Ngalingali ʻokú ke mahinoʻi mei he ngaahi kupu ki muʻá ʻa e mātuʻaki mahuʻinga ki he Kau Fakamoʻoni ʻa Sihová ʻa e Puleʻanga ʻo e ʻOtuá. Pea mahalo naʻe fakamānako kiate koe ʻa e niʻihi ʻo e ngaahi tāpuaki ʻi he kahaʻú naʻe lāulea ki aí ʻo fekauʻaki mo e Puleʻanga ʻo e ʻOtuá. ʻI he taimi tatau, te ke fifili nai ko e ngaahi talaʻofa peheé ʻoku hā ngali taʻemalava ke hoko moʻoni ia.

ʻOku fakapotopoto ke ke tokanga ʻo ʻoua ʻe tui ki he ngaahi meʻa kotoa kuó ke fanongo ki aí. (Palōveepi 14:15) ʻI he ngaahi founga ʻe niʻihi, ko hoʻo tokangá ʻe lava ke hangē ia ko e kau Pēlea * ʻi he kuonga muʻá. ʻI he taimi naʻe fuofua fanongo ai ʻa e kau Pēleá ki he ongoongo lelei ʻo e Puleʻangá, naʻa nau tali ʻa e meʻa naʻa nau fanongo ki aí, ʻo ʻikai ko ʻenau loto pē ke hoko moʻoni ia. Kae kehe, naʻa nau sivisiviʻi fakalelei ʻa e Folofolá “pe naʻe moʻoni koā ʻa e ngaahi meʻa ko iá.” (Ngāue 17:11) ʻI hono fakalea ʻe tahá, naʻe fakahoa ʻe he kau Pēleá ʻa e ongoongo lelei naʻa nau fanongo ki aí mo e meʻa naʻe leaʻaki ʻe he Folofolá. ʻI he faai mai ʻa e taimí, naʻa nau fakapapauʻi ko e ongoongo leleí ko e moʻoni naʻe makatuʻunga fefeka ia ʻi he Folofola ʻa e ʻOtuá.

ʻOku fakaafeʻi loto-māfana atu koe ʻe he Kau Fakamoʻoni ʻa Sihová ke ke fai ʻa e meʻa tatau. ʻI heʻemau polokalama ako Tohi Tapu taʻetotongí, ʻoku mau ʻoatu ai ha faingamālie ke ke fakahoa ai ʻa e meʻa ʻoku tui ki ai ʻa e Kau Fakamoʻoni ʻa Sihová ʻo fekauʻaki mo e Puleʻanga ʻo e ʻOtuá mo e meʻa ʻoku akoʻi ʻe he Tohi Tapú.

 Tānaki atu ki hoʻo ako fekauʻaki mo e Puleʻanga ʻo e ʻOtuá, ko hoʻo ako ʻa e Tohi Tapú ʻoku lava ke ne tokoniʻi ai koe ke ke maʻu ʻa e ngaahi tali ki he niʻihi ʻo e ngaahi fehuʻi mahuʻinga taha ʻi he moʻuí.

• Ko ʻetau haʻú mei fē?

• Ko e hā ʻa e taumuʻa ʻo e moʻuí?

• Ko e hā ʻoku fakaʻatā ai ʻe he ʻOtuá ʻa e faingataʻá?

• Ko e hā ʻoku hoko ʻi he taimi ʻoku tau mate aí?

• ʻE fakaʻauha ʻa e māmaní?

• Ko e hā ʻa e kī ki he moʻui fakafāmili fiefiá?

Hiliō ʻi he meʻa kotoa, ko hono ako ʻa e Tohi Tapú ʻe tokoniʻi ai koe ke ke “ʻunuʻunu ofi ki he ʻOtuá.” (Sēmisi 4:8) Ko e olá, ko hoʻo ʻunuʻunu ofi ange ki he ʻOtuá, ko e lahi ange ia hoʻo sio ki he ngaahi ʻaonga ʻokú ke maʻu mei he Puleʻanga ʻo e ʻOtuá—ʻo ʻikai ʻi he taimí ni pē ka ʻe hoko ʻo taʻengata. Naʻe pehē ʻe Sīsū tonu ʻi heʻene lotu ki heʻene Tamaí: “Ko ʻeni ia ʻe maʻu ai ʻa e moʻui taʻengatá, ko ʻenau hoko ʻo ʻiloʻi koe, ko e ʻOtua moʻoni pē taha, pea mo e tokotaha ko ia naʻá ke fekau maí, ʻa Sīsū Kalaisi.”—Sione 17:3.