ʻAisea 49:1-26
49 Fanongo mai kiate au, ʻa kimoutolu ʻa e ngaahi motú,Pea tokanga mai, ʻa kimoutolu ʻa e ngaahi puleʻanga mamaʻó.+
Kuo ui au ʻe Sihova ki muʻa ʻi hoku fanauʻí.*+
Mei he taimi naʻá ku ʻi he manava ai ʻo ʻeku faʻeé naʻá ne leaʻaki ʻa hoku hingoá.
2 Naʻá ne ngaohi ʻa hoku ngutú ke hangē ha heletā māsilá;Kuó ne fufū au ʻi he malu ʻo hono nimá.+
Naʻá ne ngaohi au ko ha foʻi ngahau kuo fakamata;Naʻá ne fufū au ʻi heʻene faʻoʻanga ngahaú.
3 Naʻá ne folofola mai kiate au: “Ko koe ʻa ʻeku sevānití, ʻe ʻIsileli,+ʻA ia te u fakahā ai ʻa hoku lāngilangí.”+
4 Ka naʻá ku pehē: “Kuo taʻeʻaonga ʻa ʻeku fakaongosiá.
Naʻe mole noa mo kulanoa ʻa hoku iví.
Ka ko hono moʻoní ʻoku ʻia Sihova ʻa hoku fakamāuʻí,*Pea ko ʻeku totongí* ʻoku ʻi hoku ʻOtuá.”+
5 Pea ko eni ko Sihova, ʻa e Tokotaha naʻá ne ngaohi au ʻi manava ko ʻene sevānití,Kuó ne folofola mai ke u fakafoki kiate ia ʻa Sēkope,Koeʻuhí ke fakatahataha kiate ia ʻa ʻIsileli.+
ʻE fakalāngilangiʻi au ʻi he ʻao ʻo Sihová,Pea ko hoku ʻOtuá te ne hoko ko hoku mālohinga.
6 Pea naʻá ne folofola: “ʻOku ʻikai feʻunga ʻa hoʻo hoko ko ʻeku sevānitiKe toe fokotuʻu ʻa e ngaahi matakali ʻo SēkopéPea ke fakafoki mai ʻa e faʻahinga ʻo ʻIsileli naʻe fakahaofí.
Kuó u toe tuku atu koe ke ke hoko ko ha maama ki he ngaahi puleʻangá,+Koeʻuhí ke aʻu ʻa ʻeku fakamoʻuí ki he ngaahi ngataʻanga ʻo e māmaní.”+
7 Ko e folofola eni ʻa Sihova, ko e Tokotaha-Huhuʻi ʻo ʻIsilelí, ko ʻene Tokotaha Māʻoniʻoní,+ ki he tokotaha kuo taʻetokaʻí,+ ki he tokotaha ʻoku fehiʻanekinaʻi ʻe he puleʻangá, ki he sevāniti ʻa e kau pulé:
“ʻE sio ʻa e ngaahi tuʻí pea te nau tuʻu hake,Pea ʻe punou ʻa e houʻeikíKoeʻuhí ko Sihova, ʻa ia ʻoku faitōnungá,+ʻA e Tokotaha Māʻoniʻoni ʻo ʻIsilelí, ʻa ia kuó ne fili koé.”+
8 Ko e folofola eni ʻa Sihová:
“ʻI ha taimi fakahōifua naʻá ku fai ha tali kiate koe,+Pea ʻi ha ʻaho ʻo e fakamoʻuí naʻá ku tokoniʻi koe;+Naʻá ku hanganaki maluʻi koe ke tuku atu koe ko ha fuakava ki he kakaí,+Ke toe fakafoʻou ʻa e fonuá,Ke ʻai kinautolu ke nau maʻu ʻa honau ngaahi tofiʻa kuo lalá,+
9 Ke lea ki he kau pōpulá, ‘Mou hū mai ki tuʻa!’+
Pea ki he faʻahinga ʻi he fakapoʻulí,+ ‘Mou omi!’
Te nau kai ʻi he ngaahi halá ʻo hangē ha fanga sipí,ʻI he ngaahi hala kotoa kuo lahi hono ʻaluʻí* ʻe ʻi ai honau ngaahi kaikaiʻangá.
10 Heʻikai te nau fiekaia, pea heʻikai te nau fieinua,+Pe taaʻi kinautolu ʻe he ʻafu vevelá pe ko e laʻaá.+
He ko e Tokotaha ʻoku meesi kiate kinautolú te ne taki kinautolu,+Pea te ne tataki kinautolu ʻi ha ngaahi veʻe vai.+
11 Te u ngaohi ʻa hoku ngaahi moʻungá kotoa ke hoko ko ha hala,Pea ke tanu ke mahiki hake ʻa hoku ngaahi hala lalahí.+
12 Vakai! ʻOku haʻu ʻa e faʻahingá ni mei he mamaʻó,+Pea vakai, ko e faʻahingá ni ʻoku mei he tokelaú pea mo e hihifó,Pea ko e faʻahingá ni ko ʻenau haʻu mei he fonua ko Sinimí.”+
13 Kaila ʻi he fiefia, ʻa kimoutolu ʻa e ngaahi langí, pea mavava, ʻa koe ʻa e māmaní.+
Tuku ke tomeʻe ʻa e ngaahi moʻungá ʻi ha kaila fiefia.+
He ko Sihova kuó ne fakafiemālieʻi ʻa hono kakaí,+Pea ʻokú ne fakahāhā ʻa e meesi ki he faʻahinga ʻaʻana kuo faingataʻaʻiá.+
14 Ka naʻe toutou pehē ʻe Saione:
“Kuo liʻaki au ʻe Sihova,+ pea kuo fakangaloʻi au ʻe Sihova.”+
15 ʻE malava koā ke ngalo ʻi ha fefine ʻa ʻene tama kei huhúPe ʻikai koā ke ne manavaʻofa ki he tama ʻo hono manavá?
