ʻI he ʻuluaki ngaahi taʻu ʻo ʻeku tupu haké, naʻe nofo homau fāmilí ʻo ofi ki Leipzig, ʻi Siamane Hahake, ʻo ʻikai ke mamaʻo mei he kauʻāfonua ʻo e kau Sekí mo e kau Pōlaní. ʻI he taimi naʻá ku taʻu ono aí, naʻe hiki homau fāmilí ki tuʻapuleʻanga ke ofi ki he ngāueʻanga ʻeku tangataʻeikí—ʻuluakí ki Pelēsila pea mei ai ki ʻEkuatoa.

ʻI heʻeku taʻu 14, naʻe fakahū au ki ha ʻapiako nofo maʻu ʻi Siamane. Koeʻuhí naʻe nofo ʻi ʻAmelika Tonga ʻeku ongo mātuʻá pea fuʻu mamaʻo, naʻe pau ai ke u tokangaʻi pē au. Naʻá ku hoko ʻo fuʻu falala pē kiate au. Naʻe ʻikai ke u tokanga ki he anga hono uesia ʻo e niʻihi kehé ʻe heʻeku ngaahi tōʻongá.

ʻI he taimi naʻá ku taʻu 17 aí, naʻe foki mai ʻeku ongo mātuʻá ki Siamane. ʻI he ʻuluaki taimí, naʻá ku nofo pē mo kinaua ʻi hona ʻapí. Ka ʻi heʻeku fakakaukau faʻifaʻitelihá naʻe ʻikai malava ai ke u fāitaha mo hoku fāmilí. ʻI hoku taʻu 18 naʻá ku mavahe ai mei ʻapi.

Naʻe hoko ke toe lahi ange ʻeku taʻemanongá, ʻou fekumi ai ki ha taumuʻa ʻi he moʻuí. Hili ʻeku vakai ki he ngaahi founga moʻui mo e ngaahi kautaha kehekehe, naʻá ku hoko ai ʻo tuipau ko e meʻa lelei taha ʻe lava ke u fai ʻaki ʻeku moʻuí ko e folau takai ʻi he palanite fakaʻofoʻofa ko ení ki muʻa ke maumauʻi ia ʻe he faʻahinga ʻo e tangatá.

Naʻá ku mavahe ai mei Siamane, ʻo fakatau ha motopaiki, pea ʻalu leva ki ʻAfilika. Neongo ia, naʻe taimi nounou mei ai, naʻe pau ke u toe foki ki ʻIulope ke ngaahi ʻeku motopaikí. Naʻe ʻikai ke fuʻu fuoloa mei ai, kuó u ʻi he matātahi ʻo Potukalí. Naʻá ku fakakaukau ke tuku ā ʻa e motopaikí kae kumi ha vaka ke hoko atu ai ʻeku folau takaí.

Naʻá ku kau ki ha kulupu toʻutupu naʻa nau teuteu ke folau ʻi he ʻŌseni ʻAtalanitikí. Naʻá ku fetaulaki ai mo Laurie ʻa ia naʻe hoko ki mui ko hoku uaifí. ʻUluakí, naʻá ma folau ki he ʻotu motu ʻo e Kalipiané. Pea hili ha nofo taimi nounou ʻi Pueto Liko, naʻá ma foki ki ʻIulope. Naʻá ma ʻamanaki ke maʻu ha ʻiote ʻe lava ke ma nofo ai. Ka ʻi he hili ha fekumi nounou ki ai ʻi ha māhina pē ʻe tolu, naʻe ngata fakafokifā ʻa e feingangāue ko iá. Naʻe fekauʻi mai ke u kau ʻi he vaʻa fakakautau ʻa Siamané.

