ʻOku feʻungamālie pē hotau palanité ke maʻu moʻui ai. ʻOku lahi ai ʻa e vaí, ʻa ia ʻoku mātuʻaki mahuʻinga ki he moʻuí. Ko e tuʻu fakaheihei mo e vilo takai ʻa e foʻi māmaní ʻi hono halangá ʻoku tonu matematē ia ʻo ne maluʻi ai ʻa e ʻōsení mei haʻane momoko ʻīʻī pe fuʻu vela tōtuʻa. Pea ʻoku maluʻi ʻe he ʻatimosifia ʻo e māmaní mo e ivi fakamakinitó ʻa e ngaahi huelo fakatupu maté. Ko e fefakatuʻungaʻaki ʻi he moʻui ʻa e ʻakaú mo e monumanú ʻi he māmaní ʻoku fakaofo ia. Ko ia ai, ʻoku fakaʻosiʻaki ʻe he kakai tokolahi naʻe ʻi ai ʻa e taumuʻa naʻe fakatupu ai hotau palanité.—Lau ʻa e ʻAisea 45:18.

Ka te ke fifili nai, ‘Ko e faingataʻá mo e fakamaau taʻetotonú ko e konga ia ʻo e taumuʻa ko iá?’—Lau ʻa e Teutalōnome 32:4, 5.

Naʻe faʻu ʻa e māmaní ke hoko ia ko e ʻapi fakafiefia ki he kakai ʻoku nau fefakaʻapaʻapaʻaki mo ʻofa ki honau Tokotaha-Fakatupú. Ko ia ai, ko e moʻui ʻa e faʻahinga ʻo e tangatá ʻoku māʻolunga ange hono taumuʻá ʻi he moʻui ʻa e ʻakaú mo e fanga manú. ʻOku lava ke tau mahinoʻi ko hai hotau Tokotaha-Fakatupú pea houngaʻia mo faʻifaʻitaki ki heʻene ʻofá mo e fakamaau totonú.—Lau ʻa e Koheleti 12:13; Maika 6:8.

ʻOku lava ke fakahoko ʻe hotau Tokotaha-Ngaohí ʻa e ngaahi ngāue kotoa pē kuó ne taumuʻa ki aí. Ko ia, ʻoku lava ke tau tuipau ʻe vavé ni ke ne toʻo ʻosi ʻa e faingataʻá mo e fakamaau taʻetotonú pea ngaohi hotau palanité ko ha ʻapi fiefia haohaoa maʻá e faʻahinga ʻo e tangatá.—Lau ʻa e Saame 37:11, 29; ʻAisea 55:11.