ʻIsikeli 12:1-28
12 Naʻe toe hoko mai ʻa e folofola ʻa Sihová kiate au, ʻo pehē:
2 “Foha ʻo e tangata, ʻokú ke nofo ʻi ha fale angatuʻu. ʻOku nau maʻu ha mata ke sio, ka ʻoku ʻikai te nau sio, mo ha telinga ke fanongo, ka ʻoku ʻikai te nau fanongo,+ koeʻuhi ko ha fale angatuʻu kinautolu.+
3 Ka ko koe, foha ʻo e tangata, teuteu ʻa hoʻo ngaʻotoʻotá ki ha ʻave fakamālohi. Pea ʻi he lolotonga ʻa e ʻahó lolotonga ʻenau sió, kuo pau ke ke ʻalu atu ʻo hangē ko hano ʻave fakamālohi koé. ʻAlu atu mei ho ʻapí ki ha feituʻu ʻe taha ʻo hangē ko hano ʻave fakamālohi koe lolotonga ʻenau sio maí. Heiʻilo te nau fakakaukau ki he ʻuhinga ʻo e meʻá ni, neongo ko ha fale angatuʻu kinautolu.
4 Toʻo mai hoʻo ngaʻotoʻota naʻe faʻo ki he ʻave fakamālohí ʻi he lolotonga ʻa e ʻahó pea lolotonga ʻa ʻenau sió, pea ʻi he efiafí lolotonga ʻenau sio maí, te ke mavahe atu ʻo hangē ko ha tokotaha kuo ʻave fakamālohí.+
5 “Lolotonga ʻenau sio maí, ʻai ha ava ʻi he holisí, peá ke fua ʻa hoʻo ngaʻotoʻotá ʻo ke hū atu ai.+
6 Lolotonga ʻenau sio maí, ʻai ʻa hoʻo ngaʻotoʻotá ʻi ho umá pea fua atu ia ʻi he fakapoʻulí. ʻUfiʻufi ho matá ke ʻoua te ke lava ʻo sio ki he kelekelé, he ʻoku ou ʻai koe ko ha fakaʻilonga ki he fale ʻo ʻIsilelí.”+
7 Naʻá ku fai ʻa e meʻa tofu pē ko ia naʻe tuʻutuʻuni mai kiate aú. Lolotonga ʻa e ʻahó naʻá ku toʻo mai ʻeku ngaʻotoʻotá ʻo hangē ko ha ngaʻotoʻota ki ha ʻave fakamālohí, pea ʻi heʻene efiafí naʻá ku avangi ʻaki hoku nimá ha ava ʻi he holisí. Pea ʻi heʻene poʻulí, naʻá ku toʻo ʻa ʻeku ngaʻotoʻotá, ʻo fua ia ʻi hoku umá ʻi muʻa pē ʻi honau ʻaó.
8 Naʻe toe hoko mai ʻa e folofola ʻa Sihová kiate au ʻi he pongipongi haké, ʻo pehē:
9 “Foha ʻo e tangata, naʻe ʻikai koā ke ʻeke atu kiate koe ʻe he fale ʻo ʻIsilelí, ʻa e fale angatuʻú, ‘Ko e hā ʻa e meʻa ʻokú ke faí?’
10 Fakahā kiate kinautolu, ‘Ko e meʻa eni ʻoku folofolaʻaki ʻe he ʻEiki Hau ko Sihová: “Ko e fanongonongo eni ʻoku fekauʻaki mo e houʻeiki+ ʻi Selusalemá pea mo e kotoa ʻo e fale ʻo ʻIsileli ʻoku ʻi he koló.”’
11 “Ke ke lea ʻo pehē, ‘Ko ha fakaʻilonga au kiate kimoutolu.+ Hangē pē ko e meʻa kuó u faí, ʻe pehē pē ʻa e meʻa ʻe fai kiate kinautolú. ʻE ʻave fakamālohi kinautolu, ʻo taki pōpula.+
12 Ko e houʻeiki ʻoku ʻi honau lotolotongá te ne fua ʻa ʻene ngaʻotoʻotá ʻi hono umá ʻo ne mavahe atu ʻi he fakapoʻulí. Te ne ʻai ha ava ʻi he ʻaá peá ne fua ʻene ngaʻotoʻotá ʻo hū atu ai.+ Te ne ʻufiʻufi hono matá koeʻuhí ke ʻoua te ne lava ʻo sio ki he kelekelé.’
