʻa Luke ko e “faihisitōlia ia ʻi he tuʻunga māʻolunga tahá.”