ʻAisea 30:1-33
30 “ʻOiauē ʻa e ngaahi foha anga-fefeká,”+ ko e fanongonongo ia ʻa Sihová,“ʻA ia ʻoku nau fakahoko ʻa e ngaahi palani ʻoku ʻikai ʻaʻaku,+ʻA ia ʻoku nau fai ʻa e ngaahi aleapau,* kae ʻikai ʻi hoku laumālié,Koeʻuhi ke tānaki atu ʻa e angahala ki he funga ʻo e angahala.
2 ʻOku nau ʻalu hifo ki ʻIsipite+ ʻo ʻikai te nau fakahā mai kiate au,*+Ke fakamalumalu ʻi he maluʻi ʻa* FelóPea ke kumi hūfanga ki he malu ʻo ʻIsipité!
3 Ka ko e maluʻi ʻa Feló ʻe hoko ia ko homou māʻanga,Pea ko e hūfanga ʻi he malu ʻo ʻIsipité ʻe hoko ai ha ngalivale.+
4 He ko ʻene kau houʻeikí ʻoku nau ʻi Soani,+Pea ko ʻene kau talafekaú kuo nau aʻu ki Hānesi.
5 ʻE fakamaaʻi kotoa kinautoluʻE ha kakai ʻa ia ʻoku ʻikai te nau ʻaonga kiate kinautolu,ʻA ia ʻoku ʻikai te nau fai ha tokoni pea ʻikai hanau ʻaonga,Ko e fakamā pē mo e ngalivale.”+
6 Ko ha fanongonongo ki he fanga manu ʻo e tongá:
ʻI he fou atu ʻi he fonua ʻo e mamahi mo e faingataʻa,ʻO e laione, ʻa e laione ngungulu,ʻO e ngata huhu kona mo e ngata huhu vela ʻoku puna,*ʻOku ʻave atu ai ʻe he kau talafekaú ʻenau koloá ʻi he tuʻa ʻo e fanga ʻasíPea mo ʻenau ngaʻotoʻotá ʻi he tuʻa ʻo e fanga kāmelí.
Ka ʻe ʻikai ʻaonga ʻa e ngaahi meʻá ni ki he kakaí.
7 He ko e tokoni ʻa ʻIsipité ʻoku taʻeʻaonga fakaʻaufuli.+
Ko ia kuó u ui ai ia: “Ko Lēhapi,+ ʻokú ne tangutu maʻu.”
8 “Ko ia, ʻalu ʻo tohi ia ʻi ha lauʻimaka ke nau sio ki ai,Pea hiki ia ʻi ha tohi,+Koeʻuhi ke tauhi ia ki ha ʻaho ʻi he kahaʻúKo ha fakamoʻoni tuʻuloa.+
9 He ko ha kakai angatuʻu kinautolu,+ ko e ngaahi foha kākā,+Ko e ngaahi foha ʻoku ʻikai te nau loto-lelei ke fanongo ki he lao* ʻa Sihová.+
10 ʻOku nau pehē ki he kau matalōloá, ‘ʻOua te mou sio,’
Pea ki he kau mata vīsoné, ‘ʻOua ʻe tala mai kiate kimautolu ha ngaahi vīsone moʻoni.+
Fai mai kiate kimautolu ha ngaahi talanoa fakahekeheke;* vīsone mai ʻaki ha ngaahi ʻataʻi meʻa kākā.+
11 Tafoki mei he hala totonú; afe mei he ʻalungá.
ʻAi ke ʻoua te mau toe fanongo ki he Tokotaha Māʻoniʻoni ʻo ʻIsilelí.’”+
12 Ko ia ko e meʻa eni ʻoku folofolaʻaki ʻe he Tokotaha Māʻoniʻoni ʻo ʻIsilelí:
“Koeʻuhi ko hoʻomou talitekeʻi ʻa e leá ni+Pea mou falala ki he kākaá pea mo e loíʻO mou falala ki he ongo meʻá ni,+
13 Ko ia ʻe hoko ʻa e faihalá ni kiate kimoutolu ʻo hangē ha ʻā maumaú,Hangē ha konga ʻā māʻolunga mafaʻaua ʻoku meimei holó.
ʻE holofa fakafokifā ia, ʻi ha foʻi kemo pē.
