Naʻe fāʻeleʻi au ʻi ha kiʻi kolo ʻi Pōlani, ʻo ʻikai mamaʻo mei he kau ʻā fonua ʻo Siamané. Naʻe ʻātakaiʻi ia ʻe he ngaahi faama mo e vaotā, naʻá ku maʻu ha moʻui nonga. Naʻe fakaʻaiʻai au heʻeku ongo mātuʻá ke u hoko ko ha tokotaha lelei, poto ʻi he akó mo feinga ke maʻu ha ngāue māʻolunga.

Naʻe kamata ʻeku faingataʻaʻiá ʻi he taimi naʻá ku ako ai ki he laó ʻi he ʻunivēsiti he kolo ko Wrocław. ʻI he mamaʻo mei heʻeku ongo mātuʻá, naʻá ku feohi kovi. Naʻá ku saiʻia maʻu pē ʻi he soká, ka ʻi he tākiekina hoku ngaahi kaungāmeʻa foʻoú, naʻe kamata ke tōtuʻa ʻeku manako ʻi he soká. Ko e timi mei Warsaw naʻá ku saiʻia taha aí, pea ʻi he fakaʻosinga uiké naʻá ku muimui pē ʻia kinautolu ʻo tatau ai pē pe ko fē feituʻu naʻa nau vaʻinga aí. Ko e ngaahi fononga ko ení naʻe faʻa fai ai e inu tōtuʻa, ngāuekoviʻaki e faitoʻo kona tapú, mo e kē ʻa e kau poupou he ongo timí. Naʻá ku vakai heni, ko ha founga ia ke fakanonga ai ʻa e mafasia ʻo e moʻui fakaʻahó, neongo naʻá ku ʻiloʻi ka puke au ʻe he kau polisí ʻe uesia ai ʻeku ako laó.

Naʻá ku saiʻia mo hoku ngaahi kaungāmeʻá ʻi he ʻalu ki he ngaahi kalapú mo e hulohulá. ʻI aí, naʻa mau faʻa kau ʻi he ngaahi kē ʻi he halá. Naʻe faʻa puke au ʻe he kau polisí, ka naʻá ku faʻa hao​—taimi ʻe niʻihi ʻoku fakafou ʻi ha ngaahi totongi fufū. Naʻá ku fakakaukau naʻá ku maʻu ʻa e moʻui moʻoní. Neongo ia, naʻá ku ʻiloʻi ʻiate au tonu naʻe hala ʻa e meʻa naʻá ku faí. Naʻá ku ʻalu ki he lotú ʻi he Sāpate kotoa pē ko e feinga ke maʻu ha konisēnisi lelei.

ʻI he 2004, naʻe tukituki mai ha ongo Fakamoʻoni ʻa Sihova ʻi he matapaá, pea naʻá ku loto-lelei ke talanoa mo kinaua ki he Tohi Tapú. ʻI heʻeku ako lahi ange ki he ʻuhinga ʻo e hoko ko e Kalisitiane moʻoní, naʻe kamata ke fakahohaʻasi au hoku konisēnisí. Naʻá ku ʻiloʻi naʻe totonu ke taʻofi ʻeku inu tōtuʻá, ngāueʻaki e faitoʻo konga tapú mo e feohi mo e kakai ʻoku ʻikai ke nau moʻuiʻaki e ngaahi tuʻunga Fakatohitapú. Naʻá ku toe ʻiloʻi ʻa e fiemaʻu ke liliu ʻeku anga-fakaaoaó mo e anga-fakamālohí. Neongo ʻeku lāuʻilo ki he fiemaʻu ke u fai ha liliú, naʻe ʻikai pē ke u fai e ngaahi liliu ko iá.

Naʻe hoko ha meʻa naʻá ne liliu ʻeku moʻuí, ʻi ha pō ʻe taha naʻe ʻohofi au ʻe ha kau tangata ʻe toko valu. ʻOku ou kei manatuʻi ʻeku tokoto ʻi he halá, ʻi hono tā mo ʻaka hoku ʻulú. ʻI heʻeku ongoʻi kuó u mei maté, naʻá ku lotu: “Fakamolemoleʻi au Sihova, ʻi he ʻikai ke u fai fakamātoato ki hoʻo Folofolá. Kapau te u toe moʻui, ʻoku ou palōmesi atu te u ako ʻa e Tohi Tapú mo e Kau Fakamoʻoní pea fakatonu tonu ʻeku moʻuí.” Ko e meʻa fakaʻohovalé, ko ʻeku toe aké. Naʻá ku tauhi maʻu ʻeku palōmesi ke ako ʻa e Tohi Tapú.

