ʻIsikeli 10:1-22
10 ʻI he lolotonga ʻeku sió, naʻá ku mamata ki he funga faliki kilisitala naʻe ʻi ʻolunga ʻi he ʻulu ʻo e ngaahi selupimí ki ha meʻa hangē ha maka sāfaiá naʻe hā mai mei ʻolunga ʻiate kinautolu, pea ko hono fōtungá naʻe tatau ia mo ha taloni.+
2 Pea naʻá ne folofola ki he tangata naʻe kofu līnení:+ “Hū atu ki he vahaʻa ʻo e ngaahi veʻeteka viloviló,+ ʻi lalo ʻi he ngaahi selupimí, ʻo fakafonu ho ongo nimá ʻaki ha ngaahi malala uloulo+ mei he vahaʻa ʻo e ngaahi selupimí peá ke tupeʻi atu ia ki he koló.”+ Ko ia naʻá ne hū atu lolotonga ʻoku ou sio ki ai.
3 Naʻe tuʻu ʻa e ngaahi selupimí ki he tafaʻaki toʻomataʻu ʻo e falé ʻi he hū atu ʻa e tangatá, pea naʻe fonu ʻa e lotoʻā ʻi lotó ʻi he ʻao.
4 Pea naʻe ʻalu hake ʻa e lāngilangi ʻo Sihová+ mei he ngaahi selupimí ki he hūʻanga ʻo e matapā ʻo e falé, pea naʻe fonu māmālie ʻa e falé ʻi he ʻao,+ pea naʻe fonu ʻa e lotoʻaá ʻi he ngingila ʻo e lāngilangi ʻo Sihová.
5 Pea ko e ongo mai ʻa e ngaahi kapakau ʻo e ngaahi selupimí naʻe malava ke fanongo ki ai ʻi he lotoʻā ʻi tuʻá, naʻe hangē ko e ongo mai ʻa e leʻo ʻo e ʻOtua Māfimafi-Aoniú ʻi he taimi ʻokú ne tō folofola aí.+
6 Pea naʻá ne tuʻutuʻuni ki he tangata naʻe kofu līnení: “Toʻo ha afi mei he vahaʻa ʻo e ngaahi veʻeteka viloviló, mei he vahaʻa ʻo e ngaahi selupimí,” pea naʻá ne hū atu ʻo ne tuʻu ʻi he tafaʻaki ʻo e veʻeteká.
7 Pea ko e taha ʻo e ngaahi selupimí naʻá ne mafao atu hono nimá ki he afi naʻe ʻi he vahaʻa ʻo e ngaahi selupimí.+ Naʻá ne toʻo mai ha afi ʻo ne ʻai ia ki he ongo nima ʻo e tokotaha naʻe kofu līnení,+ ʻa ia naʻá ne toʻo leva ia ʻo ne ʻalu mo ia.
8 Naʻe maʻu ʻe he ngaahi selupimí ha meʻa hangē ko ha nima ʻo e tangata ʻi lalo ʻi honau ngaahi kapakaú.+
9 ʻI he lolotonga ʻeku sió, naʻá ku mamata ki he veʻeteka ʻe fā ʻi he tafaʻaki ʻo e ngaahi selupimí, ko e veʻeteka ʻe taha ʻi he tafaʻaki ʻo e selupimi taki taha, pea naʻe hā ngingila mai ʻa e ngaahi veʻeteká ʻo hangē ko e maka kalisolaité.+
10 Ko e anga ʻo ʻenau hā maí, naʻe tatau pē ʻa e ngaahi veʻeteka ko eni ʻe faá, ko ʻenau hā maí naʻe hangē ha veʻeteka ʻoku ʻi loto ʻi ha veʻeteká.
11 ʻI he taimi naʻa nau ngaʻunu aí, naʻe lava ke nau ʻalu ki ha taha pē ʻo e ngaahi tafaʻaki ʻe faá ʻo ʻikai tafoki, koeʻuhi naʻa nau ʻalu ki he feituʻu naʻe hanga ki ai ʻa e ʻulu ʻo e ngaahi selupimí* ʻo ʻikai tafoki.
