ʻIsikeli 37:1-28
37 Naʻe ʻiate au ʻa e nima ʻo Sihová, pea naʻe ʻave au ʻe Sihova fakafou ʻi hono laumālié ʻo ne tuku hifo au ʻi he loto teleʻa lautoká,+ pea naʻe fonu ia ʻi he ngaahi huí.
2 Naʻá ne ʻai au ke u ʻalu takai holo ai, pea naʻá ku sio naʻe lahi ʻaupito ʻa e ngaahi hui naʻe tākoto ʻi he teleʻa lautoká ni, pea naʻa nau mōmoa ʻaupito.+
3 Naʻá ne ʻeke mai kiate au: “Foha ʻo e tangata, ʻe lava ke toe moʻui ʻa e ngaahi huí ni?” ʻI he meʻá ni naʻá ku pehē ange: “ʻEiki Hau Sihova, ko koe ʻa e tokotaha ʻokú ke ʻafioʻí.”+
4 Ko ia naʻá ne pehē mai kiate au: “Fai ha kikite ʻo fekauʻaki mo e ngaahi huí ni, peá ke pehē kiate kinautolu, ‘Ko kimoutolu ngaahi hui mōmoa, mou fanongo ki he folofola ʻa Sihová:
5 “‘Ko e folofola eni ʻa e ʻEiki Hau ko Sihová ki he ngaahi huí ni: “Te u ʻai ke hū atu ha mānava kiate kimoutolu, pea te mou toe moʻui.+
6 Te u ʻai ha ngaahi uoua mo ha kakano kiate kimoutolu, pea te u kofuʻaki kimoutolu ha kili pea ʻai ha mānava kiate kimoutolu, pea te mou toe moʻui; pea kuo pau ke mou ʻilo ko Sihova au.”’”
7 Naʻá ku fai leva ha kikite ʻo hangē ko ia naʻe tuʻutuʻuni mai kiate aú. ʻI heʻeku fai pē ʻa e kikité, naʻe ongo mai ha longoaʻa, ko ha ongo ʻo e ngahaha, pea naʻe kamata ke fakatahataha ʻa e ngaahi huí, ʻa e hui ki he hui.
8 Pea naʻá ku sio naʻe ʻiate kinautolu ha ngaahi uoua mo ha kakano, pea kofu kinautolu ʻe ha kili. Ka naʻe teʻeki ai ke ʻi ai ha mānava ʻiate kinautolu.
9 Naʻá ne folofola mai leva kiate au: “Fai ha kikite ki he matangí. Fai ha kikite, foha ʻo e tangata, ʻo ke pehē ki he matangí, ‘Ko e folofola eni ʻa e ʻEiki Hau ko Sihová: “ʻE matangi,* haʻu mei he ngaahi matangi ʻe faá, ʻo ke angi ki he kakai ko eni naʻe tāmateʻí, koeʻuhi ke nau lava ʻo toe moʻui.”’”
10 Ko ia naʻá ku fai ha kikite ʻo hangē ko ia naʻá ne tuʻutuʻuni mai kiate aú, pea naʻe hū ʻa e mānavá* kiate kinautolu, pea naʻe kamata ke nau moʻui ʻo nau tuʻu hake,+ ko ha fuʻu kau tau mātuʻaki tokolahi.
11 Naʻá ne folofola mai leva kiate au: “Foha ʻo e tangata, ko e ngaahi huí ni ko e fale fakakātoa ia ʻo ʻIsilelí.+ Ko eni ʻoku nau pehē, ‘ʻOku mōmoa hotau ngaahi huí, pea kuo mole atu ʻetau ʻamanakí.+ Kuo tuʻusi ʻosi kitautolu.’
12 Ko ia fai ha kikite peá ke pehē kiate kinautolu, ‘Ko e folofola eni ʻa e ʻEiki Hau ko Sihová: “Te u fakaava homou ngaahi faʻitoká+ pea fokotuʻu hake kimoutolu mei homou ngaahi faʻitoká, ʻe hoku kakai, pea ʻomai kimoutolu ki he fonua ko ʻIsilelí.+
13 Pea kuo pau ke mou ʻilo ko Sihova au ʻi heʻeku fakaava homou ngaahi faʻitoká pea ʻi heʻeku fokotuʻu mai kimoutolu mei homou ngaahi faʻitoká, ʻe hoku kakai.”’+
14 ‘Te u ʻai hoku laumālié kiate kimoutolu pea te mou toe moʻui,+ pea te u ʻai kimoutolu ke mou nofo ʻi homou fonuá; pea kuo pau ke mou ʻilo ko au Sihova tonu, kuó u leá pea kuó u fai ia,’ ko e fakahaaʻi ia ʻe Sihová.”
15 Naʻe toe hoko mai ʻa e folofola ʻa Sihová kiate au, ʻo pehē:
16 “Pea ko koe, foha ʻo e tangata, toʻo ha vaʻakau pea tohi ai, ‘Ki Siuta pea ki he kakai ʻo ʻIsileli ʻoku kau mo iá.’*+ Pea toe toʻo mo ha vaʻakau ʻe taha pea tohi ai, ‘Ko e vaʻakau kia Siosifa ʻokú ne fakafofongaʻi ʻa ʻIfalemi, pea mo e kotoa ʻo e fale ʻo ʻIsileli ʻoku kau mo iá.’*+
17 Pea ʻomi kinaua ʻo fakatahaʻi ke na hoko ko e vaʻakau pē ʻe taha ʻi ho nimá.+
18 ʻI he taimi ʻe pehē atu ai ʻe ho kakaí* kiate koe, ‘Heʻikai koā te ke tala mai kiate kimautolu ʻa e meʻa ʻoku ʻuhinga ki ai ʻa e ngaahi meʻá ni?’
