ʻIsikeli 7:1-27
7 Naʻe toe hoko mai kiate au ʻa e folofola ʻa Sihová, ʻo pehē:
2 “Ko koe, foha ʻo e tangata, ko e folofola eni ʻa e ʻEiki Hau ko Sihová ki he fonua ko ʻIsilelí: ‘Ko ha ngataʻanga! Kuo hoko mai ʻa e ngataʻangá ki he tuliki ʻe fā ʻo e fonuá.
3 ʻOku hoko mai he taimí ni ʻa e ngataʻangá kiate koe, pea te u tuku ange atu ʻa ʻeku ʻitá kiate koe, pea te u fakamāuʻi koe ʻo fakatatau ki ho ngaahi ʻalungá pea kounaʻi koe ke ke fai ha fakamatala ki he kotoa ʻo hoʻo ngaahi ngāue fakalieliá.
4 ʻE ʻikai haʻaku mataʻi fakaʻofaʻia ʻiate koe; pea heʻikai haʻaku ongoʻi manavaʻofa,+ he te u ʻomi kiate koe ʻa e ngaahi ola ʻo ho ngaahi ʻalungá, pea te ke fuesia ʻa e ngaahi nunuʻa ʻo hoʻo ngaahi ngāue fakalieliá.+ Pea kuo pau ke mou ʻiloʻi ko Sihova au.’+
5 “Ko e folofola eni ʻa e ʻEiki Hau ko Sihová: ‘Vakai! ʻOku hoko mai ha fakatamaki, ko ha fakatamaki taʻehanotatau.+
6 ʻOku hoko mai ʻa e ngataʻangá; ʻe hoko mai ʻa e ngataʻangá; ʻe mālanga hake* ia kiate koe. Vakai! ʻOku hoko mai ia.
7 Kuo hoko mai ho taimí,* ʻa koe ʻokú ke nofo ʻi he fonuá. ʻOku haʻu ʻa e taimí, ʻoku ofi mai ʻa e ʻahó.+ ʻOku ʻi ai ha vālautuʻu, ʻo ʻikai ko ha kaila fiefia ʻi he ngaahi moʻungá.
8 “‘ʻOku vavé ni ke u huaʻi atu ʻa ʻeku ʻitá kiate koe,+ pea te u tuku ange kakato atu ʻa ʻeku tuputāmakí kiate koe,+ pea te u fakamāuʻi koe ʻo fakatatau ki ho ngaahi ʻalungá pea kounaʻi koe ke ke fai ha fakamatala ki he kotoa ʻo hoʻo ngaahi ngāue fakalieliá.
9 ʻE ʻikai haʻaku mataʻi fakaʻofaʻia; pea heʻikai haʻaku ongoʻi manavaʻofa.+ Te u ʻomi kiate koe ʻa e ngaahi ola ʻo ho ngaahi ʻalungá, pea te ke fuesia ʻa e ngaahi nunuʻa ʻo hoʻo ngaahi ngāue fakalieliá. Pea kuo pau ke mou ʻiloʻi ko au Sihova ʻoku ou taaʻi kimoutolú.+
10 “‘Vakai, ko e ʻahó ē! Vakai, ʻoku hoko mai!+ Kuo hoko mai ho taimí;* ko e vaʻakau tauteá ʻoku mateuteu mai ke u ngāueʻaki pea ko e pōlepole ʻa e filí kuo fakautuutu.
11 Kuo tupu ʻa e fakamālohí ʻo hoko ko ha vaʻakau tautea ʻo e fulikivanú.+ Ko kinautolu mo ʻenau koloá mo honau kakaí mo honau tuʻunga māʻolungá ʻe ʻikai hao.
12 ʻE hoko mai ʻa e taimí, ʻe aʻu mai ʻa e ʻahó. Tuku ki he tokotaha ʻoku fakatau maí ke ʻoua naʻá ne fiefia, pea tuku ki he tokotaha ʻoku fakatau atú ke ʻoua naʻá ne mamahi, he ʻoku ʻi ai ha houhau ki hona kakaí kotoa.*+
13 He ko e tokotaha ʻokú ne fai ʻa e fakatau atú ʻe ʻikai te ne foki ki he meʻa naʻe fakatau atú, neongo kapau te ne hao, he ʻoku fakahoko ʻa e vīsoné ki he fuʻu kakaí kotoa. ʻE ʻikai ke foki ha taha, pea ʻe ʻikai ha taha ʻe hao koeʻuhí ko ʻene faihalá.*
14 “‘Kuo nau ifi ʻa e talupité,+ pea ʻoku mateuteu ʻa e tokotaha kotoa, ka ʻoku ʻikai ke ʻalu atu ha taha ke faitau, koeʻuhi ʻoku hoko ʻa ʻeku tuputāmakí ki he fuʻu kakaí kotoa.+
15 ʻOku ʻi tuʻa ʻa e heletaá,+ pea ʻoku ʻi loto ʻa e mahaki fakaʻauhá mo e hongé. ʻIlonga ʻa ia ʻoku ʻi he vaó ʻe mate ʻi he heletaá, pea ko e faʻahinga ʻi koló ʻe keina ia ʻe he hongé mo e mahaki fakaʻauhá.+
16 Ko e niʻihi ʻo kinautolu ʻe lava ke haó te nau ʻalu atu ki he ngaahi moʻungá, pea ʻi he hangē ko e fanga lupe ʻo e teleʻá, ʻe tangi ʻa e tokotaha taki taha koeʻuhi ko ʻene faihalá.+
17 Ko honau nimá kotoa ʻe tāupe, pea ʻe tafe hifo ʻa e vai ʻi he kotoa ʻo honau tuí.*+
18 Kuo nau ʻai tauangaʻa,+ pea kuo maʻu* kinautolu ʻe he manavaheé. ʻE fakamaaʻi ʻa e tokotaha kotoa, pea ʻe tula ʻa e ʻulu kotoa pē.*+
19 “‘Te nau laku ʻenau silivá ki he halá, pea ko ʻenau koulá ʻe hoko ko e meʻa te nau fakaliliʻa ki ai. Heʻikai lava ʻe heʻenau silivá pe ko ʻenau koulá ʻo fakahaofi kinautolu ʻi he ʻaho ʻo e houhau kakaha ʻa Sihová.+ ʻE ʻikai te nau fiemālie, pea ʻe ʻikai ke mākona honau keté, he kuo hoko ʻa e meʻa ko iá* ko ha tūkiaʻanga ʻo tupu ai ʻenau faihalá.