12 Ko honau sinó fakakātoa, ʻa honau tuʻá, mo honau nimá, mo honau kapakaú, pea mo e ngaahi veʻeteká, ʻa e ngaahi veʻeteka ʻa e toko fā kotoa ko kinautolú, naʻe fonu takatakai kotoa ʻi he ngaahi foʻi mata.+
13 ʻI he fekauʻaki mo e ngaahi veʻeteká, naʻá ku fanongo ki ha leʻo naʻe ui kiate kinautolu, “Ngaahi veʻeteka vilovilo, mou ngaʻunu atu!”
14 Naʻe maʻu ʻe he toko taha taki taha* ʻa e mata ʻe fā. Ko e ʻuluaki matá ko e mata ʻo e selupimi, ko e mata hono uá ko e mata ʻo ha tangata,* ko hono tolú ko e mata ʻo ha laione, pea ko hono faá ko e mata ʻo ha ʻīkale.+
15 Pea naʻe ʻalu hake ʻa e ngaahi selupimí—ko e ngaahi meʻamoʻui* tatau pē ia naʻá ku mamata ki ai ʻi he vaitafe ko Kipá+—
16 pea ʻi he taimi naʻe ngaʻunu ai ʻa e ngaahi selupimí, naʻe ngaʻunu fakataha mo kinautolu ʻa e ngaahi veʻeteká ʻi honau tafaʻakí; pea ʻi he taimi naʻe hiki hake ai ki ʻolunga ʻe he ngaahi selupimí honau ngaahi kapakaú ke nau mahiki hake mei he kelekelé, naʻe ʻikai tafoki pe mavahe mei honau tafaʻakí ʻa e ngaahi veʻeteká.+
17 ʻI he taimi naʻa nau tuʻu maʻu aí, naʻe tuʻu maʻu mo e ngaahi veʻeteká; pea ʻi he taimi naʻa nau mahiki hake aí, naʻe mahiki fakataha hake mo kinautolu ʻa e ngaahi veʻeteká, he ko e laumālie naʻe ngāue ʻi he ngaahi meʻamoʻuí* naʻe ʻi he ngaahi veʻeteká.
18 Naʻe mavahe leva ʻa e lāngilangi ʻo Sihová+ mei ʻolunga mei he hūʻanga ʻo e matapā ʻo e falé ʻo tuʻu maʻu ʻi ʻolunga ʻi he ngaahi selupimí.+
19 Naʻe hiki hake leva ʻe he ngaahi selupimí honau kapakaú pea nau mahiki hake mei he kelekelé ʻi he lolotonga ʻeku sió. Naʻe ʻi honau tafaʻakí foki ʻa e ngaahi veʻeteká ʻi heʻenau mavahe atú. Naʻa nau tuʻu ʻi he hūʻanga ʻo e matapā fakahahake ʻo e fale ʻo Sihová, pea naʻe ʻi ʻolunga ʻiate kinautolu+ ʻa e lāngilangi ʻo e ʻOtua ʻo ʻIsilelí.
20 Ko e ngaahi meʻamoʻui* eni naʻá ku sio ki ai ʻi lalo ʻi he taloni ʻo e ʻOtua ʻo ʻIsilelí ʻi he vaitafe ko Kipá,+ ko ia naʻá ku ʻilo ai ko e ngaahi selupimi kinautolu.
21 Ko e kotoa ʻo e toko faá ni naʻa nau maʻu ʻa e mata ʻe fā, mo e kapakau ʻe fā, pea mo e meʻa naʻe hā mai ko e nima ʻo e tangata ʻi lalo ʻi honau kapakaú.+
22 Pea ko e fōtunga ʻo honau ngaahi matá naʻe hangē ko e ngaahi mata ko ia naʻá ku sio ki ai ʻi he veʻe vaitafe ko Kipá.+ Naʻa nau taki taha ʻalu hangatonu pē ki muʻa.+
Fakamatala ‘i Lalo
^ Fakafoʻilea, “ʻa e ʻulú.”
^ Pe “mata fakaetangata.”
^ ʻA ia, ko e selupimi taki taha.
^ Fakafoʻilea, “ko e meʻamoʻui.”
^ Fakafoʻilea, “ko e laumālie ʻo e meʻamoʻuí.”
^ Fakafoʻilea, “Ko e meʻamoʻui.”