ʻI he 2006, naʻá ku hiki ki ʻIngilani. Naʻá ku taumuʻa ke tānaki ha paʻanga feʻunga ke foki ki Pōlani ke toe maʻu ha tuʻunga māʻolunga ange ʻi he ako laó. ʻI he hokohoko atu ʻeku ako e Tohi Tapú, naʻe ʻi ai ha konga Tohi Tapu naʻe maongo lahi kiate au. Naʻe tohi ʻe he ʻapositolo ko Paulá: “ʻOku ou lau moʻoni foki ai ʻa e ngaahi meʻa kotoa pē ko e meʻa ke mole koeʻuhi ko e mahuʻinga taʻehanotatau ʻo e ʻilo kia Kalaisi Sīsū ko hoku ʻEikí. Ko e meʻa kiate iá, kuó u tali fiemālie ai ʻa e mole ʻa e ngaahi meʻa kotoa pē pea ʻoku ou lau ia ko e fuʻu koto kinohaʻa, koeʻuhí ke u maʻu ʻa Kalaisi.” (Filipai 3:8) ʻI he hangē ko aú, ko e ʻapositolo ko Paulá naʻá ne ako ki he laó​—pea ko ia foki naʻá ne hoko ko ha tangata anga-fakamālohi ʻaupito. (Ngāue 8:3) Neongo ia naʻá ne hoko ʻo ʻiloʻi ʻoku ʻi ai ʻa e founga lelei ke moʻui ai: ko e tauhi ki he ʻOtuá mo fai hono lelei tahá ke faʻifaʻitaki kia Sīsū. ʻI heʻeku fakalaulauloto ki he faʻifaʻitakiʻanga ʻa Paulá, naʻá ku ʻiloʻi ai ko e ngāue totongi leleí mo e fakamālohí ʻoku ʻikai ko e kī ia ki he fiefiá. Naʻá ku tuipau kapau naʻe lava ʻa Paula ʻo liliu, te u lava pē mo au. Ko ia ai, naʻá ku fakapapauʻi ke nofo ʻi ʻIngilani pea ʻikai toe feinga ki ha tuʻunga māʻolunga ʻi he ako laó.

Ko e lahi ange ʻeku ʻilo fekauʻaki mo Sihová, ko e lahi ange ia ʻeku ongoʻi ofi kiate iá. Naʻe maongo kiate au ʻene talaʻofa ke fakamolemoleʻi e faʻahinga ʻoku nau loto-moʻoni ke fai ha ngaahi liliú. (Ngāue 2:​38) ʻI heʻeku fakalaulauloto ki he 1 Sione 4:​16, ʻa ia ʻoku pehē ai “Ko e ʻOtuá ko e ʻofa,” naʻá ku mahinoʻi ʻa e ʻuhinga ʻoku fehiʻa ai ʻa Sihova ʻi he fakamālohí.

Naʻe toe maongo kiate au ʻa e ʻulungaanga ʻo e Kau Fakamoʻoní. Naʻe hā mahino kiate au ʻenau feinga ke moʻuiʻaki ʻa e ngaahi tuʻunga māʻolunga fakaeʻulungaanga Fakatohitapú. Naʻá ku loto ke hoko ko ha konga ʻi he fetokouaʻaki fiefia ʻoku nau maʻú. Hili ha ngaahi fāinga mo e fakatonutonu ʻi heʻeku moʻuí, naʻá ku papitaiso ko e taha ʻo e Kau Fakamoʻoni ʻa Sihová ʻi he 2008.

Naʻe liliu au ʻe he Tohi Tapú mei he feinga vivili ki ha tuʻunga māʻolungá, fakamālohí, ngāuekoviʻaki ʻa e faitoʻo konga tapú, inu tōtuʻá mo e manako tōtuʻa ʻi he soká, ki ha sevāniti ʻa e ʻOtuá ʻoku fiefia ʻi hono akoʻi ʻa e niʻihi kehé ʻo fekauʻaki mo e Tohi Tapú. ʻOku ou kei saiʻia pē ʻi he mamata soká, ka ʻoku ou fakapapauʻi ke ʻai ʻa e fakafiefia ko iá ki hono tuʻunga totonú.

ʻI he taimí ni ʻoku ou fiefia ʻi he mali mo Esther ko ha fefine fakaʻofoʻofa ko ha kaungālotu ʻa Sihova. ʻOkú ma maʻu ʻa e fiefia moʻoni ʻi hono akoʻi ʻa e Tohi Tapú ki he kakai lea faka-Pōlani ʻi he tokelau hihifo ʻo ʻIngilaní. Ko e fuofua taimi eni, ke u toki maʻu ai ʻa e fiemālie moʻoní. ʻOku ou maʻu ha konisēnisi maʻa mo kakato mo ha moʻui mohu ʻuhinga.