19 Tala kiate kinautolu, ‘Ko e folofola eni ʻa e ʻEiki Hau ko Sihová: “Te u toʻo ʻa e vaʻakau kia Siosifá, ʻa ia ʻoku ʻi he nima ʻo ʻIfalemí, pea mo e ngaahi matakali ʻo ʻIsileli ʻoku ʻiate iá, pea te u fakatahaʻi kinautolu ki he vaʻakau ki Siutá; pea te u ʻai kinaua ko e vaʻakau pē ʻe taha,+ pea te na hoko ʻo taha pē ʻi hoku nimá.”’
20 Ko e ongo vaʻakau ʻokú ke tohi aí ʻoku totonu ke ʻi ho nimá ke nau sio ki ai.
21 “Pea tala ange kiate kinautolu, ‘Ko e folofola eni ʻa e ʻEiki Hau ko Sihová: “Te u toʻo ʻa e kau ʻIsilelí mei he lotolotonga ʻo e ngaahi puleʻanga kuo nau ʻalu atu ki aí, pea te u tānaki fakataha mai kinautolu mei he tapa kotoa pē ʻo ʻomi kinautolu ki honau fonuá.+
22 Te u ʻai kinautolu ko e puleʻanga pē ʻe taha ʻi he fonuá,+ ʻi he ngaahi moʻunga ʻo ʻIsilelí, pea ko e tuʻi pē ʻe taha ʻe pule ki he kotoa ʻo kinautolú,+ pea heʻikai te nau kei hoko ko ha kakai ʻe ua; pea heʻikai ke kei vahevahe kinautolu ki ha puleʻanga ʻe ua.+
23 Heʻikai te nau kei ʻuliʻi kinautolu ʻaki ʻenau ngaahi ʻaitoli fakalieliá* mo ʻenau ngaahi tōʻonga fakalieliá pea mo e kotoa ʻo ʻenau ngaahi laka halá.+ Te u fakahaofi kinautolu mei he kotoa ʻo ʻenau taʻefaitōnunga ʻa ia kuo nau faiangahala aí, pea te u fakamaʻa kinautolu. Te nau hoko ko hoku kakai, pea ko au tonu te u hoko ko honau ʻOtua.+
24 “‘“ʻE hoko ʻa ʻeku sevāniti ko Tēvitá ko honau tuʻi,+ pea te nau maʻu kotoa ha tauhi pē ʻe taha.+ Te nau ʻaʻeva ʻi heʻeku ngaahi tuʻutuʻuni fakaefakamāú mo mātuʻaki tauhi ʻa ʻeku ngaahi tuʻutuʻuní.+
25 Te nau nofo ʻi he fonua naʻá ku foaki ki heʻeku sevānití, kia Sēkope, ʻa ē naʻe nofo ai hoʻomou fanga kuí,+ pea te nau nofo ai ʻo taʻengata,+ ʻa kinautolu mo ʻenau fānaú* pea mo e fānau ʻenau fānaú;+ pea ʻe hoko ʻa ʻeku sevāniti ko Tēvitá ko honau ʻeiki ʻo taʻengata.+
26 “‘“Pea te u fai ha fuakava ʻo e melino mo kinautolu;+ ʻe hoko ia ko ha fuakava taʻengata mo kinautolu. Te u fokotuʻu maʻu kinautolu pea ʻai kinautolu ke nau tokolahi+ pea te u fokotuʻu ʻa hoku temipalé ʻi honau lotolotongá ʻo taʻengata.
27 Ko hoku tēnití* ʻe ʻiate* kinautolu, pea te u hoko ko honau ʻOtua, pea te nau hoko ko hoku kakai.+
28 Pea kuo pau ke ʻilo ʻe he ngaahi puleʻangá ko au Sihova, ʻoku ou fakamāʻoniʻoniʻi ʻa ʻIsileli ʻi he tuʻu ʻa hoku temipalé ʻi honau lotolotongá ʻo taʻengata.”’”+
Fakamatala ‘i Lalo
^ Pe “mānava; laumālie.”
^ Pe “laumālié.”
^ Pe “ʻa ia ko hono ngaahi kaungāmeʻá.”
^ Pe “ʻa ia ko hono ngaahi kaungāmeʻá.”
^ Fakafoʻilea, “ʻe he ngaahi foha ʻo ho kakaí.”
^ Ko e foʻi lea faka-Hepeluú naʻe felāveʻi nai ia mo ha foʻi lea ki he “kinohaʻá” pea ʻoku ngāueʻaki ia ko ha fakahaaʻi ʻo e taʻetokaʻi.
^ Fakafoʻilea, “mo honau ngaahi fohá.”
^ Pe “nofoʻangá; ʻapí.”
^ Pe “fakamalumalu kiate.”
