KO E lea ko ení ʻoku ʻiloʻi lelei ia ʻe he kakai ʻo ʻAfilika Hahaké, pea ʻoku ʻikai ha veiveiua ʻoku fakahaaʻi ai ʻa e anga ʻo e fakakaukau ʻa e kakai tokolahi ʻi he ngaahi fonua takatakai ʻi he māmaní. Ko e anga ia hoʻo ongoʻí fekauʻaki mo haʻo nō ha paʻanga mei ha kaumeʻa pe mei ha toe feituʻu? Neongo ʻoku hā ngali lelei nai ia ʻi he taimi ʻe niʻihi, ka ko ha fakakaukau lelei ia? Ko e hā ʻa e ngaahi fakatuʻutāmaki mo e ngaahi tauhele ʻo e noó?

ʻOku toe ʻi ai ha lea faka-Suahili ʻe taha ʻe lava ke ne fakahaaʻi mai ʻa e palopalema ʻe hoko ʻi he noó. ʻOku pehē ai: “Ko e noó mo e tali noó ʻokú ne maumauʻi ha kaumeʻa.” Ko e moʻoni, ʻoku lava ʻe he noó ke ne ʻai ha kaumeʻa pea mo ha vahaʻangatae ke ʻi ha tuʻunga fakatuʻutāmaki. Naʻa mo e ngaahi palani lelei tahá pea mo e ngaahi taumuʻa totonu tahá, ʻoku ʻikai ke faʻa hoko ʻa e ngaahi meʻa naʻe ʻamanaki ki aí. Ko e fakatātaá, kapau ʻoku ʻikai totongi taimi totonu ʻa e noó, ʻe hoko nai ʻo ʻita ʻa e tokotaha tali noó. ʻOku lava ke hoko ai ha loto-mamahi ʻi he vahaʻa ʻo e tokotaha tali-noó mo e tokotaha noó—naʻa mo hona fāmilí—ʻe hoko nai ai ha palopalema. Koeʻuhi ʻoku malava ke hoko ʻa e noó ko e tupuʻanga ia ʻo e feʻiteʻitaní, te tau vakai atu nai ki ai ko e meʻa fakamuimuí ia kae ʻikai ko e fakaleleiʻanga vave ia ki ha palopalema fakapaʻanga.

ʻOku lava foki ke hoko ʻa e nō paʻangá ke uesia ai ʻa e vahaʻangatae ʻo ha taha mo e ʻOtuá. Anga-fēfē? ʻUluakí, ʻoku pehē ʻe he Tohi Tapú ko e tokotaha faikoví ʻokú ne ʻosi fakataumuʻa mo loto-lelei ke ʻoua te ne totongi fakafoki ʻene noó. (Saame 37:21) ʻOku toe fakahaaʻi mahino mai “ko ia kuo ne fai ha no, ʻoku ne tamaioʻeiki ki he tangata kuo tali ʻa e no.” (Palōveepi 22:7) ʻOku totonu ke ʻiloʻi ʻe he tokotaha noó ʻoku ʻi ai hono fatongia ki he tokotaha tali-noó kae ʻoua kuo totongi ʻosi ʻa e paʻangá. ʻOku moʻoni ʻa e toe lea ʻe taha ʻa e kau ʻAfiliká: “Kapau te ke kole mai ha vaʻe ʻo ha tangata, te ke ʻalu pē ki he feituʻu te ne tataki koe ki aí.” Ko e fakakaukaú ko e tokotaha ko ia ʻoku fuʻu lahi ʻene noó ʻoku ʻikai kei tauʻatāina ia ke fai ʻa e meʻa ʻokú ne loto ki aí.