14 ʻE maumau ia hangē ha fuʻu siā ʻa ha tokotaha tufunga-ʻumeá,ʻOku mātuʻaki mafahifahi ʻo ʻikai hano konga ʻe toeKe heu ʻaki ʻa e afi mei he tafuʻanga afíPe ke ohu ʻaki ha vai mei ha ano.”*
15 He ko e folofola eni ʻa e ʻEiki Hau ko Sihová, ʻa e Tokotaha Māʻoniʻoni ʻo ʻIsilelí:
“ʻI hoʻomou foki mai kiate au ʻo maʻu ha mālōloó, ʻe fakahaofi ai kimoutolu;Ko hoʻomou mālohí ʻe hoko ia ʻi hoʻomou hanganaki nonga mo fakahāhā ʻa e falalá.”+
Ka naʻe ʻikai te mou loto ki ai.+
16 ʻI hono kehé, naʻa mou pehē: “ʻIkai, te mau hola kimautolu ʻi ha fanga hoosi!”
Ko ia te mou hola.
“Pea te mau heka ʻi ha fanga hoosi veʻe-vave!”+
Ko ia ʻe veʻe-vave mo e faʻahinga te nau tuli kiate kimoutolú.+
17 ʻE tetetete ha toko taha afe ʻi he fakamanamana ʻa ha toko taha;+ʻI he fakamanamana ʻa ha toko nima te mou holaKae ʻoua kuo hangē ʻa e toe ʻiate kimoutolú ko ha foʻi pou ʻoku tuʻu ʻi he tumutumu ʻo ha moʻungá,Hangē ha fuʻu pou fakaʻilonga ʻi ha foʻi māʻolungá.+
18 Ka ʻoku tatali anga-kātaki* ʻa Sihova ke fakahaaʻi atu kiate kimoutolu ʻa e hōifuá,+Pea te ne tuʻu hake ke fakahaaʻi atu kiate kimoutolu ʻa e mēsí.+
He ko Sihová ko ha ʻOtua ʻo e fakamaau totonu.+
He fiefia ē ka ko e faʻahinga kotoa ʻoku hanganaki ʻamanaki* kiate iá.+
19 ʻI he taimi ʻe nofo ai ʻa e kakaí ʻi Saione, ʻi Selusalemá,+ heʻikai ʻaupito te ke tangi.+ Te ne fakahaaʻi moʻoni atu kiate koe ʻa e hōifuá ʻi he ongo mai ʻa hoʻo tangi ki ha tokoní; te ne fai atu ha tali kiate koe ʻi heʻene fanongo pē ki aí.+
20 Neongo ʻe ʻoatu ʻe Sihova kiate kimoutolu ʻa e mā ko e mamahí mo e vai ko e faingataʻá,+ ʻe ʻikai ke kei fufū ʻe ho Faiako Maʻongoʻongá ʻa ia tonu, pea te ke sio ki hoʻo Faiako Maʻongoʻongá+ ʻaki ho matá tonu.
21 Pea ʻe fanongo ʻa ho telingá tonu ki ha lea mei mui ʻiate koe ʻo pehē, “Ko eni ʻa e halá.+ ʻAlu ai,” kapau te mou ʻalu ki he toʻomataʻú pe te mou ʻalu ki he toʻohemá.+
22 Pea te mou ʻuliʻi ʻa e siliva kuo kofuʻaki ʻa hoʻo ngaahi ʻīmisi kuo tongí pea mo e koula kuo kofuʻaki ʻa hoʻo ngaahi ʻīmisi mētalé.*+ Te ke laku kinautolu ʻo hangē ha tupenu ʻoku tau ai ha puke fakamāhiná peá ke pehē kiate kinautolu, “Mou mole atu!”*+
23 Pea te ne ʻomi ʻa e ʻuha ki he tengaʻi ʻakau ʻokú ke tūtuuʻi ʻi he kelekelé,+ pea ko e mā ʻe fakatupu mai ʻe he kelekelé ʻe lahi fau mo fakatupu ivi.*+ ʻI he ʻaho ko iá ʻe kai mohuku ʻa hoʻo fanga manú ʻi ha ngaahi kaikaiʻanga ʻatāloa.+
24 Pea ko e fanga pulu mo e fanga ʻasi ʻa ia ʻoku nau ngāueʻi ʻa e kelekelé te nau kai ʻa e meʻakai lelei kuo fio, ʻa ia naʻe ʻauʻau ʻaki ʻa e sāvolo mo e ngaahi fuʻu huhu.
25 Pea ʻi he moʻunga māʻolunga kotoa pē mo e ngaahi foʻi māʻolunga kotoa pē ʻe ʻi ai ʻa e ngaahi vai mo e ngaahi tafengavai,+ ʻi he ʻaho ʻo e tāmate lahi ʻi he holo ʻa e ngaahi tauá.