20 Naʻa nau pōlepole ʻi he fakaʻofoʻofa ʻo ʻenau ngaahi meʻa-teuteú, pea naʻa nau ngaohiʻaki ia* ʻenau ngaahi ʻīmisi fakalieliá, ʻenau ngaahi ʻaitoli fakalieliá.+ Ko e ʻuhinga ia te u ʻai ai ia ko ha meʻa ke nau fakaliliʻa ki aí.
21 Te u tuku ia* ki he nima ʻo e kau mulí ke nau faʻao fakamālohi pea ki he kau fulikivanu ʻi he māmaní ko ha koloa vete,* pea te nau taʻetokaʻi ia.
22 “‘Te u hanga kehe meiate kinautolu,+ pea te nau taʻetokaʻi ʻa hoku feituʻu fufuú,* pea ʻe hū ki ai ʻa e kau kaihaʻá ʻo nau taʻetokaʻi ia.+
23 “‘Ngaohi ʻa e sēiní,*+ he ʻoku fonu ʻa e fonuá ʻi he fakamaau taʻetotonu+ ʻoku iku ki he fakapō pea ʻoku fonu ʻa e koló ʻi he fakamālohi.+
24 Te u ʻomi ʻa e kakai kovi taha ʻo e ngaahi puleʻangá,+ pea te nau maʻu honau ngaahi falé,+ pea te u fakangata ʻa e pōlepole ʻa e kau mālohí, pea ko honau feituʻu toputapú ʻe taʻetokaʻi.+
25 ʻI he hoko mai ʻa ʻenau mamahí, te nau kumi ki ha melino, ka ʻe ʻikai ke ʻi ai.+
26 ʻE ʻosi atu ʻa e fakatamaki pea hoko mai ʻa e fakatamaki, pea ʻe ʻosi atu ʻa e fakamatala pea haʻu ʻa e fakamatala, pea ʻe kumi ʻa e kakaí ki ha vīsone mei ha palōfita,+ ka ʻe mole ʻa e laó* mei he taulaʻeikí mo e faleʻí* mei he kau mātuʻá.+
27 ʻE fakamamahi ʻa e tuʻí,+ pea ʻe fakakofuʻaki ʻa e houʻeikí ʻa e siva ʻa e ʻamanakí,* pea ʻe tete ʻa e nima ʻo e kakai ʻo e fonuá ʻi he manavaheé. Te u fakafeangai kiate kinautolu ʻo fakatatau ki honau ngaahi ʻalungá, pea te u fakamāuʻi kinautolu ʻo hangē ko e fakamaau naʻa nau faí. Pea kuo pau ke nau ʻiloʻi ko Sihova au.’”+
Fakamatala ‘i Lalo
^ Fakafoʻilea, “ʻā hake.”
^ Pe ngalingali, “ʻa e pale-ʻulu matalaʻiʻakaú.”
^ Pe ngalingali, “ʻa e pale-ʻulu matalaʻiʻakaú.”
^ ʻA ia, heʻikai hano ʻaonga ki he faʻahinga ʻoku nau fakatau mai ha ʻapí pe ko e faʻahinga ʻoku nau fakatau atu iá, koeʻuhí ʻe hoko mai ʻa e fakaʻauhá kiate kinautolu kotoa.
^ Pe ngalingali, “fakafou ʻi heʻene faihalá.”
^ ʻA ia, mei he tuʻuofi koeʻuhi ko e ilifiá.
^ ʻA ia, ʻe tele honau ʻulú ʻi he fakamamahi.
^ Fakafoʻilea, “ʻufiʻufi.”
^ ʻA ia, ko ʻenau silivá mo ʻenau koulá.
^ ʻA ia, ko ʻenau ngaahi meʻa koulá mo silivá.
^ ʻA ia, ko ʻenau siliva mo e koula naʻe ngāueʻaki ki hono ngaohi ʻo e ngaahi ʻaitolí.
^ Sio ki he Lea mo Hono ʻUhinga.
^ ʻOku hā mahino ko e ʻuhingá ki he feituʻu taupotu taha ki loto ʻo e feituʻu toputapu ʻo Sihová.
^ ʻA ia, ko e sēini ki he kau pōpulá.
^ Pe “fakahinohinó.”
^ Pe “akonakí.”
^ Pe “ʻa e liʻekiná.”
