ʻAisea 19:1-25
19 Ko ha fanongonongo ki ʻIsipite:+
Vakai! ʻOku heka ʻa Sihova ʻi ha konga ʻao ʻoku vave ʻene ʻalú pea ʻokú ne hāʻele atu ki ʻIsipite.
Ko e ngaahi ʻotua taʻeʻaonga ʻo ʻIsipité te nau tete ʻi hono ʻaó,+Pea ʻe vai ʻa e loto ʻo e kau ʻIsipité.
2 “Te u fakaʻaiʻai ʻa e kau ʻIsipité ke nau tuʻu pē ki he kau ʻIsipité,Pea te nau fetauʻaki,ʻA e tokotaha taki taha mo hono tokoua pea mo hono kaungāʻapi,ʻA e kolo mo e kolo, ʻa e puleʻanga mo e puleʻanga.
3 Pea ʻe hoko ʻo puputuʻu ʻa ʻIsipite,Pea te u fakafehālaakiʻi ʻa ʻene ngaahi palaní.+
Te nau hanga ki he ngaahi ʻotua taʻeʻaongá,Ki he kau faifakalouʻakaú pea ki he kau taula faʻahikehé pea ki he kau tala meʻa ki he kahaʻú.+
4 Te u tuku atu ʻa ʻIsipite ki ha tokotaha pule fefeka,Pea ʻe pule kiate kinautolu ha tuʻi anga-kakaha,”+ ko e fanongonongo ia ʻa e ʻEiki moʻoní, ʻa Sihova ʻo e ngaahi kau tau.
5 Ko e vai ʻo e vaitafé ʻe maha,Pea ʻe hoko ʻa e vaitafé ʻo pakukā mo mātuʻu.+
6 Pea ʻe nanamu ʻa e ngaahi vaitafé;Ko e ngaahi mangaʻivai ʻo Naila ʻo ʻIsipité ʻe maha hifo pea pakukā.
Ko e ʻulu kahó mo e kutá ʻe palapalangia.+
7 Ko e fanga kiʻi ʻakau ʻi he veʻe Vaitafe Nailá, ʻi he ngutu vai ʻo Nailá,Mo e kelekele kotoa kuo tūtuuʻi ai ʻa e tenga ʻi he veʻe Nailá+ ʻe mōmoa.+
ʻE puhiʻi ia, pea ʻe ʻikai ke toe ʻi ai.
8 Pea ʻe mamahi ʻa e kau tangata toutaí,Ko kinautolu ʻoku lī ʻenau mātaʻú ki Nailá te nau tangilāulau,Pea ʻe holo ʻo tokosiʻi ʻa kinautolu ʻoku lī ʻenau kupengá ki he vaí.
9 Ko kinautolu ʻoku nau ngāueʻaki ʻa e falakesi kuo haʻaló+Pea mo kinautolu ʻoku nau ngaohi ʻa e tupenu hina ʻi he meʻa lalangá ʻe fakamaaʻi.
10 ʻE ongoʻi lōmekina ʻa ʻene kau lalangá;ʻE mamahi ʻa e kau ngāue totongí kotoa.
11 Ko e kau houʻeiki ʻo Soaní+ ko e kau vale.
Ko e kau faleʻi poto taha ʻa Feló ʻoku nau ʻomi ha faleʻi taʻeʻuhinga.+
ʻE lava fēfē ke mou pehē kia Felo:
“Ko ha hako au ʻo e faʻahinga ʻoku poto,Ko ha hako ʻo e ngaahi tuʻi ʻo e kuonga muʻá”?
12 Ko feʻia leva hoʻo kau tangata potó?+
Tuku ke nau tala atu pe ʻoku nau ʻiloʻi ʻa e meʻa kuo fakapapauʻi ʻe Sihova ʻo e ngaahi kau taú ke fai ki ʻIsipité.
13 Ko e kau houʻeiki ʻo Soaní kuo nau fai ʻa e tōʻonga fakavalevale;Ko e kau houʻeiki ʻo Nofí*+ kuo kākaaʻi;Ko e ngaahi ʻeiki ʻo e ngaahi matakali ʻo ʻIsipité kuo nau takiheeʻi ʻa ʻIsipite.