26 Pea ko e maama ʻo e māhina kātoá ʻe hangē ko e maama ʻo e laʻaá; pea ko e maama ʻo e laʻaá ʻe liunga fitu ʻa hono mālohí,+ ʻo hangē ko e maama ʻo e ʻaho ʻe fitu, ʻi he ʻaho ʻe haʻihaʻi ai ʻe Sihova ʻa e kafo* ʻo hono kakaí+ pea faitoʻo ʻa e lavea lahi ʻoku hoko mei he tā naʻá ne faí.+
27 Vakai! Ko e huafa ʻo Sihová ʻoku haʻu mei he mamaʻó,ʻOku kakaha ʻa ʻene houhaú fakataha mo ha ngaahi konga ʻao mamafa.
Ko hono loungutú ʻoku fonu ʻi he tuputāmakí,Pea ko hono ʻeleló ʻoku hangē ha afi faifakaʻauhá.+
28 Ko hono laumālié* ʻoku hangē ha vai ʻoku tafe mālohi mai ʻo aʻu hake ki he kiá,Ke luluʻi ʻa e ngaahi puleʻangá ʻi ha meʻa-sivi ʻo e fakaʻauhá;*Pea ko e ngaahi kakaí ʻe fakapiti honau kaungaó+ ʻa ia ʻe takiheeʻi ai kinautolu.
29 Ka ko hoʻomou hivá ʻe hangē ko e hiva ʻoku fai ʻi he poʻulíʻI hoʻo teuteu* ki ha kātoanga,+Pea ʻe fiefia ho lotó ʻo hangē ko ha tahaʻOku ʻalu atu ki he ifi* ʻo ha fulutaʻI heʻene fononga ki he moʻunga ʻo Sihová, ki he Makatuʻu ʻo ʻIsilelí.+
30 ʻE ʻai ʻe Sihova ke fanongoa ʻa hono leʻo fakangeingeiá+Pea fakaeʻa atu ʻa e ʻalu hifo ʻa hono nimá+ ʻi he kakaha ʻo ʻene houhaú,+Fakataha mo e uloʻi afi ʻo ha afi faifakaʻauha,+Mo e haʻulu fakafokifā ʻa ha fuʻu lōvai+ mo ha afā ʻoku mana mo ʻuhila pea mo e ʻuha-ʻaisi.+
31 He koeʻuhi ko e leʻo ʻo Sihová, ʻe taaʻi ai ʻa ʻAsīlia ʻaki ʻa e manavahē;+Te ne taaʻi ia ʻaki ha tokotoko.+
32 Pea ko e foʻi hapo kotoa pē ʻa hono tokotoko faitauteáʻA ia ʻe fakahoko hifo ʻe Sihova ki ʻAsīliáʻE haʻu fakataha ia mo e tā nafa mo e tā haʻape+ʻI heʻene ofa atu hono nimá kiate kinautolu ʻi he taú.+
33 He ko ʻene Tōfetí*+ kuo ʻosi mateuteu;Kuo mateuteu foki ia ki he tuʻí.+
Kuó ne ʻai ʻa e fokotuʻunga fefié ke loloto mo fālahi,Fakataha mo ha afi mo ha fefie lahi fau.
Ko e mānava ʻa Sihová, ʻi he hangē ko e matua mai ʻa ha sūlifá,Te ne tutuʻi ia.
Fakamatala ‘i Lalo
^ Fakafoʻilea, “huaʻi atu ha inu ko ha feilaulau,” ʻo hā mahino ko e ʻuhinga iá ki hano fai ha aleapau.
^ Fakafoʻilea, “ʻi he maluʻanga ʻo.”
^ Pe “ʻikai fai mai ha fehuʻi ki haʻaku lau.”
^ Pe “mo e ngata huhu kona ʻoku vave ʻene ʻoho atú.”
^ Pe “fakahinohino.”
^ Fakafoʻilea, “momole-ʻolunga.”
^ Pe ngalingali, “mei ha lepa.”
^ Pe “hanganaki ʻamanaki.”
^ Pe “tatali vēkeveke.”
^ Pe “ngaahi ʻīmisi mētale kuo haká.”
^ Pe ngalingali, “pea lau kinautolu ʻoku nau palakū.”
^ Fakafoʻilea, “ngako mo lolololo.”
^ Pe “fasi.”
^ Fakafoʻilea, “meʻa-sivi ʻo e meʻa ʻoku taʻeʻaongá.”
^ Pe “Ko ʻene mānavá.”
^ Pe “fakamāʻoniʻoniʻi koe.”
^ Pe “ki he ongo mai.”
^ Ko “Tōfetí” ʻoku ngāueʻaki ia heni ko ha feituʻu tutuʻanga meʻa fakaefakatātā, ʻo ne fakafofongaʻi ʻa e fakaʻauha.
