ʻI he ʻEmipaea Lomá, naʻe tokolahi ai ʻa e faʻahinga naʻa nau hoko ko e kau pōpula koeʻuhí ko e ikuna fakakautau pe puke fakamālohi. Ko e faʻahinga ko iá naʻe fakatau atu kinautolu pea ko e tokolahi taha naʻe ʻikai ʻaupito haʻanau toe sio ki honau ngaahi ʻapí pe fāmilí.

Naʻe tokolahi ʻa e kau pōpula naʻa nau ngāue pē ki he mate ʻi he ngaahi keliʻanga malalá, ka naʻe sai ange ʻa e faʻahinga naʻe ngāue ʻi he ngaahi fāmá mo e tauhi ʻapí. Naʻe fakamālohiʻi nai ha pōpula ke ne tui ha kahoa ukamea ʻoku tā tongitongi ai ha fakaʻilonga ko e talaʻofa ki ha pale ʻe maʻu kapau ʻe hola pea toe foki ki hono pulé. Ko e faʻahinga naʻa nau toutou feinga ke holá ʻe fakaʻilongaʻi honau laʻé ʻo faʻa ngāueʻaki ʻa e foʻi mataʻitohi ko e F ki he fugitivus (tokotaha hola).

Ko e tohi ʻa Filimone ʻi he Tohi Tapú naʻe lāulea ai ki hono fakafoki mai ʻe he ʻApositolo ko Paulá ʻa e pōpula hola ko ʻOnesema ki hono pulé ʻa Filimone. Neongo naʻe ʻi ai ʻa e totonu fakalao ʻa Filimone ke tauteaʻi mamafa ʻa ʻOnesema, ka naʻe kole ʻe Paula kia Filimone ke “talitali lelei ia,” ʻo makatuʻunga ʻi he ʻofa pea mo e kaumeʻa ofi.—Filimone 10, 11, 15-18.

Ko Finisia, ʻa ia ʻoku fakafuofua ko Lepanoni ia ʻi he ʻaho ní, naʻe ʻiloa ʻi hono fakalanu vaioleti Taiá, ʻa ia ko e fakahingoa ki he kolo ko Taiá. Ko Tuʻi Solomone ʻo ʻIsileli ʻo e kuonga muʻá naʻe teuteu ʻaki hono temipalé ʻa e ‘filo vaioleti’ ʻa ia naʻe ngaohi ʻe ha tokotaha ngāue fakasanisani mei Taia.—2 Kalonikali 2:13, 14.

Ko e fakalanu vaioleti Taiá naʻe mahuʻinga taha ʻi hono taimí, koeʻuhi ko e konga lahi ʻo e ngāue ki he fakalanú naʻe fiemaʻu ki ai ha kau ngāue ke ngaohi ia. ʻUluakí, naʻe tānaki ʻe he kau toutaí ʻa e fingota * lahi ʻaupito mei tahi. Ko e foʻi fingota ʻe 12,000 naʻe ngāueʻaki ki hono ngaohi mei ai ha fakalanu feʻunga ki ha tupenu ʻe taha. Hokó naʻe toʻo ʻa e ʻelili tahí mei hono ngeʻesí kae lava ke tānaki mei ai hono huhuʻa fakalanú. Naʻe fakatahaʻi ia ʻe he kau ngaohi fakalanú mo e māsima pea tauaki ia ʻi he laʻaá ʻi he ʻaho ʻe tolu. Pea faʻo leva ʻi ha fuʻu kulo lahi tāpuni ʻo haka māmālie ʻaki ʻa e tahí ʻi ha ngaahi ʻaho lahi.

Naʻe tauhi maʻu ʻe he kau Finisiá fakatouʻosi ʻa e fakamāketiʻi ʻo e fakalanu vaioleti Taiá mo ʻenau malava ke ngaohi iá ʻi he ngaahi taʻu ʻe lauingeau ʻi he fefakatauʻakí mo e pisinisí. Ko ʻenau meʻangāue ngaohi fakalanú naʻe maʻu ia ʻi he Tahi Metiteleniané ʻo aʻu atu ki he fakahihifo ʻo Cádiz ʻi Sipeini.