Naʻá ku ngāue ʻi he māhina ʻe 15 ʻi he tau tahi ʻa Siamané. Lolotonga ʻa e taimi ko iá, naʻá ku mali ai mo Laurie pea teuteu ke hokohoko atu ai pē ʻema folau takaí. Taimi nounou ki muʻa ʻi heʻeku ngāue fakakautaú, naʻá ma fakatau ha sinoʻi vaka fakahaofi moʻui. ʻI he lolotonga ʻeku ngāue ʻi he vaʻa fakakautaú, naʻe hokohoko atu  ʻema ngaohi ʻa e sinoʻi vaká ke ʻai ko ha ʻiote. Naʻá ma palani ke nofo ai pea hokohoko atu ai pē ʻema folau takai ʻi he palanite fakaʻofoʻofa ko ení. ʻI he tuʻunga ko iá—hili ʻeku ngāue fakakautaú pea ki muʻa ke fakaʻosi ʻa e vaká—naʻá ma fetaulaki ai mo e Kau Fakamoʻoni ʻa Sihová pea kamata ke ma ako ʻa e Tohi Tapú.

ʻI he ʻuluaki taimí, naʻe ʻikai te u ʻiloʻi ʻa e fiemaʻu ha liliu lahi ki heʻeku moʻuí. Naʻá ku mali mo e fefine naʻá ku nofo mo iá, pea naʻe ʻosi tuku mo ʻeku ifi tapaká. (ʻEfesō 5:5) Koeʻuhi ko ʻema palaní ke folau takai ʻi he māmaní, naʻá ku fakakaukau ko e līʻoa ʻema moʻuí ke vakai ki he ngaahi fakatupu fakaofo ʻa e ʻOtuá naʻe pau pē ko ha ngaahi feinga ʻaonga ia.

Kae kehe, ko hono moʻoní naʻe fiemaʻu ke u fai ha ngaahi liliu— tautefito ki hoku angaʻitangatá. ʻI he hoko ko ia ko ha tokotaha fuʻu pōlepole mo falala pē kia kitá, naʻá ku mātuʻaki nōfoʻi pē ʻi heʻeku ngaahi malavá mo ʻeku ngaahi lavameʻá. Naʻá ku moʻui siokita.

ʻI he ʻaho ʻe taha, naʻá ku lau ai ʻa e Malanga ʻiloa ʻa Sīsū ʻi he Moʻungá. (Mātiu vahe 5-7) ʻI he ʻuluaki taimí, naʻá ku fifili ki he fiefia naʻe lea ʻa Sīsū ʻo fekauʻaki mo iá. Ko e fakatātaá, naʻá ne pehē ʻoku maʻu ʻa e fiefiá ʻe kinautolu ʻoku fiekaia mo fieinuá. (Mātiu 5:6) Naʻá ku ʻohovale pe ʻe lava fēfē ke hoko ha ngaahi fiemaʻu ʻa ha tokotaha ʻo ʻai ia ke fiefia. ʻI he hokohoko atu ʻeku akó, naʻá ku ʻiloʻi ai ʻoku ʻi ai ʻa e fiemaʻu fakalaumālie kiate kitautolu kotoa, ka kuo pau ke tau lāuʻilo anga-fakatōkilalo ki he fiemaʻu ko iá ki muʻa ke tau lava ʻo maʻu ia. Hangē ko ia naʻe leaʻaki ʻe Sīsuú: “Fiefia ē ka ko kinautolu ʻoku nau lāuʻilo ʻoku ʻi ai ʻenau fiemaʻu fakalaumālié.”—Mātiu 5:3.

ʻI he hili ʻa e kamata ʻema ako Tohi Tapu ʻi Siamané, naʻá ku hiki ai mo Laurie ki Falanisē, pea ki mui aí ki ʻĪtali. Ko ha feituʻu pē naʻá ma ʻo ki ai naʻá ma fetaulaki ai mo e Kau Fakamoʻoni ʻa Sihová. Naʻe maongo loloto kiate au ʻa ʻenau feʻofaʻaki moʻoní mo ʻenau fāʻūtahá. Naʻá ku ʻiloʻi ai ko e Kau Fakamoʻoní ʻoku nau fetokouaʻaki moʻoni ʻi māmani lahi. (Sione 13:34, 35) ʻI he faai mai ʻa e taimí, naʻá ku papitaiso ai mo Laurie pea hoko ko e ongo Fakamoʻoni ʻa Sihova.