13 Te u lī atu ʻeku kupengá kiate ia, pea ʻe maʻu ia ʻi heʻeku kupenga tulimanú.+ Te u ʻomi leva ia ki Pāpilone ki he fonua ʻo e kau Kalitiá, ka heʻikai te ne sio ki ai; pea te ne mate ai.+
14 Pea ko e kotoa ʻo e faʻahinga takatakai kiate iá, ʻa hono kau tokoní mo ʻene kau taú, te u fakamovetevete kinautolu ʻi he tapa kotoa pē;+ pea te u unuhi hake ha heletā ke tulimui kiate kinautolu.+
15 Pea ʻi he taimi te u ʻai ke nau mafola atu ai ʻi he lotolotonga ʻo e ngaahi puleʻangá mo fakamovetevete kinautolu ʻi he lotolotonga ʻo e ngaahi fonuá, kuo pau ke nau ʻilo ai ko Sihova au.
16 Ka te u fakahaofi ha tokosiʻi ʻo kinautolu mei he heletaá, mo e hongé, mo e mahaki fakaʻauhá, koeʻuhi ke nau fakamatala nai ʻo fekauʻaki mo ʻenau ngaahi tōʻonga fakalieliá kotoa ʻi he lotolotonga ʻo e ngaahi puleʻanga ʻa ia te nau ʻalu atu ki aí; pea kuo pau ke nau ʻilo ko Sihova au.”
17 Pea naʻe toe hoko mai kiate au ʻa e folofola ʻa Sihová, ʻo pehē:
18 “Foha ʻo e tangata, te ke kai hoʻo maá ʻi he tetetete pea inu hoʻo vaí ʻi he puputuʻu mo e loto-hohaʻa.+
19 Lea ki he kakai ʻo e fonuá, ‘Ko e folofola eni ʻa e ʻEiki Hau ko Sihová ki he kakai ʻo Selusalema ʻi he fonua ko ʻIsilelí: “Te nau kai ʻenau maá ʻi he loto-hohaʻa pea inu ʻenau vaí ʻi he manavahē, he ko honau fonuá ʻe hoko ʻo mātuʻaki maomaonganoa+ koeʻuhi ko e fakamālohi ʻa e faʻahinga kotoa ʻoku nofo ʻi aí.+
20 Ko e ngaahi kolo nofoʻí ʻe liʻaki, pea ʻe hoko ʻa e fonuá ko ha potu lala;+ pea kuo pau ke mou ʻilo ko Sihova au.”’”+
21 Pea naʻe toe hoko mai kiate au ʻa e folofola ʻa Sihová, ʻo pehē:
22 “Foha ʻo e tangata, ko e hā ʻa e lea manuki ko eni ʻa kimoutolu ʻi ʻIsileli ʻa ia ʻoku pehē, ‘ʻOku ʻosi atu ʻa e ngaahi ʻahó, pea ʻoku ʻikai ke fakahoko ʻa e vīsone kotoa pē’?+
23 Ko ia ai, lea kiate kinautolu, ‘Ko e folofola eni ʻa e ʻEiki Hau ko Sihová: “Te u ʻai ke ngata ʻa e leá ni, pea heʻikai te nau toe ngāueʻaki ia ko ha lea manuki ʻi ʻIsileli.”’ Ka ke tala kiate kinautolu, ‘ʻOku ofi mai ʻa e ngaahi ʻaho,+ pea ʻe fakahoko ai ʻa e vīsone kotoa pē.’
24 Koeʻuhí heʻikai ke toe ʻi ai ha vīsone loi pe ko ha vavalo fakahekeheke* ʻi he fale ʻo ʻIsilelí.+
25 ‘“He ko au Sihova te u leá. ʻIlonga ha lea te u leaʻaki ʻe fakahoko ia ʻo ʻikai toe toloi.+ ʻA e fale angatuʻu, ʻi homou ngaahi ʻahó,+ te u fai ha lea pea fakahoko ia,” ko e fakahaaʻi ia ʻe he ʻEiki Hau ko Sihová.’”
26 Naʻe toe hoko mai ʻa e folofola ʻa Sihová kiate au, ʻo pehē:
27 “Foha ʻo e tangata, ko e meʻa eni ʻoku leaʻaki ʻe he kakai* ʻo ʻIsilelí, ‘Ko e vīsone ʻokú ne sio ki aí ko ha meʻa ia ʻoku mamaʻo mei he taimí ni, pea ʻokú ne kikite ʻo fekauʻaki mo ha meʻa ʻi he kahaʻu mamaʻó.’+
28 Ko ia ai, ke ke lea kiate kinautolu, ‘Ko e meʻa eni ʻoku folofolaʻaki ʻe he ʻEiki Hau ko Sihová: “‘ʻE ʻikai toloi ha taha ʻo ʻeku ngaahi leá; ʻilonga ha meʻa ʻoku ou leaʻaki ʻe fakahoko ia,’ ko e fakahaaʻi ia ʻe he ʻEiki Hau ko Sihová.”’”