14 Kuo ʻai ia ʻe Sihova ke ne puputuʻu;+Pea kuo nau takiheeʻi ʻa ʻIsipite ʻi ha meʻa pē ʻokú ne fai,ʻO hangē ha tokotaha konā ʻoku sīfā holo ʻi heʻene luá.
15 Pea ʻe ʻikai ke ʻi ai ha ngāue ʻa ʻIsipite ke fai,Pe ko e ʻulú pe ko e hikú, ʻa e hulí pe ko e kutá.*
16 ʻI he ʻaho ko iá ʻe hoko ai ʻa ʻIsipite ʻo hangē ha kau fefiné, ʻo tetetete mo manavahē koeʻuhí ko e hiki ʻe Sihova ʻo e ngaahi kau taú ʻa hono nima fakamanamaná kiate iá.+
17 Pea ko e fonua ʻo Siutá ʻe hoko ko e manavahēʻanga ʻo ʻIsipite. Te nau ongoʻi tailiili ʻi he fai ha lave ki ai koeʻuhí ko e tuʻutuʻuni kuo fai kiate kinautolu ʻe Sihova ʻo e ngaahi kau taú.+
18 ʻI he ʻaho ko iá ʻe ʻi ai ʻa e kolo ʻe nima ʻi he fonua ko ʻIsipité te nau leaʻaki ʻa e lea ʻa Kēnaní+ pea nau fai ha fakapapau ke nau mateaki kia Sihova ʻo e ngaahi kau tau. Ko e kolo ʻe taha ʻe ui ia Ko e Kolo ʻo e Holoki Hifo.
19 ʻI he ʻaho ko iá ʻe ʻi ai ha ʻōlita kia Sihova ʻi he lotolotonga ʻo e fonua ko ʻIsipité mo ha fuʻu pou kia Sihova ʻi hono kauʻaá.
20 ʻE hoko ia ko ha fakaʻilonga mo ha fakamoʻoni kia Sihova ʻo e ngaahi kau taú ʻi he fonua ko ʻIsipité; he te nau tangi kia Sihova koeʻuhí ko e kau fakafeʻātungiá, pea te ne tuku mai kiate kinautolu ha faifakahaofi, ko ha tokotaha lahi, ʻa ia te ne fakahaofi kinautolu.
21 Pea ʻe hoko ʻa Sihova ʻo ʻiloa ki he kau ʻIsipité, pea ʻe ʻiloʻi ʻe he kau ʻIsipité ʻa Sihova ʻi he ʻaho ko iá, pea te nau ʻoatu ha ngaahi feilaulau mo ha ngaahi meʻaʻofa pea fai mo ha fuakava kia Sihova pea fakahoko ia.
22 ʻE taaʻi ʻe Sihova ʻa ʻIsipite,+ ʻo ne taaʻi pea fakamoʻui ia; pea te nau foki kia Sihova, pea te ne fai ha tali ki heʻenau ngaahi kolé ʻo ne fakamoʻui kinautolu.
23 ʻI he ʻaho ko iá ʻe ʻi ai ha hala lahi+ mei ʻIsipite ki ʻAsīlia. Pea ʻe hū atu ʻa ʻAsīlia ki ʻIsipite, pea mo ʻIsipite ki ʻAsīlia, pea ʻe tauhi ʻa ʻIsipite ki he ʻOtuá fakataha mo ʻAsīlia.
24 ʻI he ʻaho ko iá ʻe hoko ʻa ʻIsileli ʻo toko tolu ʻaki ʻa ʻIsipite mo ʻAsīlia,+ ko ha tāpuaki ʻi he lotolotonga ʻo e māmaní,
25 he ʻe tāpuakiʻi ia ʻe Sihova ʻo e ngaahi kau tau, ʻo ne pehē: “Ke faitāpuekina ʻa hoku kakaí, ʻa ʻIsipite, pea mo e ngāue ʻa hoku nimá, ʻa ʻAsīlia, pea mo hoku tofiʻá, ʻa ʻIsileli.”+