ʻI he hili ʻa e papitaisó, naʻá ku hokohoko atu ke fai ha ngaahi liliu ʻi hoku angaʻitangatá. Naʻá ku fili ai mo Laurie ke folau ki he matāfanga ʻo ʻAfiliká pea kolosi leva ʻi he ʻŌseni ʻAtalanitikí ki ʻAmelika. Ko kimaua toko ua pē ʻi ha kiʻi vaka ʻi he fuʻu ʻōseni lau maile ʻo e vaha noá—naʻá ku ʻiloʻi ai ʻa e ʻikai haʻaku mahuʻinga ʻi hono fakahoa atu ki hotau Tokotaha-Fakatupu maʻongoʻongá. ʻI he ʻikai ha ngāue ke fai ʻi ʻōsení naʻe lahi ange ai hoku taimi ke u lau ʻa e Tohi Tapú. Naʻe maongo kiate au tautefito ʻa e fakamatala ʻo fekauʻaki mo e moʻui ʻa Sīsū ʻi he māmaní. Ko e tangata naʻe haohaoa fakataha mo ha ngaahi malava naʻe mahulu atu ia ʻi ha toe meʻa ʻoku lava ke u fakakaukau atu ki ai, kae kehe naʻe ʻikai ʻaupito ke ne pōlepole. Naʻe ʻikai ke ne moʻui pē maʻana ka ki heʻene Tamai fakahēvaní.

ʻI heʻeku fakalaulauloto ki he faʻifaʻitakiʻanga ʻa Sīsuú, naʻá ku ʻiloʻi ai ʻa e fiemaʻu ke u fakamuʻomuʻa ʻa e Puleʻanga ʻo e ʻOtuá ʻi he ʻeku moʻuí, kae ʻikai ko hono fai ʻa e ngaahi meʻa kehekehe naʻá ku loto ke faí. (Mātiu 6:33) ʻI he taimi naʻá ma aʻu ai mo Laurie ki ʻAmeliká, naʻá ma fakakaukau ke ma nofo ai mo tokangataha ki he lotú.

Ko ʻeku founga moʻui siokita ki muʻá, naʻá ku hoko ai ʻo veiveiua maʻu pē ʻi he ngaahi fili naʻá ku faí. Kae kehe, ʻi he taimi ko ení ʻoku ou maʻu ai ʻa e matavai ʻo e poto haohaoá ke ne tataki au. (ʻAisea 48:17, 18) Naʻá ku toe maʻu ai ʻa e taumuʻa ki he moʻuí ʻa ia naʻe teʻeki ai ʻaupito ke u maʻu ki muʻá—ʻa e lotu ki he ʻOtuá mo tokoniʻi ʻa e niʻihi kehé ke ako kiate ia.

ʻI hono ngāueʻaki ʻa e ngaahi tefitoʻi moʻoni he Tohi Tapú, naʻe hoko ʻo fakaivimālohiʻi lahi ai ʻema nofo mali mo Laurie. Naʻe toe tāpuakiʻi kimaua ʻaki ha ʻofefine fakaʻofoʻofa, ʻa ia naʻá ne tupu hake ʻo ʻilo mo ʻofa kia Sihova.

Naʻe ʻikai ke toka mālie maʻu pē ʻa e ngaahi meʻá ʻi heʻema moʻuí. Ka ʻi he tokoni ʻa Sihová, naʻá ma fakapapauʻi ai ke ʻoua te ma foʻi pe tuku ʻema falala kiate iá.—Palōveepi 3:5, 6.