Ko ia ai, ko hono totongi fakafoki ʻo e noó, kuo pau ke hoko ko e meʻa muʻomuʻa tahá ia. Ka ʻikai, ʻe hoko nai ai ha palopalema. Ko e lahi fau ʻa e noó ʻoku lava ke iku ki he loto-mamahi lahi, pehē ki ha ngaahi pō taʻemamohe, ngāue tōtuʻa, feʻiteʻitani ʻi he vā ʻo e husepānití mo e uaifí, pea aʻu ke movete ʻa e fāmilí, ʻo ʻikai lau ki ai ʻa e malava ke hoko ha ngaahi fakatonutonu fakalao pe nofo pilīsone. ʻOku maʻu ʻa e ngaahi lea fakapotopoto ʻi he Loma 13:8: “ʻOua te mou moʻuaʻaki ha meʻa ki ha taha, tuku kehe pē ke mou feʻofaʻaki.”

ʻI he vakai kotoa ki hení, ko e lelei tahá ke tokanga ʻi he taimi ke nō ai ha paʻanga. ʻOku fakapotopoto ke ʻeke hifo angé: ʻOku fiemaʻu moʻoni ke fai ha nō? Ko ha tuʻunga nai eni ke tokangaʻi ai ʻa e fiemaʻu tefito ho fāmilí? Pe ʻoku kaunga ki ai ʻa e mānumanú mo holi nai ke moʻui ʻo laka ʻi he meʻa ʻoku maʻú? ʻI he ngaahi tuʻunga lahi, ʻoku lelei ange ke fiemālie pē ʻi ha meʻa ʻoku siʻi kae ʻikai ko hono fakamoʻuaʻi kita ʻi he noó.

Ko e moʻoni, ʻe kehe nai ʻa e tuʻungá ʻo hangē ko e taimi ʻoku hoko ai ha meʻa taʻeʻamanekina pea ʻikai ha toe fili. Neongo ia, kapau ʻoku fakapapauʻi ʻe ha taha ke nō, ʻoku totonu ke ne fakahaaʻi atu ko ha tokotaha faitotonu ia. ʻE lava fēfē ke fai eni?

ʻUluakí, ʻoua ʻaupito te ke ngāuehalaʻaki ha taha koeʻuhí pē nai ko ʻene hā ngali tuʻumālie ange ʻi he niʻihi kehé. ʻOku ʻikai totonu ke tau ongoʻi ko e taimi ʻoku hā ngali tuʻumālie ai ha taha, ko hono fatongia ia ke ne tokoniʻi fakapaʻanga kitautolu. Pea ʻoku ʻikai totonu ke tau ongoʻi ʻoku tau ʻatā mei hotau fatongia ke fakahāhā ʻa e ʻulungaanga faitotonú ki ha tokotaha pehē. ʻOua ʻaupito ʻe meheka ʻi he faʻahinga ko ia ʻoku nau maʻu ha maluʻanga fakapaʻangá.—Palōveepi 28:22.

Fakapapauʻi leva ke totongi fakafoki ʻa e paʻanga naʻá ke noó, pea fai ia ʻi he vave tahá. Kapau ʻoku ʻikai fakahā atu ʻe he tokotaha tali-noó ha taimi-tēpile pau ke totongi ai, ʻoku totonu ke ke fokotuʻu ha taimi pau ke totongi fakafoki ai ʻa e noó. ʻOku fokotuʻu atu ke ke ʻai ha tohi aleapau koeʻuhí ke fakaʻehiʻehi ai mei ha ngaahi taʻefemahinoʻaki ʻi he ongo tafaʻakí. (Selemaia 32:9, 10) Kapau ʻoku malava, totongi fakafoki ki he tokotaha tali-noó fakaekimoua pē koeʻuhí ke ke lava ai ʻo fai ha fakamālō kiate ia. Ko e tokanga ke totongi fakafoki hoʻo noó ʻoku langa hake ai ha ngaahi vahaʻangatae lelei. Naʻe pehē ʻe Sīsū ʻi heʻene Malanga he Moʻungá: “ʻAi pē hoʻomou lea ‘ʻió’ ke ʻuhingá ko e ʻio, mo hoʻomou ‘ʻikaí’ ke ʻikai.” (Mātiu 5:37) Tānaki atu ki ai, manatuʻi maʻu pē ʻa e Lao Koulá: “Ko ia ai, ko e ngaahi meʻa kotoa pē ʻoku mou loto ke fai atu ʻe he kakaí kiate kimoutolú, kuo pau foki ke mou fai ia kiate kinautolu.”—Mātiu 7:12.

