ʻIsikeli 30:1-26
30 Pea naʻe toe hoko mai ʻa e folofola ʻa Sihová kiate au, ʻo pehē:
2 “Foha ʻo e tangata, ke ke kikite ʻo pehē, ‘Ko e meʻa eni ʻoku folofolaʻaki ʻe he ʻEiki Hau ko Sihová:
“Mou tangilāulau, ‘ʻOiauē, ʻoku hoko mai ʻa e ʻahó!’
3 He ʻoku ofi mai ʻa e ʻahó, ʻio, ʻoku ofi mai+ ha ʻaho ʻo Sihova.
ʻE ʻaoʻaofia+ ʻa e ʻaho ko iá, ko ha taimi kotofa ki he ngaahi puleʻangá.+
4 ʻE hoko mai ha heletā ki ʻIsipite, pea ʻe maʻu ʻe he tailiilí ʻa ʻItiopea ʻi he tō ʻa e faʻahinga kuo tāmateʻi ʻi ʻIsipité;ʻOku ʻave ʻa ʻene koloá pea ʻoku holoki ʻa hono ngaahi fakavaʻé.+
5 Ko ʻItiopea,+ Puti,+ Luti, mo e kakai kehekehe kotoa pē,*Mo Kupi, fakataha mo e ngaahi foha ʻo e fonua ʻo e fuakavá,*Te nau tō kotoa ʻi he heletaá.”’
6 Ko e meʻa eni ʻoku folofolaʻaki ʻe Sihová:
‘ʻE tō foki mo e kau poupou ʻo ʻIsipité,Pea ʻe ʻohifo ʻa e mālohi ʻokú ne pōlepole aí.’+
“‘Te nau tō ʻi he heletā ʻi he fonuá mei Mikitoli+ ki Suene,’+ ko e fakahaaʻi ia ʻe he ʻEiki Hau ko Sihová.
7 ‘ʻE ʻai kinautolu ko e fonua maomaonganoa taha ia ʻi he ngaahi fonuá, pea ʻe hoko hono ngaahi koló ko e ngaahi kolo maomaonganoa tahá ia.+
8 Pea kuo pau ke nau ʻilo ko Sihova au ʻi heʻeku ʻai ha afi ki ʻIsipite pea laiki ʻa kinautolu kotoa ʻoku kau mo iá.
9 ʻI he ʻaho ko iá te u fekauʻi atu ha kau talafekau ʻi ha ngaahi vaka ke ʻai ʻa ʻItiopea ʻoku falala pē kiate iá ke ne tetetete; ʻe maʻu kinautolu ʻe he tailiilí ʻi he ʻaho ʻa ia ʻe hoko mai ki ʻIsipité, he kuo pau ke hoko mai ia.’
10 “Ko e meʻa eni ʻoku folofolaʻaki ʻe he ʻEiki Hau ko Sihová: ‘Te u ʻomi ha ngataʻanga ki he fuʻu kakai tokolahi ʻo ʻIsipité fakafou ʻi he nima ʻo Tuʻi Nepukanesa* ʻo Pāpiloné.+
11 Ko ia mo ʻene kau taú, ʻa e kau anga-fakamamahi taha ʻi he ngaahi puleʻangá,+ ʻe ʻomai ke nau fakaʻauha ʻa e fonuá. Te nau unuhi ʻenau ngaahi heletaá ki ʻIsipite pea fakafonu ʻa e fonuá ʻaki ʻa e faʻahinga kuo tāmateʻí.+
12 Te u ʻai ʻa e ngaahi mangaʻivai ʻo Nailá+ ke hoko ko ha kelekele mōmoa pea ʻe fakatau atu ʻa e fonuá ki he nima ʻo ha kau tangata fulikivanu. Te u ʻai ʻa e fonuá mo e meʻa kotoa ʻoku ʻi aí ke maomaonganoa fakafou ʻi he nima ʻo ha kau muli.+ Ko au, Sihova tonu, kuó u leá.’
13 “Ko e meʻa eni ʻoku folofolaʻaki ʻe he ʻEiki Hau ko Sihová: ‘Te u fakaʻauha foki ʻa e ngaahi ʻaitoli fakalieliá* pea ʻomi ha ngataʻanga ki he ngaahi ʻotua taʻeʻaonga ʻo Nofí.*+ Heʻikai ke toe ʻi ai ha houʻeiki* mei he fonua ko ʻIsipité, pea te u ʻai ke manavahē ʻa e fonua ko ʻIsipité.+
14 Te u ʻai ke maomaonganoa ʻa Patalosi+ pea tuku atu ha afi ki Soani mo fakahoko ha fakamaau ki Nō.*+
15 Te u huaʻi atu ʻa ʻeku ʻitá ki Sini, ʻa e kolo malu ʻo ʻIsipité, pea te u fakaʻauha ʻa e kakai ʻo Noó.
16 Te u tuku atu ha afi ki ʻIsipite; pea ʻe tofanga ʻa Sini ʻi he manavahē pea ʻe fai ha hū fakamālohi ki Nō pea ʻe fehangahangai ʻa Nofi* mo hano ʻohofi ʻi he hoʻatā mālié!