Neongo kapau ʻe ngalo ʻi he kau fefiné, ʻe ʻikai ʻaupito te ke ngalo ʻiate au.+
16 Vakai! Kuó u tongi ho hingoá ʻi hoku ʻaofinimá.
Ko ho ngaahi ʻaá ʻoku ʻi hoku ʻaó maʻu ai pē.
17 Ko ho ngaahi fohá ʻoku nau haʻu fakavave.
Ko e faʻahinga naʻa nau holoki mo fakaʻauha koé te nau mavahe meiate koe.
18 Hanga hake ho matá ʻo sio takai holo.
ʻOku nau fakatahataha kotoa mai.+
ʻOku nau haʻu kiate koe.
“ʻOku ou fuakava ʻiate au,”* ko e fanongonongo ia ʻa Sihová,“Te ke fakateunga ʻaki koe ʻa kinautolu kotoa ʻo hangē ha meʻa-teuteú,Pea te ke nonoʻo kinautolu kiate koe ʻo hangē ko ia ʻoku fai ʻe ha taʻahine malí.
19 Neongo ko ho ngaahi feituʻú naʻe ʻauha mo maomaonganoa pea maumau ho fonuá,+Ko eni ʻe hoko ia ʻo fuʻu ʻefiʻefi ki he faʻahinga ʻoku nofo aí,+Pea ko e faʻahinga naʻa nau folofua koé+ te nau ʻi he mamaʻó.+
20 Ko e ngaahi foha naʻe fanauʻi hili ʻa e mole ʻa hoʻo fānaú te nau lea ʻo ke fanongo ki ai,‘ʻOku fuʻu ʻefiʻefi ʻa e feituʻú ni kiate au.
Fakaʻataʻatā ha feituʻu moʻoku ke u nofo ai ʻi heni.’+
21 Pea te ke pehē ʻi ho lotó,‘Ko hai ʻa e tamai kuó ne tokangaʻi ʻa kinautolú ni maʻakú,He ko aú ko ha fefine naʻe mole ʻeku fānaú peá u paʻa,Naʻe ʻave fakamālohi mo taki pōpula?
Ko hai naʻá ne tauhi hake ʻa kinautolú ni?+
Vakai! Naʻe liʻaki toko taha pē au,+Ko ia ko e haʻu mei fē ʻa kinautolú ni?’”+
22 Ko e folofola eni ʻa e ʻEiki Hau ko Sihová:
“Vakai! Te u hiki hake ʻa hoku nimá ki he ngaahi puleʻangá,Pea te u hiki hake ʻa ʻeku fakaʻilongá* ki he ngaahi kakaí.+
Te nau fua mai ʻa ho ngaahi fohá ʻi honau nimá*Mo fafa mai ho ngaahi ʻofefiné ʻi honau umá.+
23 Ko e ngaahi tuʻí te nau hoko ko ho kau tauhi,+Pea ko ʻenau kau pilinisesí te nau hoko ko ho kau fefine tauhi.
Te nau punou kiate koe mo hanga honau matá ki he kelekelé+Pea ʻemo ʻa e efu ʻi ho vaʻé,+Pea te ke toki ʻilo ai ko au Sihova;Ko e faʻahinga ʻoku nau ʻamanaki kiate aú ʻe ʻikai ke fakamaaʻi.”+
24 ʻE lava koā ke ʻave ʻa e faʻahinga kuo puke pōpulá mei ha tangata toʻa,Pe ʻe lava koā ke fakahaofi ʻa e kau pōpula ʻa e tokotaha pule kakahá?
25 Ka ko e folofola eni ʻa Sihová:
“Naʻa mo e kau pōpula ʻa ha tangata toʻa ʻe ʻave kinautolu,+Pea ko e faʻahinga naʻe puke pōpula ʻe he tokotaha pule kakahá ʻe fakahaofi.+
Te u fakafepakiʻi ʻa e faʻahinga ʻoku nau fakafepakiʻi koé,+Pea te u fakahaofi ho ngaahi fohá.
26 Te u ʻai ʻa e faʻahinga ʻoku nau ngaohikoviʻi koé ke nau kai honau kakano ʻonautolú,Pea te nau hoko ʻo konā ʻi honau totó ʻo hangē ko e konā ʻi he uaine melié.
Pea ʻe toki ʻilo ai ʻe he kakai* kotoa pē ko Sihova au,+Ko ho Fakamoʻuí+ mo ho Tokotaha-Huhuʻí,+ʻA e Tokotaha Mālohi ʻo Sēkopé.”+
Fakamatala ‘i Lalo
^ Fakafoʻilea, “mei manava.”
^ Pe “ʻE fai mai ʻe Sihova ʻa e fakamaau totonu kiate au.”
^ Pe “ko hoku palé.”
^ Pe ngalingali, “ʻI he ngaahi foʻi māʻolunga tekeleí kotoa.”
^ Fakafoʻilea, “Hangē pē ko ʻeku moʻuí.”
^ Fakafoʻilea, “fatafatá.”
^ Pe “fuʻu pou fakaʻilongá.”
^ Fakafoʻilea, “kakano.”