ʻOku ʻomai ʻi he Tohi Tapú ha solovaʻanga faingofua ʻi he holi ko ia ke nō paʻangá. ʻOku pehē ai: “Ko e moʻoni, ʻoku maʻu ʻa e meʻa lahi ʻi he anga-līʻoa fakaʻotuá, kapau ʻoku tau fiemālie pē ʻi he meʻa ʻoku tau maʻú.” (1 Tīmote 6:6) ʻI he fakalea ʻe tahá, ko e hoko ʻo fiemālie ʻi he meʻa ʻoku maʻú ko e founga lelei taha ia ke hao ai mei he ngaahi nunuʻa kovi ʻo e noó. Kae kehe, ko hono moʻoní ʻoku ʻikai faingofua ke hoko ʻo fiemālie ʻi he māmani holi ke fakatōliʻa vave ʻo e ʻaho ní. Ko e taimi eni ke fakahāhā ai ʻa e “anga-līʻoa fakaʻotuá.” ʻI he founga fē?

Ko e fakatātaá, ko ha ongo meʻa Kalisitiane ʻi ʻĒsia. ʻI heʻena taʻu siʻi angé, naʻá na saiʻia ʻi he faʻahinga naʻa nau malava ke fakatau ha ʻapi. Ko ia, naʻá na fakakaukau ke na fakatau hona ʻapi ʻaki ʻena paʻanga naʻe tātānakí fakataha mo ʻena nō mei he pangikeé mo e kaingá. Kae kehe, ko e taimi siʻi mei ai naʻe kamata ke na ongoʻi mafasia ʻaupito ʻi he māʻolunga ʻo e totongi fakamāhiná. Naʻe toe lahi ange ʻena ngāué, lōloa ange mo e taimi ngāué ʻo siʻisiʻi ai ʻa e taimi ki heʻena fānaú. Naʻe pehē ʻe he husepānití: “Ko e loto-mafasiá, mamahí mo e ʻikai ha mohe feʻungá naʻe hangē ia ha fuʻu maka ʻoku hilifaki ʻi hoku ulú. Naʻe hoko ia ʻo fakatupu lōmekina.”

ʻI he taimi ko iá, naʻá na manatuʻi ʻa e ngaahi lea ʻi he 1 Tīmote 6:6 pea naʻá na fakakaukau ko e fakaleleiʻanga pē ki aí ko hono fakatau atu ʻa e ʻapí. Naʻe feʻunga mo e taʻu ʻe ua ki muʻa peá na toki maʻu ʻa e fiemālie mei heʻena kavenga ko iá. Ko e hā naʻe ako ʻe he ongo meʻa ko ení mei heʻena hokosiá? Naʻá na fakaʻosiʻaki: “Ko e vakai ki he ngaahi meʻa fakamatelié mei he tafaʻaki fakalaumālié ko ha maluʻanga ia.”

Ko e palōveepi faka-Suahili naʻe lave ki ai ʻi he kamatá kuo ʻiloʻi lelei ia ʻe he tokolahi. Kae kehe, kuo ʻikai taʻofi ai ʻa e kakaí mei he noó. ʻI he fakamaama ʻa e ngaahi tefitoʻi moʻoni Fakatohitapu naʻe lāulea ki ai ʻi ʻolungá, ʻikai ko ha ʻalunga fakapotopoto ia ke fakakaukau fakamātoato fekauʻaki mo e fehuʻi ko ení, ʻOku totonu ke u nō paʻanga?