17 Ko e kau talavou ʻo ʻOni* mo Pīpesetí te nau tō ʻi he heletā, pea ʻe taki pōpula ʻa e ongo koló ni.
18 ʻE hoko ʻa e ʻahó ʻo fakapoʻuli ʻi Tapanesa ʻi he taimi te u fesiʻi ai ʻi ai ʻa e ngaahi ʻioke ʻa ʻIsipité.+ ʻE hoko ʻo ngata+ ʻa hono mālohi ʻokú ne pōlepole aí, ʻe ʻufiʻufi ia ʻe ha ngaahi ʻao, pea ʻe taki pōpula ʻa hono ngaahi koló.+
19 Te u fakahoko ʻa e fakamaau ki ʻIsipite, pea kuo pau ke nau ʻilo ko Sihova au.’”
20 Pea ʻi he taʻu hono 11, ʻi he ʻuluaki māhiná, ʻi he ʻaho hono fitu ʻo e māhiná, naʻe hoko mai ai kiate au ʻa e folofola ʻa Sihová, ʻo pehē:
21 “‘Foha ʻo e tangata, kuó u fesiʻi ʻa e nima ʻo Felo ko e tuʻi ʻo ʻIsipité; ʻe ʻikai ke haʻihaʻi ia ke moʻui pe takatakaiʻi ʻaki ha konga tupenu ke hoko ʻo mālohi feʻunga ke ne toʻo ʻa e heletaá.”
22 “Ko ia ai, ko e meʻa eni ʻoku folofolaʻaki ʻe he ʻEiki Hau ko Sihová: ‘Ko au eni te u fai ha meʻa kia Felo ko e tuʻi ʻo ʻIsipité,+ pea te u fesiʻi hono ongo nimá, ʻa e nima mālohí mo ia kuo mafesí,+ pea te u ʻai ke tō ʻa e heletaá mei hono nimá.+
23 Pea te u fakamovetevete ʻa e kau ʻIsipité ki he lotolotonga ʻo e ngaahi puleʻangá pea ʻai ke nau mafola atu ki he lotolotonga ʻo e ngaahi fonuá.+
24 Te u fakaivimālohiʻi ʻa e nima* ʻo e tuʻi ʻo Pāpiloné+ pea ʻai ʻa ʻeku heletaá ki hono nimá,+ pea te u fesiʻi ʻa e nima ʻo Feló, pea te ne toʻe leʻo-lahi ʻo hangē ha tangata ʻoku meimei mate ʻi hono ʻaó.*
25 Te u fakaivimālohiʻi ʻa e nima ʻo e tuʻi ʻo Pāpiloné, ka ko e nima ʻo Feló ʻe tāupe; pea kuo pau ke nau ʻilo ko Sihova au ʻi heʻeku ʻai ʻa ʻeku heletaá ki he nima ʻo e tuʻi ʻo Pāpiloné pea ʻokú ne hiki ia ki he fonua ko ʻIsipité.+
26 Pea te u fakamovetevete ʻa e kau ʻIsipité ki he lotolotonga ʻo e ngaahi puleʻangá pea ʻai ke nau mafola atu ki he lotolotonga ʻo e ngaahi fonuá,+ pea kuo pau ke nau ʻilo ko Sihova au.’”
Fakamatala ‘i Lalo
^ Pe “ʻoange ʻa e mālohi ki he fale ʻo ʻIsilelí.”
^ Pe “faʻahinga kotoa mei he ngaahi puleʻanga kehé.”
^ Ko ha lave nai ki he kau ʻIsileli ʻa ia naʻa nau kau mo ʻIsipité.
^ Pe “Memifisí.”
^ Ko e foʻi lea faka-Hepeluú naʻe felāveʻi nai ia mo ha foʻi lea ki he “kinohaʻá” pea ʻoku ngāueʻaki ia ko ha fakahaaʻi ʻo e taʻetokaʻi.
^ Fakafoʻilea, “Nepukalesa,” ko hano sipela ia ʻe taha.
^ Pe “ʻeiki.”
^ ʻA ia, ko Tēpesi.
^ Pe “Memifisi.”
^ ʻA ia, ko Heliopolisi.
^ Pe “fakalahi ʻa e mafai.”
